Wetin Go Apin to Rilijɔn Dɛn?

1. Na ɔl rilijɔn de du wetin fayn?

Pipul dɛn we rili want fɔ no Gɔd de na ɔl rilijɔn. Na gud nyuz fɔ no se Gɔd de si dɛn pipul ya ɛn i kia bɔt dɛn. Bɔt di bad tin na dat, sɔm pipul dɛn we de insay rilijɔn de du bad bad tin dɛn ɛn se na fɔ Gɔd dɛn de du am. (Sɛkɛn Lɛta Fɔ Kɔrint 4:4; 11:13-15) We wi lisin nyuz, wi kin yɛri se rilijɔn de mek pipul dɛn put bɔm pan dɛnsɛf fɔ kil ɔda pipul dɛn. Dɛn kin put an pan wɔ ɛn du bad to pikin dɛn. Ɔl dɛn tin ya nɔ de mek Gɔd gladi.​—Rid Matyu 24:3-5, 11, 12.

Tru rilijɔn de mek Gɔd gladi bɔt lay lay rilijɔn nɔ de mek Gɔd gladi. Lay lay rilijɔn de tich tin dɛn we nɔ de na di Baybul. Dɛn de tich lay lay tin bɔt Gɔd ɛn bɔt dayman. Bɔt Jiova want lɛ pipul dɛn no di tru bɔt am.​—Rid Izikɛl 18:4; Fɔs Lɛta To Timoti 2:3-5.

2. Wetin go apin to rilijɔn dɛn?

Pipul dɛn we lɛk Setan in wɔl bɔt de mek lɛk se dɛn lɛk Gɔd, nɔ go ebul ful Gɔd. (Jems 4:4) Di Baybul kɔl ɔl lay lay rilijɔn “Babilɔn we ɔlman no [“Babilɔn di Gret”, NW].” Lay lay rilijɔn bigin na Babilɔn afta di Ebi Ren bin kam insay Noa in tɛm. I nɔ go te igen, Gɔd de kam pul ɔl di rilijɔn dɛn we de ful pipul dɛn ɛn we de du bad bad tin dɛn.​—Rid Rɛvɛleshɔn 17:1, 2, 5, 16, 17; 18:8.

Nɔto dat nɔmɔ na di gud nyuz o, mɔ de! Jiova nɔ de fɔgɛt di wan dɛn we de insay lay lay rilijɔn we want fɔ no bɔt am. I de tich dɛn pipul ya di tru tin bɔt am ɛn ɛp dɛn fɔ kɔmɔt insay lay lay rilijɔn.​—Rid Mayka 4:2, 5.

3. Wetin pipul dɛn we want no Gɔd, fɔ du?

Jiova bisin bɔt pipul dɛn we want no di tru tin bɔt am ɛn we want du wetin gud. Gɔd want mek pipul dɛn kɔmɔt insay lay lay rilijɔn. Pipul dɛn we want no Gɔd fɔ rɛdi fɔ lɛf ɔl di bad tin dɛn we dɛn bin de du so dat Gɔd go gladi fɔ dɛn.​—Rid Rɛvɛleshɔn 18:4.

Di tɛm we di apɔsul dɛn bin de, pipul dɛn we bin rili want no Gɔd bin gladi fɔ yɛri di gud nyuz we di apɔsul dɛn bin de tɛl dɛn. Dɛn lan aw fɔ gɛt gladi at, wetin mek Gɔd gi dɛn layf, ɛn aw dɛn go gɛt op. I fayn mek wi falamakata dɛn bikɔs dɛn du wetin di apɔsul dɛn tɛl dɛn, ɛn put Gɔd biznɛs fɔs na dɛn layf.​—Rid Fɔs Lɛta Fɔ Tɛsalonayka 1:8, 9; 2:13.

Jiova de gladi fɔ ɛnibɔdi we kɔmɔt insay lay lay rilijɔn fɔ kam jɔyn in famili. If yu gri fɔ jɔyn Jiova in famili, yu go bi in padi ɛn yu go gɛt layf we go de sote go.​—Rid Mak 10:29, 30; Sɛkɛn Lɛta Fɔ Kɔrint 6:17, 18.

4. Aw Gɔd go mek gladi at de ɔlsay na di wɔl?

Na gud nyuz fɔ no se Gɔd de kam pul ɔl dɛn lay lay rilijɔn dɛn. I go pul wi pan ɔl di prɔblɛm dɛn we lay lay rilijɔn dɔn put wi pan. Lay lay rilijɔn nɔ go ful pipul dɛn igen, ɛn wanwɔd go de ɔlsay. Ɔlman we go de na di wɔl da tɛm de go de wɔship Gɔd di sem we.​—Rid Rɛvɛleshɔn 18:20, 21; 21:3, 4.