Kwɛstyɔn dɛn we Pipul dɛn Kin Aks

Wetin Lɛvitikɔs 19:16 (NWT) min we i se wi nɔ fɔ “put [wi] kɔmpin in layf pan denja,” ɛn us lɛsin wi kin lan frɔm am?

Jiova bin tɛl di Izrɛlayt dɛn fɔ bi pipul dɛn we oli. Fɔ ɛp dɛn fɔ bi dɛn kayn pipul dɛn de, i bin tɛl dɛn se: “Yu nɔ fɔ de go ɛn tɔk lay lay tin to yu pipul dɛn fɔ pwɛl ɔda pɔsin in nem. Yu nɔ fɔ put yu kɔmpin in layf pan denja. Mi na Jiova.”—Lɛv. 19:​2, 16, NWT.

Aw wi fɔ ɔndastand di sɛntɛns we se: “Yu nɔ fɔ put yu kɔmpin in layf pan denja”? Wan Juish buk bɔt Lɛvitikɔs tɔk se: “Dis pat na di vas . . . at fɔ intaprit bikɔs i nɔ izi fɔ no di pɔynt we di Ibru wɔd dɛn de tray fɔ mek. Di wɔd fɔ wɔd minin fɔ dɛn Ibru wɔd dɛn ya na ‘nɔ tinap oba, bay, ɔ nia.’”

Sɔm masta sabi bukman dɛn se dis vas gɛt sɔntin fɔ du wit vas 15 we se: “We pɔsin . . . de jɔj kes na kot, [i] nɔ fɔ luk fes; dat na [i] nɔ fɔ gi pɔsin rayt bikɔs i po ɔ jɛntri bɔt [i] fɔ trit [in] kɔmpin fia wan.” (Lɛv. 19:​15) If na so i bi, dat min se di lɔ we de na vas 16 we se nɔ fɔ tinap oba, bay, ɔ nia pɔsin kin min se di Izrɛlayt dɛn nɔ fɔ du ɛnitin we nɔ fia we dɛn gɛt kɔt kes, we dɛn de du biznɛs, ɔ insay dɛn famili. Ɛn pɔsin we na Izrɛlayt nɔ fɔ du tin we nɔ ɔnɛs jɔs fɔ bɛnifit insɛf. Na tru se wi nɔ fɔ du dɛn tin dɛn de, bɔt ɔda we de fɔ ɔndastand dis pat na vas 16 we mek sɛns pas dis wan.

Tink bɔt di fɔs pat na vas 16. Gɔd kɔmand in pipul dɛn se dɛn nɔ fɔ de go ɛn tɔk lay lay tin we go pwɛl pɔsin in nem. Na tru se we pɔsin de kongosa ɔda pipul dɛn, i kin kɔz prɔblɛm. Bɔt we pɔsin de pwɛl ɔda pɔsin in nem, dat wɔs pas fɔ kongosa. (Prɔv. 10:​19; Ɛkli. 10:​12-14; 1 Tim. 5:​11-15; Jems 3:​6) Bɔku tɛm, we pɔsin kin pwɛl ɔda pɔsin in nem, i kin tɔk tin dɛn we nɔto tru baywilful. Da pɔsin de kin gi fɔls witnɛs agens ɔda pɔsin, ilɛksɛf dat go mek di pɔsin day. Mɛmba se na dɛn kayn pipul dɛn de bin lay pan Nebɔth, ɛn bikɔs ɔf dat dɛn bin ston am. (1 Kiŋ 21:​8-13) So, lɛk aw di sɛkɔn pat na Lɛvitikɔs 19:​16 (NWT) tɔk, pɔsin we de pwɛl in kɔmpin in nem kin put in kɔmpin in layf pan denja.

Dɔn bak, pɔsin kin pwɛl ɔda pɔsin in nem bikɔs i et am. Fɔs Jɔn 3:​15 tɛl wi se: “Ɛnibɔdi we et in brɔda na pɔsin we de kil, ɛn una no se ɛnibɔdi we de kil pɔsin nɔ go gɛt layf we go de sote go.” I fayn fɔ mɛmba se afta Gɔd bin se, “Yu nɔ fɔ put yu kɔmpin in layf pan denja,” i tɔk bak se yu “nɔ fɔ [et] pɔsin na [yu] at.”—Lɛv. 19:​17.

So di sɛkɔn pat na Lɛvitikɔs 19:​16 (NWT) gɛt strɔng advays fɔ Kristian dɛn. Wi nɔ fɔ alaw wisɛf fɔ tink bad tin bɔt ɔda pɔsin ɛn wi nɔ fɔ ɛva pwɛl pɔsin in nem. If wi pwɛl pɔsin in nem bikɔs wi nɔ lɛk am ɔ wi de jɛlɔs am, dat de sho se wi et am. Kristian dɛn nɔ fɔ et ɛnibɔdi.—Mat. 12:​36, 37.