Chowɛɛ
2 “La hɔŋ buloo o Saayɔŋ niŋ!+
La yonda o pembii nii diandɛi choo maa chɔuwo cho hunɔɔ.
Wana o wana cho o lɛŋndeŋ niŋ,* la nyiiya a siooŋnde,
kanifuule paale Chɛhowa leŋ le cho hunɔɔ!+ Le cho niŋ kpɛɛluŋ!
2 O paaleŋ ndeŋ choo, nyumma bɛnduaŋ ma cho tolɔɔ kpiŋgbi,+
Nduyɛ mi yumbu yumboo o halaa niŋ bɛɛ piimiaa kpilo kpilo.+
Le cho wa mɛɛ nyɔɔ kandu nuaa teŋgaa idii, mi pemboŋ kumbu ndu yɛ.
Wanaa kpaaya bɛnduaa kɔnduŋ ma wa hunɔɔ, nduyɛ a chuu chɔm te.+
Kani bɛɛ ŋ chi wɔ waŋnda maa nda le.
Nduyɛ fɛɛŋ bɛɛ ŋ chi lɛ niŋ waŋnda maa nda le,
Chɔŋ niŋ mbo kuɛ a lachi kɛ.
3 Yiŋndeŋ le cho hunɔɔ a nda nyɔɔŋ tɛɛmbuuwo lachi,
Mi yiŋnde wule wule leŋ le wa nda sandei amakɔɔ.+
Lɛŋnde cho nda lachi leŋ le cho ko maa kpeloo Idɛŋ.+
Kɛ leŋ nda amakɔɔ, pollo le cho ni.
Nduyɛ nyɛ o nyɛ tiuba mbo hɛluŋ nda le.
4 Wana che nda pɛ, naŋ chaa suaa ni.
Nduyɛ te a wa kiltaŋ pɛ, naŋ chaa suaa chɔuwa ni.+
5 Wana tuei nda hunɔɔ idiki dikiei pɛ, naŋ chaa nyɛm nyaanaŋ suaa naŋndoŋ cho kɔlaŋ o pemboŋ choo ni.+
Naŋ chaa yiŋnde bɛndu leŋ le cho kɔlaŋ a bil vesɛiyo lomɔɔ kpalatata ni.
A cho ko mɛɛ wanaa kpaayaa bɛnduaa a bɛɛndiaŋ nuaa ma sim le chɔuwo yɛ.+
6 Te waŋnda che nda pɛ, kɔltaŋ la cho nda yɔŋnɔŋ pulaŋ pulaŋ.
Hɔlla cho wana o wana siŋgaŋ a siooŋnde.
7 A cho ko mɛɛ kuubaa chɔuwa chiŋalaŋ nuaa yaamɔɔwaa ndaa yɛ.
Ma hel kpaki chioo maa puaa chɔu.
O kɛ kɛ, kɔlaŋ lachi sakpo,
A feŋaŋ o nɛi ndaa choo ma sei le.
8 Te a wa kɔlaŋ pɛ, a nyiindaŋ te.
Wana o wana mel nɛi ndɔɔ, mbo kelu chaaŋ ndɔ lachi le.
Te a wuu pɛ apum a nyɛm chɔuwoŋ ma del,
A tuaa hiou lachi a kɔlaŋ.
9 Ma nyaanuŋ le chioo biyɔɔ, ma hel kpakioo a kiltaŋ.
Ma hel o chiɛilaŋ choo, ma keeku o wundɛilaŋ* nduyɛ ma luɛi chiɛilaŋ niŋ maa viinɔ.
10 Te a wa pɛ kɔlaŋ, mi lɛŋndeŋ le nyiiya, nduyɛ mi halaa bɛɛ hiiluŋ.
Mi paaleŋ a paŋgei bɛɛ piimiaa kpilo.+
Nduyɛ, mi looŋ yɔŋnuŋ yim yim.
11 Chɛhowa cho wa yondaa puaa nduaa chɔuwa lachi,+ kanifuule a cho kunda bɛndoo.+
Mɛlɛka cho tosa nyɛ o dimi wo, kanifuule o cho wana kpaaya bɛndu.
Paale Chɛhowa leŋ le cho paale bɛndu, nduyɛ le cho paale isiooŋ.+
O nɛɛnɛ nɔla yɛ mbo biunuŋ ndeŋ?”+
12 Kɛ Chɛhowa dimi aa: “O hiu wɔ teleŋ te. La miiŋgu ya o ibuŋ a kɔlta nyalaŋ kpou.+
La bii sumndo,+ nduyɛ mi la chaŋ chaŋ imɔnɔɔ.
13 La sɛɛsiaa kɔlta nyalaŋ,+ kɛ o cho domala nyalaŋ te,+
Nduyɛ mi la miiŋgu Chɛhowa Mɛlɛka nyaa o ibuŋ.
Kanifuule, o nɔ kɛndɛi a nyiɛɛye. O doonuŋ tumbe chɔ chɔ le,+ nduyɛ kaala lo lechoo ndɔɔ cho bɔɔ.+
Te la tosa lende pɛ, o nɔla mbo siŋga kɔl ndɔɔ a kpundɛ o dimi le hunɔɔ wo okɔɔ.
14 Kɛlɛŋgaa dɔɔ mbo pɔlul kɔl, mbo siŋga yiyaŋ ndɔɔ,+
Nduyɛ mbo dɔu nya sala.
Le halikpeŋ mi la yɔŋgu sala ŋkullo a sala mamuɛiyo o Chɛhowa Mɛlɛka nyaa lo.
15 La hɔŋ buloo o Saayɔŋ niŋ!
La yonda le sumndo biyɔɔ. La veelu waŋnda le bɔŋaŋ teŋgeŋndo.+
16 La chuuŋgiaa waŋnda diompilɛ mi la dindi nda.+
La chuuŋgiaa falla,* chuaambuaa, a chɛlɛkpiaa cho wuɛiyo wa.+
Wana pɔnɔ chua lanɔɔ sɛnɛiyo nɔ mbo fula o lumui ndɔɔ niŋ, nduyɛ mi wana lanɔ chal nɔɔ sɛnɛiyo bɛɛ fula o lumui ndɔɔ niŋ.
17 Nya wanaa soliaa lasalaa, wanaa cho wallo le Chɛhowa wa,
La sim toŋgoo tɛɛŋ a bandu luamaa lasalaa+ mi la chaŋ mi la dimi aa:
‘Oo Chɛhowa, tuiinuŋ wanaa numnda inyiɛɛ fɔ.
Tosa mi wanaa numnda* simnuŋ nyɛ mamaa le.
Chɛl mi lɛŋii cheleŋnde nɔ nda kpaayaa choo,
Nduyɛ mi waŋnda nyuna aa, “Kuɛɛnɛ Mɛlɛka ndaa cho yɛ?” le.’+
18 Okoŋ, Chɛhowa cho lɛŋnde ndɔleŋ manda a yoomuma nduaŋ kpou,
Nduyɛ mbo tuiinuŋ wanaa nduaa inyiɛɛ.+
19 Chɛhowa cho wanaa nduaa mulul aa:
‘I hiŋ nya ke nyɛdiaa, muɛima sɛnɛiyaŋ a chuɛiyaŋ,
Nduyɛ mi la hini kɔl mɛɛ.+
I cho lɛ tosa mi lɛŋii cheleŋnde i mam nya le.+
20 I cho wanaa chɛŋ ba luaŋ ndo wa touwɔɔ landaŋ a nya.
I cho nda sɛŋi o lɛŋnde vesɛileŋ niŋ, naa nyɛ o nyɛ cho le wa.
Kunda cho lachi wo cho muliŋ ma kuɛ o pee mɛŋma ihɛllo ba paaleŋ le chaŋ ndo,*
Mi kunda cho amakɔɔ wo muliŋ mbo kuɛ o pee mɛŋma ihɛllo ba paaleŋ le del lo.*
Dialuŋ ndaŋ vilɛiyoŋ cho siɔ miŋ fula chuŋ.
Nduyɛ, mi chuŋ koŋ tiu ba o ba fee.+
Kanifuule, Mɛlɛka cho sɔɔŋ kɔndɔfilloŋ tosa.’
21 Oo lɛŋndeŋ, yɔŋ isiooŋ te!
Naŋ kɔl ma dɔɔnuŋ nyaale, kanifuule Chɛhowa cho sɔɔŋ kɔndɔfilloŋ tosa.
22 Nya visiaa cho yondoo niŋnda, la yɔŋ isiooŋ te.
Yɔm mafikiiyo, a yɔm makilepiiyo cho komɔɔ lɔpi lɔpi.+
23 Nya puaa Saayɔŋ, la naŋ kɔl nduyɛ mi la dɔɔnuŋ nyaale le Chɛhowa Mɛlɛka nyaa.+
Kanifuule, o cho nya ke piɔɔ tasoo* a mɛɛ nya nɔ mi la sɔla ndu yɛ.
O cho tosa mi piɔɔ wa siaa tau tau.
Piɔɔ tasoo a piɔɔ mɛɛlaa* cho wa siaa maa paandu.+
24 Fondaŋnda nya luaa witiiyoŋ ndaŋ la cho piɔ cha a witiiyoŋ.
Muɛima sɛnɛiyaŋ a chuɛiyaŋ ma cho piɔ o doolala* nya toosiaa maŋ ndaŋ, mi ma choŋ.+
25 Nyɛ o nyɛ soonuaa kunda bɛnduaa, soonuaa villɔ labɔɔ le wa, soonuaa tɛɛmbaa latɔluaa, a soonuaa tɛɛmbaa cheleŋ de o wɔsila hiou laŋ niŋ,
I cho nya paawa* le ndu.
Ya yɔŋ puaa niaa chɔuwaa kpaaya bɛnduaa kaŋ ni, ma kɔ del nya choo.+
26 La cho nyɛdiaa dio mi la hini kɔl.+
Okoŋ, mi la saŋgala diola Chɛhowa Mɛlɛka nyaa,+
O tosa sɔɔŋ kɔndɔfilloŋ le nya wo.
Fɛɛŋ bɛɛ siɔmbula tullɛ niŋ wanaa niaa le.+
27 La cho sina maa I cho a nya waŋnda Isɔluɛi latulu.+
Nduyɛ maa, ya cho Chɛhowa Mɛlɛka nyaa ni.+ Mɛlɛka cheleŋ cho maa ya le!
Fɛɛŋ bɛɛ siɔmbula tullɛ niŋ wanaa niaa le.
28 Okoŋ kɔɔli, I cho nyina nuu waŋnda suu o suu ke.+
Puaa nyaa a chuaa nyaa laanduaa cho yooŋgu nuu dimi.
Falaa nyaa yuuwa cho lɔma teŋgeŋndaŋ sɔl,
Mi chuaa nyaa piaanduaa che yilaŋndoŋ.+
30 I cho sɔɔŋ kɔndɔfilloŋ tosa o choo choo niŋ a o lɛŋndeŋ choo.
Muŋ cho ni, koowaŋ, yiŋndeŋ, vɛlɛ a kumii bɛnduei.+
31 Tuupa mi paale bɛndule Chɛhowa leŋ le fuuluu,+
Paaleŋ le cho simnɔŋ nyumndaŋ, mi paŋgei simnuŋ koowaŋ.+
32 Nduyɛ, wana o wana veelu pɛ diola Chɛhowa laŋ, o cho pioŋɔɔ sɔla.+
Wanaa cho hiɔlɔŋ nda cho wa o pembii Saayɔŋ nde choo a o Chulusalɛm niŋ,+ a mɛɛ Chɛhowa dimi yɛ.
Nda cho wa wanaa Chɛhowa veelu ma sɔla chindaa wa ni.”