Rɛfrɛns dɛn fɔ Layf ɛn Prichin Wok Mitin Buk
MACH 1-7
DI VALYU TIN DƐN FRƆM GƆD IN WƆD | DI NƆMBA DƐM 7-8
“Lɛsin dɛn we Wi Kin Lan Frɔm di Izrɛlayt dɛn Kamp”
it-1-E pej 497, par. 3
Kɔngrigeshɔn
Insay di Izrɛlayt dɛn tɛm, bɔku tɛm na di bigman dɛn bin de disayd wetin di pipul dɛn fɔ du. (Ɛzr 10:14) So na di “bigwan dɛn na dɛn famili” dɛn bin gi dɛn prɛzɛnt dɛn afta we dɛn dɔn fɔ mek di tabanakul. (Nɔm 7:1-11) Insay Nɛimaya in tɛm bak, di Prist dɛn, Livayt dɛn ɛn di “pipul dɛn lida dɛn” bin “put dɛn stamp na di pepa” fɔ sho se dɛn gri. (Nɛi 9:38–10:27) We di Izrɛlayt dɛn bin de na di wildanɛs, 250 ɔda “Izrɛlayt man dɛn we ɔlman no se na lida dɛn” bin jɔyn Kora, Detan, Abiram, ɛn On fɔ chalenj Mozis ɛn Erɔn. (Nɔm 16:1-3) Mozis bin du wetin Jiova tɛl am we i pik 70 bigman dɛn pan di Izrɛlayt dɛn fɔ ɛp am fɔ “tot di lod we di pipul dɛn gɛt” we in wangren nɔ go ebul fɔ tot. (Nɔm 11:16, 17, 24, 25) Lɛvitikɔs 4:15 tɔk bɔt di “big wan dɛn pan di pipul dɛn” ɛn i tan lɛk se di wan dɛn we bin de bifo di pipul dɛn na di bigman dɛn na di famili dɛn ɛn di jɔj dɛn.—Nɔm 1:4, 16; Jɔs 23:2; 24:1.
it-2-E pej 796, par. 1
Rubɛn
Insay di Izrɛlayt dɛn kamp, di Rubɛnayt dɛn bin de midul Simiɔn ɛn Gad dɛn trayb dɛn ɛn dɛn bin de na di sawt pat na di tabanakul. We dɛn bin de waka, Rubɛn dɛn kamp bin de biɛn Juda, Isaka ɛn Zubyulɔn dɛn kamp dɛn. (Nɔm 2:10-16; 10:14-20) Di sem aw di trayb dɛn bin arenj we dɛn bin de waka, na di sem we dɛn bin de we dɛn bin gi dɛn gift ɔfrin dɛn di de we dɛn opin di tabanakul.—Nɔm 7:1, 2, 10-47.
w04-E 8/1 pej 25, par. 1
Men Pɔynt dɛn Frɔm di Baybul Buk we Nem Di Nɔmba Dɛm
8:25, 26. Fɔ mek bɔku pipul dɛn wok as Livayt dɛn ɛn bikɔs dɛn bin de tink bɔt di ol wan dɛn, lɔ bin de se di ol wan dɛn fɔ ritaya, dɛn nɔ nid fɔ kɔntinyu fɔ wok. Bɔt if dɛn want, dɛn kin ɛp di ɔda Livayt dɛn wit dɛn wok. Tide, pan ɔl we ej nɔ de fɔ mek pɔsin stɔp fɔ prich, di prinsipul we de biɛn dis lɔ de tich wi impɔtant lɛsin. If ol ej mek Kristian nɔ ebul du sɔm wok dɛn we i fɔ du, i kin du wok dɛn we in trɛnk alaw am fɔ du.
Luk Gud Wan fɔ di Valyu Tin dɛn na Gɔd in Wɔd
it-1-E pej 835
Fɔs Pikin dɛn ɛn di Fɔs Animal Dɛn
Bikɔs na di Izrɛlayt dɛn fɔs bɔypikin dɛn bin fɔ lid dɛn famili dɛn, na dɛn bin tinap fɔ di wan ol neshɔn. Infakt, Jiova bin kɔl di wan ol neshɔn in “fɔs-bɔy-pikin,” ɛn dɛn bi in fɔs bɔypikin bikɔs ɔf di agrimɛnt we i mek wit Ebraam. (Ɛks 4:22) Bikɔs Jiova bin sev dɛn layf, i bin tɛl dɛn se “ɔl di fɔs-bɔy-pikin ɛn di fɔs man animal dɛn” we di Izrɛlayt dɛn gɛt nain yon. (Ɛks 13:2) So na Gɔd bin gɛt ɔl di fɔs bɔypikin dɛn.
MACH 8-14
DI VALYU TIN DƐN FRƆM GƆD IN WƆD | DI NƆMBA DƐM 9-10
“Aw Jiova De Lid In Pipul Dɛn?”
it-1-E pej 398, par. 3
Kamp
Fɔ mek dis kayn big kamp kɔmɔt wan ples go ɔdasay (insay Nɔmbaz 33 Mozis bin tɔk bɔt 40 difrɛn say dɛn we di kamp bin go) bin sho se dɛn rili ɔganayz. Wans di klawd kɔntinyu fɔ de oba di tabanakul, di kamp nɔ de go nɔsay. We de klawd muv, di kamp de muv. “Na aw PAPA GƆD [“Jiova,” NWT] tɛl dɛn na so dɛn de waka ɛn kamp.” (Nɔm 9:15-23) Dɛn bin de yuz tu silva trɔmpɛt dɛn fɔ tɛl ɔlman na di kamp wetin Jiova se. (Nɔm 10:2, 5, 6) Di spɛshal we aw dɛn bin de blo di trɔmpɛt bin de mek di Izrɛlayt dɛn no se dɛn fɔ muv. Di fɔstɛm we dis apin na “afta i dɔn tu ia we dɛn lɛf Ijipt, [1512 bifo Krays] na di de we mek twɛnti, na di sɛkɛn mɔnt.” Di agrimɛnt bɔks bin de bifo ɛn Juda, Isaka, ɛn Zɛbyulɔn dɛn kamp dɛn bin de biɛn am. Di Gashɔnayt ɛn di Mɛrarayt dɛn bin de biɛn dɛn wit dɛn yon tin dɛn we dɛn fɔ kia fɔ na di tabanakul. Rubɛn, Simiɔn ɛn Gad dɛn trayb dɛn bin de biɛn di Gashɔnayt dɛn ɛn di Mɛrarayt dɛn. Afta dɛn di Koathayt dɛn bin de biɛn dɛn wit di tɛnt, dɔn di tri trayb dɛn we na Ifrem, Manasɛ, ɛn Bɛnjamin bin de biɛn di Koathayt dɛn. Di las grup we bin de biɛn dɛn na Dan, Asha, ɛn Naftali dɛn trayb dɛn. So di tu trayb dɛn we bin bɔku ɛn pawaful na dɛn bin de bifo ɛn biɛn.—Nɔm 10:11-28.
w11-E 4/15 pej 4 ɛn pej 5
Yu De Si Klia Wan se na Gɔd De Dayrɛkt Wi?
Aw wi go sho se wi gladi fɔ di we aw Gɔd de dayrɛkt wi? Apɔsul Pɔl bin se: “Una obe di wan dɛn we de bifo una ɛn una rɛdi fɔ du wetin dɛn tɛl una.” (Ibru 13:17) Fɔ du dis nɔ kin izi ɔltɛm. Fɔ ɛgzampul, imajin se yu na Izrɛlayt insay Mozis in tɛm. Di faya ɔ klawd we Jiova bin de yuz fɔ lid una stɔp afta una dɔn waka fɔ sɔntɛm. Aw lɔng i go de de? Wan de? Wan wik? Sɔm mɔnt? Yu go de wɔnda, ‘I rili mek sɛns fɔ mek a skata ɔl mi tin dɛn?’ Sɔntɛm fɔs, yu go jɔs pul di tin dɛn we yu nid. Bɔt afta sɔm dez go dɔn pas yu go dɔn taya fɔ de fɛn fɛn, so yu disayd fɔ skata ɔltin. Bɔt we yu dɔn skata yu tin dɛn dɔn, yu si di klawd ɔ faya bigin muv ɛn yu go nid fɔ bigin pak bak. Dat nɔto bin izi tin fɔ du. Bɔt pan ɔl we i nɔ bin izi “di Izrɛlayt dɛn kin bigin waka.”—Nɔm. 9:17-22.
So wetin wi kin du we Jiova tɛl wi fɔ du sɔntin? Wi kin tray fɔ fala am wantɛm wantɛm? Ɔ wi go kɔntinyu fɔ du tin dɛn aw wi bin dɔn yus fɔ du am? Yu sabi di nyu dayrɛkshɔn dɛn bɔt aw fɔ kɔndɔkt Baybul stɔdi dɛn, aw fɔ prich to pɔsin we de tɔk ɔda langwej, fɔ du famili wɔship ɔltɛm, aw fɔ wok wit di Ɔspitul Lezɔn Kɔmiti Dɛn, ɔ aw fɔ biev we wi go kɔnvɛnshɔn dɛn? Wi kin sho bak se wi gladi fɔ di we aw Jiova de dayrɛkt wi we wi gri fɔ tek advays. We wi want fɔ disayd fɔ du impɔtant tin dɛn, wi nɔ kin abop pan di sɛns we wi gɛt, bɔt wi kin abop pan Jiova ɛn in ɔganayzeshɔn fɔ dayrɛkt wi. Jɔs lɛk aw pikin de rɔn go to in mama ɛn papa fɔ protɛkt am we big briz de blo, na so wisɛf de rɔn go to Jiova in ɔganayzeshɔn we wi gɛt prɔblɛm dɛn we kin tan lɛk big briz.
Luk Gud Wan fɔ di Valyu Tin dɛn na Gɔd in Wɔd
it-1-E pej 199, par. 3
Fɔ Mit Togɛda
Wetin Mek I impɔtant fɔ Mit Togɛda? Di Pasova we di Izrɛlayt dɛn bin de gɛt ɛni ia ɛp wi fɔ si se i rili impɔtant fɔ de gɛda fɔ lan bɔt Jiova. Dɛn bin fɔ kil ɛni man we klin, ɛn we nɔ travul, bɔt we nɔ gri fɔ go fɔ di Pasova. (Nɔm 9:9-14) We Kiŋ Ɛzikaya bin kɔl di pipul dɛn na Juda ɛn Izrɛl fɔ kam na Jerusɛlɛm fɔ sɛlibret di Pasova, dis na pat pan wetin i bin se: “Duya una Izrɛl pipul dɛm tɔn bak to PAPA GƆD [“Jiova,” NWT] . . . Una nɔ stif una nɛk lɛk una Papa dɛn, bɔt gi unasɛf to PAPA GƆD [“Jiova,” NWT]. Ɛn kam to in Oli ples we i dɔn mek oli sote go ɛn sav PAPA GƆD [“Jiova,” NWT] una Gɔd mek i at we dɔn wam fɔ una go kol. . . . Bikɔs PAPA GƆD [“Jiova,” NWT] una Gɔd i de mɛmba ɛn i gɛt sɔri at ɛn i nɔ go tɔn in fes kɔmɔt to una if una tɔn bak to am.” (2Kr 30:6-9) We pɔsin nɔ gri fɔ go, dat bin de sho se i dɔn kɔmɔt biɛn Gɔd. Pan ɔl we Kristian dɛn nɔ de sɛlibret di Pasova, Pɔl bin ɛnkɔrej dɛn nɔ fɔ lɛf fɔ de gɛda wit Gɔd in pipul dɛn we i se: “Ɛn lɛ wi de tink bɔt wi kɔmpin dɛn so dat wi go ɛp dɛn fɔ sho lɔv ɛn du fayn tin dɛn, ɛn mek wi nɔ lɛf fɔ de mit togɛda lɛk aw sɔm dɔn yus fɔ du, bɔt mek wi de ɛnkɔrej wi kɔmpin dɛn, mɔ we una de si se di de de kam nia.”—Ibr 10:24, 25; rid CONGREGATION.
MACH 15-21
DI VALYU TIN DƐN FRƆM GƆD IN WƆD | DI NƆMBA DƐM 11-12
“Wetin Mek Wi Fɔ Avɔyd di Abit fɔ De Grɔmbul?”
w01-E 6/15 pej 17, par. 20
Una Nɔ Bi Pipul dɛn we De Fɔgɛt Wetin Una De Yɛri
20 Bɔku Kristian dɛn nɔ go ɛva put an pan mami ɛn dadi biznɛs di we aw Gɔd nɔ want. Bɔt wi nid fɔ tek tɛm mek wi nɔ alaw wisɛf fɔ gɛt di abit fɔ de grɔmbul ɛn pwɛl wi padi biznɛs wit Gɔd. Pɔl bin wɔn wi se: “Ɛn lɛ wi nɔ tɛst Jiova, lɛk aw sɔm pan dɛn [di Izrɛlayt dɛn] bin tɛst am we mek snek dɛn kil dɛn. Ɛn lɛ wi nɔ de grɔmbul, lɛk aw sɔm pan dɛn bin de grɔmbul we mek di wan we de kil, kil dɛn.” (1 Kɔrintians 10:9, 10) Di Izrɛlayt dɛn bin grɔmbul pan Mozis ɛn Erɔn, bɔt nɔto pan dɛn nɔmɔ, dɛn bin ivin grɔmbul pan Gɔd fɔ di mana we i yuz mirekul fɔ gi dɛn. (Di Nɔmba Dɛm 16:41; 21:5) Fɔ se di aw Jiova bin vɛks we dɛn bin de grɔmbul nɔ rich di aw i bin vɛks we dɛn bin du mami ɛn dadi biznɛs di we aw i nɔ want? Di Baybul tɛl wi se snek dɛn bin kil bɔku pan di wan dɛn we bin grɔmbul. (Di Nɔmba Dɛm 21:6) Bifo dis tɛm, i pas 14,700 pipul dɛn we day bikɔs dɛn bin grɔmbul. (Di Nɔmba Dɛm 16:49) So lɛ wi nɔ tɛst di peshɛnt we Jiova de peshɛnt wit wi bay we nɔ de trit di tin dɛn we i de gi wi wit rɛspɛkt.
w06-E 7/15 pej 15, par. 7
‘Stɔp fɔ De Grɔmbul’
7 Di Izrɛlayt dɛn bin rili chenj! Bikɔs dɛn bin gladi fɔ di pul we Jiova pul dɛn na Ijipt ɛn mek dɛn pas na di Rɛd Si, dɛn bin siŋ fɔ prez am. (Ɛksodɔs 15:1-21) Bɔt we tin nɔ bin izi fɔ dɛn na di wildanɛs ɛn bikɔs dɛn bin de fred di Kenanayt dɛn, dat bin mek di tɛnki we Gɔd in pipul dɛn bin gɛt chenj ɛn dɛn nɔ bin gladi igen. Bifo dɛn tɛl Gɔd tɛnki fɔ di fri we i fri dɛn, dɛn bin de blem am bikɔs dɛn fil se dɛn nɔ de gɛt wetin dɛn fɔ gɛt. So di grɔmbul we dɛn bin de grɔmbul bin sho se dɛn nɔ gladi fɔ di tin dɛn we Jiova bin de du fɔ dɛn. Na dat mek Jiova bin se: “Dis Kɔmyuniti so bad, dɛn jɛs de grɔmbul pan mi.”—Di Nɔmba Dɛm 14:27; 21:5.
it-2-E pej 719, par. 4
Plaba
Grɔmbul. Grɔmbul de pwɛl pɔsin in at ɛn mek i fil bad. I nɔ te we di Izrɛlayt dɛn kɔmɔt na Ijipt, nain dɛn bigin grɔmbul pan Jiova ɛn bigin fɔ fɛn fɔlt pan di wan dɛn we Jiova dɔn pik fɔ lid dɛn we na Mozis ɛn Erɔn. (Ɛks 16:2, 7) Leta dɛn grɔmbul bin mek Mozis in at pwɛl te i se i want fɔ day. (Nɔm 11:13-15) Pɔsin we de grɔmbul kin lɔs in layf. Jiova bin si di grɔmbul we dɛn bin de grɔmbul pan Mozis lɛk se na In dɛn bin de grɔmbul pan bikɔs na in bin de rul dɛn. (Nɔm 14:26-30) Bɔku pipul dɛn bin day bikɔs dɛn bin lɛk fɔ grɔmbul.
Luk Gud Wan fɔ di Valyu Tin dɛn na Gɔd in Wɔd
it-2-E pej 309
Mana
Aw I Bin De? Mana bin “wayt lɛk korianda sid,” i bin tan lɛk di gɔm we de kɔmɔt pan tik, i bin transperɛnt ɛn i bin fiba pal. Dɛn kɔmpia in tes to “wefa we dɛn tek ɔni mek” ɔ lɛk “sɔntin we dɛn tek ɔyl mek.” Afta dɛn gren am na grenin ston ɔ bit am na mataodo, dɛn kin bɔyl am ɔ bek am as kek.—Ɛks 16:23, 31; Nɔm 11:7, 8.
MACH 22-28
DI VALYU TIN DƐN FRƆM GƆD IN WƆD | DI NƆMBA DƐM 13-14
“Fet De Mek Wi Gɛt Maynd”
w06-E 10/1 pej 16 ɛn pej 17, par. 5 ɛn par. 6
Fet ɛn di Fred We dɛn Bin De Gɔd Mek dɛn Gɛt Maynd
5 Bɔt di tu spay dɛn, we na Jɔshwa ɛn Kelɛb bin rili want fɔ go insay di Prɔmis Land. Dɛn se “dɛn go dɔnawe wit di pipul dɛn” na Kenan. “Dɛn se di pipul dɛn nɔ gɛt natin fɔ kɔba dɛn, bɔt dɛn di Izrɛlayt dɛn gɛt PAPA GƆD [“Jiova,” NWT] wit dɛn so dɛn nɔ fɔ fred di pipul dɛn.” (Di Nɔmba Dɛm 14:9) Fɔ se Jɔshwa ɛn Kelɛb bin de op fɔ tin we nɔ mek sɛns? Nɔ, nɔto so i bi! Dɛn ɛn di ɔda Izrɛlayt dɛn bin dɔn si aw Jiova yuz di tɛn bad bad tin dɛn fɔ disgrez Ijipt we na bin pawaful neshɔn ɛn dɛn gɔd dɛn. Ɛn dɛn bin si we Jiova mek Fɛro ɛn in sojaman dɛn drawn na di Rɛd Si. (Sam 136:15) Dis sho klia wan se, nid nɔ bin de fɔ mek di tɛn spay dɛn ɛn di ɔda pipul dɛn fred. Jiova bin rili vɛks ɛn tɔk se: “Dɛn nɔ de gri fɔ biliv mi pan ɔl di wɔnda we a dɔn ple we dɛn dɔn si.”—Di Nɔmba Dɛm 14:11.
6 Jiova tɔk wetin na di prɔblɛm, di Izrɛlayt dɛn bin de fred bikɔs dɛn nɔ gɛt fet. Fɔ tru, fet gɛt sɔntin fɔ du wit kɔrej, na dat mek we apɔsul Jɔn bin de rayt to di Kristian Kɔngrigeshɔn ɛn dɛn padi biznɛs wit Jiova i se: “Di tin we dɔn mek wi win di wɔl na wi fet.” (1 Jɔn 5:4) Tide, i pas siks milyɔn Jiova Witnɛs dɛn we gɛt fet lɛk Jɔshwa ɛn Kelɛb we de prich di gud nyuz bɔt Gɔd in Kiŋdɔm ɔlsay na di wɔl, yɔŋ wan dɛn, ol wan dɛn, di wan dɛn we strɔng ɛn di wan we nɔ strɔng. Nɔn pan dɛn ɛnimi dɛn nɔ ebul fɔ stɔp dis pawaful ami we gɛt maynd.—Romans 8:31.
Luk Gud Wan fɔ di Valyu Tin dɛn na Gɔd in Wɔd
it-1-E pej 740
Di Land we Gɔd Bin Gi di Izrɛlayt Dɛn
Di land we Gɔd bin gi di Izrɛlayt dɛn bin rili fayn. We Mozis bin sɛn di spay dɛn fɔ go wach di Prɔmis Land, dɛn bin kam wit sɔntin dɛn we de gro de, lɛk fig ɛn ɔda frut dɛn. Di bɔnch grep dɛn bin rili big so na tu man dɛn bin put am na dɛn sholda. Pan ɔl we dɛn bin fred bikɔs dɛn nɔ gɛt strɔng fet, dɛn bin tɔk se: “Na land we gud ɛn i de bia bɔku tin.”—Nɔm 13:23, 27.
MACH 29–EPRIL 4
DI VALYU TIN DƐN FRƆM GƆD IN WƆD | DI NƆMBA DƐM 15-16
“Tek Tɛm Mek di Abit fɔ Mek Prawd ɛn fɔ Fil se Yu Sabi Ɔltin Nɔ Ambɔg Yu”
w11-E 9/15 pej 27, par. 12
Jiova Sabi Yu?
12 Pan ɔl dat, we di Izrɛlayt dɛn bin de na rod fɔ go na di Prɔmis Land, Kora bin si sɔntin dɛn we i bin fil se na prɔblɛm dɛn pan di we aw Gɔd bin arenj fɔ du tin. Ɛn 250 bigman dɛn bin jɔyn Kora fɔ tray fɔ mek dɛn chenj dɛn de. Kora ɛn di ɔda man dɛn go dɔn de fil se dɛn padi biznɛs wit Jiova nɔ gɛt wan prɔblɛm. Dɛn tɛl Mozis se: I “dɔn pasmak. Dɛn se ɔlman na Izrɛl oli ɛn PAPA GƆD [“Jiova,” NWT] de wit dɛnsɛf.” (Nɔm. 16:1-3) Dɛn bin fil se dɛn sabi ɔltin ɛn dɛn bin prawd. Mozis bin tɛl dɛn se: “PAPA GƆD [“Jiova,” NWT] go sho dɛn udat nain yon.” (Rid Di Nɔmba Dɛm 16:5.) Bifo di nɛks de de dɔn, Kora ɛn ɔl di wan dɛn we jɔyn am fɔ mek trangayes bin day.—Nɔm. 16:31-35.
w11-E 9/15 pej 27, par. 11
Jiova Sabi Yu?
11 Mozis ɛn Kora bin rili difrɛn we i kam to aw dɛn bin de sho rɛspɛkt fɔ Jiova in arenjmɛnt ɛn wetin i de disayd fɔ du. Di we aw dɛn bin de du tin gɛt sɔntin fɔ du wit di we aw Jiova bin de si dɛn. Kora na bin Koathayt we kɔmɔt na Livay in trayb, i bin gɛt bɔku wok dɛn, ɛn i go dɔn si we Jiova sev di Izrɛlayt dɛn na di Rɛd Si, i bin sɔpɔt Jiova we i bin kil di trangayes Izrɛlayt dɛn na Mawnt Saynay, ɛn i bin gɛt wok fɔ du we dɛn bin de transfa di agrimɛnt bɔks. (Ɛks. 32:26-29; Nɔm. 3:30, 31) I bin dɔn de biɛn Jiova fɔ lɔng tɛm, ɛn bɔku pipul dɛn bin de si am as ɛgzampul.
Luk Gud Wan fɔ di Valyu Tin dɛn na Gɔd in Wɔd
w98-E 9/1 pej 20, par. 1 ɛn par. 2
Mek Shɔ se Yu Put di Tin dɛn we Impɔtant Bifo
Jiova bin si dis kes as tin we rili siriɔs. Di Baybul tɔk se “PAPA GƆD [“Jiova,” NWT] tɛl Mozis se ‘di man fɔ day.’” (Di Nɔmba Dɛm 15:35) Wetin mek Jiova bin si wetin dis man du as tin we rili siriɔs?
Di pipul dɛn bin gɛt siks dez fɔ gɛda wud, kuk, bruk, ɛn du ɔda tin dɛn. Di de we mek sɛvin na bin fɔ du tin dɛn we go mek dɛn gɛt tayt padi biznɛs wit Gɔd. Pan ɔl we i nɔ bin bad fɔ gɛda wud, i bin bad fɔ yuz da tɛm we dɛn dɔn se fɔ wɔship Jiova fɔ du dat. Pan ɔl we Kristian dɛn nɔ de ɔnda di Lɔ we Gɔd bin gi Mozis, wetin bin apin nɔ tich wi impɔtant lɛsin bɔt aw fɔ put wetin impɔtant fɔs?—Filipians 1:10.
EPRIL 5-11
DI VALYU TIN DƐN FRƆM GƆD IN WƆD | DI NƆMBA DƐM 17-19
“Mi Na [Una] Prɔpati”
w11-E 9/15 pej 13, par. 9
Lɛ Jiova Bi Yu Prɔpati
9 Tink bɔt di Livayt dɛn we nɔ bin gɛt prɔpati. Bikɔs di tin we bin impɔtant to dɛn na Jiova in wɔship, dɛn bin nid fɔ abop pan Jiova fɔ gi dɛn wetin dɛn nid. Na dat mek Jiova bin tɛl dɛn se: “Mi na [una] prɔpati.” (Nɔm. 18:20) Pan ɔl we wi nɔ de wok na di tɛmpul lɛk aw di prist ɛn di Livayt dɛn bin de du, wi kin falamakata dɛn we wi biliv se Jiova go gi wetin wi nid. Di abop we wi abop pan di pawa we Gɔd gɛt fɔ provayd fɔ wi, impɔtant mɔ naw as wi de go insay di las dez.—Rɛv. 13:17.
w11-E 9/15 pej 7, par. 4
Jiova Na Mi Prɔpati
4 Wetin da wok de bin min fɔ di Livayt dɛn? Jiova bin se i go bi dɛn prɔpati we min se bifo dɛn gɛt land as prɔpati, dɛn go gɛt spɛshal wok fɔ du fɔ am. Bikɔs “PAPA GƆD [“Jiova,” NWT] dɔn pik dɛn fɔ sav am” dɛn nɔ bin gɛt prɔpati. (Jɔs. 18:7) Di vas dɛn we de arawnd Di Nɔmba Dɛm 18:20 sho se i nɔ min se dɛn bin po. (Rid Di Nɔmba Dɛm 18:19, 21, 24.) Dɛn bin fɔ “gi di Livayt dɛn ɔl di tayth dɛn na Izrɛl as dɛn yon prɔpati fɔ di wok we dɛn de du.” Dɛn go gɛt 10 pasɛnt pan wetin di Izrɛlayt dɛn de plant ɛn dɛn animal dɛn as dɛn de bɔku. Di Livayt dɛnsɛf fɔ gi wan pat pan ɛni tɛn pat frɔm wetin di Izrɛlayt dɛn gi fɔ sɔpɔt di prist wok ɛn na “di bɛst pat” dɛn fɔ gi. (Nɔm. 18:25-29) Na di prist dɛn bin gɛt ɔl di “sakrifays we oli” we di Izrɛlayt dɛn bin de briŋ na Gɔd in os. So di prist dɛn bin gɛt gud rizin fɔ biliv se Jiova go provayd fɔ dɛn.
Luk Gud Wan fɔ di Valyu Tin dɛn na Gɔd in Wɔd
g02-E 6/8 pej 14, par. 2
Sɔl Na Tin We Valyu
Sɔl bin tinap bak fɔ sɔntin we go las. Na dat mek insay di Baybul dɛn bin de kɔl agrimɛnt we de las “sɔl agrimɛnt,” ɛn bɔku tɛm di wan dɛn we kin mek dis agrimɛnt kin it chɔp we gɛt sɔl togɛda fɔ sho se dɛn gri. (Di Nɔmba Dɛm 18:19) Insay di Lɔ we Gɔd bin gi Mozis, dɛn bin de put sɔl pan di sakrifays dɛn we dɛn bin de mek na di ɔlta, i bin min se di sakrifays nɔ gɛt bɔt ɔ sin.
EPRIL 12-18
DI VALYU TIN DƐN FRƆM GƆD IN WƆD | DI NƆMBA DƐM 20-21
“Kɔntinyu fɔ Bi Pɔsin we Ɔmbul Ilɛksɛf I Nɔ Izi”
Tray fɔ Bi Pɔsin We Ɔmbul ɛn Du Tin we Go Mek Jiova Gladi
19 If wi ɔmbul, wi go avɔyd fɔ mek bɔku mistek dɛn. Tink bak bɔt Mozis. Fɔ lɔng tɛm, Mozis bin ɔmbul, ɛn i bin du tin dɛn we bin de mek Jiova gladi. Bɔt afta we di Izrɛlayt dɛn dɔn waka na di ɛmti land usay pɔsin nɔ go ebul fɔ liv fɔ lɛk 40 ia, Mozis bin du sɔntin we mek i nɔ ɔmbul. In sista we sɔntɛm na in bin ɛp fɔ sev in layf na Ijipt, bin jɔs day, ɛn dɛn bin bɛr am na Kedɛsh. Ɛn naw di Izrɛlayt dɛn stat fɔ tɔk bak se dɛn nɔ de kia fɔ dɛn fayn. Dis tɛm dɛn bin de “grɔmbul pan Mozis” se dɛn nɔ gɛt wata. Di pipul dɛn bin grɔmbul pan ɔl we Jiova bin dɔn yuz Mozis fɔ du mirekul dɛn, ɛn pan ɔl we Mozis dɔn de lid dɛn fayn wan fɔ lɔng tɛm. Dɛn nɔ bin jɔs grɔmbul bikɔs bɛtɛ wata nɔ de bɔt dɛn grɔmbul bɔt Mozis lɛk se na in mek dɛn tɔsti.—Nɔm. 20:1-5, 9-11.
w19.02 pej 13, par. 20 ɛn par. 21
Tray fɔ Bi Pɔsin We Ɔmbul ɛn Du Tin we Go Mek Jiova Gladi
20 Wamat mek Mozis stɔp fɔ bi ɔmbul pɔsin. Pan ɔl we Jiova bin dɔn tɛl Mozis fɔ tɔk to di rɔk, Mozis bin vɛks we i de tɔk to di pipul dɛn ɛn i tɔk se in go mek mirekul. Dɔn i nak di rɔk tu tɛm ɛn bɔku wata bin kɔmɔt insay di rɔk. Prawd ɛn wamat bin mek i mek big big mistek. (Sam 106:32, 33) Fɔ da shɔt tɛm we Mozis nɔ bin ɔmbul, dat bin mek Jiova nɔ alaw am fɔ go na di land we I bin dɔn prɔmis dɛn.—Nɔm. 20:12.
21 Wi lan impɔtant lɛsin dɛn frɔm dis ɛgzampul. Fɔs, wi fɔ wok tranga wan fɔ kɔntinyu fɔ bi pɔsin we ɔmbul. If wi stɔp fɔ tray fɔ bi pɔsin we ɔmbul, i go izi fɔ lɛ wi mek prawd ɛn dat go mek wi tɔk sɔntin we nɔ mek sɛns. Sɛkɔn, strɛs kin mek i nɔ izi fɔ lɛ wi kɔntinyu fɔ bi pɔsin we ɔmbul, so wi fɔ tray tranga wan fɔ bi pɔsin we ɔmbul pan ɔl we sɔntin de mɔna wi.
w09-E 9/1 pej 19, par. 5
Jɔj We Tinap Tranga Wan fɔ Wetin Rayt
Fɔs, Gɔd nɔ bin tɛl Mozis fɔ tɔk to di pipul dɛn, wi nɔ go se naw fɔ mek i kɔl dɛn rebɛl dɛn. Sɛkɔn, Mozis ɛn Erɔn nɔ bin prez Gɔd. Gɔd bin tɛl dɛn se: “Una nɔ . . . sho di Izrɛlayt dɛn se a oli.” (Vas 12) We Mozis se dɛn “go mek lɛ wata kɔmɔt,” Mozis bin tɔk lɛk se na in ɛn Erɔn go pafɔm mirekul fɔ lɛ wata kɔmɔt nɔto Gɔd. Tɔd, Jiova jɔj dɛn di sem we lɛk aw i bin dɔn jɔj ɔda pipul dɛn. Gɔd nɔ bin gri fɔ mek di wan dɛn we bin dɔn mek trangayes ɛnta na Kenan, so na di sem tin i bin du wit Mozis ɛn Erɔn. (Di Nɔmba Dɛm 14:22, 23) Fɔt, na Mozis ɛn Erɔn bin de lid di Izrɛlayt dɛn. Gɔd de ɛkspɛkt mɔ frɔm di wan dɛn we i gi wok fɔ du.—Lyuk 12:48.
Luk Gud Wan fɔ di Valyu Tin dɛn na Gɔd in Wɔd
Yu De Si Ɔda Pipul dɛn Prɔblɛm ɛn Mistek di We Aw Jiova De Si Am?
12 Jiova bin fɔ dɔn pɔnish Erɔn wantɛm wantɛm fɔ dɛn mistek ya. Bɔt i nɔ du dat, bikɔs i no se Erɔn nɔto bad pɔsin. I go bi se Erɔn bin mek dɛn mistek ya bikɔs i bin alaw ɔda pipul dɛn ɛn di tin dɛn we de apin rawnd am, fɔ push am fɔ du wetin nɔ rayt. Bɔt we dɛn bin tɛl am bɔt in mistek dɛn, i bin gri ɛn sɔpɔt di tin we Jiova bin disayd fɔ du. (Ɛks. 32:26; Nɔm. 12:11; 20:23-27) Jiova bin disayd fɔ luk di kayn fet we Erɔn bin gɛt ɛn di we aw i bin fil sɔri fɔ di bad tin we i bin du. Afta lɔng lɔng tɛm dɔn pas, pipul dɛn bin stil de mɛmba Erɔn ɛn in pikin dɛn as pipul dɛn we de fred Jiova.—Sam 115:10-12; 135:19, 20.
EPRIL 19-25
DI VALYU TIN DƐN FRƆM GƆD IN WƆD | DI NƆMBA DƐM 22-24
“Jiova Tɔn Swɛ to Blɛsin”
bt-E pej 53, par. 5
Prich “di Gud Nyuz bɔt Jizɔs”
5 Jɔs lɛk aw di sɔfa we dɛn bin de mek Gɔd in pipul dɛn sɔfa insay di fɔstɛm Kristian dɛn tɛm nɔ bin stɔp di prichin wok, na di sem tin de apin tide bak. Bɔku tɛm, we dɛn de fos Kristian dɛn fɔ muv go ɔdasay illɛk na prizin ɔ ɔda kɔntri, dat kin jɔs mek di mɛsej bɔt di Kiŋdɔm rich pipul dɛn na di nyu ples. Fɔ ɛgzampul, insay Wɔl Wɔ II, Jiova Witnɛs dɛn bin ebul fɔ prich insay di Nazi kɔnsɛntreshɔn kamp dɛn we dɛn bin de. Wan Ju we bin mit Jiova Witnɛs dɛn de tɔk se: “Di kɔrej we di Jiova Witnɛs prizina dɛn bin gɛt mek a no se di tin dɛn we dɛn biliv kɔmɔt na di Baybul so misɛf bi Jiova Witnɛs.”
it-2-E pej 291
Kres
Kres fɔ Chalenj Jiova. Prɔfɛt Belam bin mek ful we i bin want fɔ prɔfɛsay agens di Izrɛlayt dɛn fɔ mek i gɛt mɔni frɔm di Moabayt dɛn kiŋ Belak, bɔt Jiova bin mek in plan nɔ wok. Apɔsul Pita bin rayt bɔt Belam se: na “animal we nɔ de tɔk ɛn we de tot lod tɔk lɛk mɔtalman fɔ tray fɔ stɔp di prɔfɛt pan in kres biznɛs.” Fɔ tɔk bɔt Belam in kres di apɔsul yuz di Greek wɔd pa·ra·phro·niʹa, we kin min “pɔsin we in ed nɔ ful-ɔp.”—2Pi 2:15, 16; Nɔm 22:26-31.
Luk Gud Wan fɔ di Valyu Tin dɛn na Gɔd in Wɔd
w04-E 8/1 pej 27, par. 2
Men Pɔynt dɛn Frɔm di Baybul Buk we Nem Di Nɔmba Dɛm
22:20-22—Wetin mek Jiova bin vɛks pan Belam? Jiova bin dɔn tɛl prɔfɛt Belam se i nɔ fɔ swɛ di Izrɛlayt dɛn. (Di Nɔmba Dɛm 22:12) Bɔt we di prɔfɛt go wit Belak in man dɛn i bin stil want fɔ swɛ di Izrɛlayt dɛn. Belam bin want fɔ mek di kiŋ na Moab gladi fɔ am ɛn i bin want mek i pe am. (2 Pita 2:15, 16; Jud 11) Pan ɔl we Gɔd bin fos Belam fɔ mek i blɛs di Izrɛlayt dɛn, i bin stil want fɔ mek di kiŋ gladi so i tɛl am fɔ yuz di uman dɛn we de wɔship beal fɔ mek di Izrɛlayt man dɛn du mami ɛn dadi biznɛs di we aw Gɔd nɔ want. (Di Nɔmba Dɛm 31:15, 16) So di tin we bin mek Gɔd vɛks pan Belam na bikɔs i bin want ɔltin fɔ insɛf.
EPRIL 26–ME 2
DI VALYU TIN DƐN FRƆM GƆD IN WƆD | DI NƆMBA DƐM 25-26
“Wetin Wan Pɔsin Du Go Mek Difrɛns?”
“Avɔyd Mami Ɛn Dadi Biznɛs Di we Aw Gɔd Nɔ Want!”
IMAJIN se wan fishaman go tinap na di say usay i go kech di kayn fish we i want. I pik di kayn bet we i want, dɔn i sɛn di uk insay di wata. I peshɛnt wet, ɛn we di fish de it di bet, i jak di uk ɛn di uk fasin na di fish in jɔ ɛn i pul di fish insay di wata.
2 Na so bak dɛn kin yuz trap fɔ kech pipul dɛn. Fɔ ɛgzampul, i bin dɔn lɛf smɔl fɔ mek di Izrɛlayt dɛn rich na di land we Gɔd bin dɔn prɔmis dɛn di tɛm we dɛn bin de na Moab. Di kiŋ na Moab bin prɔmis fɔ gi wan man we nem Belam bɔku mɔni if i swɛ di Izrɛlayt dɛn. Leta, Belam bin fɛn we fɔ mek di Izrɛlayt dɛn briŋ trɔbul pan dɛnsɛf. I bin tek tɛm pik di bet. I sɛn di yɔŋ uman dɛn na Moab fɔ go usay di Izrɛlayt dɛn bin de fɔ go mek di Izrɛlayt man dɛn ledɔm wit dɛn.—Di Nɔmba Dɛm 22:1-7; 31:15, 16; Rɛvɛleshɔn 2:14.
“Avɔyd Mami Ɛn Dadi Biznɛs Di we Aw Gɔd Nɔ Want!”
4 Wetin mek bɔku Izrɛlayt dɛn bin fɔdɔm na Belam in trap? Na bikɔs dɛn bin jɔs de tink bɔt aw dɛn go ɛnjɔy dɛnsɛf nɔmɔ, ɛn dɛn fɔgɛt bɔt ɔl wetin Jiova bin dɔn du fɔ dɛn. Di Izrɛlayt dɛn bin gɛt bɔku rizin fɔ kɔntinyu fɔ de biɛn Gɔd. Na in bin dɔn fri dɛn frɔm di slev wok we dɛn bin de du na Ijipt, i bin de fid dɛn we dɛn bin de na di ɛmti land usay pɔsin nɔ go ebul fɔ liv, ɛn i bin briŋ dɛn kam sef wan na di bɔda fɔ rich di land we i bin dɔn prɔmis dɛn. (Di Ibru Pipul Dɛn 3:12) Bɔt pan ɔl dat, dɛn bin alaw di uman dɛn na Moab fɔ ful dɛn fɔ mek dɛn du mami ɛn dadi biznɛs di we aw Gɔd nɔ want. Di apɔsul Pɔl bin tɔk se: “Wi nɔ fɔ liv fri layf, lɛkɛ aw sɔm pipul bin du, we mek twɛnti-tri tawzin pan dɛn day wande.”—Fɔs Lɛta Fɔ Kɔrint 10:8.
Luk Gud Wan fɔ di Valyu Tin dɛn na Gɔd in Wɔd
it-1-E pej 359, par. 1 ɛn par. 2
Bandri
I tan lɛk se na dɛn tu tin dɛn ya bin de sho ɔmɔs land di trayb dɛn go gɛt: we dɛn balɔt, ɛn if di wan dɛn we de na di trayb bɔku. Di balɔt we dɛn bin de balɔt bin jɔs de sho us pat na di land ɛni trayb go de. So i jɔs bin de sho us pat na di land dɛn go de lɛk di nɔt, di sawt, di ist ɔ di wɛst, ɔ if dɛn go de nia di wata, ɔ ɔp di mawnten dɛn. Na Jiova bin tɛl dɛn fɔ balɔt so dat dɛn nɔ go jɛlɔs ɔ mek plaba. (Prɔ 16:33) We dɛn du am dis we, Gɔd go gayd dɛn bak fɔ mek ɔl di trayb dɛn gɛt wetin dɛn fɔ gɛt jɔs lɛk aw Jekɔb bin prɔfɛsay na Jɛnɛsis 49:1-33 bifo i day.
Afta we di balɔt dɔn sho usay di trayb fɔ de, dɛn go chɛk ɔmɔs pipul dɛn de na di trayb dɔn dɛn go no ɔmɔs land fɔ gi dɛn. “Dɛn fɔ [balɔt] fɔ ebul sheb di land gud. Di big grup fɔ gɛt big ples as prɔpati ɛn di smɔl grup fɔ gɛt smɔl wan. Ɔlman fɔ tek wetin i gɛt we dɛn [balɔt].” (Nɔm 33:54) Usay di balɔt sho se ɛni trayb fɔ de, na de dɛn go de, bɔt dɛn go ajɔst ɔmɔs land dɛn go gi dɛn as prɔpati. So we dɛn bin kam fɔ no se Juda in land big pasmak, dɛn bin ridyus di land we dɛn gɛt ɛn gi sɔm to Simiɔn in trayb.—Jɔs 19:9.