Wetin Mek Gɔd mek Mɔtalman?

1. Wetin mek Gɔd mek mɔtalman?

GƆD gɛt gud rizin we mek i mek mɔtalman. I bin mek di fɔs man ɛn uman, Adam ɛn Iv fɔ de na wan fayn gadin. I bin want fɔ mek dɛn bɔn pikin dɛn, mek di wan ol wɔl bi Paradays, ɛn fɔ mɛn di animal dɛn.—Jɛnɛsis 1:​28; 2:​8, 9, 15; luk Ɛndnot 6 na pej 208.

2. (a) Aw wi no se Gɔd go du wetin i bin want fɔ du? (b) Wetin di Baybul se bɔt layf we go de sote go?

² Yu tink se wi go ɛva de na Paradays? Jiova tɛl wi se: “A dɔn mek ɔp am, ɛn a go du am.” (Ayzaya 46:​9-11; 55:​11) Na tru, i go mɔs du wetin i bin want fɔ du, ɛn natin nɔ go stɔp am. Jiova se na rizin mek i mek di wɔl. I “nɔ mek di wɔl fɔ natin.” (Ayzaya 45:​18) I want pipul dɛn fɔ de ɔlsay na di wɔl. Uskayn pipul dɛn Gɔd want fɔ de na di wɔl ɛn aw lɔng i want dɛn fɔ de de? Di Baybul se: “Udat dɛn de du wetin rayt [ɔ, obe] go gɛt di land, ɛn dɛn go de de sote go.”—Sam 37:​29; Rɛvɛleshɔn 21:​3, 4.

3. Us kwɛstyɔn yu go aks we yu de si pipul dɛn de sik ɛn day?

³ Bɔt tide pipul dɛn de sik ɛn day. Na bɔku say dɛn na di wɔl, pipul dɛn de fɛt ɛn kil dɛnsɛf. Fɔ tru, nɔto dat Gɔd bin want. So, wetin apin, ɛn wetin mek? Na di Baybul nɔmɔ go ebul fɔ ɛksplen.

GƆD IN ƐNIMI

4, 5. (a) Udat bin yuz wan snek fɔ tɔk to Iv na di gadin we bin de na Idɛn? (b) Aw pɔsin we ɔnɛs kin tɔn to tifman?

⁴ Di Baybul tɛl wi se Gɔd gɛt ɛnimi we dɛn de “kɔl dɛbul ɛn Setan.” Setan bin yuz wan snek fɔ tɔk to Iv na di gadin we bin de na Idɛn. (Rɛvɛleshɔn 12:​9; Jɛnɛsis 3:​1) I bin mek i tan lɛk se na di snek de tɔk.—Luk Ɛndnot 7 na pej 208.

⁵ So, yu tink se na Gɔd mek Setan? Nɔ! Na wan enjɛl we bin de na ɛvin di tɛm we Gɔd bin de mek di wɔl fɔ Adam ɛn Iv bin chenj ɛn tɔn to Setan. (Job 38:​4, 7) Aw dis bin apin? Wɛl, aw pɔsin we ɔnɛs kin bi tifman? Dɛn nɔ bɔn am as tifman. Bɔt i bin want sɔntin we nɔto in yon. I kɔntinyu fɔ tink bɔt am, ɛn we i gɛt di chans, i tif am. So i dɔn tɔn insɛf to tifman.—Rid Jems 1:​13-15; luk Ɛndnot 8 na pej 210.

6. Aw wan enjɛl kam fɔ bi Gɔd in ɛnimi?

⁶ Na dis bin apin to da enjɛl de. Afta we Jiova mek Adam ɛn Iv, i tɛl dɛn fɔ bɔn pikin dɛn ɛn “de ɔlsay na di wɔl.” (Jɛnɛsis 1:​27, 28) Da enjɛl go dɔn de tink se, ‘Ɔl dɛn pipul ya fɔ wɔship mi nɔto Jiova dɛn fɔ wɔship!’ Di mɔ i de tink bɔt dat, na di mɔ i de milɛ wetin Jiova gɛt. Da enjɛl de bin want mek pipul dɛn wɔship am. So i lay to Iv ɛn ful am. (Rid Jɛnɛsis 3:​1-5.) Na dis tin we i du mek i bi Setan ɛn i kam fɔ bi Gɔd in ɛnimi.

7. (a) Wetin mek Adam ɛn Iv bin day? (b) Wetin mek wi de ol ɛn day?

⁷ Adam ɛn Iv dɛn nɔ bin obe Gɔd we dɛn it di frut. (Jɛnɛsis 2:​17; 3:​6) Dɛn sin agens Jiova, ɛn as tɛm de go dɛn day jɔs lɛk aw Jiova bin dɔn se. (Jɛnɛsis 3:​17-19) Adam ɛn Iv dɛn pikin dɛnsɛf gɛt sin ɛn na dat mek dɛn de day. (Rid Lɛta Fɔ Rom 5:​12.) Fɔ ɛp wi fɔ ɔndastand wetin mek Adam ɛn Iv dɛn pikin dɛnsɛf gɛt sin, lɛ wi si dis ɛgzampul. Imagin se pɔsin de yuz pan we dɛnt fɔ bek bred. Di bred sef go gɛt dɛnt. Adam bin gɛt sin we i nɔ obe Gɔd. So bikɔs wi na Adam in pikin dɛn wi ɔl gɛt sin, ɔ gɛt di sem “dɛnt” we i bin gɛt. Ɛn bikɔs wi ɔl gɛt sin na dat mek wi de ol ɛn day.—Lɛta Fɔ Rom 3:​23; luk Ɛndnot 9 na pej 210.

8, 9. (a) Wetin Setan bin want mek Adam ɛn Iv biliv? (b) Wetin mek Jiova nɔ bin kil di rebɛl dɛn wantɛm wantɛm?

⁸ Setan bin bigin chalenj Jiova we i mek Adam ɛn Iv dɛn nɔ obe Gɔd. I bin want mek Adam ɛn Iv dɛn biliv se Jiova de lay, ɛn in na bad rula we nɔ sabi wetin fayn fɔ dɛn. Setan bin de se mɔtalman nɔ nid Gɔd fɔ tɛl dɛn wetin fɔ du, ɛn Adam ɛn Iv dɛn fɔ disayd fɔ dɛnsɛf wetin gud ɛn bad. So, wetin Jiova go du? I bin fɔ dɔn kil dɛn wantɛm wantɛm ɛn fɔgɛt bɔt di tranga-yes we dɛn mek. Bɔt yu tink se dat fɔ dɔn pruv se Setan de lay? Nɔ-o.

⁹ Jiova nɔ bin kil dɛn wantɛm wantɛm. Bifo dat, i alaw mɔtalman fɔ rul dɛnsɛf. Dis go sho klia wan se Setan de lay ɛn na Jiova sabi wetin gud fɔ mɔtalman. Wi go lan mɔ bɔt dat na Chapta 11. Wetin yu tink bɔt di tin we Adam ɛn Iv bin disayd fɔ du? Yu tink se i bin rayt fɔ lɛ dɛn biliv Setan ɛn nɔ obe Gɔd? Na Jiova gi Adam ɛn Iv ɔltin we dɛn bin gɛt. I bin gi dɛn pafɛkt layf, fayn ples fɔ de, ɛn wok we dɛn bin de ɛnjɔy. Bɔt Setan nɔ bin dɔn ɛva du ɛnitin gud fɔ dɛn. If yu bin de de, wetin yu bin fɔ dɔn du?

10. Us impɔtant tin wi ɔl gɛt fɔ disayd fɔ du?

¹⁰ Semweso, wisɛf gɛt fɔ disayd udat wi go obe. Wetin wi disayd go mek wi gɛt layf ɔ wi day. Wi kin disayd fɔ obe Jiova as di wan we gɛt rayt fɔ rul wi ɛn ɛp fɔ sho se Setan na layman. Ɔ wi kin disayd fɔ mek Setan rul wi. (Sam 73:​28; rid Prɔvabs 27:​11.) Bɔku pipul dɛn nɔ de obe Gɔd. Infakt, nɔto Gɔd de rul di wɔl. Bɔt if nɔto Gɔd, na udat?

UDAT DE RUL DI WƆL?

11, 12. (a) Wetin wi lan frɔm di prɔmis we Setan bin mek to Jizɔs? (b) Us skripchɔ dɛn de sho se na Setan de rul di wɔl?

¹¹ Jizɔs bin sabi udat rili de rul di wɔl. Wantɛm, Setan “sho am ɔl dɛn neshɔn na [di] wɔl wit ɔl dɛn pawa ɛn jɛntri.” Dɔn Setan prɔmis Jizɔs se: “A go gi yu ɔl dɛn tin ya, if yu nil dɔŋ ɛn se mi na yu masta.” (Matyu 4:​8, 9; Lyuk 4:​5, 6) Aks yusɛf dis kwɛstyɔn, ‘If nɔto Setan bin gɛt ɔl dɛn gɔvmɛnt dɛn, i bin fɔ dɔn se i go gi dɛn to Jizɔs?’ Nɔ, i nɔ bin fɔ dɔn se so. Na Setan gɛt ɔl dɛn gɔvmɛnt dɛn.

¹² Sɔntɛm yu go de wɔnda: ‘Aw Setan go bi di wan we de rul di wɔl? Nɔto di Ɔlmayti Gɔd, Jiova, mek di wan ol wɔl?’ (Rɛvɛleshɔn 4:​11) Yɛs, na in, bɔt Jizɔs bin tɔk klia wan se “di wan we de rul dis wɔl” na Setan. (Jɔn 12:​31; 14:​30; 16:​11) Di apɔsul Pɔl bin kɔl Setan “di gɔd we de na dis wɔl.” (Sɛkɔn Lɛta Fɔ Kɔrint 4:​3, 4, NW) Di apɔsul Jɔn bin rayt se na “Setan de rul di ol wɔl.”—Jɔn In Fɔs Lɛta 5:​19.

SETAN IN WƆL NƆ GO DE IGEN

13. Wetin mek wi nid Paradays?

¹³ Di wɔl de bad mɔ ɛn mɔ ɛvride. Wi de si fɛt-fɛt, kɔrɔpshɔn, ipokrit, ɛn plɛnti ɔda bad bad tin dɛn ɔlsay na di wɔl. Ilɛk aw mɔtalman tray, dɛn nɔ go ebul fɔ pul ɔl dɛn prɔblɛm dɛn ya. Bɔt i nɔ de fa igen, Gɔd go dɔnawe wit dis wikɛd wɔl na in wɔ we dɛn kɔl Amagɛdɔn, ɛn i go mek di wɔl bi Paradays.—Rɛvɛleshɔn 16:​14-16; luk Ɛndnot 10 na pej 210.

14. Udat Gɔd bin dɔn pik fɔ bi Kiŋ na in Kiŋdɔm? Wetin di Baybul bin dɔn tɔk bɔt Jizɔs?

¹⁴ Jiova bin dɔn pik Jizɔs fɔ bi di Kiŋ na in Kiŋdɔm we go de na ɛvin. Trade trade, di Baybul bin dɔn tɔk se na Jizɔs go rul as “prins ɔf pis” ɛn in Kiŋdɔm go de sote go. (Ayzaya 9:​6, 7) Jizɔs bin tich in disaypul dɛn fɔ pre fɔ da Kiŋdɔm de, we i se: “Lɛ yu Kiŋdɔm kam. Mek wetin yu want, bi na di wɔl lɛk aw i de bi na ɛvin.” (Matyu 6:​10, NW) Insay Chapta 8, wi go lan aw Gɔd in Kiŋdɔm go pul ɔl di gɔvmɛnt dɛn na di wɔl ɛn put in yon gɔvmɛnt. (Rid Daniɛl 2:​44.) Dɔn Gɔd in Kiŋdɔm go mek di wɔl bi Paradays.—Luk Ɛndnot 11 na pej 211.

DI NYU WƆL NƆ DE FA IGEN!

15. Wetin na di “nyu wɔl”?

¹⁵ Di Baybul prɔmis se: “Wi de wet fɔ di nyu ɛvin ɛn di nyu wɔl we Gɔd dɔn tɔk se wi go gɛt; ɔlman go de du wetin rayt insay da wɔl de.” (Pita In Sɛkɛn Lɛta 3:​13; Ayzaya 65:​17) Sɔm tɛm dɛn de, we di Baybul tɔk bɔt “di wɔl,” na di pipul dɛn we de de i de tɔk bɔt. (Sam 96:​1) So di “nyu wɔl” we di Baybul tɔk bɔt, min di pipul dɛn we Gɔd dɔn blɛs ɛn we de obe am.

16. Us wɔndaful gift Gɔd go gi di wan dɛn we go de na di nyu wɔl? Wetin wi go du fɔ gɛt dis gift?

¹⁶ Jizɔs prɔmis se di wan dɛn we go de na Gɔd in nyu wɔl go gɛt “layf we go de sote go.” (Mak 10:​30) Wetin wi fɔ du fɔ gɛt dis gift? Duya rid Jɔn 3:​16 ɛn 17:​3 fɔ fɛn di ansa. Lɛ wi si naw wetin di Baybul se bɔt aw layf go tan lɛk na Paradays.

17, 18. Aw wi no se pis go de ɔlsay na di wɔl ɛn wi go fil sef?

¹⁷ Wɔ, pipul dɛn we de brok lɔ, ɛn ɔl ɔda bad bad tin dɛn nɔ go de igen. No wikɛd pɔsin nɔ go de na di wɔl igen. (Sam 37:​10, 11) Gɔd go “mek ɔl udat de fɛt na [di] wɔl, lɛf fɔ fɛt.” (Sam 46:​9; Ayzaya 2:​4) Di wɔl go ful-ɔp wit pipul dɛn we lɛk Gɔd ɛn we de obe am. Pis go de sote go.—Sam 72:​7.

¹⁸ Bad tin nɔ go apin to Jiova in pipul dɛn. Di tɛm we di Izrɛlayt dɛn bin de obe Gɔd, i bin de sev ɛn protɛkt dɛn. (Lɛvitikɔs 25:​18, 19) Insay Paradays, wi nɔ go fred ɛnitin. Wi go fil sef ɔltɛm!—Rid Ayzaya 32:​18; Mayka 4:​4.

19. Wetin mek wi shɔ se bɔku it go de insay Gɔd in nyu wɔl?

¹⁹ Tin fɔ it go de plɛnti. “It go gro ɔlsay na di land, ɛn ivin pantap dɛn il dɛn ɛn dɛn mawnten.” (Sam 72:​16) Jiova, we na wi Gɔd “we wi de wɔship go blɛs wi” ɛn “di fam dɛn go gɛt bɔku tin fɔ avɛst.”—Sam 67:​6.

20. Aw wi no se di wɔl go bi Paradays?

²⁰ Di wan ol wɔl go bi Paradays. Pipul dɛn go gɛt fayn fayn os ɛn gadin dɛn. (Rid Ayzaya 65:​21-24; Rɛvɛleshɔn 11:​18.) Di wan ol wɔl go fayn jɔs lɛk di gadin we bin de na Idɛn. Jiova go gi wi ɔl wetin wi nid. Di Baybul tɔk bɔt Jiova se: “Yu opin yu an ɛn satisfay ɔltin we gɛt layf.”—Sam 145:​16, NW.

21. Aw wi no se pis go de bitwin mɔtalman ɛn animal dɛn?

²¹ Pis go de bitwin mɔtalman ɛn animal dɛn. Animal dɛn nɔ go du bad to mɔtalman igen. Smɔl pikin dɛnsɛf go fil sef, ilɛksɛf dɛn de nia bad bad animal dɛn we dɛn de fred tide.—Rid Ayzaya 11:​6-9; 65:​25.

22. Wetin Jizɔs go du fɔ di wan dɛn we sik?

²² Sik nɔ go de igen. We Jizɔs bin de na di wɔl, i mɛn bɔku pipul dɛn we bin sik. (Matyu 9:​35; Mak 1:​40-42; Jɔn 5:​5-9) Bɔt as Kiŋ na Gɔd in Kiŋdɔm, Jizɔs go mɛn ɔlman. Nɔbɔdi nɔ go ɛva se: “A nɔ wɛl.”—Ayzaya 33:​24; 35:​5, 6.

23. Wetin Gɔd go du fɔ di wan dɛn we dɔn day?

²³ Di wan dɛn we dɔn day go gɛt layf bak. Gɔd dɔn prɔmis se i go gi layf to bɔku bɔku pipul dɛn we dɔn day. Di Baybul se: “Gɔd go mek ɔlman, gud ɔ bad, rayz frɔm dɛn grev.”—Rid Jɔn 5:​28, 29; Di Apɔsul Dɛn Wok [Akt] 24:​15.

24. Aw yu go fil if yu de na Paradays?

²⁴ Wi ɔl gɛt fɔ disayd if wi go lan bɔt Jiova ɛn sav am ɔ wi go jɔs du wetin wi want fɔ du. If wi disayd fɔ sav Jiova wi go gɛt wɔndaful op fɔ tumara bambay. We wan man aks Jizɔs fɔ mɛmba am afta i day, Jizɔs bin prɔmis am se: “Yu go de wit mi na Paradays.” (Lyuk 23:​43, NW) Lɛ wi lan mɔ bɔt Jizɔs ɛn aw i go mek Gɔd in wɔndaful prɔmis dɛn, apin.