“Kray wit di Wan dɛn We De Kray”
“Una fɔ stil de kɔrej ɛn ɛp una kɔmpin Kristian dɛn.”—FƆS LƐTA FƆ TƐSALONAYKA 5:11.
1, 2. Wetin mek wi nid fɔ tɔk bɔt aw fɔ kɔrej di wan dɛn we dɛn at rili pwɛl? (Luk di pikchɔ nia dis atikul in taytul.)
WAN Witnɛs we nem Suzi bin tɔk se: “Fɔ lɛk wan ia so afta wi pikin day, wi bin stil de fil am ɛn wi at bin rili pwɛl.” Wan brɔda we in wɛf bin jɔs day lɛk dat, bin tɔk se i “nɔ ebul fɔ ɛksplen di kayn pen we i de fil.” I sɔri fɔ no se bɔku pipul dɛn kin fil dis kayn we. Insay di Kristian kɔngrigeshɔn tide, bɔku pan wi brɔda ɛn sista dɛn nɔ bin de tink se dɛn man ɔ dɛn wɛf go day bifo Amagɛdɔn. Sɔntɛm pɔsin we yu lɛk dɔn day, ɔ sɔntɛm yu sabi sɔmbɔdi we i at rili pwɛl bikɔs pɔsin we i lɛk dɔn day. If na so i bi, yu go de wɔnda, ‘Aw pɔsin we in at rili pwɛl go gɛt kɔrej?’
2 Sɔm pipul dɛn kin tɔk se as tɛm de go di pen we pɔsin kin fil na in at kin bigin fɔ bɛtɛ smɔl smɔl. Bɔt yu tink se na so i kin apin ɔltɛm? Wan uman we i man bin dɔn day se, “A dɔn kam fɔ no se na wetin pɔsin du wit in tɛm na in go ɛp am fɔ mek i fil bɛtɛ.” We pɔsin wund, i go nid fɔ kia fɔ di wund ɛn gi am tɛm fɔ mek in go wɛl. Semweso, pɔsin we in at pwɛl nid tɛm ɛn kia fɔ mek i ebul fɔ bia di pen we de na in at. Wetin go ɛp di wan dɛn we dɛn at rili pwɛl?
JIOVA NA DI GƆD WE “DE KƆREJ WI ƆLTƐM”
3, 4. Wetin mek wi shɔ se Jiova ɔndastand di pen we wi kin fil na wi at we pɔsin we wi lɛk day?
3 Jiova na wi Papa we gɛt sɔri-at, na in na di men pɔsin we de gi wi di kɔrej we wi rili nid. (Rid Sɛkɛn Lɛta Fɔ Kɔrint 1:3, 4.) Na in na di bɛst ɛgzampul we i kam to aw fɔ sho sɔri-at, ɛn i prɔmis in pipul dɛn se: “Na Mi na di wan we de kɔnfɔt yu.”—Ayzaya 51:12; Sam 119:50, 52, 76.
Jiova de rili wet fɔ di tɛm we i go gi layf bak to i fetful savant dɛn
4 Wi Papa we lɛk wi insɛf dɔn lɔs pipul dɛn we i lɛk, pipul dɛn lɛk Ebraam, Ayzak, Jekɔp, Mozis, ɛn Kiŋ Devid. (Di Nɔmba Dɛm 12:6-8; Matyu 22:31, 32; Di Apɔsul Dɛn Wok [Akt] 13:22) Di Baybul sho se Jiova de rili wet fɔ di tɛm we i go gi layf bak to dɛn fetful man dɛn ya. (Job 14:14, 15) Da tɛm de, dɛn go gladi ɛn dɛn nɔ go sik igen. Jiova bin rili fil am we in fɔs bɔypikin bin day. Di Baybul se Jizɔs na bin di wan we bin de mek Jiova “gladi ɛvride.” (Prɔvabs 8:22, 30) Wi nɔ go ebul fɔ imajin di kayn pwɛl at we Jiova bin gɛt we i bin de wach aw in pikin de sɔfa te i day.—Jɔn 5:20; 10:17.
5, 6. Aw Jiova de kɔrej wi?
5 Wi rili shɔ fɔ se Jiova go ɛp wi. So wi fɔ fil fri ɔltɛm fɔ pre to am ɛn tɛl am bɔt aw wi de fil ɛn di kayn we aw wi at pwɛl. Wi kin fil fayn we wi no se Jiova ɔndastand di we aw wi de fil ɛn i de gi wi di kɔrej we wi nid! Bɔt aw i de du dat?
6 Wan pan di bɔku we dɛn we Jiova de kɔrej wi na bay in oli spirit. (Di Apɔsul Dɛn Wok [Akt] 9:31) Jizɔs bin prɔmis se wi Papa go gi in pawaful oli spirit to ɔl di wan dɛn we aks am fɔ am. (Lyuk 11:13) Suzi we wi bin dɔn tɔk bɔt fɔs se: “Bɔku tɛm wi kin jɔs nil dɔŋ ɛn pre to Jiova fɔ mek i go kɔrej wi. Ɔltɛm, di kolat we Gɔd de gi wi bin de mek wi nɔ wɔri tumɔs ɛn wi kin gɛt kɔrej.”—Rid Lɛta Fɔ Filipay 4:6, 7.
JIZƆS ƆNDASTAND AW WI DE FIL
7, 8. Wetin mek wi shɔ se Jizɔs go ebul fɔ kɔrej wi?
7 We Jizɔs bin de na di wɔl, i bin rili falamakata in Papa in fayn fayn kwaliti dɛn bay wetin i bin de se ɛn di tin dɛn we i bin de du. (Jɔn 5:19) Jiova bin sɛn Jizɔs na di wɔl fɔ kɔrej “dɛn wan we gɛt brok at” ɛn “ɔl udat at de blid.” (Ayzaya 61:1, 2; Lyuk 4:17-21) Pipul dɛn bin no se Jizɔs ɔndastand di we aw dɛn bin de sɔfa ɛn i rili want fɔ ɛp dɛn.—Di Ibru Pipul Dɛn 2:17.
8 We Jizɔs bin smɔl, i go mɔs bi se i bin gɛt tayt padi ɛn fambul dɛn we bin day. Fɔ ɛgzampul, i tan lɛk se Josɛf bin day we Jizɔs bin stil yɔŋ.a (Luk di futnot.) Imajin aw i nɔ bin izi fɔ yɔŋ pɔsin lɛk am we bisin bɔt ɔda pipul dɛn fɔ ebul bia we in yon at pwɛl ɛn fɔ bia bak we i si in mama, in brɔda dɛn, ɛn in sista dɛn sɛf at pwɛl.
9. Aw Jizɔs bin sho se i gɛt sɔri-at di tɛm we Lazarɔs bin day?
9 Di tɛm we Jizɔs bin de prich, i bin sho se i rili ɔndastand pipul dɛn ɛn i bin gɛt sɔri-at fɔ dɛn. Fɔ ɛgzampul, we Jizɔs in tayt padi Lazarɔs bin day, Jizɔs bin rili fil di pen we Meri ɛn Mata bin de fil. Di we aw i bin de fil sɔri fɔ dɛn bin mek i bigin fɔ kray pan ɔl we i no se i go gi Lazarɔs layf bak.—Jɔn 11:33-36.
10. Wetin mek wi biliv se Jizɔs ɔndastand di we aw wi de fil tide?
10 Aw di wɔd dɛn we Jizɔs bin tɔk trade go kɔrej wi tide? Di Baybul mek wi no klia wan se Jizɔs nɔ de chenj. I se: “Jizɔs Krays na di sem yɛstade, tide, ɛn i go bi di sem sote go.” (Di Ibru Pipul Dɛn 13:8) Di Baybul se na in “gɛt pawa fɔ gi tru layf” bikɔs na in mek am pɔsibul fɔ mek wi go gɛt layf we go de sote go. Jizɔs ɔndasand di pen we pipul dɛn de fil ɛn “i ebul ɛp dɛn pipul we Setan de tray.” (Di Apɔsul Dɛn Wok [Akt] 3:15; Di Ibru Pipul Dɛn 2:10, 18) So wi fɔ biliv tranga wan se i stil de fil am fɔ di wan dɛn we dɛn at pwɛl. Jizɔs ɔndastand di kayn we aw dɛn de fil ɛn i ebul fɔ kɔrej dɛn “di rayt tɛm.”—Rid Di Ibru Pipul Dɛn 4:15, 16.
“GƆD IN BUK . . . DE MEK WI EBUL BIA”
11. Us patikyula skripchɔ dɔn kɔrej yu?
11 Wetin di Baybul tɔk bɔt di kayn we aw Jizɔs bin fil di tɛm we Lazarɔs bin day, na jɔs wan pan di bɔku bɔku skripchɔ dɛn we de na Gɔd in Wɔd we de kɔrej wi. Dis nɔ fɔ mek wi sɔprayz bikɔs “ɔltin we rayt na Gɔd in Buk na fɔ lan wi sɔntin, so dat, we di tin we rayt de, de mek wi ebul bia ɛn mek wi gɛt kɔrej, wi go no se Gɔd nɔ go lɛf wi.” (Lɛta Fɔ Rom 15:4) If yu at pwɛl bikɔs yu pɔsin day, yu go ebul gɛt kɔrej frɔm dɛn skripchɔ dɛn ya:
“PAPA GƆD [“Jiova,” NW] de nia ɔl udat fil se i dɔn dɔn fɔ am ɛn de ɛp udat fil se bɛtɛ nɔ de fɔ am igen.”—Sam 34:18, 19.
“Wɛn a kin ɛŋ-at na yu [Jiova] nɔmɔ ebul kɔrej mi dɔn a gladi.”—Sam 94:19.
“Mek wi Masta Jizɔs Krays insɛf, ɛn Gɔd we na wi Papa, we lɛk wi ɛn mek wi gɛt kɔrej ɔltɛm bikɔs i gud ɛn mek wi ebul bia wet fɔ wetin gud, kɔrej una ɛn ɛp una fɔ du ɛn tɔk ɔl wetin gud.”—Sɛkɛn Lɛta Fɔ Tɛsalonayka 2:16, 17.b—Luk di futnot.
WI KIN GƐT MƆ KƆREJ FRƆM WI KƆNGRIGESHƆN
12. Aw wi go kɔrej ɔda pipul dɛn?
12 Di wan dɛn we dɛn at pwɛl bikɔs dɛn pɔsin day, kin gɛt kɔrej bak frɔm di Kristian kɔngrigeshɔn. (Rid Fɔs Lɛta Fɔ Tɛsalonayka 5:11.) Wetin yu go du fɔ ɛnkɔrej di wan dɛn we dɛn “at pwɛl”? (Prɔvabs 17:22) Mɛmba se “tɛm de fɔ sɛt mɔt, ɛn tɛm de fɔ tɔk.” (Ɛkliziastis 3:7) Wan uman we i man bin dɔn day, we nem Delin, bin ɛksplen se di wan dɛn we dɛn at pwɛl bikɔs dɛn pɔsin dɔn day nid fɔ tɔk bɔt wetin dɛn de tink ɛn aw dɛn de fil. So di bɛst tin we yu go du na fɔ sɛt mɔt ɛn lisin to wetin di pɔsin de tɔk. Junia in brɔda bin kil insɛf ɛn Junia tɔk se: “Pan ɔl we yu nɔ go rili ebul fɔ ɔndastand di kayn we aw pipul dɛn at kin pwɛl, wetin impɔtant na dat yu want fɔ ɔndastand aw dɛn de fil.”
13. Wetin wi nid fɔ mɛmba bɔt pwɛl at?
13 Wi nid fɔ mɛmba se wi ɔl nɔ go ebul fɔ sho di kayn we aw wi de fil di sem we. Sɔntɛnde, wi nɔ kin ebul fɔ ɛksplen di kayn we aw wi de rili fil. Gɔd in Wɔd se: “Udat wɛr in sus, nain no aw i fit am, nɔbɔdi nɔ no aw i tayt ɔ i slak.” (Prɔvabs 14:10) Ilɛk pɔsin de ɛksplen aw i de fil, bɔku tɛm i nɔ kin izi fɔ mek ɔda pipul dɛn ɔndastand wetin i de tray fɔ se.
Bɔku tɛm, di men tin we yu go du fɔ ɛp na fɔ “kray wit di wan dɛn we de kray”
14. Wetin wi go se fɔ kɔrej di wan dɛn we dɛn at pwɛl?
14 I nɔ kin izi fɔ no wetin fɔ se to pɔsin we in at pwɛl bikɔs in pɔsin day. Bɔt di Baybul se pɔsin we gɛt “sɛns, wɛn i tɔk, i kin mek pɔsin [in] at kol.” (Prɔvabs 12:18) Bɔku pipul dɛn dɔn lan wetin fɔ se fɔ ɛnkɔrej ɔda pipul dɛn frɔm wan buk we nem When Someone You Love Dies.c (Luk di futnot.) Bɔku tɛm, di men tin we yu go du fɔ ɛp na fɔ “kray wit di wan dɛn we de kray.” (Lɛta Fɔ Rom 12:15, NW) Gabi, we in man bin dɔn day, bin tɔk se di bɛst we fɔ mek i sho aw i de fil na bay we i de kray. I bin kɔntinyu fɔ tɔk se: “Na dat mek a kin gɛt kɔrej we mi padi dɛn kray wit mi. Da patikyula tɛm de, a nɔ kin fil se na mi wangren gɛt pwɛl at.”
15. Aw wi go kɔrej ɔda pipul dɛn if wi tink se i nɔ izi fɔ mek wi si dɛn? (Luk bak di bɔks we se “Fayn Wɔd dɛn fɔ Ɛnkɔrej Pɔsin.”)
15 If yu si am se i nɔ izi fɔ mek yu se sɔntin fɔ kɔrej pɔsin bifo in fes, i go izi fɔ sɛn kad, imel, tɛks mɛsej, ɔ lɛta to am. Yu kin kot skripchɔ we go kɔrej di pɔsin, tɔk bɔt wan spɛshal kwaliti we yu mɛmba bɔt di pɔsin we dɔn day, ɔ tɔk bɔt sɔntin we yu lɛk we go mek di pɔsin gladi. Junia bin se, “Di shɔt mɛsej we a bin de gɛt frɔm pipul dɛn fɔ kɔrej mi ɔ we mi kɔmpin Kristian dɛn invayt mi fɔ spɛn tɛm wit dɛn bin ɛp mi mɔ ɛn mɔ. Dɛn tin ya we dɛn bin de du mek a biliv se dɛn rili lɛk mi ɛn dɛn bisin bɔt mi.”
16. Us fayn we bak wi kin kɔrej ɔda pipul dɛn?
16 Wi prea dɛn kin ɛp wi brɔda ɛn sista dɛn we dɛn at pwɛl bikɔs pɔsin we dɛn lɛk dɔn day. Wi kin pre fɔ dɛn ɔ wi kin ivin pre wit dɛn. Pan ɔl we i nɔ izi fɔ du dat bikɔs wi kin fil fɔ kray, di pre we yu de pre frɔm yu at kin gi dɛn kɔrej. Delin bin mɛmba se: “Sɔntɛnde we di sista dɛn kin kam fɔ kɔrej am, a kin aks dɛn if dɛn go want fɔ pre wit mi. Bɔku tɛm dɛn we dɛn kin stat fɔ pre, i nɔ kin izi fɔ tɔk sɔm wɔd dɛn. Bɔt as tɛm kin go dɛn vɔys kin bigin fɔ klia smɔl smɔl ɛn dɛn kin pre frɔm dɛn at. Dɛn fet, dɛn lɔv, ɛn di we aw dɛn de sho se dɛn bisin bɔt mi de mek a gɛt fet mɔ ɛn mɔ.”
KƆNTINYU FƆ ƐNKƆREJ ƆDA PIPUL DƐN
17-19. Wetin mek wi nid fɔ kɔntinyu fɔ kɔrej di wan dɛn we dɛn at pwɛl?
17 I nɔ pɔsibul fɔ no ustɛm sɔmbɔdi go lɛf fɔ kray fɔ in pɔsin we dɔn day. We pɔsin we wi lɛk day, bɔku padi ɛn fambul dɛn kin kam fɔ kɔrej wi wantɛm wantɛm. Bɔt afta we dɛn go bak to wetin dɛn bin de du, di wan dɛn we dɛn at pwɛl kin stil nid pɔsin fɔ kɔrej dɛn. So na fɔ rɛdi fɔ ɛp. Di Baybul se: “Gud padi de sho lɔv ɔltɛm, ɛn in na brɔda we dɛn bɔn fɔ di tɛm dɛn we prɔblɛm kin de.” (Prɔvabs 17:17, NW) Wi nid fɔ kɔrej di wan dɛn we dɛn at pwɛl ɛni tɛm we dɛn nid wi.—Rid Fɔs Lɛta Fɔ Tɛsalonayka 3:7.
18 Mɛmba se, sɔmbɔdi we dɔn lɔs pɔsin we i lɛk kin gɛt pwɛl at ɛnitɛm. Dis kin apin ɛnitɛm we dɛn anivasri rich, we i yɛri wan patikyula myuzik de ple, we i si sɔm pikchɔ dɛn, sɔm tin dɛn we dɛn bin de du togɛda, ɔ ivin we dɛn smɛl ɔ yɛri sɔntin, ɔ wan patikyula sizin insay di ia. We pɔsin we i man ɔ wɛf day kin du sɔntin in wangren fɔ di fɔs tɛm lɛk fɔ go mitin, asɛmbli, ɔ Mɛmorial, i nɔ kin rili izi fɔ am. Wan brɔda tɔk se: “A bin de tink se di fɔs anivasri afta mi wɛf day nɔ go izi fɔ mi ɛn fɔ tru i nɔ bin izi. Bɔt sɔm brɔda ɛn sista dɛn bin mek smɔl gɛt-to-gɛda wit mi tayt padi dɛn so dat a nɔ go de mi wangren.”
19 Mɛmba se di wan dɛn we dɛn at pwɛl bikɔs pɔsin we dɛn lɛk dɔn day nid sɔmbɔdi fɔ kɔrej dɛn ɔltɛm. Junia bin ɛksplen se: “Bɔku tɛm di ɛp we dɛn de ɛp yu ɛn spɛn tɛm wit yu di tɛm we no spɛshal anivasri nɔ de, kin rili bɛnifit yu. Dɛn tɛm dɛn de rili valyu ɛn i de mek yu gɛt kɔrej.” Fɔ tru, wi nɔ go ebul fɔ pul ɔl di pwɛl at, bɔt wi kin ɛnkɔrej di wan dɛn we dɛn at pwɛl bay we wi de du sɔm tin dɛn fɔ dɛn. (Jɔn In Fɔs Lɛta 3:18) Gabi se: “A rili gladi we Jiova gi wi ɛlda dɛn we lɛk wi. Dɛn ɛlda dɛn ya bin rili ɛp mi di tɛm dɛn we tin nɔ rili izi fɔ mi. Dɛn rili dɔn mek a fil lɛk se Jiova in an de rawnd mi.”
20. Wetin mek Jiova in prɔmis dɛn kin rili ɛnkɔrej wi?
20 I fayn fɔ no se Jiova, we na di Gɔd we de kɔrej wi ɔltɛm, go pul pwɛl at kpatakpata, di tɛm we i go gi layf bak to di wan dɛn we dɔn day. (Jɔn 5:28, 29) Gɔd prɔmis se: “I go swɛla day sote go, ɛn Papa Gɔd [“Jiova,” NW] we na Gɔd go wep wata kɔmɔt na ɔlman yay.” (Ayzaya 25:8) Dɔn bifo wi “kray wit di wan dɛn we de kray,” ɔlman na di wɔl go “gladi wit di wan dɛn we gladi.”—Lɛta Fɔ Rom 12:15, NW.
a Di Baybul sho se Josef bin de alayf we Jizɔs bin ol 12 ia. Bɔt di Baybul nɔ tɔk ɛnitin bɔt Josɛf di tɛm we Jizɔs bin du in fɔs mirekul, dat na we i tɔn wata to wayn, ɔ ɛni ɔda tɛm afta dat. I go mɔs bi se Josɛf bin dɔn day bifo da tɛm de. Dɔn, we Jizɔs bin ɛng na di stik usay dɛn kil am, i bin tɛl di apɔsul Jɔn fɔ kia fɔ in mama. Jizɔs nɔ bin fɔ du dat if Josɛf bin stil de alayf.—Jɔn 19:26, 27.
b Ɔda skripchɔ dɛn we dɔn kɔrej bɔku pipul dɛn na, Sam 20:1, 2; 31:7; 38:8, 9, 15; 55:22; 121:1, 2; Ayzaya 40:28, 29; Ayzaya 57:15; 66:13; ɛn Pita In Fɔs Lɛta 5:7, NW.
c Luk bak di atikul we gɛt di taytul “Comfort the Bereaved, as Jesus Did” we de na di Novɛmba 1, 2010, Wachtawa.