Isikiɛɛ

16 Mi Chɛhowa suaa vɛlɛ naa ya chua aa: 2 “Po wanachioo, chɔm Chulusalɛm sɔɔŋ nɔɔlɛi o cho tosaa woŋ.+ 3 Dimi aa, ‘Nyɛ Chɛhowa, Mɛlɛka Kpuluŋguma Bɛndoo dimi a num okɔɔ wo cho hoo ni Chulusalɛm: “O lɛŋnde Kenaŋ ndeŋ niŋ kɔɔlima numndaŋ ma cho ni, nduyɛ loŋ ŋ veluŋ ni. Amɔluaitiinɔɔ finya num wa ni,+ nduyɛ Hitaitiinɔɔ kala num wa ni.+ 4 Paale nda velu numndeŋ, a bɛɛndiaa num puleŋ te, a pulu num a mɛŋndaŋ ma dendu le, a suu num ihɛl te, nduyɛ a mɔɔsiaa num o lakola niŋ te. 5 Wana o wana bii imɔnɔ le num mbo tosal num sɔɔŋ muŋ i pilɛ bɛɛ le. Wana o wana tuiinuŋ num inyiɛɛ le. Kɛ ma mal num o bɛɛ kpendekele o paale ŋ veluŋ ndeŋ choo, le mɛɛ ndaa tul num yɛleŋ yɛ.

6 “‘“Mɛɛ ya wa hiouwɔɔ, mi cha num o lindɛi a koowaŋ. Nduyɛ a wa ihini lende a koowaŋ, mi dimi aa: ‘A cho chinda!’ A tonya, mi dimul num naa ŋ wa ihini o lindɛi a koowaŋ nda aa: ‘A cho chinda!’ 7 Mi tosa ma kui tau, mɛɛ yɔmnde wa nuaa yondoo niŋ tau tau yɛ. Ma hindu, ma simnuŋ chua laandu, nduyɛ ma wounuŋ nyɛm kɛvɛlɛŋ kɛndɛ kɛndɔŋ. Mi mɛɛyaŋ ma pia num o ibuŋ, nduyɛ mi yiinde del num o kɔɔ. Kɛ a koŋ kpou, a wa wɔ tum fondo fuu.”’

8 “‘Mɛɛ ya wa hiouwɔɔ, mi cha num, mi saaluŋ maa num aa fuuluu niŋ boondii wana dimul num diomnda kaalaa laŋ ndo. Mi kuumbuu num doma* ni bɛndoo choo+ le dialuŋ num lasiɔmboŋ kumbɔɔ. Nduyɛ mi yii kpemaa a num, mi mɛnaŋ po le ma simnuŋ laa ni.’ Ya Chɛhowa, Mɛlɛka Kpuluŋguma Bɛndoo dimi lende ni. 9 ‘Okoŋ kɔɔli, mi pulu num a mɛŋndaŋ, le kooma wa num lekɔɔ waŋ faŋaa. Nduyɛ mi suu num chuɛiyaŋ.+ 10 Mi wou num kola kɛndɛ kɛndɛ nda hɔu wo, mi ke num kɔwɛila* kɛndɛ kɛndɛla nda toosiaa a yau visioo laŋ, nduyɛ mi yii num kola kɛndɛ nda toosiaa a fuŋndeŋ ndo. Mi tosa ma chuɛɛnuŋ nyɛla baa kala laŋ. 11 Mi wou num kelaŋ labaŋ a yɔlɔŋ laboloŋ kɛndɛ kɛndɔŋ. 12 Mi wou num vɛlɛ kelɛi o miliŋ a kelaŋ lanioŋ, nduyɛ mi wou num mɔsil lemasa kɛndɛ kɛndɔɔ o lebol. 13 Nyɛm nda toosiaa a kooliiyoŋ vɛlɛ a kaniŋ humboŋ ndoŋ num oo bayiaŋ ni, kola baa kalaa num oo yiinuŋ ni, vɛlɛ a doma kɛndɛ nda hɔu wo. Kpeyaŋ kɛndɛ kɛndɔɔ, liaaŋ, vɛlɛ a chuɛiyaŋ num oo dia ni. Nduyɛ ma naŋ naŋɔɔ pila,+ mi keŋ tosa ma suliŋ le ma wa masa laandu.’”

14 “‘Mi tɔɔ numndo tiu* o lɛŋnde niŋ kpou,+ a naŋɔɔ bɛndu num oo naŋ ndo. Kanifuule, ya tosa ni ma naŋ tau tau.’+ Ya Chɛhowa, Mɛlɛka Kpuluŋguma Bɛndoo dimi lende ni.”

15 “‘Kɛ ma kandu tiindaŋndo dɔwɔɔ o naŋɔɔ numndo niŋ,+ nduyɛ ma simnuŋ wana lanɔ suundɛiyo le mɛɛ ŋ fula tɔɔ yɛ.+ Ma simnuŋ wana lanɔ malnaŋndo. Wana o wana ndoo wa pɛ hiouwɔɔ+ mbo kaala num, a chɛl. 16 Ma soliŋ nyɛla numnda chuɛɛnaŋndaŋ lapum kpeku le fondaŋnda filioŋndaŋ bɛɛndiaa nyɛkɛndɛi, naa ŋ kua suundaa wa.+ Sɔɔŋ waa nuaa nɔ miŋ yɔŋnuŋ te, nduyɛ fɛɛŋ bɛɛ ŋ nɔ lɛ miŋ yɔŋnuŋ te. 17 Ma chua vɛlɛ nyɛm kɛvɛlɛŋ kɛndɛ kɛndɛ nda toosiaa a kooliiye vɛlɛ a kanii humbuei mi ke num ndoŋ, ma bɛɛndiaa piɔmaa piaanduaa a muŋ ma suunda a nda.+ 18 Nduyɛ, ma chua kolala numnda huauwaa laŋ ma wou nda.* Okoŋ, ma soliŋ nyɛm chuŋ kɛndɛŋ nuŋ a chuɛima niaŋ kpeku le salalaŋ solioo o nda lo.+ 19 Ma chua beedii* nda toosiaa a kpeyaŋ kɛndɛ kɛndɔɔ, chuɛiyaŋ, vɛlɛ a liaaŋ mi ke num le dioo wo, ma soli salaa o nda lo le mi chuŋ kɛndɛ koŋ komal nda.+ Lende kpeekpei i yɔŋnuŋ ni.’ Ya Chɛhowa, Mɛlɛka Kpuluŋguma Bɛndoo dimi lende ni.”

20 “‘Ma chua puaa numnda a chuaa laanduaa ŋ vilul la wa,+ ma soli nda salaa o piɔmnda haa lo.+ Baa kaa num suundɛiyo cho letuu le? 21 A diu puaa niaa, nduyɛ ma soli nda salalaŋ o yiŋndeŋ niŋ.+ 22 Mɛɛ ŋ wa balaŋ lueiyo o sɔɔŋ nɔɔlɛiyoŋ niŋ ma suunda, a loonuŋ a teleŋ ŋ wa o lende ma wa tum fondo o luŋ kpendekele, ma lindaŋ a kooma numndaŋ ndo le. 23 Kpundɔɔ cho le num le sɔɔŋ wɔɔŋ ŋ tosa muŋ ndoŋ kpou.’+ Ya Chɛhowa, Mɛlɛka Kpuluŋguma Bɛndoo dimi lende ni. 24 ‘A toosiaa luaŋnde le numpila, vɛlɛ a fondaŋ filioŋndo o fondaŋ kɛ kɛ cho kpendekele. 25 A taŋgul fondaŋnda filioŋndaŋ o fondaŋnda nɔ tɔɔ laŋ o nɛi bɛndu kɛ kɛ. Le mɛɛ ŋ yɔŋguŋ numpila* o wanaa hiauwaŋnda lo yɛ, ma siiŋguu naŋɔɔ numndo nyɛ nɔɔlɛi.+ A wa tuŋ hiouwɔɔ lachi a kaa suundɛiyo tosaa.+ 26 A tosa kaa suundɛiyo a puaa Ichipi,+ wanaa nya chiɛɛliaŋ ma nɔ yeemɛi tau le waŋ laanduaa wa, nduyɛ ma tɛɛmbuu ya kɔllo teleŋnda bɔɔbɔɔ a kaa num suundɛiyo. 27 Lelaŋ, I cho ba nuu siɛndi mi tusi num nyɛpalaa choo, nduyɛ mi dɔɔniaa nyɛdiaa numndo.+ I cho num malɔɔ waŋ laanduaa tul num leyɛ wa o ba,+ nda cho yɛ chuaa laanduaa Filitiaŋnda ni, a kɔndɔfillo bii a kaa num nɔɔlɛiyo wa.+

28 “‘Le mɛɛ ŋ nɔ kɔl hiniaa le yɛ, ma suunda a waŋ piaanduaa Asiiliaa.+ Kɛ a suunda koŋ kpou, a hini kɔl te. 29 Le hei, ma hiau lachi a kaa suundɛiyo tosaa a lɛŋnde wanaa leyulaa,* vɛlɛ a lɛŋnde Kaadiaŋ ndeŋ.+ Kɛ a koŋ kpou, a hini kɔl te. 30 Nuawɔ se mɛɛ num oo naa* o kɔllo niŋ yɛ,* mɛɛ ŋ wa sɔɔŋ muŋ kpou tosaa maa wana lanɔ suundɛi bɛndu!’ Ya Chɛhowa, Mɛlɛka Kpuluŋguma Bɛndoo dimi lende ni.+ 31 ‘Kɛ mɛɛ ŋ taŋgul luaŋii numnde o fondaŋnda nɔ tɔɔ laŋ, nduyɛ ma toosiaa fondaŋ filioŋndo o fondaŋnda cho kpendekele laŋ, a ve maa wana suundɛi le. Kanifuule, a ve nyɛsɔlaa nda wa num kioo wo biyɔɔ le. 32 Kɛ num wana lanɔ suundɛi mɛi pɔnɔ ndɔ mbo kɔ wa a waŋ piaanduaa cheleŋnda wo ŋ cho ni!+ 33 Waŋ laanduaa suundɛiya kpou, mi waŋnda ke nda nyɔɔŋ.+ Kɛ num, num ke puaa del num kɔɔli wa nyɔɔŋ ni.+ Nduyɛ ba o ba nda wa, ma vɛɛlu nda le ma hiŋ o numndo ma suunda a nda.+ 34 Num a cho teŋgeŋ a waŋ laanduaa suundɛiyaa cheleŋ. Mɛɛ ŋ suunda yɛ, o cho lende le chaanda suunda le! Wanaa suunda a numnda, num paawa* nda ni, kɛ o cho nda le paawa num te. Mɛɛ num num suunda yɛ choŋnuŋ bɔɔ teŋgeŋ.’

35 “Lelaŋ num wana suundɛiyo hoo,+ yaŋ nilaŋ o nyɛ Chɛhowa dimi wo. 36 Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Yeemɛi suundɛiye hiou num bɔɔ o kɔl kɔɔli. Nduyɛ hei tosa mi samaa numnda, vɛlɛ a piɔmaa nɔɔlɛiyaa+ ŋ soli kooma puaa numnda salalaŋ o nda lo wa cha num tum fondo.+ 37 Lelaŋ, I cho samaa ŋ kaala wa, vɛlɛ a samaa ŋ tul leyɛ ma peelu yeemɛi ndɛi ya chuuŋgiaa naapilɛ kpou. Ba o ba nda wa, I cho nda kpou chuuŋgiaa naapilɛ, mi yuŋga num nda o hɔl pulee ma che num tum fondo.+

38 “‘I cho num nyɛpalaa waŋ laanduaa suundɛiya,+ a waŋ laanduaa diu waŋnda+ wa sɔla wo tusi choo. I cho num diyɔɔ a kɔl tuuwo le mɛɛ ya paŋala num yɛ.+ 39 I cho num nda malɔɔ o ba, ma tɛɛmbuu luaŋuŋ numndoŋ, nduyɛ ma pesi pesi fondaŋnda numnda filioŋndaŋ.+ A cho num yuŋga,+ ma sooluu nyɛm kɛvɛlɛŋ kɛndɛ kɛndɛŋ cho num ŋ bayiaŋ ndoŋ,+ okoŋ ma mɛi num tum fondo. 40 A cho hunɔɔ faŋga bɛndoo ma chiŋalaŋ num,+ ma vii vii num a poutaŋ,+ nduyɛ ma dii num a mɔɔŋ faŋuŋ ndaŋ.+ 41 A cho chiɛila numndaŋ malɔɔ o yiŋ,+ nduyɛ ma tusi num nyɛpalaa choo waŋ laanduaa bɔɔbɔɔ o hɔl. I cho tosa mi suunda numndo mɛɛlu,+ nduyɛ ma pɛŋgi waŋnda paawaa le suundaa a num. 42 I cho pɔlul kɔl a tumbe ya dɔɔnuŋ a num ndo,+ nduyɛ mi kɔl ni tuuwo faŋaŋ num choo,+ okoŋ mi meinuŋ kpili, I doonuŋ lɛ tumbe le.’

43 “‘Le mɛɛ ŋ kɛɛ loonɔŋndo a nyɛ ya tosal num teleŋ ŋ wa chɔŋnɔŋndo wo,+ nduyɛ ma tosa sɔɔŋ muŋ kpou le ya kɔllo tɛɛmbuuwo yɛ, I cho num nyɛpalaa tusi choo le sɔɔŋ wɔɔŋ ŋ tosa woŋ. Nduyɛ kposoŋ bɛɛ I cho lɛ num chɛlɔɔ ma hiou lachi a kaa num wɔɔŋndo vɛlɛ a sɔɔŋ nɔɔlɛiyoŋ tosaa le.’ Ya Chɛhowa, Mɛlɛka Kpuluŋguma Bɛndoo dimi lende ni.

44 “‘A tonya, wana o wana cho taloo hoo dimi a num okɔɔ aa: “Kala ndɔ yɛŋgɛsɛɛ!”+ 45 Kaa kala numndo ŋ tol kɔɔli ni, o ndoo tul pɔnɔ ndɔ a chuauwaa nduaa leyɛ wo. Nduyɛ kaa bɛndaa numnda a pɔmbuaa numnda ŋ tol kɔɔli ni, a ndaa tul piaandaa ndaa a chuauwaa ndaa leyɛ wa. Hitaitiinɔɔ kala num wa ni, nduyɛ Amɔluaitiinɔɔ finya num wa ni.’”+

46 “‘Bɛ num cho Sameeliaa ni,+ o cho ba luaŋ ndo* a chuauwaa nduaa laanduaa latulu wo.*+ Nduyɛ pɔmbɔ num cho Sodɔm ni,+ o cho ba tou wo* a chuauwaa nduaa laanduaa latulu wo.+ 47 O cho ko kaala ndala nɔɔlɛilaŋ te ŋ tol kɔɔli le, kɛ o teleŋ biŋgi bɛŋgu, ma tosa kaala nɔɔlɛilaŋ mbo hiau la ndalaŋ poloŋ.+ 48 Mɛɛ i cho kpendekele maa I cho yoomu yɛ, nyɛ num a chuauwaa num aa laanduaa tosa wo, Sodɔm pɔmbɔ num a chuauwaa nduaa laanduaa tosa ndu kposoŋ te.’ Ya Chɛhowa, Mɛlɛka Kpuluŋguma Bɛndoo dimi lende ni. 49 ‘Suɛi wɔɔŋii Sodɔm pɔmbɔ num tosa ve cho hei ni: Ndu nda chuauwaa nduaa laanduaa,+ wanaa heelaŋnda nda wa ni.+ Ndaa nɔ nyɛdiaa tau,+ ndaa buulaŋ le nyɛ o nyɛ le, nduyɛ a waŋnuŋ hɛnɛkɛ.+ Kɛ, a chɛl le wanaa wa mɔnɛi biyɔɔ wa a wanaa bala fonduaa malaa le.+ 50 Wanaa heelaŋnda nda wa ni,+ nduyɛ ma tosa sɔɔŋ nɔɔlɛiyoŋ ya o hɔl.+ Lelaŋ mi cha maa o bɛnda mi tɛɛmbuu nda.+

51 “‘Sɔɔŋ wɔɔŋ ŋ tosa woŋ, tɛɛŋ bɛɛ Sameeliaa+ fuuluu a muŋ tosaa le. Ma hiau lachi a sɔɔŋ nɔɔlɛiyoŋ tosaa mbo hiau nda. Nduyɛ mi hei tosa mi pɔmbɔ num a bɛ num wa sakpo ma hiau num.+ 52 Biunuŋ niko bɛɛla tambɛila komal num ndaŋ, le mɛɛ ŋ toolu* bɛ num a pɔmbɔ num o kaala ndalaŋ choo yɛ. Le mɛɛ ŋ tosa hakioo mbo hiau nda yɛ, a chɔm maa a cho sakpo ma hiau num. Lelaŋ, biunuŋ niko siɔmbulaŋ a bɛɛla tambɛilaŋ, le mɛɛ ŋ tosa mi pɔmbɔ num a bɛ num wa sakpo ma hiau num yɛ.’

53 “‘I cho wanaa ndaa cho o biyɔɔ niŋnda kpou chuuŋgiaa naapilɛ. Sodɔm wanaa nduaa cho o biyɔɔ niŋnda a chuauwaa nduaa laanduaa, vɛlɛ a Sameeliaa wanaa nduaa cho o biyɔɔ niŋnda a chuauwaa nduaa laanduaa. Nduyɛ num bɛɛ, I cho wanaa num aa cho o biyɔɔ niŋnda chuuŋgiaa a nda latulu,+ 54 le halikpeŋ ma biunuŋ bɛɛla tambɛila numndaŋ. A cho tambu labɛɛ, le mɛɛ sɔɔŋ wɔɔŋuŋ ŋ tosa woŋ dɛɛniaa nda kɔllo yɛ. 55 Sodɔm pɔmbɔ num a chuauwaa nduaa laanduaa cho miiŋgu mɛɛ nda wa paandu yɛ, mi Sameeliaa bɛ num a chuauwaa nduaa laanduaa miiŋgu mɛɛ nda wa paandu yɛ. Nduyɛ num bɛɛ a chuauwaa num aa laanduaa, la cho miiŋgu mɛɛ nya wa paandu yɛ.+ 56 Teleŋ ŋ fula tɔɔ a heelɔŋndo wo, Sodɔm pɔmbɔ num ndoo bii num o chaŋ te, 57 tuupa bɛɛ mi dɛnɛ wɔɔŋ numndo fula chieeŋ kpendekele.+ Nuawɔ mɛɛ chuaa laanduaa Siiliaa a wanaa nda chiɛɛliaŋ nda cho num mamɔɔ yɛ, nduyɛ mi chuaa laanduaa Filitiaa+ a wanaa balu numnda kpou chua num chɔdɔ yɛ. 58 A cho fulamakɔɔlila wɔɔŋndaŋ sɔla le kaa num wɔɔŋndo, vɛlɛ a sɔɔŋ nɔɔlɛi ŋ tosa woŋ.’ Ya Chɛhowa dimi lende ni.”

59 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘I cho num tosal mɛɛ ŋ tosa yɛ,+ le mɛɛ ŋ tɛɛmbuu kpema ya yii a numndo yɛ.+ 60 Kɛ ya, I cho loonɔŋ a kpema ya yii a num boondii ŋ wa chɔŋnɔŋndo ve. Nduyɛ, I cho yii kpema fafɛɛŋndo a num.+ 61 Teleŋ ŋ cho pɔmbɔ num a bɛ num demul lo, a cho loonɔŋ a kaala numnda wɔɔŋndaŋ, okoŋ mi siɔmbulaŋ la bii num.+ Nduyɛ I cho tosa ma simnuŋ chuauwaa num aa laanduaa, kɛ o cho le kpema ya yii a num ndo le.’

62 “‘I cho kpemaa yii a num, ma sina maa ya cho Chɛhowa ni. 63 Te I mal num haki le sɔɔŋ wɔɔŋ ŋ tosa woŋ kpou pɛ,+ a cho loonɔŋ a keŋ okɔɔ nduyɛ mi siɔmbulaŋ la bii num.+ Bakoo bɛɛ a nɔla niŋ ma soo le.’ Chɛhowa, Mɛlɛka Kpuluŋguma Bɛndoo dimi lende ni.”