LƐSIN 60
Kɔntinyu fɔ Kam Nia Jiova
Insay dis buk, yu dɔn lan bɔku tin dɛn bɔt Jiova. Sɔntɛm di tin dɛn we yu dɔn lan bɔt Jiova dɔn mek yu dɔn lɛk am te yu dɔn gi yu layf to am ɛn baptayz. If nɔto so i bi, sɔntɛm yu de tink fɔ du dat jisnɔ. Bɔt yu nɔ go stɔp fɔ go nia Jiova jɔs bikɔs yu dɔn baptayz. Yu go kɔntinyu fɔ go nia am sote go. Aw?
1. Wetin mek yu fɔ kɔntinyu fɔ mek yu padi biznɛs wit Jiova tayt mɔ ɛn mɔ?
Wi fɔ wok tranga wan fɔ kɔntinyu fɔ gɛt tayt padi biznɛs wit Jiova mɔ ɛn mɔ. Wetin mek? “So dat wi nɔ go ɛva kɔmɔt” nia am. (Ibruz 2:1) Wetin go ɛp wi fɔ kɔntinyu fɔ sav Jiova fetful wan? Wi fɔ kɔntinyu fɔ du di prichin wok ɔltɛm ɛn luk fɔ ɔda we dɛn fɔ sav wi Gɔd mɔ ɛn mɔ. (Rid Filipians 3:16.) Fɔ sav Jiova na di bɛst layf we wi go ɛva liv!—Sam 84:10.
2. Wetin bak yu fɔ kɔntinyu fɔ de du?
Pan ɔl we yu dɔn dɔn fɔ stɔdi dis buk, yu go stil kɔntinyu fɔ du di tin dɛn we yu de du fɔ sav Jiova. Di Baybul tɛl wi se wi “nid fɔ gɛt di nyu abit dɛn.” (Ɛfishians 4:23, 24) As yu de kɔntinyu fɔ stɔdi Gɔd in Wɔd ɛn atɛnd di mitin dɛn, yu go lan nyu tin dɛn bɔt Jiova ɛn in kwaliti dɛn. Luk fɔ we dɛn we yu go falamakata in kwaliti dɛn fayn fayn wan pan ɛnitin we yu de du. Kɔntinyu fɔ mek ɛni chenj dɛn we yu nid fɔ mek fɔ lɛ Jiova gladi.
3. Aw Jiova go ɛp yu fɔ kam nia am?
Di Baybul se: “Gɔd . . . go dɔn fɔ tren una. I go mek una tinap tranga wan, i go mek una strɔng, i go gi una strɔng fawndeshɔn.” (1 Pita 5:10) Wi ɔl kin gɛt tin dɛn we kin tɛmt wi fɔ du bad. Bɔt Jiova de gi wi wetin wi nid fɔ lɛ wi nɔ du dɛn tin dɛn de. (Sam 139:23, 24) I dɔn prɔmis se i go gi wi trɛnk ɛn mek wi want fɔ sav am fetful wan.—Rid Filipians 2:13.
LAN MƆ
Lan aw yu go kɔntinyu fɔ go nia Jiova mɔ ɛn aw i go blɛs yu.
4. Kɔntinyu fɔ tɔk ɛn lisin to yu bɛst Padi
Prea ɛn Baybul stɔdi dɔn ɛp yu fɔ bi Jiova in padi. Aw dɛn tin dɛn ya go ɛp yu fɔ kam nia Jiova mɔ ɛn mɔ?
Rid Sam 62:8, dɔn una tɔk bɔt dis kwɛstyɔn:
Wetin-ɛn-wetin yu go chenj bɔt di we aw yu de pre to Jiova ɛn wetin yu de tɛl am we go mek yu kɔntinyu fɔ gɛt tayt padi biznɛs wit am?
Rid Sam 1:2 (NWT) dɔn una tɔk bɔt dis kwɛstyɔn:
Wetin-ɛn-wetin yu go du fɔ bɛnifit frɔm yu Baybul ridin we go mek yu kɔntinyu fɔ gɛt tayt padi biznɛs wit Jiova?
Wetin-ɛn-wetin yu go du fɔ bɛnifit mɔ frɔm yu pasɔnal Baybul stɔdi? Fɔ si sɔm tin dɛn we go ɛp yu fɔ du dat, ple di VIDIO, dɔn una tɔk bɔt di kwɛstyɔn dɛn we de dɔŋ.
Uswan pan di tin dɛn we dɛn tɔk bɔt na di vidio we yu go lɛk fɔ du?
Us tɔpik yu go lɛk fɔ stɔdi?
5. Sɛt gol dɛn we go mek yu go nia Jiova mɔ ɛn mɔ
We yu sɛt gol dɛn we yu de sav Jiova, dat go ɛp yu kɔntinyu fɔ sav Jiova mɔ ɛn mɔ. Ple di VIDIO, dɔn una tɔk bɔt di kwɛstyɔn we de dɔŋ.
Insay dis vidio, aw Kamɛrɔn bin bɛnifit we i sɛt gol dɛn we i de sav Jiova?
Nɔto ɔlman go ebul go na ɔda kɔntri fɔ go prich. Bɔt wi ɔl go ebul sɛt gol dɛn we wi go ebul rich. Rid Prɔvabs 21:5, dɔn una tɔk bɔt us gol dɛn yu go lɛk fɔ sɛt . . .
na di kɔngrigeshɔn.
na di prichin wok.
Aw di prinsipul we de na di vas go ɛp yu fɔ rich yu gol dɛn?
Sɔm gol dɛn we yu go plan fɔ sɛt
Impruv di we aw yu de pre.
Rid di wan ol Baybul.
Tray fɔ sabi ɔlman na yu kɔngrigeshɔn.
Stat fɔ kɔndɔkt Baybul stɔdi.
Sav as ɔgzilari payɔnia ɔ rɛgyula payɔnia.
If yu na brɔda, tray fɔ bi ministerial savant.
6. Ɛnjɔy layf sote go!
Rid Sam 22:26, dɔn una tɔk bɔt dis kwɛstyɔn:
Wetin yu go du fɔ ɛnjɔy layf naw ɛn sote go?
WETIN YU DƆN LAN?
Kɔntinyu fɔ du di tin dɛn we go mek yu gɛt tayt padi biznɛs wit Jiova ɛn sɛt gol dɛn we yu de sav am. Dɔn yu go ɛnjɔy layf sote go!
Rivyu
Wetin mek yu shɔ se Jiova go ɛp yu fɔ kɔntinyu fɔ sav am fetful wan?
Aw yu go kɔntinyu fɔ gɛt tayt padi biznɛs wit Jiova?
Aw di gol dɛn we yu de sɛt we yu de sav Jiova go ɛp yu fɔ kam nia am mɔ ɛn mɔ?
DU MƆ RISACH
Wetin Jiova valyu mɔ, na we yu du wan big tin fɔ sho se yu de biɛn am ɔ na we yu kɔntinyu fɔ sav am fetful wan sote go?
Ivin Jiova in fetful savant dɛn nɔ kin gɛt gladi-at ɔltɛm. Si aw yu go gɛt gladi-at bak.
Aw yu go sɛt gol dɛn we yu de sav Jiova ɛn du dɛn?
“Yuz Spirichwal Gol dɛn fɔ Ɔnɔ di Wan We Mek Yu” (Di Wachtawa, Julay 15, 2004)
Wetin mek i impɔtant fɔ bi machɔ Kristian? Aw yu go bi machɔ Kristian?
“Kɔntinyu fɔ Bi Machɔ Kristian—‘Jiova in Gret De Nɔ De Fa’” (Di Wachtawa, Me 15, 2009)