Rɛfrɛns dɛn fɔ Layf ɛn Prichin Wok Mitin Buk
© 2023 Watch Tower Bible and Tract Society of Pennsylvania
SƐPTƐMBA 4-10
DI VALYU TIN DƐN FRƆM GƆD IN WƆD | ƐSTA 1-2
“Tray fɔ Bi Pɔsin We No Se Nɔto Ɔltin I Ebul fɔ Du Lɛk Ɛsta”
Kɔntinyu fɔ Bi Pɔsin We No se Nɔto Ɔltin I Ebul fɔ Du, Ilɛksɛf I Nɔ Izi
11 I nɔ kin izi fɔ bi pɔsin we no se nɔto ɔltin i ebul fɔ du we dɛn prez wi ɔ tɛl wi sɔntin we de mek wi ed big. Dɛn bin de prez Ɛsta pasmak ɛn tɛl am sɔntin dɛn we kin mek pɔsin in ed big. In na bin wan pan di uman dɛn we fayn pas ɔlman na Pashia. Fɔ wan ia, dɛn bin de rɔb spɛshal tin dɛn na in bɔdi so dat i go frɛsh ɛn fayn mɔ. Bɔt nɔto in nɔmɔ dɛn bin de du dis to. Dɛn bin de du am bak to bɔku yɔŋ uman dɛn we bin de tray fɔ lɛ di kiŋ notis dɛn. Dɔn di kiŋ bin gɛt fɔ pik Ɛsta fɔ bi in kwin. Bɔt ɔl dis nɔ bin mek i chenj. Ɛsta nɔ bin bigin tink bɔt insɛf nɔmɔ. Bifo dat, i bin kɔntinyu fɔ bi pɔsin we no se nɔto ɔltin i ebul fɔ du, i bin gud, ɛn gɛt rɛspɛkt.—Ɛsta 2:9, 12, 15, 17.
ia-E pej 130, par. 15
I Bin Fɛt fɔ Gɔd in Pipul Dɛn
15 We di tɛm bin kam fɔ mek dɛn go wit Ɛsta to di kiŋ, dɛn bin tɛl am mek i tek ɛnitin we i want fɔ mek i fayn mɔ. I bin put insɛf dɔŋ ɛn jɔs aks fɔ di tin dɛn we Egaay bin tɔk bɔt. (Ɛsta 2:15) Sɔntɛm i bin no se nɔto di fayn we i fayn nɔmɔ go mek di kiŋ lɛk am, bɔt we i no se nɔto ɔltin i ebul fɔ du ɛn we i ɔmbul, dat na tin we go valyu mɔ to di kiŋ. I bin kɔrɛkt?
Kɔntinyu fɔ Bi Pɔsin We No se Nɔto Ɔltin I Ebul fɔ Du, Ilɛksɛf I Nɔ Izi
12 If wi no se nɔto ɔltin wi ebul fɔ du, di we aw wi de drɛs ɛn biev go sho se wi rɛspɛkt ɔda pipul dɛn ɛn wi rɛspɛkt wisɛf. Wi nɔ go de bost ɔ tray fɔ blɔf pipul dɛn, bifo dat, wi go tray fɔ “de tɔk ɛn du tin saful saful.” (Rid Pita In Fɔs Lɛta 3:3, 4; Jɛrimaya 9:23, 24) As tɛm de go, di we aw wi de tɔk ɛn du tin go sho aw wi de fil bɔt wisɛf. Fɔ ɛgzampul, sɔntɛm wi go de tray fɔ mek ɔda pipul dɛn fil se wi spɛshal bikɔs wi fil se wi de du impɔtant wok, wi sabi bɔku tin, ɔ wi no pipul dɛn we impɔtant. Ɔ sɔntɛm wi de tray fɔ mek lɛk se na wi wangren du wan impɔtant wok, we i bi se ɔda pipul dɛn bin ɛp wi. I go fayn lɛ wi tink bɔt Jizɔs. I bin fɔ dɔn blɔf pipul dɛn wit di kayn sɛns we i gɛt. Bɔt i nɔ bin du dat, bifo dat, i bin de kot Gɔd in Wɔd bɔku tɛm. I nɔ bin want lɛ pipul dɛn prez am. I bin want lɛ pipul dɛn prez Jiova.—Jɔn 8:28
Luk Gud Wan fɔ di Valyu Tin dɛn na Gɔd in Wɔd
w22.11 pej 31, par. 3 to par. 6
Yu Bin No?
Pipul dɛn we de du risach bin fɛn wan kle tablɛt we tɔk bɔt wan man we nem Maduka (Krio Mɔdikay). I bin de wok as administretɔ, sɔntɛm in na bin akawntant na Shushan. Di tɛm we dɛn fɛn dis tablɛt, Atɔ Ungnad we na pɔsin we rili sabi bɔt di istri na da eria de bin rayt se dis na di fɔstɛm we dɛn tɔk bɔt Mɔdikay insay sɔntin we nɔ de pat pan di Baybul.
Frɔm we Ungnad bin mek in ripɔt, masta sabi bukman dɛn dɔn translet di tin dɛn we dɛn rayt pan bɔku ɔda kle tablɛt dɛn. Sɔm pan dɛn na smɔl kle tablɛt dɛn we dɛn fɛn na di siti we nem Pasipolis we dɔn pwɛl pwɛl. Dɛn bin fɛn dɛn na wan say we dɛn bin de kɔl di Treasury we de nia di siti wɔl dɛn. Dɛn tablɛt dɛn ya bin dɔn de frɔm di tɛm we Zaksis I bin de rul. Dɛn rayt dɛn insay di Ilamayt langwej ɛn dɛn gɛt bɔku nem dɛn we de na di Baybul buk we nem Ɛsta.
Bɔku Pasipolis tablɛt dɛn tɔk bɔt Maduka we bin de wok as sɛktri to di kiŋ na di pales na Shushan di tɛm we Zaksis I bin de rul. Wan tablɛt tɔk se Maduka na bin transletɔ. Dis tin we dis tablɛt tɔk gri wit wetin di Baybul tɔk bɔt Mɔdikay. Dɛn bin pik am as Kiŋ Aasuirɔs (Zaksis I) in savant ɛn i bin de tɔk lɛk tu langwej dɛn. Mɔdikay bin de sidɔm na di kiŋ in get na di pales na Shushan ɔltɛm. (Ɛsta 2:19, 21; 3:3) Dis get na bin wan big bildin usay di pales wokman dɛn bin de du dɛn wok.
Di tin dɛn we dɛn tɔk bɔt Maduka na di tablɛt dɛn fiba wetin di Baybul tɔk bɔt Mɔdikay. Dɛn bin liv di sem tɛm ɛn na di sem ples, ɛn dɛn bin de du di sem wok na di sem ples bak. Ɔl dɛn tin dɛn ya de mek i luk lɛk se Maduka ɛn Mɔdikay na di sem pɔsin.
SƐPTƐMBA 11-17
DI VALYU TIN DƐN FRƆM GƆD IN WƆD | ƐSTA 3-5
“Ɛp Ɔda Pipul dɛn fɔ Du dɛn Bɛst”
it-2-E pej 431, par. 7
Mɔdikay
I Nɔ Gri fɔ Butu Bifo Eman. Bifo dis tɛm, Aasuirɔs bin dɔn mek Eman we na Agagayt praym minista ɛn pas lɔ se ɔlman we de na di kiŋ in kɔmpawnd fɔ butu bifo am bikɔs ɔf di nyu pozishɔn we i dɔn gɛt. Mɔdikay nɔ bin gri fɔ butu bifo am ɛn di rizin we mek i se i nɔ go du am na bikɔs in na Ju. (Ɛst 3:1-4) Dis rizin we Mɔdikay bin gi sho se in na Ju we bin fetful ɛn i valyu in padi biznɛs wit in Gɔd Jiova. I bin no se fɔ butu bifo Eman nɔto jɔs we fɔ sho rɛspɛkt fɔ pɔsin we gɛt pawa lɛk aw di Izrɛlayt dɛn bin de du trade fɔ sho rɛspɛkt fɔ pɔsin we na rula. (2Sa 14:4; 18:28; 1Ki 1:16) Mɔdikay bin gɛt gud rizin we mek i nɔ gri fɔ butu bifo Eman. I go bi se na bikɔs Eman na bin Amalɛkayt ɛn Jiova bin dɔn tɔk se in ɛn di Amalɛkayt dɛn go fɛt wɔ “sote go.” (Ɛks 17:16; luk EMAN.) So na fɔ sho se i de waka tret wit Gɔd mek Mɔdikay nɔ gri fɔ butu bifo Eman nɔto bikɔs ɔf di pawa we Eman bin gɛt.
it-2-E pej 431, par. 9
Mɔdikay
Dɛn Yuz Am fɔ Sev di Izrɛlayt Dɛn. Afta we dɛn bin dɔn pas lɔ fɔ dɔnawe wit ɔl di Ju pipul dɛn na di kiŋdɔm, Mɔdikay bin sho se i gɛt fet se di pawa we Ɛsta bin dɔn gɛt na fɔ tɛm lɛk dis fɔ sev di Ju pipul dɛn. I bin sho Ɛsta di big wok we i gɛt ɛn tɛl am fɔ beg di kiŋ fɔ ɛp dɛn. Pan ɔl we dis bin put Ɛsta in layf pan denja, i bin gri fɔ du am.—Ɛst 4:7–5:2.
ia-E pej 133, par. 22 ɛn par. 23
I Bin Fɛt fɔ Gɔd in Pipul Dɛn
22 Ɛsta in at go mɔs dɔn kɔt we i yɛri da mɛsej. Dis na tin we go tɛst in fet pas ɛni ɔda tin. Di we aw Ɛsta ansa Mɔdikay sho se i bin de fred. I mɛmba am bɔt di lɔ we di kiŋ gɛt. If pɔsin go bifo di kiŋ we i nɔ kɔl am, dɛn go kil am. Di wangren tin we go mek dɛn nɔ kil di pɔsin na if di kiŋ sho am in gold staf. Ɛsta bin gɛt ɛni rizin fɔ fil se di kiŋ go sɔri fɔ am mɔ we i tink bɔt wetin apin to Vashtay we i nɔ bin gri fɔ go we di kiŋ kɔl am? Ɛsta tɛl Mɔdikay se i dɔn tek 30 dez we di kiŋ nɔ kɔl am! Dis go dɔn mek i de wɔnda if dis kiŋ we kin vɛks kwik nɔ want am igen.—Ɛsta 4:9-11.
23 Mɔdikay bin tɔk sɔntin fɔ ɛp Ɛsta fɔ gɛt mɔ fet. I mek i no se Jiova go fɛn ɔda we fɔ sev di Ju pipul dɛn if in nɔ du natin. Bɔt wetin fɔ mek i ɛkspɛkt se i go sev we di wan we de agens dɛn gɛda fɔ fɛt dɛn? Mɔdikay bin sho se i gɛt strɔng fet pan Jiova se i nɔ go ɛva alaw fɔ mek dɛn dɔnawe wit in pipul dɛn ɛn mek in prɔmis nɔ kam tru. (Jɔs 23:14) Dɔn Mɔdikay tɛl Ɛsta se: “Sɔntɛm na bikɔs i go gɛt fɔ pul di Ju dɛn pan trɔbul mek i bi kwin da tɛm de.” (Ɛsta 4:12-14) Mɔdikay nɔto fayn ɛgzampul fɔ falamakata? I bin abop pan in Gɔd Jiova wit ɔl in at. Wisɛf kin du di sem tin?—Prɔ 3:5, 6.
Luk Gud Wan fɔ di Valyu Tin dɛn na Gɔd in Wɔd
kr-E pej 160, par. 14
Fɛt fɔ Fridɔm fɔ Wɔship
14 Lɛk Ɛsta ɛn Mɔdikay we bin de trade, Jiova in pipul dɛn tide de fɛt fɔ gɛt fridɔm fɔ wɔship am di we aw i want. (Ɛsta 4:13-16) Yusɛf go jɔyn dis fɛt? Yɛs. Yu kin du dat we yu pre ɔltɛm fɔ yu brɔda ɛn sista dɛn we de sɔfa rayt naw bikɔs dɛn de yuz di lɔ fɔ tek advantej pan dɛn. Dɛn prea dɛn na pawaful we fɔ ɛp wi brɔda ɛn sista dɛn we tin tranga fɔ ɛn di wan dɛn we dɛn de mek sɔfa. (Rid Jems 5:16.) Jiova kin ansa dɛn kayn prea dɛn ya? Di kes dɛn we wi dɔn win na kɔt dɔn sho klia wan se i de ansa!—Ibr 13:18, 19.
SƐPTƐMBA 18-24
DI VALYU TIN DƐN FRƆM GƆD IN WƆD | ƐSTA 6-8
“Ɛgzampul bɔt Aw fɔ Tɔk Fayn”
ia-E pej 140, par. 15 ɛn par. 16
I Du Tin wit Sɛns, I Gɛt Maynd, ɛn I Sho se I Bisin bɔt Ɔda Pipul Dɛn
15 Bikɔs Ɛsta bin peshɛnt wet wan mɔ de fɔ tɛl di kiŋ wetin i bin want mek i du fɔ am, dis bin mek Eman gɛt mɔ tɛm fɔ du tin dɛn we go mek i disgres. Nɔto Jiova Gɔd go dɔn mek di kiŋ nɔ ebul fɔ slip? (Prɔ 21:1) So wi si wetin mek Gɔd in wɔd Ɛnkɔrej wi fɔ “wet”! (Rid Mayka 7:7.) We wi wet fɔ Gɔd, wi go si se di we aw i de sɔlv wi prɔblɛm dɛn bɛtɛ fawe pas wetin wi bin de tink.
I Bin Gɛt Maynd fɔ Tɔk
16 Dis na di sɛkɔn pati we Ɛsta dɔn kɔl di kiŋ fɔ ɛn i nɔ gɛt ɛni ɔda we pas i tɛl di kiŋ wetin i bin want fɔ tɛl am. Bɔt aw i go du am? As tin bin apin, na di kiŋ sɛf sɛf bin aks am wetin i want mek i du fɔ am. (Ɛsta 7:2) Ɛsta in ‘tɛm fɔ tɔk bin dɔn rich.’
ia-E pej 140 par. 17
I Du Tin wit Sɛns, I Gɛt Maynd ɛn I Sho se I Bisin bɔt Ɔda Pipul Dɛn
17 Wi de imajin se Ɛsta bin pre kwayɛt wan to in Gɔd bifo i tɔk dɛn wɔd dɛn ya: “If yu gladi wit mi, a de aks mek dɛn nɔ kil mi ɛn mi pipul dɛn.” (Ɛsta 7:3) Notis se i bin mek di kiŋ no se i go rɛspɛkt ɛnitin we i fil se gud, we i disayd fɔ du. Ɛsta bin sho se i rili difrɛn frɔm Vashtay, di kiŋ in wɛf trade we bin disgres in man bay wilful! (Ɛsta 1:10-12) Pantap dat, Ɛsta nɔ bin tɔk bad bɔt di kiŋ bikɔs i mek mistek fɔ abop pan Eman. Bifo dat, i beg di kiŋ fɔ protɛkt am fɔ mek dɛn nɔ kil am.
ia-E pej 141, par. 18 ɛn par. 19
I Du Tin wit Sɛns, I Gɛt Maynd ɛn I Sho se I Bisin bɔt Ɔda Pipul Dɛn
18 Dis tin we di kiŋ yɛri go dɔn mek i sɔprayz ɛn want fɔ du sɔntin. Udat want fɔ put in kwin in layf pan denja? Ɛsta bin kɔntinyu fɔ tɔk se: “Dɛn dɔn sɛl mi ɛn mi pipul dɛn fɔ lɛ dɛn kil wi, dɔnawe wit wi, ɛn wep wi ɔl. If na sɛl nɔmɔ dɛn bin sɛl wi as man ɛn uman slev dɛn, a nɔ fɔ dɔn tɔk natin. Bɔt i nɔ go fayn fɔ lɛ dis kayn prɔblɛm apin, bikɔs i go afɛkt di kiŋ bad bad wan.” (Ɛsta 7:4 NWT) Notis se Ɛsta bin tɔk ɔltin, dɔn i bin ad bak se, i nɔ bin fɔ tɔk natin if dɛn bin jɔs sɛl dɛn fɔ bi slev. Bɔt dis kil we dɛn bin want fɔ kil di Ju dɛn ɔl fɔ dɔn bi big lɔsis fɔ di kiŋ, so i nɔ go ebul fɔ sɛt mɔt pan am.
19 Ɛsta in ɛgzampul tich wi aw fɔ tɔk to pɔsin di kayn we we go mek i lisin to wi ɛn du wetin wi tɛl am. If wisɛf ɛva nid fɔ tɔk to pɔsin we wi lɛk ɔ pɔsin we gɛt pawa bɔt sirɔs prɔblɛm, we wi peshɛnt, sho rɛspɛkt, ɛn nɔ ayd di tru, dat kin ɛp.—Prɔ 16:21, 23.
Luk Gud Wan fɔ di Valyu Tin dɛn na Gɔd in Wɔd
w06-E 3/1 pej 11, par. 1
Men Pɔynt dɛn Frɔm di Baybul Buk we Nem Ɛsta
7:4 NWT—If dɛn kil ɔl di Ju dɛn, aw dat “go afɛkt di kiŋ bad bad wan”? We Ɛsta tek tɛm tɔk bɔt di sɛl we dɛn bin fɔ dɔn sɛl di Ju dɛn as slev i mek di kiŋ no se i go bi lɔsis to am if dɛn kil dɛn ɔl. Di 10,000 silva mɔni we Eman bin prɔmis fɔ gi di kiŋ nɔ bin nia di mɔni we dɛn bi fɔ dɔn gɛt if Eman bin plan fɔ sɛl di Ju dɛn as slev. Dɔn bak, di plan we dɛn bin mek fɔ kil di Ju pipul dɛn bin fɔ dɔn mek di kwin insɛf day.
SƐPTƐMBA 25–ƆKTOBA 1
DI VALYU TIN DƐN FRƆM GƆD IN WƆD| ƐSTA 9-10
“I Yuz di Pawa we I Gɛt fɔ Ɛp In Pipul Dɛn”
it-2-E pej 432, par. 2
Mɔdikay
Mɔdikay bin tek Eman in ples as praym minista ɛn i bin gɛt di kiŋ in riŋ we i de yuz fɔ stamp dɔkyumɛnt dɛn. Ɛsta bin put Mɔdikay oba Eman in os we di kiŋ bin dɔn gi am. Dɔn Mɔdikay yuz di pawa we di kiŋ dɔn gi am fɔ mek nyu lɔ we gi di Ju dɛn di rayt fɔ fɛt fɔ dɛnsɛf. Dis na bin chans fɔ mek di Ju pipul dɛn sev ɛn gladi. Bɔku pipul dɛn na di Pashian kiŋdɔm bin jɔyn di Ju pipul dɛn. We Eda 13 bin rich, di de fɔ mek dɛn go du wetin di lɔ se, di Ju pipul dɛn bin rɛdi. Dɛn bin gɛt sɔpɔt frɔm di gɔvmɛnt bikɔs ɔf di ay pozishɔn we Mɔdikay bin gɛt. Insay Shushan, dɛn bin fɛt te di nɛks de. I pas 75,000 pipul dɛn we bin et di Ju dɛn na di Pashian Kiŋdɔm we bin day, ɛn ivin Eman in pikin dɛn sɛf bin day. (Ɛst 8:1–9:18) Afta we Ɛsta bin gri, Mɔdikay bin tɛl di Ju dɛn fɔ sɛlibret di de we mek 14 ɛn 15 insay di mɔnt we nem Eda as “di Purim fɛstival,” fɔ gladi gladi, it ɛn gi gift to dɛnsɛf ɛn di wan dɛn we po. Di Ju dɛn bin gri ɛn dɛn, ɛn dɛn pikin dɛn ɛn ɔl udat jɔyn dɛn bigin fɔ du dis sɛlibreshɔn. As pɔsin we de nɛks to di kiŋ na di kiŋdɔm, di Ju dɛn we na Gɔd in yon pipul dɛn bin rɛspɛkt Mɔdikay ɛn i bin kɔntinyu fɔ wok fɔ kia fɔ dɛn.—Ɛst 9:19-22, 27-32; 10:2, 3.
it-2-E pej 716, par. 5
Purim
Rizin we Mek Dɛn Bin De Gɛt Am. Sɔm pipul dɛn se di Purim Fɛstival we di Ju dɛn de sɛlibret naw tan mɔ lɛk gɔvmɛnt ɔlide, nɔto ɔlide we gɛt sɔntin fɔ du wit rilijɔn, ɛn sɔntɛnde, dɛn kin du tin pasmak we difrɛn frɔm di we aw dɛn bin de sɛlibret am trade. Mɔdikay ɛn Ɛsta na bin Jiova Gɔd in savant dɛn ɛn dɛn bin mek dis ɔlide fɔ ɔnɔ Am. Na Jiova bin mek di pipul dɛn sev, ɛn di tin we kam wit di prɔblɛm na bikɔs na Jiova nɔmɔ Mɔdikay bin want fɔ sav. I go mɔs bi se Eman na bin Amalɛkayt ɛn na pipul dɛn we Jiova bin dɔn swɛ ɛn tɔk se dɛn fɔ dɔnawe wit. Mɔdikay bin rɛspɛkt Gɔd in lɔ ɛn i nɔ bin gri fɔ butu bifo Eman. (Ɛst 3:2, 5; Ɛks 17:14-16) Dɔn bak, di wɔd dɛn we Mɔdikay bin tɛl Ɛsta (Ɛst 4:14) sho se i bin de luk fɔ pɔsin we gɛt mɔ pawa fɔ sev di Ju dɛn, ɛn di fast we Ɛsta fast bifo i go mit di kiŋ di fɔstɛm fɔ invayt am fɔ pati bin sho se i beg Gɔd fɔ mek i ɛp am.—Ɛst 4:16.
cl pej 101 ɛn pej 102, par. 12 ɛn par. 13
“Falamakata Gɔd” We I Kam pan Aw Yu De Yuz Pawa
12 Jiova dɔn pik man dɛn fɔ tek di lid na di Kristian kɔngrigeshɔn. (Ibruz 13:17) Dɛn kwalifay man dɛn ya fɔ yuz di pawa we Gɔd dɔn gi dɛn fɔ gi di rayt ɛp to ɔlman na di kɔngrigeshɔn ɛn fɔ mek dɛn gɛt tayt padi biznɛs wit Jiova. Fɔ se di pozishɔn we ɛlda dɛn gɛt fɔ mek dɛn tɔn masta pan dɛn kɔmpin Kristian dɛn? Nɔ, nɔto so i fɔ bi! Ɛlda dɛn nid fɔ put dɛnsɛf dɔŋ ɛn tink di rayt we bɔt di wok we dɛn gɛt na di kɔngrigeshɔn. (1 Pita 5:2, 3) Di Baybul tɛl ovasia dɛn se: “Una bi shɛpad to Gɔd in kɔngrigeshɔn, we i bay wit in Pikin in blɔd.” (Akt 20:28) Dis vas gi pawaful rizin we fɔ mek ɛlda dɛn tek tɛm trit ɔlman na di kɔngrigeshɔn fayn.
13 Tink bɔt dis ɛgzampul. Wan yu tayt padi gi yu sɔntin we i lɛk fɔ lɛ yu kip am fɔ am. Yu no se yu padi pe bɔku bɔku mɔni fɔ da tin de. Yu tink se yu go kialɛs am? Nɔ, yu go tek tɛm ol am fayn so dat i nɔ go pwɛl. Semweso, Gɔd dɔn gi di ɛlda dɛn di wok fɔ kia fɔ sɔntin we rili valyu to am, we na di kɔngrigeshɔn, ɛn di wan dɛn we de de tan lɛk ship to am. (Jɔn 21:16, 17) Jiova in ship dɛn valyu to am. Na dat mek i yuz Jizɔs Krays, we na in wangren Pikin we insɛf sɛf mek, in blɔd fɔ bay dɛn. No ɔda prayz nɔ de we valyu pas di prayz we Jiova pe fɔ bay in ship dɛn. Ɛlda dɛn we ɔmbul fɔ de mɛmba dat ɛn trit Jiova in ship dɛn di we aw i want.
Luk Gud Wan fɔ di Valyu Tin dɛn na Gɔd in Wɔd
w06-E 3/1 pej 11 par. 4
Men Pɔynt dɛn Frɔm di Baybul Buk we Nem Ɛsta
9:10, 15, 16—Pan ɔl we di lɔ bin se dɛn kin tek dɛn ɛnimi dɛn prɔpati dɛn afta dɛn kil dɛn, wetin mek di Ju dɛn nɔ bin du am? Bikɔs dɛn nɔ bin gri fɔ tek dɛn ɛnimi dɛn prɔpati dɛn, dat sho klia wan se di rizin we mek dɛn fɛt nɔto fɔ mek dɛn jɛntri bɔt na fɔ mek dɛn sev dɛn layf.
ƆKTOBA 2-8
DI VALYU TIN DƐN FRƆM GƆD IN WƆD | JOB 1-3
“Kɔntinyu fɔ Sho se Yu Rili Lɛk Jiova”
w18.02 pej 7, par. 16 ɛn par. 17
Falamakata di Kayn Fet we Noa, Daniɛl, ɛn Job Bin Gɛt ɛn Aw Dɛn Bin De Obe
16 Wetin na sɔm pan di prɔblɛm dɛn we Job bin gɛt? Sɔm siriɔs tin dɛn bin apin to Job we bin mek in layf chenj. Fɔs, “nɔbɔdi nɔ bin de we tap na di ist, we jɛntri pas” Job. (Job 1:3) I bin jɛntri pasmak, ɛn bɔku pipul dɛn bin sabi am ɛn dɛn bin de rili rɛspɛkt am. (Job 29:7-16) Bɔt pan ɔl dat, Job nɔ bin tink se i bɛtɛ pas ɔda pipul dɛn ɔ fil se i nɔ nid fɔ sav Gɔd. Wi no dis bikɔs Jiova bin kɔl am in “wokman” ɛn i bin tɛl am se: “Na gud man ɛn i de waka tret wit am. I fred ɛn rɛspɛkt in PAPA GƆD ɛn nɔ miks pan bad.”—Job 1:8.
17 Dɔn wan-tɛm wan-tɛm, Job in bin layf chenj. I bin lɔs ɔl wetin i bin gɛt, ɛn i bin want fɔ day bikɔs in at bin pwɛl bad bad wan. Tide, wi no se na Setan bin mek Job gɛt dɛn prɔblɛm dɛn de. Setan bin tɔk se Job bin de sav Jiova fɔ di tin dɛn we Jiova de du fɔ am. (Rid Job 1:9, 10.) Jiova bin tek di bad bad lay we Setan bin lay pan am rili siriɔs. Wetin Jiova bin du fɔ sho se Setan na bad bad layman? Jiova bin gi Job di chans fɔ sho se i de biɛn Gɔd ɛn i de sav am bikɔs i lɛk am.
Kɔntinyu fɔ Tinap Tranga Wan fɔ Du Wetin Rayt!
10 Setan de tɔk di sem tin bɔt ɛni wan pan wi. Aw yusɛf de insay di tin we Setan bin tɔk bɔt Job? Setan de tɔk se yu nɔ rili lɛk Jiova Gɔd, yu go stɔp fɔ sav am fɔ sev yu layf, ɛn yu nɔ go ebul fɔ tinap tranga wan fɔ du wetin rayt! (Job 2:4, 5; Rɛv. 12:10) Aw dat mek yu fil? I de mek yu rili fil bad, nɔto so? Bɔt tink bɔt dis: Jiova rili biliv yu ɛn na dat mek i gi yu wɔndaful chans. Jiova de alaw Setan fɔ tɛst yu fɔ sho aw yu go tinap tranga wan fɔ du wetin rayt. Jiova biliv se yu go tinap tranga wan ɛn ɛp fɔ sho se Setan na layman. Ɛn Jiova prɔmis se i go ɛp yu fɔ du dat. (Ibru 13:6) Dis na big big ɔnɔ wi gɛt fɔ lɛ di Rula fɔ di wan ol wɔl biliv wi! Yu si wetin mek i rili impɔtant fɔ tinap tranga wan fɔ du wetin rayt? Dat de ɛp wi fɔ lɛ wi nɔ biliv Setan in lay lay tɔk dɛn ɛn sɔpɔt wi Papa in we fɔ rul ɛn tɔk bɔt in gudnem. Wetin wi go du fɔ lɛ wi go kɔntinyu fɔ tinap tranga wan fɔ du wetin rayt?
Luk Gud Wan fɔ di Valyu Tin dɛn na Gɔd in Wɔd
Wetin Wi Go Lan Frɔm di Las Wɔd dɛn we Jizɔs Tɔk?
9 Wetin Jizɔs Bin Se? Shɔt tɛm bifo Jizɔs day, i bin se: “Mi Gɔd, mi Gɔd, wetin mek yu dɔn lɛf mi?” (Mat. 27:46) Di Baybul nɔ tɛl wi wetin mek Jizɔs bin tɔk dɛn wɔd dɛn ya. Bɔt lɛ wi tɔk bɔt wetin wi go lan frɔm dɛn wɔd dɛn de. Wan tin we wi lan na dat we Jizɔs bin tɔk dɛn wɔd dɛn de, i bin de mek di prɔfɛsi we de na Sam 22:1 kam tru. Dɔn bak, dɛn wɔd dɛn de mek wi no klia wan se Jiova nɔ bin de protɛkt in Pikin fɔ mek “natin” nɔ du am. (Job 1:10) Jizɔs bin ɔndastand se in Papa bin de alaw in ɛnimi dɛn fɔ rili tɛst in fet te i day. Dɛn nɔ ɛva tɛst ɛni ɔda mɔtalman in fet rich di we aw dɛn tɛst Jizɔs in fet. Dɔn bak, dɛn wɔd dɛn de sho se Jizɔs nɔ bin dɔn kɔmit ɛni kraym we fɔ mek dɛn kil am.
ƆKTOBA 9-15
DI VALYU TIN DƐN FRƆM GƆD IN WƆD | JOB 4-5
“Avɔyd Lay Lay Infɔmeshɔn Dɛn”
it-1-E pej 713, par. 11
Ɛlifaz
2. Wan pan Job in tri padi dɛn. (Job 2:11) Na Timanayt ɛn sɔntɛm in na No. 1 we wi dɔn tɔk bɔt in pikin, so in na Ebraam in fambul ɛn Job in fawe fambul. In ɛn di wan dɛn we kɔmɔt na in famili layn de bost bɔt di sɛns we dɛn gɛt. (Jɛr 49:7) Pan di tri pipul dɛn we bin kam fɔ kɔrej am, Ɛlifaz na di wan we bin impɔtant pas dɛn ɔl ɛn we pipul dɛn bin gɛt rɛspɛkt fɔ, bikɔs ɔf dis i tan lɛk se na in bin ol fɔ dɛn ɔl. Na in fɔs bin tɔk ɛn i bin tɔk lɔng pas dɛn ɔl.
w05-E 9/15 pej 26, par. 2
Avɔyd fɔ Tink di Rɔng We!
Ɛlifaz mɛmba wan tin we apin to am we nɔ bin nachɔral ɛn i tɔk se: “A fil briz de blo na mi fes mi ia tinap na mi bɔdi. Sɔntin tinap ɛn nɔ de muf, bɔt a nɔ ebul si wetin. Sɔntin tinap frɔnt mi so ɛn di ples mek yeŋ, wantɛm a yɛri vɔys.” (Job 4:15, 16) Uskayn spirit go dɔn afɛkt di we aw Ɛlifaz de tink? Di tin dɛn we i tɔk afta wetin i se sho se fɔ tru di spirit we i si nɔto bin wan pan Gɔd in fetful enjɛl dɛn. (Job 4:17, 18) Na bin wan wikɛd spirit. If nɔto dat, wetin mek Jiova bin kɔrɛkt Ɛlifaz ɛn in tu padi dɛn bikɔs dɛn lay? (Job 42:7) Fɔ tru, na dɛbul bin de kɔntrol Ɛlifaz. Di tin dɛn we i tɔk sho se i nɔ bin de tink di we aw Gɔd de tink.
w10-E 2/15 pej 19, par. 5 ɛn par. 6
Avɔyd Setan in Lay Lay Tɔk Dɛn
Setan bin yuz Ɛlifaz, we na wan pan Job in tri padi dɛn we go fɛn am fɔ tɔk se mɔtalman nɔ gɛt wan yuz. We i de tɔk bɔt mɔtalman i se: “Di wan dɛn we de na os we dɛn mek wit dɔti” ɛn i tɛl Job se: “We in fawndeshɔn de na di dɔst, We izi fɔ dɔnawe wit lɛk mɔt! Dɛn dɔnawe wit dɛn kpatakpata frɔm mɔnin te ivintɛm; Dɛn day sote go, ɛn nɔbɔdi nɔ notis.”—Job 4:19, 20, NWT.
Ɔdasay na di Baybul, dɛn kɔmpia wi to “kɔntri pɔt dɛn” we dɛn yuz kle fɔ mek we izi fɔ pwɛl. (2 Kɔ 4:7) Wi wik bikɔs wi bɔn wit sin ɛn wi nɔ pafɛkt. (Rom 5:12) If i lɛf to wisɛf nɔmɔ Setan go win wi izi wan. Bɔt as Kristian dɛn wi gɛt pɔsin we de ɛp wi pan ɔl we wi wik, wi valyu na Gɔd in yay. (Ayz 43:4) Ɛn apat frɔm dat, Jiova de gi oli spirit to di wan dɛn we de aks fɔ am. (Lyuk 11:13) In spirit de gi wi “pawa we pas mɔtalman in yon,” fɔ bia ɛni prɔblɛm we Setan go mek wi gɛt. (2 Kɔ 4:7; Fil 4:13) If wi tinap tranga wan agens di Dɛbul, ɛn “gɛt strɔng fet,” Gɔd go mek wi tinap tranga wan. (1 Pi 5:8-10) So, wi nɔ nid fɔ fred Setan di Dɛbul.
mrt-E atikul 32, par. 13 to par. 17
Protɛkt Yusɛf Frɔm Lay Lay Infɔmeshɔn Dɛn
● Tray fɔ no usay di infɔmeshɔn kɔmɔt ɛn wetin i de tɔk bɔt
Wetin di Baybul se: “Una mek shɔ ɔf ɔltin.”—1 Tɛsalonians 5:21.
Bifo wi biliv ɔ sɛn infɔmeshɔn, ilɛk na wan we bɔku pipul dɛn de tɔk bɔt ɔ na wan we dɛn dɔn tɔk bɔt na nyuz bɔku tɛm, i fayn fɔ mek shɔ if na tru. Aw wi go du am?
Tray fɔ no usay di infɔmeshɔn kɔmɔt. Di wan dɛn we kin rid nyuz nɔ kin tɔk di kɔrɛkt tin ɔltɛm bikɔs dɛn want mɔni ɔ bikɔs ɔf pɔlitiks. Tray fɔ kɔmpia di nyuz dɛn we yu de yɛri. Sɔntɛnde, wi padi dɛn kin yuz mel ɔ soshal midia fɔ sɛn infɔmeshɔn dɛn we nɔ kɔrɛkt. So nɔ jɔs biliv wetin yu yɛri na nyuz, te yu gɛt di kɔrɛkt infɔmeshɔn.
Mek shɔ se di infɔmeshɔn nɔto ol wan ɛn i kɔrɛkt. Luk fɔ det dɛn ɛn tin dɛn we de pruv se wetin dɛn tɔk na tru. Tek tɛm mɔ if infɔmeshɔn dɛn we fɔ at fɔ ɔndastand luk rili simpul ɔ if dɛn rayt di ripɔt di we we go mek pɔsin want fɔ du sɔntin we i rid am.
Luk Gud Wan fɔ di Valyu Tin dɛn na Gɔd in Wɔd
w03-E 5/15 pej 22, par. 5 ɛn par. 6
Kɔntinyu fɔ Tinap Tranga Wan ɛn Win di Res fɔ Layf
We wi de pat pan di ɔganayzeshɔn we gɛt pipul dɛn ɔlsay na di wɔl we de wɔship di rayt we, dat kin mek wi kɔntinyu fɔ tinap tranga wan. Na big blɛsin wi gɛt fɔ de pat pan dis ɔganayzeshɔn we lɛk dɛnsɛf ɛn we de ɔlsay na di wɔl. (1 Pita 2:17) Ɛn wi ebul fɔ ɛp wi kɔmpin Kristian dɛn fɔ kɔntinyu fɔ tinap tranga wan.
Lɛ wi tɔk bɔt di tin dɛn we Job we na man we bin de du wetin rayt bin du. Ivin Ɛlifaz we na bin wan pan Job in lay lay padi dɛn bin gɛt fɔ tɔk se: “Di wɔd dɛn we yu de tɔk de mek udat wan giv ɔp, olɔp insɛf.” (Job 4:4) Aw wisɛf de du we i kam to dis? Wi ɔl gɛt di wok fɔ ɛp wi brɔda ɛn sista dɛn fɔ kɔntinyu fɔ bia as dɛn de sav Gɔd. We wi de wit dɛn wi kin du tin dɛn we gri wit dɛn wɔd dɛn ya: “Una mek dɛn wik an dɛn trɔŋ, ɛn stɛdi dɛn fut dɛn we de trimbul.” (Ayzaya 35:3) So wetin mek yu nɔ go mek am yu gol fɔ ɛnkɔrej wan ɔ tu pan yu kɔmpin Kristian dɛn ɛnitɛm yu mit dɛn? (Ibruz 10:24, 25) We wi tɔk to dɛn fayn ɛn tɛl dɛn tɛnki fɔ we dɛn de kɔntinyu fɔ tray tranga wan fɔ du wetin Jiova want, dat kin ɛp dɛn fɔ mekɔp dɛn maynd fɔ kɔntinyu fɔ sav am fetful wan ɛn win di res fɔ layf.
ƆKTOBA 16-22
DI VALYU TIN DƐN FRƆM GƆD IN WƆD | JOB 6-7
“We Yu Fil se Yu Layf Tu Tranga ɛn Yu Nɔ Ebul Bia Igen”
w06-E 3/15 pej 14, par. 10
Men Pɔynt dɛn Frɔm di Baybul Buk we Nem Job
7:1, NWT; 14:14, NWT—Wetin di wɔd dɛn “wokman we dɛn aya” ɔ “we dɛn de fos. . . fɔ wok” min? Job in prɔblɛm bin rili siriɔs na dat mek i bin tink se in layf so tranga ɛn i tan lɛk we dɛn de fos pɔsin fɔ wok. (Job 10:17) Bikɔs di tɛm we pɔsin de spɛnd na di grev—frɔm di tɛm we i day te to di tɛm we i go gɛt layf bak na wan we i nɔ gɛt natin fɔ du bɔt, na dat mek Job bin kɔmpia am to we dɛn de fos pɔsin fɔ wok.
“Jiova De Sev di Wan dɛn we Gɛt Pwɛlat”
I GO mɔs bi se sɔntɛnde, wi kin tink bɔt di we aw wi layf shɔt, ɛn di we aw wi “gɛt bɔku bɔku waala.” (Job 14:1) So dis kin mek wi at pwɛl. Bɔku pan Jiova in savant dɛn we bin de di tɛm we dɛn bin de rayt di Baybul bin fil da we de. Sɔm pan dɛn bin ivin want fɔ day. (1 Kiŋ 19:2-4; Job 3:1-3, 11; 7:15, 16) Bɔt dɛn bin abop pan Jiova, ɛn i bin de kɔntinyu fɔ ɛnkɔrej dɛn. Jiova mek dɛn rayt bɔt dɛn pipul dɛn ya dɛn stori so dat dɛn go ɛnkɔrej wi, ɛn wi go lan frɔm dɛn.—Rom. 15:4.
g-E 1/12 pej 16 ɛn pej 17
We Yu Fil Lɛk se Yu Nɔ Want fɔ Liv Igen
Pan ɔl we di prɔblɛm we yu gɛt de rili mɔna yu, mɛmba se nɔto yu wangren de ɛn i sɔri fɔ no se ɔlman gɛt dɛn yon prɔblɛm dɛn we dɛn de bia wit tide. Di Baybul tɔk se: “Ɔl di tin dɛn we Gɔd mek de kɔntinyu fɔ pini togɛda ɛn dɛn de fil pen togɛda.” (Romans 8:22) Pan ɔl we fɔs i kin tan lɛk se yu prɔblɛm nɔ go ɛva dɔn, mɛmba se tin kin chenj as tɛm de go. Wetin go ɛp yu as yu de wet?
Tɛl wan machɔ padi we yu trɔst bɔt aw yu de fil. Di Baybul se: “Tru tru padi de sho lɔv ɔltɛm, Ɛn na brɔda we dɛn bɔn fɔ di tɛm we prɔblɛm go kam.” (Prɔvabs 17:17, NWT) Di Baybul tɔk bɔt aw Job we na man we bin de du wetin rayt bin tɛl ɔda pipul dɛn bɔt aw i de fil we tin bin mɔna am. Bikɔs ɔf di kayn we aw i bin de fil i bin tɔk se: “A et mi layf. A go tɔk bɔt di we aw a de fil. A go tɔk bɔt di tin dɛn we de rili mɔna mi!” (Job 10:1) We yu tɛl ɔda pipul dɛn aw yu de fil dat kin mek yu fil bɛtɛ ɛn sɔntɛm dat go mek yu si di prɔblɛm difrɛn we.
Pre to Gɔd ɛn tɛl am ɔl wetin de na yu at. Sɔm pipul dɛn kin se prea na jɔs sɔntin fɔ mek pipul dɛn fil bɛtɛ bɔt nɔto dat di Baybul se. Sam 65:2 kɔl Jiova Gɔd di wan “we de ansa wi prea,” ɛn 1 Pita 5:7 se: “I bisin bɔt una.” Bɔku say dɛn de na di Baybul we tɔk bɔt wetin mek i impɔtant fɔ abop pan Jiova. Fɔ ɛgzampul:
“Trɔs PAPA GƆD wit ɔl yu at. Nɔ abop pan yu yon sɛns. Mek i put an pan ɔl wetin yu de du, ɛn yu go si yu we klia.”—PRƆVABS 3:5, 6.
“I de gi di wan dɛn we de fred am, wetin dɛn want. Dɔn i de yɛri we dɛn kray to am, ɛn i de sev dɛn.”—SAM 145:19 NWT.
“Dis na di kɔnfidɛns we wi gɛt pan am se ilɛk wetin wi aks am fɔ, wans na dat i want, i de yɛri wi.”—1 JƆN 5:14.
“PAPA GƆD nɔ de nia bad man [wikɛd pɔsin], bɔt de ansa udat de waka tret wan in prea.”—PRƆVABS 15:29.
If Yu tɛl Gɔd di prɔblɛm dɛn we de mit yu, i go ɛp yu. Gud rizin de we mek di Baybul de ɛnkɔrej yu fɔ “abop pan am ɔltɛm . . . Tɛl am ɔl wetin de na [yu] at.”—Sam 62:8, NWT.
Luk Gud Wan fɔ di Valyu Tin dɛn na Gɔd in Wɔd
Lisin, Lan, ɛn Sho Sɔri-at
10 Wi kin falamakata Jiova bay we wi tray fɔ ɔndastand wi brɔda ɛn sista dɛn. Tray fɔ no yu brɔda ɛn sista dɛn gud gud wan. Tɔk wit dɛn bifo ɛn afta di mitin dɛn, wok wit dɛn na fil savis, ɛn if i pɔsibul, invayt dɛn na yu os fɔ it wit yu. We yu du dat, yu go kam fɔ no se wan sista we yu tink se nɔ nays, sɔntɛm na pɔsin we de shem, ɔ wan brɔda we yu tink se lɛk bɔku prɔpati na pɔsin we lɛk fɔ du gud, ɔ wan famili we bɔku tɛm kin kam let na mitin, yu go kam fɔ no se pipul dɛn de mek dɛn sɔfa. (Job 6:29) Bɔt wi nɔ fɔ “bizabɔdi, ɛn tɔk bɔt tin we [wi] nɔ fɔ tɔk bɔt.” (1 Tim. 5:13) So na dat mek i fayn fɔ mek wi no sɔntin bɔt wi brɔda ɛn sista dɛn ɛn ɔl di tin dɛn we bin dɔn apin to dɛn.
ƆKTOBA 23-29
DI VALYU TIN DƐN FRƆM GƆD IN WƆD | JOB 8-10
“Gɔd in Lɔv we Nɔ De Chenj De Protɛkt Wi Frɔm Setan in Lay Dɛn”
w15-E 7/1 pej 12, par. 3
I Rili Pɔsibul fɔ Mek Wi Du Wetin Gɔd Want?
Bɔku bad tin dɛn bin apin to Job we tan lɛk se i nɔ fia. Dis bin mek i bigin tink di rɔng we, i tek am se Gɔd nɔ bisin if i fetful to Am ɔ i nɔ fetful. (Job 9:20-22) Job bin biliv tranga wan se i bin de du wetin rayt ɛn di we aw i tɔk mek ɔda pipul dɛn fil se i tink se i de du wetin rayt pas Gɔd.—Job 32:1, 2; 35:1, 2.
Wetin Jiova in Lɔv we Nɔ De Ɛva Chenj Min fɔ Yu?
14 Gɔd in lɔv we nɔ de ɛva chenj de gi wi spirichwal protɛkshɔn. We Devid bin de pre to Jiova, i bin se: “Yu na ples fɔ ayd fɔ mi. Yu de protɛkt mi frɔm prɔblɛm. Yu go sɔrawnd mi ɛn ala wit gladi-at fɔ sev mi. . . . Jiova in lɔv we nɔ de ɛva chenj sɔrawnd di wan we abop pan Am.” (Sam 32:7, 10, NWT) Insay di tɛm we dɛn bin de rayt di Baybul, di wɔl dɛn we bin de rawnd di siti dɛn bin de protɛkt di pipul dɛn frɔm dɛn ɛnimi. Jiova in lɔv we nɔ de ɛva chenj tan lɛk wɔl we de protɛkt wi frɔm ɛnitin we go pwɛl wi padi biznɛs wit am. Dɔn bak, Jiova in lɔv we nɔ de ɛva chenj de muv am fɔ drɔ wi nia am.—Jɛr. 31:3.
Luk Gud Wan fɔ di Valyu Tin dɛn na Gɔd in Wɔd
w10-E 10/15 pej 6 ɛn pej 7, par. 19 ɛn par. 20
“Udat No di we Aw Jiova De Tink?”
19 Wetin wi dɔn lan bɔt di we “aw Jiova de tink”? Wi nid fɔ alaw Gɔd in Wɔd fɔ ɛp wi fɔ ɔndastand di we aw Jiova de tink. Wi nɔ want fɔ yuz wi impafɛkt we aw wi de tink ɛn du tin fɔ jɔj di we aw Jiova de du tin. Job bin tɔk se: “If PAPA GƆD na bin mɔtalman lɛk mi fɔ agyu wit, wi bin fɔ go kot mek dɛn jɔj wi kes.” (Job 9:32) Lɛk Job, we wi stat fɔ ɔndastand di we aw Jiova de tink, wi go rili kɔle ɛn tɔk se: “E! Dɛn wan ya na lilibit pan di tin dɛn we i ebul du; wi nɔ yɛri natin yet bɔt wetin i dɔn du! Bɔt udat no fɔ tru tru aw PAPA GƆD in pawa ebi?”—Job 26:14.
20 We wi de rid di Baybul, wetin wi go du if wi rich say we at fɔ ɔndastand, mɔ if i gɛt sɔntin fɔ du wit di we aw Jiova de tink? If wi du risach bɔt di tɔpik ɛn stil nɔ ebul fɔ gɛt klia ansa, wi want fɔ si am as tɛst fɔ sho if wi abop pan Jiova. Mɛmba se, sɔntɛnde sɔm tin dɛn we de na di Baybul kin gi wi chans fɔ sho if wi gɛt fet pan Jiova in kwaliti dɛn. Mek wi put wisɛf dɔŋ ɛn gri se nɔto ɔltin we Jiova de du wi ɔndastand. (Ɛkl 11:5) So dis de mek wi gri wit di wɔd dɛn we apɔsul Pɔl tɔk se: “Gɔd in jɛntri, in sɛns, ɛn di tin dɛn we i no, bɔku pasmak! I nɔ pɔsibul fɔ rili faynd awt bɔt in jɔjmɛnt dɛn, ɛn wi nɔ ebul fɔ ɔndastand in we dɛn! ‘Udat dɔn no Jiova in maynd, ɔ udat dɔn bi in advaysa?’ Ɔ ‘udat fɔs dɔn gi am sɔntin, we fɔ mek I pe am bak?’ Na frɔm am, na tru am, ɛn na fɔ am ɔltin de. Mek i gɛt di glori sote go. Emɛn.”—Rom 11:33-36.
ƆKTOBA 30–NOVƐMBA 5
DI VALYU TIN DƐN FRƆM GƆD IN WƆD | JOB 11-12
“Tri We dɛn fɔ Gɛt Sɛns ɛn Bɛnifit Frɔm Am”
w09-E 4/15 pej 6, par. 17
Job Bin Rili Gɛt Rɛspɛkt fɔ Jiova in Nem
17 Wetin bin ɛp Job fɔ kɔntinyu fɔ fetful to Jiova? Wi si klia wan se, bifo di prɔblɛm dɛn stat, Job bin ɔlrɛdi dɔn gɛt tayt padi biznɛs wit Jiova. Pan ɔl we wi nɔ gɛt ɛnitin fɔ sho se Job bin no se Setan dɔn chalenj Jiova, i bin mekɔp in maynd fɔ kɔntinyu fɔ de biɛn am. I bin se: “A nɔ de tink sɛf fɔ se una kɔrɛkt! Te a day, a nɔ go ɛva lɛf fɔ sav Gɔd.” (Job 27:5, NWT) Aw Job bin gɛt dis tayt padi biznɛs wit Gɔd? Wan dawt nɔ de se i bin valyu wetin i bin de yɛri bɔt aw Gɔd bin de wit Ebraam, Ayzak, ɛn Jekɔp we na bin in fawe fambul dɛn. Job bin lan bɔt bɔku pan Jiova in kwaliti dɛn we i wach di tin dɛn we i mek.—Rid Job 12:7-9, 13, 16.
w21.06 pej 10, par. 10 to par. 12
Jiova De wit Yu Ɔltɛm, So Nɔto Yu Wangren De
10 Mek padi dɛn wit fetful Kristian dɛn. Mek padi dɛn na di kɔngrigeshɔn we yu go lan frɔm. Dɛn go bi di wan dɛn we dɔn ɔl ɔ di wan dɛn we yɔŋ, ɔ we kɔmɔt difrɛn say dɛn. Di Baybul mɛmba wi se “ol pipul” dɛn gɛt sɛns. (Job 12:12) Di wan dɛn we dɔn ol dɛn bak kin lan bɔku tin frɔm fetful yɔŋ wan dɛn. Devid bin yɔŋ pas Jonɛthan fa fawe, bɔt dat nɔ bin mek dɛn nɔ ɛnjɔy dɛn tayt padi biznɛs. (1 Sam. 18:1) Devid ɛn Jonɛthan bin de ɛp dɛnsɛf fɔ sav Jiova pan ɔl we dɛn bin de gɛt siriɔs prɔblɛm dɛn. (1 Sam. 23:16-18) Wan sista we nem Irina, we na in wangren de sav Jiova na in famili, bin tɔk se: “Wi Kristian brɔda ɛn sista dɛn tan lɛk wi tru tru mama ɛn papa dɛn ɔ brɔda ɛn sista dɛn. Jiova kin yuz dɛn as wi famili we wi nid.”
11 Fɔ mek nyu padi dɛn nɔ kin izi, mɔ if yu na pɔsin we de shem. Wan sista we nem Ratna, we bin de shem ɛn we lan di trut pan ɔl we dɛn bin de agens am, bin tɔk se: “A bin gɛt fɔ gri se a nid ɛp ɛn sɔpɔt frɔm mi brɔda ɛn sista dɛn na di kɔngrigeshɔn.” I nɔ kin izi fɔ tɛl ɔda pipul dɛn aw wi de fil. Bɔt we yu du dat, da pɔsin de kin bi yu tayt padi. Yu padi dɛn want fɔ ɛnkɔrej ɛn sɔpɔt yu, bɔt na yu go mek dɛn no aw dɛn fɔ ɛp yu.
12 Wan pan di bɛst we dɛn fɔ mek padi dɛn na we wi prich wit wi kɔmpin Kristian dɛn. Karɔl, we wi bin dɔn tɔk bɔt, se: “A dɔn gɛt bɔku gud padi dɛn bay we a de spɛn tɛm wit sista dɛn fɔ du di prichin wok ɛn we wi de du ɔda tin dɛn we wi de sav Jiova. Insay dɛn ia dɛn ya we dɔn pas, Jiova dɔn yuz mi padi dɛn fɔ ɛp mi.” I gud fɔ wi ɔltɛm we wi de mek padi dɛn we na fetful Kristian dɛn. Jiova de yuz dɛn kayn padi ya fɔ ɛp wi we wi at pwɛl, fɔ ɛgzampul, we wi kin fil se na wi wangren de.—Prɔv. 17:17.
it-2-E pej 1190, par. 2
Sɛns
Di Sɛns we Gɔd De Gi. Na Jiova “wangren gɛt sɛns” we wi nɔ go kɔmpia to ɛni ɔda pɔsin. (Rom 16:27; Rɛv 7:12) Fɔ sabi min fɔ no bɔt sɔntin ɛn bikɔs na Jiova Mek wi ɛn i dɔn de ‘frɔm tɛm ɛn go de sote go’ (Sam 90:1, 2), i no ɔltin bɔt di wan ol wɔl, wetin i tek mek am, wetin de insay de ɛn ɔl wetin dɔn apin te naw. Di lɔ dɛn we de gayd di tin dɛn we de na di wɔl, di saykul dɛn (ɛgzampul: wata saykul ɛn ɔksijɛn saykul) ɛn di lɔ dɛn we mɔtalman dɛn abop pan fɔ du risach ɛn mek tin dɛn, ɔl na Jiova mek dɛn. (Job 38:34-38; Sam 104:24; Prɔ 3:19; Jɛr 10:12, 13) Semweso, Jiova in lɔ dɛn bɔt aw fɔ liv wi layf impɔtant bikɔs i de ɛp wi fɔ disayd fɔ du di rayt tin ɛn ebul fɔ liv wi layf di rayt we. (Dit 32:4-6; luk JEHOVAH [A God of moral standards].) Natin nɔ de we i nɔ ebul fɔ ɔndastand. (Ayz 40:13, 14) Pan ɔl we i go alaw tin fɔ apin we nɔ gri wit wetin i want fɔ sɔntɛm ɛn ivin alaw dɛn fɔ go bifo, na in go disayd wetin go apin tumara bambay ɛn i go bi jɔs lɛk aw i want ɛn di tin dɛn we i dɔn tɔk “go du wɛl.”—Ayz 55:8-11; 46:9-11.
Luk Gud Wan fɔ di Valyu Tin dɛn na Gɔd in Wɔd
w08-E 8/1 pej 11, par. 5
Aw fɔ Tɔk Wit Yɔŋ Wan Dɛn
▪ ‘A kin ɔndastand wetin dɛn de tray fɔ se?’ Job 12:11 se: “Aw pɔsin de tes it fɔ no if i gud ɔ bad, na so i de lisin fɔs fɔ no wetin na tru?” I impɔtant naw mɔ pas ɛni ɔda tɛm fɔ “tes” wetin yu pikin dɛn de tɔk. Bɔku tɛm yɔŋ wan dɛn nɔ kin tɔk bɔt wetin de na dɛn maynd dayrɛkt wan. Fɔ ɛgzampul, yu bɔypikin ɛn yu galpikin go se, “Yu de trit mi lɛk pikin ɔltɛm!” ɔ “Yu nɔ de ɛva lisin to mi!” Bifo yu pe atɛnshɔn to di wɔd dɛn we i tɔk we nɔ kɔrɛkt lɛk “ɔltɛm” ɛn “ɛva,” mɛmba se sɔntɛm yu pikin nɔ rili min wetin i tɔk. Fɔ ɛgzampul, “Yu de trit mi ɔltɛm lɛk pikin” kin min se “A fil se yu nɔ trɔst mi,” ɛn “Yu nɔ de ɛva lisin to mi” kin min se “A want tɛl yu aw a de rili fil.” Tray fɔ ɔndastand wetin dɛn rili want fɔ tɔk.