Rɛfrɛns dɛn fɔ Layf ɛn Prichin Wok Mitin Buk
© 2023 Watch Tower Bible and Tract Society of Pennsylvania
NOVƐMBA 6-12
DI VALYU TIN DƐN FRƆM GƆD IN WƆD | JOB 13-14
“If Pɔsin Day, I Go Gɛt Layf Bak?”
w99-E 10/15 pej 3, par. 1 to par. 3
Di Tin dɛn we Pipul dɛn De Du fɔ Gɛt Lɔng Layf
IVIN tide bɔku pipul dɛn go gri se layf shɔt pan ɔl we dɛn bin dɔn rayt bɔt am lɛk 3,500 ia bifo dis tɛm. Sɔm pipul dɛn nɔ kin gladi we dɛn kin yɔŋ fɔ sɔm tɛm, dɔn dɛn ol ɛn day. So, fɔ sɔm tɛm naw dɛn dɔn de du difrɛn tin dɛn fɔ mek pipul dɛn liv lɔng.
Insay Job in tɛm, di Ijipshian dɛn bin de it animal dɛn prayvet pat dɛn bikɔs dɛn bin tink se dat go mek dɛn yɔŋ bak. Leta, sɔm pipul dɛn bin de yuz majik fɔ mek drink we dɛn biliv se go mek pɔsin gɛt lɔng layf. Bɔku pan dɛn pipul dɛn ya biliv se we dɛn yuz ayɛn fɔ mek fek gold, dat go mek dɛn nɔ day. Ɛn dɛn biliv bak se we dɛn it insay gold plet dat go mek dɛn gɛt lɔng layf. Sɔm Chayniz pipul dɛn we bin de trade bin biliv se dɛn go ebul fɔ chenj di we aw di bɔdi de wok fɔ mek dɛn nɔ day, we dɛn de du tin dɛn lɛk fɔ tink gud wan, fɔ du ɛksasayz dɛn we gɛt fɔ du wit di we aw wi de blo ɛn it patikyula tin dɛn.
Dɛn bin sabi Juan Ponce de León as man we nɔ bin de taya fɔ fɛn sɛns bɔt wetin go mek pɔsin yɔŋ. Wan dɔktɔ we bin liv lɛk 300 ia bifo dis tɛm, bin rayt insay in buk we nem Hermippus Redivivus se if dɛn kip yɔŋ vajin dɛn insay rum di tɛm we di plant dɛn de frɛsh, gɛda di briz we dɛn de blo ɛn put am insay bɔtul dɛn, dɛn go yuz am as mɛrɛsin fɔ mek pɔsin gɛt lɔng layf. Nɔn pan dɛn difrɛn we dɛn ya nɔ bin wok.
w15-E 4/15 pej 32, par. 1 ɛn par. 2
Tik we Dɛn Dɔn Kɔt Go Gro Bak?
WI NƆ go kɔle di ɔliv tik we ruf ɛn ol, if wi kɔmpia am to di big big sida tik na Libanɔ. Bɔt ɔliv tik dɛn ebul fɔ bia ɛni wɛda. Sɔm kin de fɔ lɛk 1,000 ia. Ɔliv tik ebul fɔ gro bak ilɛk dɛn kɔt am bikɔs in rut kin go dip insay di dɔti. Wans di rut nɔ day, i go gro bak.
Job bin biliv tranga wan se ilɛksɛf i day, i go gɛt layf bak. (Job 14:13-15) I bin yuz tik we sɔntɛm na ɔliv tik fɔ sho se i gɛt kɔnfidɛns se Gɔd ebul fɔ gi am layf bak. Job tɔk se “lɛk tik so, in abop if yu kɔt am, i go gro bak.” We ren bigin fɔ kam afta di grɔn dɔn dray fɔ sɔm tɛm, di ɔliv tik we bin dɔn dray go bigin fɔ gro bak frɔm di rut dɛn we de na grɔn ɛn “pul branch dɛn lɛk yɔŋ plant.”—Job 14:7-9.
w11-E 3/1 pej 22, par. 5
“Yu Go Dɔn Aŋri fɔ Si di Wan we Na Yu Mek”
Job in wɔd dɛn tich wi fayn lɛsin bɔt Jiova: Jiova kin gɛt spɛshal padi biznɛs wit ɛnibɔdi we fiba lɛk Job, we bin put insɛf na Jiova in an, ɛn we de alaw Jiova fɔ shep dɛn to pipul dɛn we de du wetin fayn na in yay. (Ayzaya 64:8) Jiova valyu di wan dɛn we de wɔship am fetful wan. I de “aŋri fɔ si” di wan dɛn we bin dɔn day we nɔ bin kɔmɔt biɛn am. Wan masta sabi bukman bin se, di Ibru wɔd we dɛn yuz na wan pan di wɔd dɛn “we de rili sho aw pɔsin de fil we i want fɔ si sɔntin apin.” Jiova nɔ jɔs de mɛmba di wan dɛn we de wɔship am, bɔt i de rili wet fɔ gi dɛn layf bak.
Luk Gud Wan fɔ di Valyu Tin dɛn na Gɔd in Wɔd
it-1-E pej 191
Ashis
Dɛn kin yuz ashis fɔ tinap fɔ sɔntin we nɔ impɔtant ɔ we nɔ gɛt valyu, fɔ ɛgzampul Ebraam bin tɛl Jiova se “mi na ɔdinari mɔtalman” we na ashis. (Jɛn 18:27; luk bak Ayz 44:20; Job 30:19.) Job bin kɔmpia wetin in lay lay padi dɛn bin tɔk to “tɔk [we] tan lɛk ashis.”—Job 13:12.
NOVƐMBA 13-19
DI VALYU TIN DƐN FRƆM GƆD IN WƆD | JOB 15-17
“Ɛlifaz in Ɛgzampul Sho di Rɔng We fɔ Ɛnkɔrej Pɔsin”
w05-E 9/15 pej 26, par. 4 ɛn par. 5
Avɔyd fɔ Tink di Rɔng We!
Ɔl di tri tɛm dɛn we Ɛlifaz tɔk, i bin se Gɔd tu strikt so natin nɔ de we in savant dɛn go du we go ful-ɔp in yay. Ɛlifaz bin tɛl Job se “In wokman dɛnsɛf i nɔ trɔs, ɛn i kin si fɔlt pan in enjɛl dɛn.” (Job 4:18) Leta, Ɛlifaz bin se: “PAPA GƆD nɔ biliv nɔn pan di wan dɛn we de wok fɔ am, di wan dɛnsɛf we de na di ɛvin dɛn, nɔ klin nain yay.” (Job 15:15) Ɛn i aks se: “Ɔlmayti PAPA GƆD go gladi if yu de waka tret?” (Job 22:3) Bildad insɛf bin gri wit wetin i tɔk bikɔs insɛf bin se: “Di mun we na di mun nɔ brayt, ɛn di sta dɛn nɔ klin na PAPA GƆD in yay.”—Job 25:5.
Wi fɔ rili tray nɔ fɔ alaw wisɛf fɔ tink dis kayn we. I go mek wi fil lɛk se Gɔd want mek wi du pas wetin wi ebul fɔ du. If wi de tink dis we, i go ambɔg wi padi biznɛs wit Jiova. If wi alaw wisɛf fɔ tink dis kayn we, wetin wi go du if wi du sɔntin we mek dɛn nid fɔ kɔrɛkt wi? Bifo wi put wisɛf dɔŋ ɛn gri fɔ tek di kɔrɛkshɔn, wi go fil bad ɛn “vɛks pan Jiova,” ɛn wi go kip grɔj na wi at fɔ am. (Prɔvabs 19:3, NWT) Dat go rili ambɔg wi padi biznɛs wit Jiova!
Lɛ Wi Falamakata Jizɔs We Bin Ɔmbul ɛn Gɛt Sɔri-at
16 Di we aw wi de tɔk fɔ sho se wi gɛt sɔri-at. If wi gɛt sɔri-at fɔ ɔda pipul dɛn, wi go “tɔk fayn to di wan dɛn we dɛn at pwɛl.” (1 Tɛsa. 5:14) Wetin wi go se fɔ ɛnkɔrɛj dɛn kayn pipul ya? Wi go mek dɛn fil fayn we wi de sho se wi rili kia fɔ dɛn ɛn bisin bɔt dɛn. Wi kin tɛl dɛn tɛnki ɛn ɛp dɛn fɔ si se dɛn gɛt gud kwaliti dɛn. Wi kin mɛmba dɛn se Jiova dɔn briŋ dɛn to in Pikin, so dɛn valyu na Jiova in yay. (Jɔn 6:44) Wi kin tɛl dɛn bak se Jiova rili kia fɔ in savant dɛn “we dɛn at rili pwɛl.” (Sam 34:18) Di fayn fayn wɔd dɛn we wi de tɔk go ɛp di wan dɛn we dɛn at pwɛl.—Prɔv. 16:24.
Luk Gud Wan fɔ di Valyu Tin dɛn na Gɔd in Wɔd
w06-E 3/15 pej 14, par. 11
Men Pɔynt dɛn Frɔm di Baybul Buk we Nem Job
7:9, 10; 10:21; 16:22—Fɔ se wetin Job tɔk sho se i nɔ biliv se we pɔsin day i go gɛt layf bak? Dis de tɔk bɔt wetin go apin to Job insay shɔt tɛm. Bɔt, wetin Job bin min? I go bi se if i day nɔn pan in kɔmpin dɛn nɔ go si am. Fɔ in kɔmpin dɛn i nɔ go ebul fɔ go bak na in os ɛn dɛn nɔ go ebul sabi ɛnitin bɔt am igen te Gɔd in tɛm rich. Ɛn sɔntɛm Job bin min bak se pɔsin nɔ go ebul fɔ kɔmɔt na di grev fɔ insɛf. Wetin Job tɔk na Job 14:13-15 sho klia wan se i bin gɛt op se we pɔsin day i go gɛt layf bak.
NOVƐMBA 20-26
DI VALYU TIN DƐN FRƆM GƆD IN WƆD | JOB 18-19
“Una Nɔ Ɛva Kɔmɔt Biɛn Una Kɔmpin Kristian Dɛn”
Lɛsin dɛn we Wi Go Lan Frɔm di Kray we Jizɔs Bin Kray
9 Yu kin ɛp di wan dɛn we dɛn at pwɛl bikɔs pɔsin we dɛn lɛk dɔn day. Jizɔs nɔ bin jɔs kray wit Mata ɛn Meri, bɔt i bin lisin to dɛn ɛn ɛnkɔrej dɛn. Wisɛf kin du di sem tin fɔ di wan dɛn we dɛn at pwɛl. Wan ɛlda we de na Ɔstrelia we nem Dan bin se: “We mi wɛf bin day, a bin nid ɛp. Bɔku brɔda ɛn dɛn wɛf dɛn bin rɛdi ɔltɛm fɔ de lisin to mi. Dɛn bin alaw mi fɔ mek a kray, ɛn dɛn nɔ bin shem we a du dat. Dɛn ɛp mi bak fɔ du ɔda tin dɛn lɛk fɔ was mi motoka, fɔ bay-bay, ɛn fɔ kuk fɔ mi we a nɔ bin ebul fɔ du dɛn tin dɛn de. Ɛn dɛn bin de pre wit mi bɔku tɛm. Dɛn bin tan lɛk tru tru padi dɛn ɛn brɔda dɛn we dɛn ‘bɔn fɔ di tɛm dɛn we prɔblɛm kin de.’”—Prɔv. 17:17, NWT.
Wetin Wi Go Du We Pɔsin we Wi Lɛk Stɔp fɔ Sav Jiova?
16 Kɔntinyu fɔ sɔpɔt di ɔda wan dɛn na di famili we de sav Jiova fetful wan. Dɛn nid yu lɔv ɛn ɛnkɔrejmɛnt dis tɛm pas ɛni ɔda tɛm. (Ibru. 10:24, 25) Sɔntɛnde, pɔsin we disfɛloship in famili dɔn notis se sɔm na di kɔngrigeshɔn nɔ de tɔk to dɛn igen, lɛk se dɛnsɛf disfɛloship. Wi nɔ want dɛn fɔ fil da we de. Wi fɔ ɛnkɔrej yɔŋ wan dɛn we dɛn mama ɛn papa dɔn stɔp fɔ sav Jiova, ɛn tɛl dɛn tɛnki. Wan sista we nem Maria, we in man bin disfɛloship ɛn lɛf di famili, tɔk se: “Sɔm pan mi padi dɛn kam na os ɛn kuk fɔ mi ɛn ɛp mi fɔ stɔdi wit mi pikin dɛn. Dɛn bin fil mi pen ɛn kray wit mi. Dɛn bin tɔk fɔ mi we pipul dɛn bin de lay pan mi. Dɛn bin rili ɛnkɔrej mi.”—Rom. 12:13, 15.
w90-E 9/1 pej 22, par. 20
Yu De Tray fɔ Du Mɔ fɔ Jiova?
20 Ɛlda dɛn fɔ no se i nɔ kin rili izi fɔ brɔda we nɔto ɛlda ɔ ministerial savant igen ilɛksɛf na in sɛf sɛf se i nɔ want fɔ bi ɛlda ɔ ministerial savant igen. If i nɔ disfɛloship ɛn di ɛlda dɛn si se in at rili pwɛl, dɛn nid fɔ ɛp am fɔ gɛt tayt padi biznɛs wit Jiova bak. (1 Tɛsalonians 5:14) Dɛn fɔ ɛp am fɔ no se dɛn stil nid am na di kɔngrigeshɔn. Ivin if dɛn bin nid fɔ kɔrɛkt am, sɔntɛm i nɔ kin rili te bifo brɔda we put insɛf dɔŋ ɛn gladi fɔ tek di kɔrɛkshɔn go bigin du di wok dɛn we i bin de du na di kɔngrigeshɔn bak.
Luk Gud Wan fɔ di Valyu Tin dɛn na Gɔd in Wɔd
w94-E 10/1 pej 32
We Pɔsin Tɔk Fayn Wɔd dat Kin Gɛt Pawa
Bɔt, we Job insɛf bin nid pɔsin fɔ ɛnkɔrej am, Ɛlifaz ɛn in kɔmpin dɛn nɔ bin tɔk fayn wɔd dɛn to am. Dɛn bin blem Job fɔ di prɔblɛm dɛn we bin de mit am ɛn dɛn bin de tɔk lɛk se i go dɔn de ayd fɔ du sɔm bad tin dɛn. (Job 4:8) Di Intaprita Baybul bin tɔk se: “Wetin Job bin nid na pɔsin we gɛt sɔri-at. Bɔt bifo in lay lay padi dɛn sɔri fɔ am, dɛn tɛl am bɔku tin dɛn bɔt Gɔd biznɛs ɛn aw pɔsin fɔ liv di rayt we. Pan ɔl we na tru tin dɛn bin de tɔk, i bin dɔn yɛri dɛn tɔk dɛn de bɔku bɔku tɛm, ɛn dɛn nɔ bin min natin to am igen.” Job in at bin rili pwɛl we i yɛri wetin Ɛlifaz ɛn in kɔmpin dɛn bin de tɔk ɛn dat bin mek i kray se: “Aw lɔŋ una go tɔmɛnt mi ɛn nyakanyaka mi wit wetin una de se?”—Job 19:2.
Wi nɔ want fɔ mek wi brɔda ɔ sista dɛn fil bad bikɔs ɔf di wɔd dɛn we wi de tɔk we nɔ fayn ɔ we wi nɔ kin tink bɔt. (Luk Dyutɔrɔnɔmi 24:15.) Wan Baybul prɔvab de wɔn wi se: “Dis mɔt, nain de mek, nain de pwɛl; aw yu yuz am, na so yu go bɛnifit.”—Prɔvabs 18:21.
NOVƐMBA 27–DISƐMBA 3
DI VALYU TIN DƐN FRƆM GƆD IN WƆD | JOB 20-21
“Nɔto Jɛntri De Sho se Pɔsin De Du Wetin Rayt”
w07-E 8/1 pej 29, par. 12
Yu “Jɛntri na Gɔd in Yay”?
12 Di wɔd dɛn we Jizɔs bin tɔk fɔ jɛntri na Gɔd in yay, difrɛn frɔm we pɔsin de gɛda bɔku valyu tin dɛn fɔ insɛf ɔ we pɔsin de gɛda bɔku mɔni ɛn prɔpati. So, Jizɔs bin se di tin we fɔ impɔtant na layf nɔto fɔ gɛda bɔku mɔni ɔ prɔpati ɔ fɔ ɛnjɔy di tin dɛn we wi gɛt. Bifo dat, wi fɔ yuz di tin dɛn we wi gɛt fɔ ɛp wi fɔ gɛt tayt padi biznɛs wit Jiova. We wi du dat, i go ɛp wi fɔ jɛntri na Gɔd in yay. Wetin mek? Na bikɔs i de mek we fɔ mek wi ɛnjɔy bɔku blɛsin dɛn frɔm am. Di Baybul tɛl wi se: “Na Jiova in blɛsin de mek pɔsin jɛntri, ɛn I nɔ de ad no pen pan am.”—Prɔvabs 10:22, NWT.
Luk Gud Wan fɔ di Valyu Tin dɛn na Gɔd in Wɔd
w95-E 1/1 pej 9, par. 19
Wi Go Win Setan ɛn In Wok Dɛn
19 Gɔd in savant Job bin yɛri tin dɛn we de “mek [i] wɔri’ we Setan bin yuz Ɛlifaz ɛn Zofa fɔ tɔk. (Job 4:13-18; 20:2, 3) Job bin de rili “sɔfa” ɛn na dat mek i bin tɔk “fulish tɔk” dɛn bɔt di “fiaful tin dɛn” we i bin de tink bɔt. (Job 6:2-4; 30:15, 16) Ilayu bin lisin kwayɛt wan to Job ɛn rili ɛp am fɔ si se di we aw Jiova de si tin rili mek sɛns. Semweso tide, ɛlda dɛn de sho se dɛn kia fɔ di wan dɛn we dɛn at pwɛl bay we dɛn nɔ “mɔna [dɛn] tumɔs.” Bifo dat jɔs lɛk Ilayu, dɛn de tek tɛm lisin to dɛn ɛn tray fɔ yuz Gɔd in wɔd fɔ mek dɛn at nɔ pwɛl. (Job 33:1-3, 7; Jems 5:13-15) So, ɔl di wan dɛn we de rili fil bad bikɔs ɔf di bad tin dɛn we de apin ilɛksɛf i apin to dɛn, ɔ na sɔntin we dɛn de tink bɔt, ɔ dɛn “drim bad bad drim dɛn ɛn si [tin dɛn] we de mek [dɛn] fred,” jɔs lɛk Job wi kin ebul fɛn ɛnkɔrejmɛnt frɔm di Baybul insay di kɔngrigeshɔn.—Job 7:14; Jems 4:7.
DISƐMBA 4-10
DI VALYU TIN DƐN FRƆM GƆD IN WƆD | JOB 22-24
“Aw Mɔtalman Go Ebul Ɛp PAPA GƆD?”
w05-E 9/15 pej 27, par. 1 to par. 3
Avɔyd fɔ Tink di Rɔng We!
Di tɔk we se Gɔd de aks wi fɔ du pas wetin wi ebul fiba di wan we se i de si mɔtalman dɛn lɛk dɛn nɔ gɛt yus to am. Di tɔd tɛm we Ɛlifaz bin tɔk i bin aks di kwɛstyɔn if: “Mɔtalman gɛt ɛni yus to Gɔd? Ɛnibɔdi we gɛt sɛns go bɛnifit am?” (Job 22:2) Ɛlifaz bin de tray fɔ tɔk se mɔtalman nɔ gɛt ɛni yus to Gɔd. Na da sem we de Bildad bin de tink we mek i tɔk se: “Aw naw yu go se mɔtalman gud bifo PAPA GƆD? Aw yu go se mɔtalman we uman bɔn klin na PAPA GƆD in yay?” (Job 25:4) Akɔdin to di we aw dɛn bin de tink, aw Job we na jɔs mɔtalman go ɛva bi pɔsin we de du wetin rayt na Gɔd in yay?
Sɔm pipul dɛn tide de fil bad bɔt dɛnsɛf ɛn dat kin mek dɛn at pwɛl. Sɔntɛm sɔm pan di tin dɛn we de mek dɛn fil dis we na di we aw dɛn mɛn dɛn, di prɔblɛm dɛn we dɔn mit dɛn, ɔ we dɛn nɔ de trit dɛn fayn bikɔs ɔf dɛn kɔlɔ ɔ di say we dɛn kɔmɔt. Bɔt Setan ɛn in dɛbul dɛn bak lɛk fɔ mek pɔsin fil bad bɔt insɛf. If dɛn ebul fɔ mek pɔsin fil se ilɛk wetin i du i nɔ min natin to Gɔd, dat go mek i izi fɔ mek i fil bad bɔt insɛf. As tɛm de go, da kayn pɔsin de go kɔmɔt biɛn Gɔd smɔl smɔl ɛn ivin lɛf fɔ sav am.—Ibruz 2:1; 3:12.
Ol ej ɛn wɛlbɔdi prɔblɛm dɛn kin mek wi nɔ ebul fɔ du wetin wi want fɔ du. We wi kɔmpia di tin dɛn we wi bin de du fɔ sav Jiova we wi yɔŋ, strɔng, ɛn gɛt wɛlbɔdi wetin wi de du naw go luk smɔl na wi yay. So i rili impɔtant fɔ mek wi no se Setan ɛn in dɛbul dɛn want fɔ mek wi fil se wetin wi de du nɔ min natin to Gɔd. Wi fɔ avɔyd fɔ tink da we de.
w95-E 2/15 pej 27, par. 6
Lɛsin bɔt Aw fɔ Sɛtul Prɔblɛm Dɛn
Job in tri padi dɛn kɔntinyu fɔ tɔk tin dɛn we go mek in at pwɛl bay we dɛn bin de tɔk wetin dɛn tink bifo dɛn tɔk bɔt wetin Gɔd tink. Ɛlifaz bin ivin tɔk se “in wokman dɛnsɛf i nɔ trɔs” ɛn Jiova nɔ bisin if Job de du wetin rayt ɔ i nɔ de du am. (Job 4:18; 22:2, 3) I at fɔ imajin ɛni ɔda lay ɔ tin we go mek pɔsin in at pwɛl pas dis! So wi nɔ sɔprayz we Jiova tɔk pan Ɛlifaz ɛn in kɔmpin dɛn fɔ dis kayn badnem we dɛn gi am. I bin se “Nɔto di rayt tin dɛn se bɔt in PAPA GƆD.” (Job 42:7) Bɔt dɛn nɔ bin dɔn tɔk di tin we bad pas ɔl yet.
w03-E 4/15 pej 14 ɛn pej 15, par. 10 to par. 12
Yɔŋ Wan dɛn We De Mek Jiova in At Gladi
10 As wi dɔn si na dis Baybul akawnt, nɔto Job nɔmɔ Setan bin se nɔ de sav Gɔd fɔ natin, i tɔk di sem tin fɔ ɔlman we de sav Gɔd ivin yusɛf. Infakt we Setan bin de tɔk bɔt mɔtalman dɛn, i tɛl Jiova se: “Pɔsin kin du ɛnitin fɔ mek i nɔ day.” (Job 2:4) Yu si di impɔtant pat we yu gɛt fɔ ple pan dis? As Prɔvabs 27:11 tɔk, Jiova de tɛl yu se sɔntin de we yu go du fɔ am, we na fɔ mek i ansa Setan we de provok am. Imajin di wan we de pantap ɔlman na di wɔl de kɔl yu fɔ ɛp am fɔ sɔlv dis big prɔblɛm. Yu rili gɛt big ɔnɔ ɛn wɔndaful wok! Yu go ebul du wetin Jiova de aks yu fɔ du? Job bin du am. (Job 2:9, 10) Jizɔs ɛn bɔku ɔda wan dɛn we bin dɔn de, ivin bɔku yɔŋ wan dɛn dɔn du am. (Filipians 2:8; Rɛvɛleshɔn 6:9) Yusɛf kin du di sem tin. Nɔ mek mistek bɔt am, midul grɔn nɔ de, yu nid fɔ de sɔnsay. Di tin dɛn we yu de du de sho if yu de sɔpɔt Setan ɔ if yu de sɔpɔt Jiova fɔ gɛt ansa fɔ gi Setan. Wetin yu go disayd fɔ du?
Jiova Bisin bɔt Yu!
11 Jiova rili bisin bɔt wetin yu disayd fɔ du? I nɔ dɔn gɛt bɔku pipul dɛn we kɔntinyu fɔ sav am fetful wan we mek i ebul fɔ gɛt ansa fɔ gi Setan? Na tru se Setan dɔn tɔk se nɔbɔdi nɔ go sav Jiova bikɔs i lɛk am, bɔt dɛn dɔn ɔlrɛdi pruv se na lay i de lay. Stil, Jiova want mek yu tek in sayd fɔ sɔlv dis prɔblɛm bɔt udat gɛt rayt fɔ rul bikɔs i bisin bɔt yu as pɔsin. Jizɔs bin se: “Mi Papa we de na ɛvin nɔ ivin want lɛ wan pan dɛn smɔl wan ya day.”—Matyu 18:14.
12 Jiova bisin bɔt wetin yu go disayd fɔ du. Ɛn wetin pas dat, wetin yu go disayd fɔ du go afɛkt am. Di Baybul mek wi no klia wan se Jiova gɛt filin ɛn wetin wi disayd fɔ du go mek i gladi ɔ mek i fil bad. Fɔ ɛgzampul, we di Izrɛlayt dɛn bin mek trangayes pan Jiova bɔku tɛm, dat bin de mek i “vɛks.” (Sam 78:40, 41) Bifo di Ebi Ebi Ren kam insay Noa in tɛm, “mɔtalman in wikɛdnɛs [bin] dɔn pasmak,” Jiova “in at [bin] pwɛl.” (Jɛnɛsis 6:5, 6) Tink bɔt wetin dis min. If yu disayd fɔ du bad tin yu go mek di Wan we mek yu, in at pwɛl. Dis nɔ min se Gɔd wik ɔ i de alaw di we aw i de fil fɔ kɔntrol am. Bifo dat, i lɛk yu ɛn i bisin bɔt yu. Bɔt if yu du di rayt tin yu go mek Jiova in at gladi. I nɔ kin jɔs gladi bikɔs i dɔn gɛt ansa fɔ gi Setan, bɔt i dɔn gɛt chans naw fɔ blɛs yu. Ɛn dat na sɔntin we i want fɔ du. (Ibruz 11:6) Jiova Gɔd na Papa we rili lɛk wi!
Luk Gud Wan fɔ di Valyu Tin dɛn na Gɔd in Wɔd
w04-E 7/15 pej 21 ɛn pej 22
Yuz Spirichwal Gol dɛn fɔ Prez di Wan we Mek Yu
Tink bɔt ɔl wetin Jiova bin du fɔ mek di wan ol wɔl. Di wɔd dɛn “ivin tɛm kam ɛn do klin,” sho ɔl wetin Jiova bin ebul du we i bin de mek tin dɛn. (Jɛnɛsis 1:5, 8, 13, 19, 23, 31) Di tɛm we i bin stat fɔ mek tin dɛn i bin no wetin i want fɔ du ɔ in plan fɔ da de de. Ɛn Gɔd bin ebul fɔ du ɔl wetin i bin plan fɔ du fɔ mek tin dɛn. (Rɛvɛleshɔn 4:11) Job bin se “we [Jiova] want fɔ du sɔntin, i go du am.” (Job 23:13) Jiova go dɔn rili fil fayn fɔ si “ɔl wetin i bin dɔn mek” ɛn i tɔk se dɛn “gud ɛn fayn”!—Jɛnɛsis 1:31.
Fɔ mek wi go ebul fɔ rich wi gol dɛn, dat fɔ bi sɔntin we wi rili want fɔ du. Wetin go ɛp wi fɔ rili want fɔ rich wi gol dɛn? Pan ɔl we di wɔl bin ɛmti ɛn natin nɔ bin de de, Jiova bin ebul fɔ si wetin i go tan lɛk we i dɔn fɔ mek am. Wan fayn valyu tin we de ɔp di skay we go mek i gɛt glori ɛn ɔnɔ. Semweso, we wi tink bɔt di rizɔlt ɔ bɛnifit we wi go gɛt we wi rich wi gol, dat de mek wi gɛt zil fɔ du sɔntin fɔ rich am. Na dat bin apin to Toni wi ol 19 ia. I nɔ bin ɛva fɔgɛt aw i bin fil di fɔstɛm we i bin go waka na Jiova Witnɛs dɛn branch ɔfis na di wɛst pat na Yurop. Frɔm da tɛm de di kwɛstyɔn we bin de na Toni in maynd na, ‘Aw i go tan lɛk fɔ liv ɛn wok na da kayn ples de?’ Toni nɔ bin ɛva stɔp fɔ tink bɔt aw i go mek dat apin ɛn i bin kɔntinyu fɔ du tin dɛn we go mek i go de. I bin rili gladi afta sɔm tɛm we dɛn bin gri fɔ mek i go wok na di branch!
DISƐMBA 11-17
DI VALYU TIN DƐN FRƆM GƆD IN WƆD | JOB 25-27
“Fɔ Sav Jiova Fetful Wan Nɔ Min se Wi Fɔ Pafɛkt”
it-1-E pej 1210, par. 4
Fɔ Sav Jiova Fetful Wan
Job. Dɛn bin tɔk bɔt Job we bin de bitwin di tɛm we Josɛf day ɛn Mozis in tɛm as “gud man ɛn i bin de waka tret wit PAPA GƆD. In fred ɛn rɛspɛkt fɔ PAPA GƆD, ɛn i layf nɔ bin gɛt wan bɔt.” (Job 1:1; Luk JOB.) Wi no se Job na bin fetful man bikɔs ɔf di kwɛstyɔn we Jiova Gɔd bin aks Setan bɔt am we Setan bin go mit Gɔd ɛn in enjɛl dɛn gɛt mitin na ɛvin. Setan bin lay pan Job se i nɔ de wɔship Gɔd fɔ natin bɔt na bikɔs ɔf wetin i de gɛt. I bin mek dawt de bɔt wetin mek Job de sav Gɔd fetful wan. Pan ɔl we Gɔd bin alaw Setan fɔ tek Job in bɔku bɔku prɔpati dɛn ɛn ivin kil in pikin dɛn, i nɔ bin ebul fɔ mek Job stɔp fɔ sav Gɔd. (Job 1:6–2:3) Setan bin tɔk se Job jɔs bisin bɔt insɛf so i go bia ilɛk i lɔs ɔl in prɔpati ɛn pikin dɛn wans natin nɔ du am. (Job 2:4, 5) Bɔt, pan ɔl we i bin gɛt bad bad sik we de mɔna am ɛn i wɛf bin de tɛl am fɔ kɔmɔt biɛn Gɔd ɛn i padi dɛnsɛf bin de kɔndɛm am ɛn tɔk bad bɔt Gɔd in lɔ dɛn ɛn wetin i want (Job 2:6-13; 22:1, 5-11), Job bin tɔk se i nɔ go lɛf fɔ sav Gɔd. I bin se “A nɔ de tink sɛf fɔ se una kɔrɛkt! Te a day, a nɔ go ɛva lɛf fɔ sav Gɔd. A go kɔntinyu fɔ du wetin rayt ɛn a nɔ go ɛva lɛf fɔ du dat; Mi at nɔ go kɔndɛm mi te a day.” (Job 27:5, 6) We i kɔntinyu fɔ sav Gɔd fetful wan, dat sho se Gɔd in ɛnimi na layman.
w19.02 pej 3, par. 3 to par. 5
Kɔntinyu fɔ Tinap Tranga Wan fɔ Du Wetin Rayt!
3 Aw Jiova in savant dɛn go tinap tranga wan fɔ du wetin rayt? Na bay we wi lɛk Jiova wit ɔl wi at ɛn dat de mek wi du wetin de mek i gladi ɔltɛm. Tink bɔt wetin di Baybul tɔk bɔt fɔ tinap tranga wan fɔ du wetin rayt. Insay di Baybul, di Ibru wɔd fɔ “tinap tranga wan fɔ du wetin rayt,” min fɔ du ɔl wetin Gɔd want ɛn nɔ gɛt wan bɔt. Fɔ ɛgzampul, di Izrɛlayt dɛn bin de sakrifays animal dɛn to Jiova, ɛn di Lɔ we Gɔd bin gi Mozis bin se dɛn animal dɛn de nɔ fɔ gɛt wan bɔt. (Lɛv. 22:21, 22) Gɔd nɔ bin de alaw di pipul dɛn fɔ sakrifays animal we gɛt wan fut, wan yes, ɔ wan yay, ɛn animal we gɛt sik. Di animal dɛn nɔ fɔ gɛt wan bɔt bikɔs dat bin rili impɔtant to Jiova. (Mal. 1:6-9) Wi kin ɔndastand wetin mek Jiova bisin bɔt fɔ du tin wit ɔl wi at ɛn we nɔ gɛt wan bɔt pan am. We wi bay sɔntin ilɛk na frut, buk, ɔ tul, wi nɔ want di wan we pwɛl. Wi want di wan we nɔ gɛt wan bɔt. Na da sem we de Jiova de fil we i kam pan di we aw wi lɛk am ɛn di we aw wi de biɛn am. I nɔ fɔ gɛt wan bɔt.
4 Yu tink se wi fɔ pafɛkt fɔ lɛ wi tinap tranga wan fɔ du wetin rayt? Infakt, wi de mek bɔku mistek. Tink bɔt tu rizin dɛn we mek wi nɔ fɔ tink se wi fɔ pafɛkt fɔ lɛ wi go tinap tranga wan fɔ du wetin rayt. Fɔs, Jiova nɔ de pe atɛnshɔn pan di mistek dɛn we wi de mek. In Wɔd, di Baybul tɛl wi se: “PAPA GƆD, if yu bin de kɔnt ɔl di bad we wi de du, PAPA GƆD [“Jiova,” NW], udat fit fɔ tinap bifo yu?” (Sam 130:3) I no se wi nɔ pafɛkt, wi de sin, ɛn i de fɔgiv wi wit ɔl in at. (Sam 86:5) Sɛkɔn, Jiova no wetin wi ebul fɔ du, ɛn i nɔ de tink se wi fɔ du pas wetin wi ebul fɔ du. (Rid Sam 103:12-14.) So aw wi go sav Jiova wit ɔl wi at ɛn wi wɔship nɔ gɛt wan bɔt na in yay?
5 Di men tin we go mek di wan dɛn we de sav Jiova tinap tranga wan fɔ du wetin rayt na lɔv. Di lɛk we wi lɛk Gɔd ɛn we wi nɔ de kɔmɔt biɛn wi Papa we de na ɛvin nɔ fɔ gɛt wan bɔt. If wi lɔv kɔntinyu fɔ de di sem we ivin if sɔntin tɛst wi fet, dat de sho se wi de tinap tranga wan fɔ du wetin rayt. (1 Kro. 28:9; Mat. 22:37, NW) Tink bak bɔt di tri Jiova Witnɛs dɛn we wi bin tɔk bɔt fɔs. Wetin mek dɛn bin du tin da we de? Fɔ se di yɔŋ titi nɔ lɛk fɔ ɛnjɔy na skul, fɔ se di yɔŋman want fɔ shem, ɔ fɔ se di maredman want fɔ lɔs in wok? Nɔ, nɔto so i bi. Bifo dat, dɛn no se Jiova gɛt lɔ dɛn, ɛn dɛn pe atɛnshɔn pan wetin go mek dɛn Papa na ɛvin gladi. Bikɔs dɛn lɛk dɛn Papa we de na ɛvin, dɛn de tink bɔt am ɔltɛm bifo dɛn disayd fɔ du sɔntin. Bay da we de, dɛn de sho se dɛn de tinap tranga wan fɔ du wetin rayt.
Luk Gud Wan fɔ di Valyu Tin dɛn na Gɔd in Wɔd
Dɛn Ɔganayz Jɔs Lɛk Aw Gɔd in Buk Se
3 We wi wach di tin dɛn we Jiova Gɔd mek, wi de si klia wan se in na Gɔd we ɔganayz. I “yuz in sɛns fɔ mek di wɔl na di sabi we i gɛt i yuz fɔ put di skay usay i de.” (Prɔvabs 3:19) Bɔku tin dɛn de we Jiova de mek we wi nɔ no bɔt. Fɔ tru, “na smɔl tin nɔmɔ wi dɔn yɛri bɔt am!” (Job 26:14, NW) Pan ɔl we na jɔs smɔl pan di tin we Jiova mek wi sabi, wi no klia wan se dɛn rili ɔganayz. (Sam 8:3, 4) Di bɔku bɔku sta dɛn we de ɔp di skay ɔganayz we dɛn de muv. Ɛn tink bɔt di we aw di planɛt dɛn na wi solar system de go rawnd di san. Dis wɔndaful tin de apin bikɔs Jiova ɔganayz di we aw di planɛt ɛn sta dɛn fɔ muv. We wi tink bɔt aw i dɔn “tek tɛm mek di ɛvin” ɛn di wɔl, wi want fɔ prez am, wɔship am, ɛn kɔntinyu fɔ de biɛn am.—Sam 136:1, 5-9, NW.
DISƐMBA 18-24
DI VALYU TIN DƐN FRƆM GƆD IN WƆD | JOB 28-29
“Dɛn Go Tɔk Gud Tin bɔt Yu Lɛk Job?”
w02 5/15 pej 22, par. 19
Sho Lɔv ɛn Du Gud to di Wan dɛn We Nid Ɛp
19 Di akawnt dɛn na di Baybul we wi dɔn tɔk bɔt de sho bak se i fayn fɔ lɛk ɛn du gud to di wan dɛn we nɔ ebul ɛp dɛnsɛf. Fɔ mek Ebraam in famili layn go kɔntinyu, Bɛthuɛl bin nid fɔ ɛp am. Fɔ mek dɛn go wit Jekɔp in bon dɛn na Kenan afta i day, Josɛf bin nid fɔ ɛp am. Ɛn fɔ mek Naomi go gɛt pikin fɔ kɔntinyu in famili layn, Rut bin nid fɔ ɛp am. If pɔsin nɔ bin ɛp Ebraam, Jekɔp, ɛn Naomi dɛn nɔ bin fɔ gɛt wetin dɛn nid. Semweso tide, wi fɔ sho lɔv ɛn du gud mɔ to di wan dɛn we nid ɛp. (Prɔvabs 19:17) Wi fɔ falamakata Job fɔ pe atɛnshɔn fɔ “ɛp po pipul dɛn we kin aks. . . fɔ ɛp dɛn, ɛn dɛn pikin dɛn we dɛn papa dɛn dɔn day we nɔ gɛt nɔbɔdi fɔ ɛp dɛn” ɛn ivin “pipul dɛn we de sɔfa te dɛn wan day.” Job bin de mek bak ‘dɛn uman dɛn we dɛn man dɛn dɔn day gladi’ ɛn in na bin ‘yay fɔ blaynd pipul dɛn ɛn fut fɔ pipul dɛn we nɔ de waka.’—Job 29:12-15.
it-1-E pej 655, par. 10
Drɛs
Dɛn kin tɔk bɔt klos bɔku tɛm we dɛn de tɔk bɔt difrɛn tin dɛn. Jɔs lɛk aw unifɔm ɔ spɛshal klos kin sho se pɔsin de na wan patikyula ɔganayzeshɔn ɔ i de sɔpɔt wan patikyula grup, na so we dɛn yuz klos na di Baybul de sho udat di pɔsin bi bikɔs ɔf di tin dɛn we i biliv ɛn di tin dɛn we i de du we gɛt fɔ du wit wetin i biliv, lɛk di ɛgzampul we Jizɔs bin tɔk bɔt di mared klos. (Mat 22:11, 12; luk HEADDRESS; SANDAL.) Na Rɛvɛleshɔn 16:14, 15, di Masta Jizɔs Krays wɔn Kristian dɛn nɔ fɔ slip spirichwali fɔ mek dɛn nɔ lɔs di klos we dɛn gɛt as Gɔd in fetful witnɛs dɛn. Dis go rili bad we di tɛm dɔn nia fɔ “di wɔ we go apin insay Gɔd di Ɔlmayti in big de.”
w09-E 2/1 pej 15, par. 3 ɛn par. 4
Wetin Nem Kin Min?
Wi nɔ go ebul fɔ disayd us nem dɛn go gi wi we dɛn bɔn wi. Bɔt na wi nɔmɔ ebul fɔ mek pipul dɛn tink gud bɔt wi. (Prɔvabs 20:11) Wetin mek yu nɔ go aks yusɛf: ‘If Jizɔs ɛn in apɔsul dɛn bin gɛt chans fɔ pik nem fɔ mi uswan dɛn go pik? Us nem dɛn go pik fɔ sho di men kwaliti we a gɛt ɔ di kayn pɔsin we a bi?’
Dis na kwɛstyɔn we wi fɔ tink siriɔs wan bɔt. Wetin mek? Kiŋ Sɔlɔmɔn we bin gɛt sɛns bin rayt se “Gud nem bɛtɛ pas jɛntri.” (Prɔvabs 22:1) Fɔ tru if wi gɛt gudnem ɔ rɛspɛkt na di eria we wi de, dat na tin we rili valyu. Bɔt di tin we impɔtant pas dat na if wi gɛt gudnem wit Gɔd, wi go gɛt valyu tin dɛn we go de sote go. Aw dat go pɔsibul? Jiova dɔn prɔmis fɔ rayt ‘buk bifo am fɔ mɛmba’ di nem dɛn fɔ di wan dɛn we de fred am ɛn i go gi dɛn op fɔ gɛt layf we go de sote go.—Malakay 3:16; Rɛvɛleshɔn 3:5; 20:12-15.
Luk Gud Wan fɔ di Valyu Tin dɛn na Gɔd in Wɔd
g00-E 7/8 pej 11, par. 3
Smayl Bikɔs I Gud fɔ Yu!
Smayl de rili chenj ɛnitin? Wɛl yu mɛmba di tɛm we di smayl we pɔsin smayl to yu, mek yu at kol ɛn rilaks? Ɔ tɛm we yu fred ɛn fil se nɔbɔdi nɔ bisin bɔt yu bikɔs pɔsin nɔ smayl to yu? Fɔ tru smayl kin chenj sɔntin. I de mek di wan we de smayl ɛn di wan we i de smayl to gladi. Job we na wan pan di man dɛn we di Baybul tɔk bɔt bin tɛl in ɛnimi dɛn se: “A kin smayl to dɛn we dɛn at kin pwɛl, ɛn mi smayl kin mek dɛn at gladi.” (Job 29:24) Di “smayl” we Job bin de smayl bin de sho se i gladi.
DISƐMBA 25-31
DI VALYU TIN DƐN FRƆM GƆD IN WƆD | JOB 30-31
“Aw Job Bin Kɔntinyu fɔ Liv Klin Layf?”
w10-E 4/15 pej 21, par. 8
Tɔn Yu Yay fɔ Mek Yu Nɔ Si Tin dɛn we Nɔ Fayn!
8 Di tin dɛn we di yay ɛn di bɔdi want na tin dɛn we tru Kristian dɛn fɔ kɔntinyu fɔ fɛt agens. Na dat mek Gɔd in Wɔd de ɛnkɔrej wi fɔ tray tranga wan fɔ kɔntrol wisɛf we i kam to di tin dɛn we wi de wach ɛn di tin dɛn we wi want. (1 Kɔr. 9:25, 27; rid 1 Jɔn 2:15-17.) Job we bin de du wetin rayt bin biliv tranga wan se wetin wi de si gɛt sɔntin fɔ du wit wetin wi want. I bin se: “Mi ɛn mi yay dɔn mek wanwɔd; aw a go se a de luk vajin gyal naw”? (Job 31:1) Job nɔ bin jɔs se i nɔ go tɔch uman we we nɔ fayn, bɔt i nɔ bin de ivin alaw in maynd fɔ tink bɔt tin lɛk dat. Jizɔs bin tɔk bɔt wetin mek i impɔtant fɔ mek wi nɔ tink bɔt tin dɛn we nɔ fayn we i se: “Ɛnibɔdi we kɔntinyu fɔ luk uman we nɔto in wɛf, te i gɛt filin fɔ am, dɔn ɔlrɛdi du mami ɛn dadi biznɛs wit am na in at.”—Mat. 5:28.
w08-E 9/1 pej 11, par. 4
Tink bɔt “Wetin Go Bi”
Bifo yu du di fɔs tin we go mek yu du bad tin, aks yusɛf, ‘Wetin go apin if a du dis?’ If wi jɔs tek smɔl tɛm fɔ tink bɔt “wetin go bi” sɔntɛm dat go du fɔ ɛp wi fɔ mek wi nɔ du sɔntin we go mek wi sɔfa bad bad wan. Sɔm pan di bad tin dɛn we go apin to di wan dɛn we nɔ gri fɔ lisin kin bi AIDS, ɔda sik dɛn we pɔsin kin gɛt we i du mami ɛn dadi biznɛs, bɛlɛ we dɛn nɔ want, fɔ pul bɛlɛ, prɔblɛm dɛn insay mared ɛn gilti kɔnshɛns. Apɔsul Pɔl bin tɔk klia wan bɔt wetin go apin to di wan we nɔ de liv klin layf. Dɛn “nɔ go gɛt Gɔd in Kiŋdɔm.”—1 Kɔrintians 6:9, 10.
w10-E 11/15 pej 5 ɛn pej 6, par. 15 ɛn par. 16
Yɔŋ Wan dɛn—Una Alaw Gɔd in Wɔd fɔ Gayd Una
15 Ustɛm mɔ yu tink se i nɔ kin izi fɔ mek yu kɔntinyu fɔ de biɛn Gɔd—na we yu wan de ɔ we yu de wit ɔda pipul dɛn? Wɛl, i go bi se we yu de na skul ɔ wok ples yu kin pe atɛnshɔn mɔ nɔ fɔ du tin we nɔ rayt. Yu kin pe atɛnshɔn to sɔntin dɛn we sɔntɛm go ambɔg yu padi biznɛs wit Jiova. Na we yu rilaks ɛn yu nɔ de pe atɛnshɔn tumɔs kin mek i izi fɔ mek yu du tin we nɔ rayt.
16 Wetin mek yu want fɔ obe Jiova ivin we na yu wangren de? Mɛmba dis: Yu ebul fɔ mek Jiova in at gladi ɔ mek in at pwɛl. (Jɛn. 6:5, 6; Prɔv. 27:11) Di tin dɛn we yu de du kin afɛkt Jiova bikɔs ‘i bisin bɔt yu.’ (1 Pit. 5:7) I want mek yu lisin to am fɔ mek yu bɛnifit yusɛf. (Ayz. 48:17, 18) Jiova in at bin pwɛl we sɔm pan in savant dɛn we bin de trade na Izrɛl nɔ bin lisin to in advays. (Sam. 78:40, 41) Bɔt Jiova bin rili lɛk prɔfɛt Daniɛl bikɔs wan enjɛl bin kɔl am “man we dɛn lɛk pasmak.” (Dan. 10:11) Wetin mek? Na bikɔs Daniɛl bin kɔntinyu fɔ de biɛn Gɔd we i de wit pipul dɛn ɛn we in wan de.—Rid Daniɛl 6:10.
Luk Gud Wan fɔ di Valyu Tin dɛn na Gɔd in Wɔd
w05-E 11/15 pej 11, par. 3
Fɔ Tek Tɛm Lisin De Sho Lɔv
Job in kɔmpin dɛn bin lisin to am lɛk tɛn difrɛn tɛm dɛn. Bɔt, Job bin kray se: “Eya! If pɔsin bin de we de lisin mi, i bin [fɔ] gud” (Job 31:35) Wetin mek? Bikɔs dɛn bin de lisin to am bɔt dɛn nɔ bin ɛnkɔrej am. Dɛn nɔ bin bisin bɔt Job ɛn dɛn nɔ bin want fɔ ɔndastand aw i de fil. Dɛn nɔ bin de sɔri fɔ am pan ɔl we dɛn bin de lisin to am. Bɔt apɔsul Pita bin advays wi se: “Una ɔl go de tink di sem we, una go de fil fɔ una kɔmpin dɛn, una fɔ rili lɛk unasɛf lɛk aw brɔda dɛn kin lɛk dɛnsɛf, una fɔ rili sho se una gɛt sɔri-at, ɛn una fɔ ɔmbul.” (1 Pita 3:8) Aw wi go sho sɔri-at? Wan we aw wi go du dat, na we wi sho se wi bisin bɔt aw ɔda pipul dɛn de fil ɛn tray fɔ ɔndastand dɛn. We wi de tɔk tin dɛn lɛk “dat go mɔs dɔn mek yu fil bad” ɔ “yu go mɔs dɔn fil se dɛn nɔ ɔndastand yu” na wan we fɔ sho se yu bisin bɔt di pɔsin. Wan ɔda tin we yu go du na we yu tɔk wetin di pɔsin se insay yu yon wɔd dɛn, we go sho se yu ɔndastand wetin i se. Fɔ lisin wit lɔv min se wi nɔ jɔs de pe atɛnshɔn to di wɔd dɛn we di pɔsin de tɔk bɔt wi de ivin pe atɛnshɔn to di we aw i de fil bɔt wetin i de tɔk.