LƐSIN 28

Wetin Na di Tin dɛn we De na Wi Wɛbsayt?

Wan uman de du risach na in kɔmpyuta — Frans

Wan man ɛn in bɔy pikin de yuz wan kɔmpyuta — Poland

Wan uman de wach wan sayn langwej fim na di Intanɛt — Rɔshia

Jizɔs bin tɛl di wan dɛn we de fala am se: “Una layt fɔ shayn so dat ɔlman go si di gud we una de du, ɛn dɛn go se, ‘Una Papa, we de na ɛvin, wɔndaful!’” (Matyu 5:16) Fɔ du dat, wi de yuz sɔm pan di tin dɛn we sayɛns dɔn mek. Wan pan dɛn tin ya na di Intanɛt. Wi Wɛbsayt na jw.org. Na de yu go ebul fɔ si di tin dɛn we wi biliv ɛn di tin dɛn we wi de du. Wetin bak yu go si na wi wɛbsayt?

Yu go si ansa dɛn to sɔm impɔtant kwɛstyɔn dɛn we pipul dɛn kin aks. Fɔ ɛgzampul, di trakt dɛn we gɛt di taytul Wi Go Ɛva Lɛf fɔ Sɔfa? ɛn Yu Tink se di Wan dɛn We Dɔn Day Go Gɛt Layf Bak? de na wi Wɛbsayt insay pas 600 langwej dɛn. Yu go si bak di New World Translation Baybul insay pas 130 langwej dɛn, ɛn bɔku ɔda tin dɛn we go ɛp yu fɔ lan bɔt di Baybul, lɛk wan buk we wi kɔl Wetin Rili di Baybul De Tich? Yu go ivin si Di Wachtawa ɛn Awake! magazin dɛn we wi jɔs mek. Yu go ebul fɔ rid ɔ lisin to plɛnti pan dɛn buk ya na di Intanɛt. Yu kin ivin dawnlod dɛn as MP3, PDF, ɔ EPUB. Yu kin ivin print sɔm pej dɛn ɛn gi pɔsin we want lan bɔt Gɔd insay in yon langwej. Wi gɛt bak fim dɛn we de insay bɔku bɔku sayn langwej dɛn. Yu kin dawnlod bak drama dɛn we wi pul na di Baybul, Baybul ridin we wi mek lɛk drama, ɛn fayn sɔng dɛn we yu go ɛnjɔy.

Yu go si tru tru tin dɛn bɔt Jiova Witnɛs dɛn. Insay wi Wɛbsayt, yu go si nyus ɛn fim dɛn bɔt di wok we wi de du ɔlsay na di wɔl, di tin dɛn we de apin to wi kɔmpin Jiova Witnɛs dɛn, ɛn di difrɛn difrɛn tin dɛn we wi de du fɔ ɛp pipul dɛn we trɔbul mit dɛn. Yu go ivin rid bɔt di kɔnvɛnshɔn dɛn we gɛt fɔ kam, ɛn aw yu go ebul tɔk to wi branch ɔfis dɛn.

Wi de du ɔl dɛn tin ya, so dat wi go ebul prich di gud nyus to pipul dɛn we de na dɛn fa fa ples dɛn. Di mɛsej de ivin rich na dɛn kol kol ples dɛn we de fa, lɛk wan ples we dɛn kɔl Antatika. Wi de pre se ‘di Gud Nyuz bɔt Jiova go de prɛd ɔlsay na di wɔl kwik kwik wan,’ so dat ɔlman go no bɔt Gɔd.—Sɛkɛn Lɛta Fɔ Tɛsalonayka 3:1.

Aw jw.org de ɛp pipul dɛn fɔ lan bɔt di Baybul?
Wetin yu go lɛk fɔ lan bɔt na wi Wɛbsayt?