Kɔntinyu fɔ Gɛt Wanwɔd na di Kɔngrigeshɔn

We wi de wit wi brɔda ɛn sista dɛn, wi de fil lɛk Kiŋ Devid we bin se: “I gud ɛn i fayn fɔ si we brɔda dɛn de togɛda wit wanwɔd.” (Sam 133:​1) Di wanwɔd we wi gɛt nɔ kam bay chans. Wi ɔl nid fɔ du sɔntin fɔ lɛ wi gɛt da wanwɔd de.

1. Wetin spɛshal bɔt Gɔd in pipul dɛn?

If yu atɛnd kɔngrigeshɔn mitin na ɔda kɔntri, yu nɔ go ɔndastand di langwej fayn fayn wan, bɔt yu nɔ go fil lɛk strenja. Wetin mek? Na bikɔs wi de yuz di sem buk ɛn magazin dɛn fɔ stɔdi di Baybul ɔlsay na di wɔl. Ɛn wi de tray tranga wan fɔ sho se wi lɛk wi brɔda ɛn sista dɛn. Ilɛk usay wi de, wi ɔl de “kɔl Jiova in nem, fɔ lɛ wi gɛt wanwɔd we wi de sav am.”​—Zɛfanaya 3:​9, NWT.

2. Wetin yu go du fɔ mek wanwɔd de?

Di Baybul se: “Una fɔ rili lɛk una kɔmpin dɛn wit ɔl una at.” (1 Pita 1:​22) Aw yu go fala dis advays? Bifo yu pe atɛnshɔn pan ɔda pipul dɛn bad kwaliti dɛn, i go fayn fɔ luk fɔ dɛn gud kwaliti dɛn. Nɔ jɔs spɛn tɛm wit brɔda ɛn sista dɛn we yu ɛn dɛn lɛk di sem tin, bɔt tray fɔ no brɔda ɛn sista dɛn we difrɛn frɔm yu. Wi kin tray bak tranga wan fɔ lɛf fɔ tek wan pɔsin bɛtɛ pas ɔda pɔsin.​—Rid 1 Pita 2:​17.a

3. Wetin yu go du we yu gɛt cham-mɔt wit yu kɔmpin Kristian?

Wi gɛt wanwɔd, bɔt wi nɔ pafɛkt. Sɔntɛnde, wi kin disapɔynt wi brɔda ɔ sista dɛn ɔ ivin du sɔntin we mek dɛn fil bad. Na dat mek Gɔd in Wɔd tɛl wi se “Una kɔntinyu fɔ bia una kɔmpin dɛn ɛn fɔgiv dɛn,” dɔn i tɔk bak se: “Jɔs lɛk aw Jiova dɔn fɔgiv una fɔ fri, na di sem tin unasɛf fɔ du.” (Rid Koloshians 3:​13.) Wi kin mek Jiova vɛks bɔku tɛm, bɔt stil i de fɔgiv wi. So i de ɛkspɛkt wi fɔ fɔgiv wi brɔda dɛn. If yu notis se yu dɔn du sɔntin we mek pɔsin fil bad, yu fɔs fɔ du sɔntin fɔ sɔlv di prɔblɛm.​—Rid Matyu 5:​23, 24.b

LAN MƆ

4. Lɛf fɔ tek wan pɔsin bɛtɛ pas ɔda pɔsin

Wi want fɔ lɛk ɔl wi brɔda dɛn. Bɔt i nɔ kin izi fɔ lɛk pɔsin we difrɛn frɔm wi. Wetin go ɛp wi? Rid Akt 10:​34, 35, dɔn una tɔk bɔt dɛn kwɛstyɔn dɛn ya:

• Jiova de gri fɔ lɛ ɔlkayn pipul dɛn bi in Witnɛs dɛn. Aw dis fɔ afɛkt di we aw yu de si ɔda pipul dɛn we difrɛn frɔm yu?

• Aw pipul dɛn na yu eria de trit pipul dɛn we difrɛn we yu fɔ avɔyd?

Rid 2 Kɔrintians 6:​11-​13, dɔn una tɔk bɔt dis kwɛstyɔn:

• Aw yu tink se yu go kam nia yu brɔda ɛn sista dɛn we difrɛn frɔm yu?

5. Fɔgiv ɛn mek pis

Jiova de fɔgiv wi fɔ fri pan ɔl we i nɔ go ɛva nid wi fɔ fɔgiv am. Rid Sam 86:​5, dɔn una tɔk bɔt dɛn kwɛstyɔn dɛn ya:

• Aw Jiova de fɔgiv wi?

• Wetin mek yu gladi fɔ di fɔgiv we Jiova de fɔgiv wi?

• Wetin-ɛn-wetin kin mek i nɔ izi fɔ mek wi gɛt wanwɔd wit ɔda pipul dɛn?

Aw wi go falamakata Jiova ɛn kɔntinyu fɔ gɛt wanwɔd wit wi brɔda ɛn sista dɛn? Rid Prɔvabs 19:​11, dɔn una tɔk bɔt dis kwɛstyɔn:

• We sɔmbɔdi ɔfɛn yu ɔ du sɔntin we mek yu vɛks, wetin yu go du fɔ lɛ prɔblɛm nɔ de bitwin una?

Sɔntɛnde wi kin ɔfɛn ɔda pipul dɛn. Wetin wi fɔ du we dat apin? Ple di VIDIO, dɔn una tɔk bɔt di kwɛstyɔn we de dɔŋ.

VIDIO: Bɔku Blɛsin De fɔ di Wan dɛn we De Mek Pis (6:​01)

• Insay di vidio, wetin di sista du fɔ mek pis?

6. Luk fɔ di gud tin dɛn we yu brɔda ɛn sista dɛn de du

We wi kam nia wi brɔda ɛn sista dɛn, wi go ebul fɔ no di gud tin dɛn we dɛn ebul fɔ du ɛn di tin dɛn we dɛn nɔ ebul fɔ du. Aw wi go pe atɛnshɔn pan di gud tin dɛn we dɛn ebul fɔ du? Ple di VIDIO, dɔn una tɔk bɔt di kwɛstyɔn we de dɔŋ.

VIDIO: Tray fɔ Bi Nays Pɔsin! (5:​10)

• Wetin go ɛp wi fɔ si di gud kwaliti dɛn we wi brɔda ɛn sista dɛn gɛt?

Jiova de pe atɛnshɔn pan wi gud kwaliti dɛn. Rid Sɛkɛn Kronikul 16:​9a, dɔn una tɔk bɔt dis kwɛstyɔn:

• We yu no se Jiova de pe atɛnshɔn pan wi gud kwaliti dɛn, aw dat de mek yu fil?

WETIN YU DƆN LAN?

Yu kin ɛp fɔ lɛ wanwɔd de na di kɔngrigeshɔn bay we yu de fɔgiv ɛn sho lɔv to ɔl yu brɔda ɛn sista dɛn.

Rivyu

• Aw yu go lɛf fɔ tek wan pɔsin bɛtɛ pas ɔda pɔsin?

• Wetin yu go du if yu gɛt cham-mɔt wit yu kɔmpin Kristian?

• Wetin mek yu want fɔ falamakata Jiova in ɛgzampul fɔ fɔgiv ɔda pipul dɛn?

DU MƆ RISACH

Lan aw wan pan di ɛgzampul dɛn we Jizɔs bin tɔk bɔt kin ɛp wi fɔ lɛf fɔ jɔj ɔda pipul dɛn.

Pul di Big Bod (6:56)

Wi nid fɔ se sɔri if wi fil se wi nɔ du bad tin?

“Fɔ Se Sɔri, Na Fayn We fɔ Mek Pis” (Di Wachtawa, Novɛmba 1, 2002)

Si aw sɔm pipul dɛn dɔn lan se dɛn nɔ fɔ tek wan pɔsin bɛtɛ pas ɔda pɔsin.

Nɔ Jɔj Bay Wetin Yu De Si (5:06)

Lan aw yu go sɔlv di cham-mɔt we yu gɛt wit pɔsin bifo i kɔz prɔblɛm na di kɔngrigeshɔn.

“Sho Lɔv We Yu De Sɛtul Dɛn Af-Af Cham-Mɔt Dɛn” (Di Wachtawa, Me 2016)