STƆDI 4

Introdyus Skripchɔ dɛn Fayn Fayn Wan

Matyu 22:41-45

WETIN FƆ DU: Pripia di pipul dɛn maynd bifo yu rid di skripchɔ.

Tink bɔt wetin mek yu de rid di skripchɔ. Introdyus ɛni skripchɔ di kayn we, we go ɛp di pipul dɛn fɔ no di men pɔynt we yu want fɔ tɔk bɔt na da skripchɔ de.

Luk wetin di ɔda vas dɛn we de arawnd di skripchɔ de tɔk bɔt. If yu de introdyus skripchɔ ɛn yu de sho udat de tɔk ɔ udat rayt da Baybul buk de, mek shɔ se wetin yu de tɔk na di kɔrɛkt tin.
Mek di pɔsin no se na frɔm di Baybul yu de tɔk. We yu de tɔk to pipul dɛn we biliv Gɔd, tray fɔ mek dɛn no se di Baybul na Gɔd in Wɔd. We yu de du dis, yu de sho se wetin yu de tich kɔmɔt frɔm Gɔd.
Se sɔntin we go mek di pipul dɛn want fɔ no wetin de na di skripchɔ. Aks kwɛstyɔn we yu go yuz di skripchɔ fɔ ansa, tɔk bɔt prɔblɛm we di skripchɔ go ɛp fɔ sɔlv, ɔ tɔk bɔt wan prinsipul we di skripchɔ go ɛp dɛn fɔ ɔndastand.

Tink bɔt wetin di pipul dɛn no bɔt di tɔpik ɛn di skripchɔ. If yu de rid skripchɔ we dɛn sabi, introdyus am di kayn we we go mek dɛn want fɔ no mɔ. Ɛp dɛn fɔ tink bɔt da skripchɔ de bak ɔ fɔ ɔndastand sɔm men pɔynt dɛn gud gud wan ɔ fɔ lan nyu tin.