DI TƆPIK NA DI FRƆNT PEJ | WETIN GƆD IN KIŊDƆM GO DU FƆ YU?

Aw Gɔd in Kiŋdɔm Go Bɛnifit Yu?

Insay di atikul dɛn we yu dɔn rid, yu go mɔs dɔn ɔndastand se Gɔd in Kiŋdɔm rili impɔtant to Jiova Witnɛs dɛn. Ɛn sɔntɛm yu bin rili gladi fɔ no bɔt di blɛsin dɛn we di Kiŋdɔm go briŋ fɔ mɔtalman. Bɔt yu go stil de wɔnda if ɔl dɛn tin ya go rili bi.

Pɔsin we gɛt sɛns nɔ jɔs de biliv ɛnitin. (Prɔvabs 14:15) Na so sɔm pipul dɛn na Beruya bin du.a Di fɔs tɛm we di pipul dɛn na Beruya yɛri di gud nyus bɔt di Kiŋdɔm, dɛn bin gladi fɔ wetin dɛn yɛri, bɔt nɔto jɔs bikɔs dɛn bin want am fɔ bi tru. Bifo dat, dɛn tek tɛm luk di Baybul gud gud wan “fɔ si if dɛn tin ya na tru.” (Di Apɔsul Dɛn Wok [Akt] 17:11) Dat min se di pipul dɛn na Beruya bin kɔmpia wetin dɛn yɛri bɔt di gud nyus wit wetin di Baybul se. As tɛm de go, dɛn kam biliv gud gud wan se di gud nyus kɔmɔt frɔm Gɔd in Wɔd.

Jiova Witnɛs dɛn want mek yu du di sem tin. Wi kin stɔdi pipul dɛn di Baybul fɔ fri so dat dɛn go gɛt di chans fɔ kɔmpia wetin Jiova Witnɛs dɛn biliv bɔt Gɔd in Kiŋdɔm wit wetin di Baybul se.

We yu stɔdi di Baybul, yu nɔ go jɔs lan bɔt Gɔd in Kiŋdɔm, bɔt di Baybul go ɛp yu bak fɔ gɛt ansa to sɔm impɔtant kwɛstyɔn dɛn we pipul dɛn kin aks na layf. Sɔm pan dɛn kwɛstyɔn ya na:

Usay wi kɔmɔt?
Wetin mek wi gɛt layf?
Wetin mek Gɔd de alaw wi fɔ sɔfa?
Wetin de apin to wi we wi day?
Fɔ se di wɔl gɛt fɔ pwɛl kpatakpata?
Wetin na di men tin we go mek famili dɛn gladi?

Di tin we pas ɔl na dat we yu stɔdi di Baybul, dat go ɛp yu fɔ “kam nia Gɔd.” (Jems 4:8) Di mɔ yu kam nia Gɔd, na di mɔ yu go si di gud tin dɛn we Gɔd in Kiŋdɔm go du fɔ yu naw ɛn sote go. Jizɔs bin pre to in Papa se: “Fɔ gɛt di layf we go de sote go, dɛn fɔ no yu, di wangren tru Gɔd, ɛn di wan we yu sɛn, Jizɔs Krays.”—Jɔn 17:3.

Jiova Witnɛs dɛn go yuz dis buk fɔ stɔdi di Baybul wit yu.

If yu want fɔ stɔdi di Baybul, aks ɛni Jiova Witnɛs ɔ go na www.jw.org/kri. (Go usay dɛn rayt AKS FƆ BAYBUL STƆDI we de na di stat pej)

a Beruya na wan tɔŋ we bin de insay Masidonia.

Wetin Mek I Lɛk Gɔd in Kiŋdɔm?

Dis biɛn tɛm, wan gyal pikin we nem Folake ɛn we ol tɛn ia bin gɛt omwɔk na skul fɔ rayt bɔt ‘Wetin I Lɛk Pas Ɔl na Dis Wɔl?’ Folake bin chuz fɔ rayt bɔt wetin mek i lɛk fɔ tɛl pipul dɛn bɔt Gɔd in Kiŋdɔm.

Folake ɛksplen se: “Gɔd in Kiŋdɔm na rial gɔvmɛnt. Bɔt pɔsin nɔ go si am ilɛksɛf i wɛr glasis.”

Folake kɔntinyu fɔ rayt bɔt di blɛsin dɛn we i go rili want fɔ ɛnjɔy na Gɔd in Kiŋdɔm. We i bin de tɔk bɔt sɔm pan di prɔblɛm dɛn we di Kiŋdɔm go sɔlv, i bin rayt se: “Mi at kin pwɛl we a de si pipul dɛn de liv na strit bikɔs dɛn nɔ gɛt say fɔ de, ɛn bikɔs angri de kil pikin dɛn na difrɛn say dɛn na di wɔl.” I tɔk bak se: “A kin gladi we a kin rid Ayzaya 65:21.” Da vas de tɔk bɔt aw mɔtalman go de ɔnda Gɔd in gɔvmɛnt. I prɔmis se: “Dɛn go bil os ɛn liv insay de, ɛn dɛn go mek gadin ɛn it wetin dɛn plant.”

Folake se i de wet fɔ di tɛm we Gɔd go yuz in Kiŋdɔm fɔ pul ɔlkayn sik na di wɔl. Insay in omwɔk, i bin kot Rɛvɛleshɔn 21:4 we se Gɔd “go wep ɔl di kray wata we de na dɛn yay, day nɔ go de igen, munin nɔ go de igen, kray nɔ go de igen, ɛn pen nɔ go de igen.” We i bin de dɔn fɔ rayt, i tɔk bak se i lɛk fɔ tɔk bɔt Jiova ɛn in Kiŋdɔm pas ɛnitin na di wɔl. Wi dɔn si klia wan se Gɔd in Kiŋdɔm rili impɔtant to dis smɔl pikin!