Emɔɔsi

7 Nyɛ Chɛhowa, Mɛlɛka Kpuluŋguma Bɛndoo chɔm ya o yilaŋnde niŋndo cho hoo ni: Mi cha mbo chuuŋgiaa soonuaa kunda bɛnduaa a teleŋ tɔlɔɔla mɛɛlaalaŋ* la kandu wulɔɔ wo. Tɔlɔɔlaŋ ndaŋ waŋnda ndaa tual ni te ndaa chii pɛ bil chɔluaa dia wo kiolɔɔ le masaa. 2 Mɛɛ soonuaa haa chii tɔlɔɔlaŋ dio o lɛŋndeŋ niŋ, mi dimi aa: “Oo Chɛhowa, Mɛlɛka Kpuluŋguma Bɛndoo, yandii mal wanaa numnda haki!+ Te hei yɔŋnuŋ pɛ, vɛɛnɛ Chekɔpu cho yɛ fula leniŋ?* Kanifuule, o cho wana dialuŋ kala le!”+

3 Okoŋ, mi Chɛhowa siŋga yiyaŋ ndɔɔ.+ Mi Chɛhowa dimi aa: “Nyɛ ŋ che hoo wo, o cho lɛ yɔŋnɔŋ te.”

4 Nyɛ Chɛhowa, Mɛlɛka Kpuluŋguma Bɛndoo chɔm ya wo cho hoo ni: Mi Chɛhowa, Mɛlɛka Kpuluŋguma Bɛndoo veelu yiŋndeŋ le lɛŋndeŋ nyɛpalaa tusioo choo. Mi le veeliaa mɛŋma cho o peela yiŋgilɛi laŋ niŋndaŋ, nduyɛ mi le luam lɛŋndeŋ le tiŋ. 5 Okoŋ mi dimi aa: “Oo Chɛhowa, Mɛlɛka Kpuluŋguma Bɛndoo, yandii veelu yiŋnde leŋ te.+ Te hei yɔŋnuŋ pɛ, vɛɛnɛ Chekɔpu cho yɛ fula leniŋ?* Kanifuule, o cho wana dialuŋ kala le!”+

6 Okoŋ, mi Chɛhowa siŋga yiyaŋ ndɔɔ.+ Mi Chɛhowa, Mɛlɛka Kpuluŋguma Bɛndoo dimi aa: “Nyɛ ŋ che vɛlɛ hoo wo, o cho lɛ yɔŋnɔŋ te.”

7 Okoŋ kɔɔli, mbo chɔm ya vɛlɛ nyɛ cheleŋ: Chɛhowa wa isisi o kpaki nda taŋgul a yoole tuwaa leŋ* ndo choo. Nduyɛ, yoole leŋ le wa ndu o ba. 8 Mi Chɛhowa nyuna ya aa: “Emɔɔsi, yɛɛnɛ ŋ cho yɛ chɔɔ?” Mi muli aa: “Yoole tuwaa leŋ.” Mi Chɛhowa dimi aa: “I hiŋ Isɔluɛiya, wanaa niaa yoole tuwaa leŋ malɔɔ tɛɛŋ le mi tuu nda. Nduyɛ, I mel lɛ nda haki kposoŋ te.+ 9 Fondaŋnda lasooluula Aase laŋ kpou,+ la cho tambei sɔla.+ Nduyɛ, mi maaŋnda lasooluu laŋ Isɔluɛi bɛɛ la piɔl wɔ wɔ. I cho vɛlɛ hunɔɔ chiɛi Chɛlobowam ndo chiŋalaŋ a muɛi faŋnde.”+

10 Mi Amasaya wana soliaa lasalaa le Bɛtɛl+ yɔŋ Chɛlobowam, masaa+ le Isɔluɛi yooŋgoo hoo. Mbo dimi aa: “Emɔɔsi cho num dumboo* yiiyo. Nduyɛ, waŋnda Isɔluɛi tɛɛŋ kpeekpei o cho hei tosaa ni.+ Waŋnda niŋ kɔl kposoŋ a sɔɔŋ o cho muŋ dimioo woŋ te.+ 11 Nyɛ Emɔɔsi dimi wo cho hoo ni, ‘A cho Chɛlobowam diyɔɔ a muɛi faŋnde, nduyɛ ma soli waŋnda Isɔluɛi o lɛŋnde ndaleŋ niŋ, ma kuɛ a nda o biyɔɔ niŋ.’”+

12 Okoŋ, mi Amasaya dimul Emɔɔsi aa: “Faŋaŋ nanuŋ, po cha yilaŋndoŋ ndo. Hiou ma kuɛ o lɛŋnde Chuda leŋ niŋ, ma kɔ nuuviaa nyɛdiaa* loŋ. Kɔ loŋ ma dimul waŋnda yilaŋuŋ ŋ che woŋ.+ 13 Kɛ ŋ yeema lɛ miŋ tuei num yooŋgulaŋ ndaŋ dimioo Bɛtɛl te.+ Kanifuule, maaŋ masaa kua sooluulaŋ tosaa wo o cho ni.+ Nduyɛ, chiɛi lelɛŋndo o cho vɛlɛ ni.”

14 Okoŋ, mi Emɔɔsi mulul Amasaya aa: “I ve wana suaa le Mɛlɛka le, nduyɛ finya nuu bɛɛ. Wana mandaa lasaa ya wa ni.+ Nduyɛ, yɔmii mafikii nda veelu a sikamɔɔ ve wo, o kpele ndɔɔ niŋ yaa tosa wallo ni. 15 Kɛ mi Chɛhowa faŋa ya saa mandaa. Nduyɛ mi Chɛhowa dimul la aa: ‘Kɔ Isɔluɛi, ma kɔ dimul wanaa niaa yooŋgu nuu.’+ 16 Lelaŋ, yaŋ nilaŋ o nyɛ Chɛhowa dimi wo: ‘A cho dimioo maa ya dimi lɛ yooŋgula wɔɔŋndaŋ a Isɔluɛi okɔɔ le.+ Nduyɛ maa, ya dimi lɛ+ sɔɔŋ wɔɔŋndoŋ a chiɛi Aase wo okɔɔ le. 17 Kɛ nyɛ Chɛhowa dimi wo cho hoo ni: “Laa num cho simnɔŋ wana suundɛi bɛndu o chioo hoo niŋ, nduyɛ ma dii puaa numnda a chuauwaa num aa laanduaa a muɛi faŋnde. A cho lɛŋnde numndeŋ tuu a yooleŋ, ma piɔuviaŋ ndeŋ. Okoŋ ma bii numpila, ma kuɛ a num o lɛŋnde sumialteŋ niŋ ma kɔ wu loŋ. Nduyɛ, a cho waŋnda Isɔluɛi soli o lɛŋnde ndaleŋ niŋ, ma kuɛ a nda o biyɔɔ niŋ.”’”+