LƐSIN 02
Di Baybul in Prɔmis dɛn De Gi Wi Op
Bɔku pipul dɛn gɛt prɔblɛm dɛn we de mek dɛn nɔ gladi, we de mek dɛn wɔri, ɛn we de ivin mek dɛn fil pen. Sɔntin dɔn ɛva apin to yu we mek yu fil dɛn we dɛn de? Sɔntɛm yu de sɔfa bikɔs yu sik ɔ bikɔs pɔsin we yu lɛk dɔn day. Sɔntɛm yu go de tink if ‘Layf go ɛva bɛtɛ?’ Di Baybul gi fayn ansa to da kwɛstyɔn de.
1. Aw di Baybul de gi wi op?
Di Baybul nɔ jɔs ɛksplen wetin mek prɔblɛm dɛn de na di wɔl tide, bɔt i tɔk bak bɔt gud nyuz fɔ se dɛn prɔblɛm dɛn ya nɔ go de sote go, dɛn go dɔn jisnɔ. Di Baybul in prɔmis dɛn go gi yu “op ɛn mek [yu] ɛnjɔy tumara bambay.” (Rid Jɛrimaya 29:11, 12, NWT.) Dɛn prɔmis dɛn de, de ɛp wi fɔ bia wit di prɔblɛm dɛn we wi gɛt naw, i de ɛp wi fɔ tink ɛn du tin di rayt we, ɛn fɔ gɛt gladi-at we go de sote go.
2. Wetin di Baybul prɔmis se go apin tumara bambay?
Di Baybul prɔmis se tumara bambay, “day nɔ go de igen, pwɛlat ɛn pen nɔ go de igen, ɛn dɛn nɔ go kray igen.” (Rid Rɛvɛleshɔn 21:4.) Di prɔblɛm dɛn we de mek pipul dɛn sɔfa lɛk po, sik, day, ɛn di trit we dɛn nɔ de trit pipul dɛn fia wan, nɔ go de igen. Di Baybul prɔmis se mɔtalman go ɛnjɔy layf sote go insay Paradays na dis wɔl.
3. Wetin go mek yu biliv se di tin dɛn we di Baybul prɔmis go mɔs bi?
Bɔku pipul dɛn de op fɔ mek gud tin dɛn apin, bɔt dɛn nɔ shɔ se di tin dɛn we dɛn de op fɔ go ɛva apin. Bɔt di tin dɛn we di Baybul prɔmis go mɔs kam tru. We wi “tek tɛm chɛk di Skripchɔ dɛn,” dat go ɛp wi fɔ mek wi biliv wetin di Baybul se. (Akt 17:11) As yu de stɔdi di Baybul, yu go ebul fɔ disayd fɔ yusɛf if yu go biliv wetin di Baybul se bɔt tumara bambay.
LAN MƆ
Lan bɔt sɔm pan di tin dɛn we di Baybul dɔn prɔmis se go apin tumara bambay. Si aw di tin dɛn we di Baybul dɔn prɔmis de ɛp pipul dɛn tide.
4. Di Baybul prɔmis wi se wi go de sote go ɛn wi nɔ go sɔfa igen
Lan bɔt sɔm pan di prɔmis dɛn we de na di Baybul. Us prɔmis dɛn we yu rili lɛk? Wetin mek yu rili lɛk dɛn?
Rid di skripchɔ dɛn we de nia di prɔmis dɛn, dɔn una tɔk bɔt dɛn kwɛstyɔn dɛn ya:
Yu tink se dɛn skripchɔ dɛn ya de bɛnifit yu? Yu tink se yu fambul ɛn padi dɛn go bɛnifit we dɛnsɛf lan bɔt dɛn skripchɔ dɛn ya?
Imajin se yu de na wɔl usay:
NƆBƆDI NƆ GO . . . |
ƆLMAN GO . . . |
|---|---|
|
|
|
|
|
|
|
|
|
|
5. Di Baybul in prɔmis dɛn go mek layf bɛtɛ
Bɔku pipul dɛn kin fil bad ɔ ivin vɛks bikɔs ɔf di prɔblɛm dɛn we de apin arawnd dɛn. Sɔm dɛn kin ivin tray fɔ mek tin bɛtɛ. Lan bɔt aw di Baybul in prɔmis fɔ se tin dɛn go bɛtɛ de ɛp pipul dɛn naw. Ple di VIDIO, dɔn una tɔk bɔt di kwɛstyɔn dɛn we de dɔŋ.
Insay di vidio, aw dɛn bin de trit pipul dɛn we mek Rafika bin fil bad?
Pan ɔl we dɛn nɔ stɔp fɔ trit pipul dɛn bad, aw di Baybul bin ɛp am?
We wi biliv di tin dɛn we di Baybul prɔmis fɔ tumara bambay, dat go ɛp wi fɔ bia we wi at pwɛl ɛn gladi ilɛksɛf wi gɛt prɔblɛm dɛn. Rid Prɔvabs 17:22 ɛn Romans 12:12, dɔn una tɔk bɔt dɛn kwɛstyɔn dɛn ya:
Yu tink se di prɔmis dɛn we de na di Baybul go mek yu layf bɛtɛ naw? Wetin mek yu tink so?
SƆM PIPUL DƐN KIN SE: “Di Baybul in prɔmis dɛn fɔ tumara bambay rili fayn, bɔt i at fɔ biliv se dɛn go kam tru.”
Wetin mek yu tink se i impɔtant fɔ mek yu lan mɔ?
WETIN YU DƆN LAN?
Di Baybul gɛt bɔku prɔmis dɛn bɔt tumara bambay we go mek wi gladi. Dis de gi wi op ɛn mek wi layf bɛtɛ naw.
Rivyu
Wetin mek pipul dɛn nid fɔ no bɔt Gɔd in prɔmis dɛn?
Wetin di Baybul se bɔt tumara bambay?
We yu gɛt op fɔ tumara bambay, aw dat go ɛp yu naw?
DU MƆ RISACH
Lan mɔ bɔt aw op go ɛp yu we yu gɛt prɔblɛm dɛn.
Lan bɔt aw op fɔ tumara bambay go ɛp di wan dɛn we gɛt siriɔs wɛlbɔdi prɔblɛm.
“Yu Tink se di Baybul Ebul fɔ Ɛp Pɔsin We Sik Siriɔs Wan?” (Atikul na di wɛbsayt)
As yu de wach dis myuzik fim, imajin aw yu ɛn yu famili go de ɛnjɔy layf na Paradays we di Baybul prɔmis.
Lan bɔt aw di Baybul in op fɔ tumara bambay bin ɛp wan man we bin de fɛt fɔ mek tin chenj na dɛn kɔmyuniti.
“A Nɔ De Fil Igen se A Fɔ Chenj di Wɔl” (Di Wachtawa, Julay 1, 2013)