A Want fɔ Kil Misɛf—Di Baybul Go Ɛp Mi We A De Tink fɔ Kil Misɛf?
Di Baybul in ansa
Yɛs! Di Baybul kɔmɔt frɔm “Gɔd, we de kɔrej di wan dɛn we gɛt pwɛlat.” (2 Kɔrintians 7:6) Pan ɔl we di Baybul nɔto buk fɔ pipul dɛn we gɛt ed prɔblɛm, i dɔn ɛp bɔku pipul dɛn we de tink fɔ kil dɛnsɛf fɔ lɛf fɔ tink da we de. I gɛt fayn advays we go ɛp yusɛf.
Us fayn advays di Baybul gi?
● Tɔk bɔt aw yu de fil.
Wetin di Baybul se? “Gud padi de sho lɔv ɔltɛm, ɛn in na brɔda we dɛn bɔn fɔ di tɛm dɛn we prɔblɛm kin de.”—Prɔvabs 17:17, NWT.
Wetin dis min? Wi nid pipul dɛn fɔ sɔpɔt wi we wi de tink bɔt sɔntin we de mɔna wi.
If yu nɔ tɛl ɔda pipul dɛn aw yu de fil, di bad we aw yu de fil go mɔna yu pasmak. Bɔt if yu tɛl ɔda pipul dɛn aw yu de fil, i go mek yu fil bɛtɛ ɛn yu go ivin tink di rayt we bɔt wetin de apin to yu.
Tray dis: Tɔk to pɔsin tide, i kin bi pɔsin na yu famili ɔ padi we yu trɔst.a Yu kin ivin rayt di we aw yu de fil.
● Go si dɔktɔ.
Wetin di Baybul se? “Pipul dɛn we gɛt wɛlbɔdi nɔ nid dɔktɔ, bɔt di wan dɛn we sik nid dɔktɔ.”—Matyu 9:12.
Wetin dis min? Wi fɔ go ɔspitul we wi sik.
If yu de tink fɔ kil yusɛf na sayn we de sho se yu maynd ɔ di we aw yu de fil nɔ oke. Wi nɔ kin shem we wi sik, semweso wi nɔ fɔ shem if wi de fil dis kayn we. Yu go ebul fɔ gɛt tritmɛnt if yu maynd ɛn di we aw yu de fil nɔ oke.
Try this: Nɔ westɛm fɔ go to dɔktɔ we kwalifay fɔ mek i ɛp yu.
● Mɛmba se Gɔd bisin bɔt yu.
Wetin di Baybul se? “Dɛn de sɛl fayv sparo dɛn fɔ tu kɔyn we nɔ gɛt bɛtɛ valyu, nɔto so? Stil, Gɔd nɔ de fɔgɛt ɛniwan pan dɛn. . . . Una nɔ fred, una valyu pas bɔku sparo dɛn.”—Lyuk 12:6, 7.
Wetin dis min? Yu valyu to Gɔd.
Sɔntɛm yu go de fil se nɔbɔdi nɔ bisin bɔt yu, bɔt Gɔd de si wetin yu de go tru. I bisin bɔt yu ilɛksɛf yu de fil se yu nɔ want fɔ liv igen. Sam 34:18 se “PAPA GƆD [“Jiova,”NWT] de nia ɔl udat fil se i dɔn dɔn fɔ am ɛn de ɛp udat fil se bɛtɛ nɔ de fɔ am igen. Gɔd want yu fɔ liv bikɔs i lɛk yu.
Tray dis: Rid bɔt sɔm tin dɛn na di Baybul we de sho se Gɔd lɛk yu. Fɔ ɛgzampul, rid chapta 24 na di buk we nem Kam Nia Jiova we go ɛp yu fɔ ɔndastand di Baybul.
● Pre to Gɔd.
Wetin di Baybul se? “Put ɔl wetin de wɔri [yu] na [Gɔd] in an, bikɔs i bisin bɔt yu.”—1 Pita 5:7.
Wetin dis min? Gɔd want mek yu tɛl am aw yu rili de fil ɛn wetin de mek yu wɔri.
Gɔd go mek yu gɛt pis ɛn trɛnk fɔ kɔntinyu fɔ bia wetin de apin to yu. (Filipians 4:6, 7, 13) I de du dat fɔ sɔpɔt di wan dɛn we de pre to am fɔ ɛp.—Sam 55:22.
Tray dis: Pre to Gɔd tide. Yuz in nem we na Jiova, ɛn tɛl am bɔt aw yu de fil. (Sam 83:18, NWT) Beg am fɔ mek i ɛp yu fɔ kɔntinyu fɔ gɛt trɛnk fɔ bia.
● Tink gud wan bɔt di Baybul in op fɔ tumara bambay.
Wetin di Baybul se? “Dis op we wi gɛt tan lɛk ankɔ fɔ wi layf we de ɛp wi fɔ tinap tranga wan ɛn nɔ gɛt wan dawt.”—Ibruz 6:19.
Wetin dis min? I go bi se di we aw yu de fil kin chenj chenj lɛk ship we de na si we rɔf, bɔt di op we di Baybul de gi go ɛp yu fɔ tink di rayt we.
Da op de nɔto jɔs tin dɛn we wi de wish fɔ we nɔ go ɛva apin bɔt na Gɔd in prɔmis fɔ pul ɛnitin we de mek wi fil pen.—Rɛvɛleshɔn 21:4.
Tray dis: Lan bɔt di Baybul in prɔmis bay we yu rid lɛsin 5 na di brosho we nem Gɔd Gɛt Gud Nyuz fɔ Wi!
● Du tin dɛn we yu kin ɛnjɔy fɔ du.
Wetin di Baybul se? “Gladi-at na gud mɛrɛsin.”—Prɔvabs 17:22, NWT.
Wetin dis min? We wi du tin dɛn we de mek wi gladi, i go impruv di we aw wi de tink ɛn di we aw wi de fil.
Tray dis: Du tin dɛn we yu kin ɛnjɔy fɔ du. Fɔ ɛgzampul, lisin to myuzik we de mek yu fil fayn, rid sɔntin we go ɛnkɔrej yu, ɔ du sɔntin we yu lɛk fɔ du. Yu go gladi bak mɔ we yu du sɔntin fɔ ɛp ɔda pipul dɛn, ilɛk na smɔl tin.—Akt 20:35.
● Tek kia ɔf yu wɛlbɔdi.
Wetin di Baybul se? “We pɔsin ɛksasayz, i de bɛnifit.”—1 Timoti 4:8.
Wetin dis min? Wi de bɛnifit we wi ɛksasayz, slip fayn, ɛn it fud we de mek wi gɛt wɛlbɔdi.
Tray dis: Go waka, ilɛksɛf na fɔ 15 minit.
● Mɛmba se di we aw pɔsin de fil kin chenj ɛn ɔda tin dɛn kin chenj na layf.
Wetin di Baybul se? “Una nɔ no aw una layf go tan lɛk tumara.”—Jems 4:14.
Wetin dis min? I go bi se prɔblɛm we de mɔna yu ɔ sɔntɛm we yu de ivin tink se yu go nɔ go ebul fɔ sɔlv am, kin jɔs de fɔ shɔt tɛm.
No mata aw bad yu tink se tin bi tide, i kin chenj tumara. So luk fɔ we dɛn fɔ bia. (2 Kɔrintians 4:8) Di tin dɛn we de apin to yu naw go mɔs chenj, bɔt if yu kil yusɛf, yu nɔ go ebul fɔ chenj dat.
Tray dis: Rid bɔt pipul dɛn na di Baybul we dɛn at bin rili pwɛl ɛn dɛn want fɔ day, ɛn lan aw tin bin chenj na dɛn layf di kayn we aw dɛn nɔ bin de ɛkspɛkt. Lɛ wi tɔk bɔt sɔm ɛgzampul dɛn.
Di Baybul tɔk bɔt pipul dɛn we bin want fɔ day?
Yɛs. Di Baybul tɔk bɔt sɔm pipul dɛn we bin tɔk se “A want fɔ day.” Gɔd nɔ bin vɛks pan dɛn, bɔt i ɛp dɛn. I go du di sem tin fɔ yu.
Ilayja
● Udat na bin Ilayja? In na bin prɔfɛt we gɛt maynd. Bɔt sɔntɛnde, insɛf bin de gɛt pwɛlat. Jems 5:17 se: “Ilayja na bin man we gɛt filin lɛk wi.”
● Wetin mek i bin want fɔ day? Wantɛm, Ilayja bin de fil lɛk se na in wan de, i bin de fred, ɛn i bin de fil se i nɔ gɛt no yus. So i beg Jiova se “lɛ a day wantɛm.”—Fɔs Kiŋ 19:4.
● Wetin bin ɛp am? Ilayja bin tɛl Gɔd aw i de fil. Aw Gɔd bin ɛnkɔrej am? Gɔd sho Ilayja se i bisin bɔt am ɛn i sho am se I gɛt pawa. I mek Ilayja no se i stil nid am ɛn i gi am pɔsin we bisin bɔt am ɛn we rili sabi wok fɔ ɛp am.
▸ Rid bɔt Ilayja: Fɔs Kiŋ 19:2-18.
Job
● Udat na bin Job? Job na bin jɛntriman, i bin gɛt big famili ɛn i bin de wɔship di tru Gɔd fetful wan.
● Wetin mek i bin want fɔ day? Wantɛm wantɛm bɔku bad bad tin dɛn bin apin to Job. I lɔs ɔl in prɔpati dɛn. Ɔl in pikin dɛn day pan dizasta. I gɛt wan bad bad sik. Dɔn afta ɔl dat, dɛn lay pan am se na in mek ɔl dɛn prɔblɛm dɛn de kam pan am. Job se: “A et mi layf: a dɔn taya wit dis layf.”—Job 7:16.
● Wetin bin ɛp am? Job pre to Gɔd ɛn tɔk to ɔda pipul dɛn. (Job 10:1-3) Wan in padi we gɛt sɔri-at we nem Ilayu, bin ɛnkɔrej am ɛn ɛp am fɔ mek i si tin difrɛn we. Apat frɔm dat, Job bin alaw Gɔd fɔ advays am ɛn ɛp am.
▸ Rid bɔt Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Mozis
● Udat na bin Mozis? Mozis na bin fetful prɔfɛt we bin de lid di Izrɛlayt dɛn trade.
● Wetin mek i bin want fɔ day? Mozis bin gɛt bɔku wok fɔ du, dɛn bin de tɔk bad bɔt am ɛn dat mek i taya. So i tɛl Gɔd se: “Kil misɛf rayt naw.”—Di Nɔmba Dɛm 11:11, 15.
● Wetin bin ɛp am? Mozis bin tɛl Gɔd aw i de fil. Gɔd bin ɛp Mozis fɔ ridyus di wok we i gɛt ɛn di tin dɛn we de mek i strɛs.
▸ Rid bɔt Mozis: Di Nɔmba Dɛm 11:4-6, 10-17.
a If dis we aw yu de fil fɔ kil yusɛf de siriɔs ɛn yu fambul ɔ padi dɛn nɔ de arawnd fɔ ɛp yu, kɔl ɔda pɔsin fɔ ɛp yu.