Kwɛstyɔn dɛn we Pipul dɛn Kin Aks

Wetin apɔsul Pɔl bin min we i kɔl insɛf “primachɔ pikin”? (1 Kɔrintians 15:​8)

Akɔdin to 1 Kɔrintians 15:​8, Pɔl bin tɔk se: “Na to mi las i apia, lɛk primachɔ pikin.” Trade, wi bin dɔn ɛksplen se i go mɔs bi se Pɔl bin de tɔk bɔt wetin apin to am di tɛm we i bin gɛt vishɔn we sho Jizɔs na ɛvin. I bin tan lɛk se i dɔn gɛt di ɔnɔ fɔ lɛ dɛn bɔn am ɔ fɔ lɛ i gɛt layf bak as spirit pɔsin lɔng tɛm bifo di tɛm we dɛn go gi pɔsin da kayn layf de bak. Bɔt afta wi dɔn stɔdi dis vas mɔ, wi si se nid de fɔ ajɔst di we aw wi ɛksplen dis vas.

Na tru se Pɔl bin de tɔk bɔt wetin bin apin to am di tɛm we i bi Kristian. Bɔt wetin i bin min we i tɔk se i tan lɛk “primachɔ pikin”? Bɔku rizin dɛn de fɔ dat.

I bin bi Kristian jɔs lɛk dat ɛn i nɔ bin izi. Bɔku tɛm, we dɛn kin bɔn primachɔ pikin, dat kin sɔprayz ɔlman. As Sɔl (we leta nem Pɔl) bin de travul go na Damaskɔs fɔ mek di Kristian dɛn we de de sɔfa, i nɔ bin de ɛkspɛkt fɔ si vishɔn we de sho Jizɔs we bin dɔn gɛt layf bak. Nɔto Pɔl wangren bin sɔprayz we i bi Kristian, ivin di Kristian dɛn we i bin de plan fɔ go mek dɛn sɔfa na da siti de bin sɔprayz. Dɔn bak, dis tin we bin apin to am nɔ bin izi fɔ am, ɛn dat bin mek i blayn fɔ sɔm tɛm.—Akt 9:​1-9, 17-19.

I bin bi Kristian “di rɔng tɛm.” Di orijinal Grik wɔd we dɛn translet as lɛk “primachɔ pikin” kin min bak “pikin we dɛn bɔn di rɔng tɛm.” The Jerusalem Bible translet dis vas se: “I bin tan lɛk se dɛn bɔn mi tɛm we nɔbɔdi nɔ bin de ɛkspɛkt.” Di tɛm we Pɔl bi Kristian, Jizɔs bin dɔn ɔlrɛdi go bak na ɛvin. Pɔl nɔ bin dɔn si Jizɔs we bin gɛt layf bak bifo i go na ɛvin, lɛk di wan dɛn we Pɔl bin tɔk bɔt insay di vas dɛn we de bifo dis wan. (1 Kɔr. 15:​4-8) Di apia we Jizɔs apia to Pɔl gi am da chans de, pan ɔl we i tan lɛk se na “di rɔng tɛm.”

I bin de tɔk bɔt insɛf di kayn we we de sho se i ɔmbul. Akɔdin to sɔm masta sabi bukman dɛn, di wɔd dɛn we Pɔl yuz na ya bin tan lɛk se i bin de tɔk bad bɔt insɛf. If na dat Pɔl bin gɛt na in maynd, i bin de gri se i nɔ fit fɔ bi apɔsul. Infakt, i bin kɔntinyu fɔ tɔk se: “Mi na di wan we nɔ impɔtant bɛtɛ pan di apɔsul dɛn, ɛn a nɔ fit fɔ mek dɛn kɔl mi apɔsul, bikɔs a bin de mek Gɔd in kɔngrigeshɔn sɔfa. Bɔt Gɔd in spɛshal gudnɛs dɔn mek a bi udat a bi.”—1 Kɔr. 15:​9, 10.

So i go bi se Pɔl bin de tɔk bɔt di tɛm we Jizɔs jɔs apia to am we i nɔ bin de ɛkspɛkt, di rɔng tɛm we i bi Kristian, ɛn fɔ se i nɔ fit fɔ gɛt da kayn wɔndaful vishɔn de. Ɛni aw i bi, dis tin we bin apin to Pɔl bin rili impɔtant to am. Dis pruv to am klia wan se Jizɔs dɔn gɛt layf bak. No wɔnda we bɔku tɛm i bin de tɔk bɔt dis tin we bin apin to am we i bin de prich to ɔda pipul dɛn fɔ se Jizɔs dɔn gɛt layf bak.—Akt 22:​6-11; 26:​13-18.