Masaa Tasiaa

6 Mi Sɔlɔmɔŋ kandu chiɛi Chɛhowa wo* taŋgullo+ o wɔsi hiɔɔlu ndɔɔ niŋ, chɔŋ a teleŋ o simnuŋ masaa le Isɔluɛi o paŋgii Sivi* ve+ niŋndo (koŋ cho ni, paŋgii diiŋ nduɛi). Nduyɛ, wɔsilaŋ 480 chɔŋ a teleŋ Isɔluɛiya fula o lɛŋnde Ichipi leŋ niŋndo+ o kandu ndu taŋgullo ni. 2 Chiɛi Sɔlɔmɔŋ taŋgul le Chɛhowa wo, o wa bandei nɛiyo 90, toŋgei nɛiyo 30, nduyɛ helɔɔ nɛiyo 45.+ 3 Toŋgo+ wa o chiɛiyo hoo lachi wo bandii nduɛi wa nɛiyo 30, mɛɛ chiɛiyo ndoo toŋgu yɛ koni. Nduyɛ toŋgii nduɛi chɔŋ o chiɛiyo holnɔŋndo wa nɛiyo 15.

4 Wundɛila* o toosiaa le chiɛiyo hoo laŋ, la wa sɔɔkɛnyɛɛ o kɔɔ,+ kɛ leniŋ la kumbiaŋ. 5 Okoŋ kɔɔli, mbo taŋgul vɛlɛ chiɛi cheleŋ le chiɛiyo hoo chɔɔloo nanɔɔ. Mbo balu ndu taŋgullo o chiɛiyo hoo holnɔŋndo chɛ chɛ. Koŋ cho ni, lumui tasoo a lumui wa leniŋ di wo balɔɔ.+ Nduyɛ, mbo kili kili chiɛi o chɔɔlu hoo nanɔɔ wo a lumuilaŋ kpou.+ 6 Chiɛiyo hoo ndoo nɔ helɔɔ le diiŋ. Fondaŋ wa lebɛŋgu wo, kumbiŋ ndɔɔ wa nɛiyo le ŋɔmmɛu a tɛndaa tɛɛŋ. Helɔɔ tasoo nɛiyo le ŋɔmahiɔɔlu, helɔɔ diiŋ ndɔɔ nɛiyo tɔ a tɛndaa tɛɛŋ. Mbo soli fondaŋndaŋ o chiyii chiɛiyo balɔɔ chɛ chɛ, le yɔmnde pɛŋgɛlaa le helɔɔ diiŋ ndɔɔ a helɔɔ yaa ndɔɔ, le halikpeŋ a sɔɔŋiaa lɛ iyɔm o chiyii chiɛiyo hoo le.+

7 Pouta nda taŋgul chiɛiyo hoo laŋ, naa nda kala laŋ nda nda sɛl taŋ ni ma bɛɛndiaa laŋ.+ Le hei, mɛɛ nda wa niŋ chiɛiyo taŋgullo, wanaa tuii lɛ haamɛi,* ɔɔ chuei ɔɔ ichiliŋ o ichiliŋ diom te. 8 Chiɛi o chɔɔlu koŋ nanɔɔ wo, dio wa le luɛiyɔɔ o fondaŋ wa lebɛŋgu wo, ba tou wo o wa ni.+ Nduyɛ, nɛi wa le kɔlaŋ o helɔɔ tasoo a o helɔɔ diiŋ ndɔɔ wo, o tundu tundɛi o wa ni. 9 Mbo hiau lachi a chiɛiyo hoo taŋgullo haaa mbo chii.+ Mɛɛ o chii, mbo yɛɛmbuu yɔmii sida ve i chelulɛi kɛndɛ kɛndɛi lechoo, okoŋ mbo pɛŋgɛla pɛŋgɛŋ yɔmii sida woŋ le ndu kumbɔɔ.+ 10 Mbo soli lumuilaŋ o chiɛi bɛndoo balɔɔ silɔ.+ Lumui o lumui, helɔɔ ndɔɔ wa nɛiyo le ŋɔmmɛu a tɛndaa tɛɛŋ. Nduyɛ lumuilaŋ ndaŋ kpou, yɔmii sida ve nda soliŋ kpeku ni le laŋ bɔŋaa o chiɛi bɛndoo.

11 A boondii keŋ, mi Chɛhowa dimul Sɔlɔmɔŋ aa: 12 “Chiɛi ŋ cho hoo taŋgullo wo, te a tol pɛ nɛila nila chɔmaalaŋ kɔɔli nduyɛ ma bii sawala nilaŋ kpou,+ I cho peelu buŋgɛi ya chuel Deeve finya numnde le num.+ 13 I cho wa ichali waŋnda Isɔluɛi tɛɛŋ,+ nduyɛ fɛɛŋ bɛɛ I mel nda le, kanifuule nda cho wanaa niaa ni.”+

14 Mi Sɔlɔmɔŋ hiau lachi a chiɛiyo taŋgullo haaa mbo chii. 15 Chiɛiyo hoo, mbo kumbu chiyii nduɛi leniŋ kpou a pɛŋgɛŋ yɔmii sida woŋ. Chɔŋ lɛŋ haaa o kaa, mbo kumbu ndu a pɛŋgɔŋ. Nduyɛ, mbo pɛŋgɛla pɛŋgɛŋ yɔmii chunipa woŋ lɛŋ kpou.+ 16 Mbo soli lumuiyo leniŋ di+ a pɛŋgɛŋ yɔmii sida woŋ, chɔŋ lɛŋ haaa hel o kaa. Nduyɛ kumbiŋ ndɔɔ o kpeŋgoŋ kpou, o wa nɛiyo 30. Leniŋ loŋ Fondaŋ Hiou Diondɔɔ Wo+ wa ni. 17 Lumui tase wa o chiɛiyo hoo niŋndo+ wa fondaŋ diandaa ni. Nduyɛ bandii nduɛi wa nɛiyo 60. 18 Pɛŋgɛŋ yɔmii sida nda kumbu chiɛiyo hoo leniŋ a muŋ ndoŋ kpou, ma tuuliaa hemndaŋ+ a bilta peeŋgelaŋ lechoo.+ Pouwo o pilɛ bɛɛ wanaa chi le. A pɛŋgɛŋ muŋ nda kumbu ndu kpou ni.

19 Okoŋ kɔɔli, mbo bɛɛndiaa lumui wa o chiɛiyo hoo leniŋ di wo,+ le kɔfu kpema Chɛhowa wo kɛsioo loŋ.+ 20 Lumuiyo hoo, bandii nduɛi wa nɛiyo 30, toŋgei nɛiyo 30, helɔɔ bɛɛ nɛiyo 30.+ Mbo kumbu ndu a koolii kɛndɛ kɛndɛi. Nduyɛ, mbo kumbu bandu luamaa lasalaa+ a pɛŋgɛŋ yɔmii sida woŋ. 21 Mi Sɔlɔmɔŋ kumbu chiɛiyo hoo leniŋ a koolii kɛndɛ kɛndɛi.+ Nduyɛ, mbo bayiaa yɔlɔŋ ŋkooliiyoŋ o lumui wa leniŋ di wo hɔlndɔ.+ Lumuiyo hoo bɛɛ, mbo kumbu ndu a kooliiye. 22 Mbo chii chiɛiyo hoo kumbɔɔ kpou a kooliiye. Nduyɛ bandu luamaa lasala wa o lumui wa leniŋ di wo ikɛiyo bɛɛ, mbo kumbu ndu kpou a kooliiye.+

23 Mi Sɔlɔmɔŋ toosiaa chɛlɔbiiya+ a ŋiɔɔŋ a yɔm machuɛiyo, o lumui wa leniŋ di wo niŋ. O kɛ kɛ bandii nduɛi wa nɛiyo 15.+ 24 Chɛlɔbiiya haa, o kɛ kɛ kumbaŋ ndɔɔ wa bandei nɛiyo le ŋɔmmɛu a tɛndaa tɛɛŋ. Nduyɛ chɔŋ o kumbaŋndo o pilɛ hɔllo kɔ o kumbaŋndo o pilɔɔ hɔllo, o wa nɛiyo 15. 25 Kumbaŋnda chɛlɔbiinɔ diiŋ ndɔɔ bɛɛ, bandii nduɛi wa nɛiyo 15. Chɛlɔbiiyaa ŋiɔɔŋnda haa kpou, kpeŋkpeŋ nda wa ni. 26 Chɛlɔbiinɔ tasoo bandii nduɛi wa nɛiyo 15, nduyɛ o pilɔɔ bɛɛ. 27 Mɛɛ o chii chɛlɔbiiya haa toosiaa,+ mbo luei nda chiɛiniŋ di.* Chɛlɔbiiya haa, nda ŋiɔɔŋ kpou kumbaŋnda ndalaŋ la wa la pɛŋgɛlaŋ. Chɛlɔbiinɔɔ o pilɔɔ, mɛɛ kumbaŋ ndɔɔ chɛŋ mbo kɔ pilaŋ chiyii chiɛiyo kpeŋgei i pilɛ. O pilɔɔ bɛɛ, mi kumbaŋ ndɔɔ chaŋ mbo kɔ pilaŋ chiyii chiɛiyo kpeŋgei i pilɛi. Nda ŋiɔɔŋ kpou, ma siɛndi kumbaŋndaŋ la pilɛlaŋ o lumuiyo tɛɛŋ, okoŋ mi la bɔɔŋiaŋ. 28 Mbo kumbu chɛlɔbiiya haa a kooliiye.

29 Nduyɛ o lumui hiou diondɔɔ wo niŋ a o lumui diandaa niŋ, mbo tuuliaa chɛlɔbiiya,+ wauwaŋ,+ a bilta peeŋgelaŋ o chiɛiyo balɔɔ silɔ.+ 30 Mbo kumbu lɛŋndeŋ a kooliiye o lumui hiou hoo diondɔɔ wo niŋ a o lumui diandaa niŋ. 31 Nduyɛ le dio nda mɛi le luɛiyɔɔ o dio wa leniŋ di wo ndu, mbo toosiaa koŋndaŋ a pɛŋgɛŋ yɔm machuɛiyo, a suŋgbuaŋ o kpeŋgoŋ, vɛlɛ a pɛŋgɛŋ wa o kpeŋguŋ dioo le koŋndaŋ lueiyo woŋ. Kpeŋgii ŋuɛɛnuei wa hei ni. 32 Koŋnda tiɔɔŋndaŋ kpou, a pɛŋgɛŋ yɔm machuɛiyo la toosiaŋ ni. Okoŋ, mbo tuuliaa chɛlɔbiiya, wauwaŋ, a bil lapeeŋgoo lechoo. Nduyɛ mbo kumbu nyɛm o tuuliaa muŋ ndoŋ a kooliiye. Chɛlɔbiiyaa kaŋ a wauma maŋ kpou, mbo kumbu a kooliiye. 33 Dio wa le luɛiyɔɔ o fondaŋ diandaa wo bɛɛ, lende o toosiaa pɛŋgɛŋ wa o kpeŋgoŋ le koŋndaŋ lueiyo woŋ a yɔm machuɛiyo ni. Kumbuii hiɔɔluei wa keŋ ni. 34 Nduyɛ, mbo toosiaa diolaŋ la tiɔɔŋ a yɔm chunipa wo. Diolaŋ ndaŋ o kɛ kɛ ndoo nɔ koŋndaŋ la tiɔɔŋ. O koŋjiiyoŋ choo laa hiŋnuŋ ni.+ 35 Mbo tuuliaa chɛlɔbiiya, wauwaŋ, a bil lapeeŋgoo lechoo. Nduyɛ, mbo kumbu nyɛm o tuuliaa muŋ ndoŋ a kooliiye.

36 Mbo taŋgul luŋ chiɛi Mɛlɛkaa+ a pouta sialaalaŋ pulaŋ ma yaa. Okoŋ, mbo handu pɛŋgɛŋ yɔm sida chelulɛiyoŋ lechoo pulaleŋ le pilɛ.+

37 O wɔsi hiɔɔloo niŋ a paŋgii Sivi* ve, nda dɔu chiyii chiɛi Chɛhowa ve lɛŋ ni.+ 38 Nduyɛ, ma chii chiɛiyo hoo taŋgul a mɛɛ nda tuula ndu yɛ+ o wɔsi 11 niŋ a paŋgii Bul* ve (koŋ cho ni, paŋgii ŋɔmaa ve.) Wɔsilaŋ la ŋɔmmɛu o chua ni le chiɛiyo hoo taŋgullo.