LƐSIN 47
Yu Dɔn Rɛdi fɔ Baptayz?
Yu dɔn lan bɔku tin bɔt Jiova frɔm we yu de stɔdi di Baybul. Yu go mɔs dɔn mek sɔm chenj dɛn fɔ aplay wetin yu de lan. Bɔt sɔntɛm sɔntin de we de mek yu nɔ gi yu layf to Jiova ɛn baptayz. Dis lɛsin go tɔk bɔt sɔm pan dɛn tin dɛn de we de stɔp yu nɔ fɔ baptayz ɛn wetin yu go du bɔt dɛn.
1. Wetin-ɛn-wetin yu nid fɔ no bifo yu baptayz?
Fɔ baptayz, yu nid fɔ “no di kɔrɛkt tin bɔt di trut.” (1 Timoti 2:4) Dis nɔ min se yu nid fɔ no di ansa to ɔl di kwɛstyɔn dɛn we pipul dɛn kin aks bɔt di Baybul bifo yu baptayz. Ivin Kristian dɛn we dɔn baptayz fɔ lɔng tɛm de kɔntinyu fɔ lan. (Koloshians 1:9, 10) Bɔt yu nid fɔ ɔndastand di men tin dɛn we di Baybul de tich. Di ɛlda dɛn na di kɔngrigeshɔn go ɛp yu fɔ no if yu dɔn lan di tin dɛn we yu nid fɔ lan fɔ baptayz.
2. Wetin na sɔm tin dɛn we yu nid fɔ du bifo yu baptayz?
Bifo yu kwalifay fɔ baptayz, yu fɔ “ripɛnt ɛn tɔn rawnd.” (Rid Akt 3:19.) Dis min se yu fɔ rili fil bad fɔ ɛni sin we yu bin dɔn kɔmit ɛn beg Jiova fɔ fɔgiv yu. Dɔn bak yu fɔ mekɔp yu maynd fɔ avɔyd ɛnitin we Gɔd se bad ɛn yu fɔ rɛdi fɔ liv yu layf di we aw Gɔd want. Apat frɔm dat, yu fɔ bigin tek pat pan di tin dɛn we di kɔngrigeshɔn de du bay we yu de atɛnd mitin dɛn ɛn bigin fɔ prich as ɔnbaptayz pɔblisha.
3. Wetin mek yu nɔ fɔ alaw fred fɔ mek yu nɔ baptayz?
Sɔm pipul dɛn de fred se dɛn nɔ go ebul fɔ du wetin dɛn dɔn prɔmis Jiova. Fɔ tru, sɔntɛnde yu go mek mistek dɛn jɔs lɛk di fetful man ɛn uman dɛn we di Baybul tɔk bɔt. Bɔt Jiova nɔ de ɛkspɛkt di wan dɛn we de wɔship am fɔ pafɛkt. (Rid Sam 103:13, 14.) I kin gladi we yu du yu bɛst! I go ɛp yu. Infakt, Jiova mek wi no se natin “nɔ ebul mek [i] lɛf fɔ lɛk wi.”—Rid Romans 8:38, 39.
LAN MƆ
Lan bɔt wetin yu go du bɔt di tin dɛn we de mek yu nɔ baptayz bay we yu lan bɔt Jiova gud gud wan ɛn gri fɔ mek i ɛp yu.
4. Lan bɔt Jiova gud gud wan
Wetin-ɛn-wetin yu nid fɔ no bɔt Jiova bifo yu baptayz? Yu nid fɔ no ɔl wetin go mek yu lɛk am ɛn want fɔ du wetin go mek i gladi. Ple di VIDIO fɔ si aw Baybul studɛnt dɛn ɔlsay na di wɔl dɔn du dat. Dɔn una tɔk bɔt di kwɛstyɔn we de dɔŋ.
Insay di vidio, wetin sɔm pipul dɛn du fɔ mekɔp dɛn maynd fɔ baptayz?
Rid Romans 12:2, dɔn una tɔk bɔt dɛn kwɛstyɔn dɛn ya:
Yu gɛt ɛni dawt bɔt wetin di Baybul de tich ɔ if Jiova Witnɛs dɛn de tich di tru?
If na so i bi, wetin yu go du bɔt dat?
5. Wetin fɔ du bɔt di tin dɛn we de mek yu nɔ baptayz?
We wi disayd fɔ gi wi layf to Jiova ɛn baptayz, wi ɔl de gɛt prɔblɛm dɛn. Fɔ si wan ɛgzampul, ple di VIDIO, dɔn una tɔk bɔt di kwɛstyɔn dɛn we de dɔŋ.
Insay di vidio, wetin Niragɛrɛ bin nid fɔ du fɔ sav Jiova?
Aw di lɛk we i lɛk Jiova bin ɛp am fɔ du dat?
Rid Prɔvabs 29:25 ɛn 2 Timoti 1:7, dɔn una tɔk bɔt dis kwɛstyɔn:
Wetin de gi wi maynd fɔ du sɔntin bɔt di tin dɛn we de mek wi nɔ baptayz?
6. Abop pan di ɛp we Jiova de gi
Jiova go ɛp yu fɔ mek yu du tin we go mek i gladi. Ple di VIDIO, dɔn una tɔk bɔt di kwɛstyɔn dɛn we de dɔŋ.
Insay di vidio, wetin mek wan Baybul studɛnt bin de fred fɔ baptayz?
Wetin i lan we ɛp am fɔ kɔntinyu fɔ abop pan Jiova mɔ ɛn mɔ?
Rid Ayzaya 41:10, 13, dɔn una tɔk bɔt dis kwɛstyɔn:
Wetin mek yu fɔ gɛt kɔnfidɛns fɔ se yu go ebul fɔ du wetin yu dɔn prɔmis we yu pre to Jiova fɔ gi yu layf to am?
7. Sho se yu gladi fɔ di we aw Jiova lɛk yu
Di mɔ yu de tink bɔt di we aw Jiova lɛk yu, na di mɔ yu go want fɔ tɛl am tɛnki ɛn na di mɔ yu go want fɔ sav am sote go. Rid Sam 40:5, dɔn una tɔk bɔt dis kwɛstyɔn:
Us blɛsin dɛn Jiova dɔn gi yu we yu rili gladi fɔ?
Di prɔfɛt Jɛrimaya bin lɛk Jiova ɛn in wɔd, ɛn i bin rili gladi fɔ di ɔnɔ we Jiova gi am fɔ tɔk bɔt In nem. I bin se: “Yu wɔd mek mi at swit ɛn a gladi bikɔs yu nem de pan mi, O Jiova Gɔd.” (Jɛrimaya 15:16, NWT) Ansa dɛn kwɛstyɔn dɛn ya:
Wetin mek na spɛshal ɔnɔ fɔ bi Jiova Witnɛs?
Yu want fɔ baptayz fɔ bi Jiova Witnɛs?
Ɛnitin de we de mek yu nɔ ebul fɔ du so?
Wetin yu tink se yu nid fɔ du fɔ ebul baptayz?
SƆM PIPUL DƐN KIN SE: “A de fred se a nɔ go ebul fɔ du ɔl wetin a dɔn prɔmis fɔ du we a baptayz?”
Na da we de yu de fil?
WETIN YU DƆN LAN?
Jiova go ɛp yu fɔ du sɔntin bɔt di tin dɛn we de mek yu fred fɔ baptayz.
Rivyu
Wetin-ɛn-wetin yu nid fɔ lan fɔ lɛ yu kwalifay fɔ baptayz?
Us chenj dɛn yu nid fɔ mek bifo yu kwalifay fɔ baptayz?
Wetin mek yu nɔ fɔ alaw fred fɔ mek yu nɔ baptayz?
DU MƆ RISACH
Tink bɔt wetin fɔ mek yu disayd fɔ baptayz.
Lan bɔt wetin yu go du bɔt patikyula tin dɛn we de mek yu fred fɔ baptayz.
Lan bɔt wetin wan man bin du bɔt wan men tin we bin de mek i nɔ baptayz.
Fɔs, wan man we nem Ata bin de fred fɔ baptayz. Lan bɔt wetin bin mek i mekɔp in maynd fɔ du dis impɔtant tin.