Sam
Masiki.* Chondii Itaŋ+ nde, Ɛsiluahaitiinɔɔ.
89 I cho chondei soli a kaala lo lechoo Chɛhowa wo okɔɔ le fɛɛŋ a fɛɛŋ.
I cho yuŋgula cho hunɔɔ o chilaŋ niŋndaŋ kpou dimul a mɛɛ ŋ cho Mɛlɛka tonya yɛ okɔɔ.
2 Kanifuule mi dimi aa: “Kaala lo lechoo wo cho wa le fɛɛŋ a fɛɛŋ,+
Nduyɛ tonya numndo cho le fɛɛŋ a fɛɛŋ o choo choo niŋ.”
4 ‘I cho tosa mi chuauwaa numnda*+ wa le fɛɛŋ a fɛɛŋ,
Nduyɛ mi tosa mi masale numndeŋ le hiou lachi a waa le teleŋ o teleŋ.’”+ (Sila)
5 Oo Chɛhowa, choo choo cho walta numnda kɔndɔfiltaŋ saŋgalaa,
Nduyɛ tonya numndo cho o kunda wanaa diandaa niŋ.
6 O nɛɛnɛ cho yɛ o choo choo niŋ ma tuu ndu a Chɛhowa?+
O nɛɛnɛ cho yɛ o chuauwaa Mɛlɛkaa tɛɛŋ+ mbo wa maa Chɛhowa?
7 Wana o wana cho o kunda wanaa diandaa niŋ nɔ siooŋnde a bɛɛleŋ tau le Mɛlɛka.+
Nduyɛ, o cho o bɛndu le wanaa balu ndu wa kpou.+
8 Oo Chɛhowa, Mɛlɛka puaa chɔuwa,
O nɛɛnɛ nɔ yɛ kpaayaa maa num Chɛhowa?+
Tonya numndo cho num o balaa silɔ.+
9 A nɔ kpaayaa pee mɛŋma ihɛllo choo.+
Te ma wa kalaŋiaŋndo pɛ, a kpaa maŋ.+
10 A niɔu niɔu Luehabi+ ma dii ndu pɛ, mɛɛ nda dii nuaa waŋndo yɛ.+
A sɛŋi yaamɔɔwaa numnda a ba num kpaaya bɛndoo.+
11 Num nɔ choo choo ni, nduyɛ num nɔ vɛlɛ lɛŋndeŋ ni.+
Lɛŋndeŋ a nyɛ o nyɛ cho lechoo,+ num toosiaa ni.
12 Num toosiaa ba luaŋ ndo a ba tou wo ni.
Tabɔɔ+ a Hɛmɔŋ+ cho diola numndaŋ saŋgalaa a nyaale.
13 Ba numndo nɔ bɔɔ kpaayaa.+
Ba numndo kendu bɔɔ.+
Ba num kɛndɔɔ nɔ bɔɔ tɔɔ.+
14 O sakpoyɛi choo a sandei kpeŋgbei* num lemasaa chal ni.+
Tonyaa a kaala lo lechoo wo cho num isisi lachi.+
15 Oo Chɛhowa, kɔl kɛndɔɔ cho le wanaa sina chonduŋ kɔl kɛndɔŋ nda.+
A cho balɔɔ o nyɛ wawoŋ numndo niŋ.
16 Le paaleŋ kpɛŋ, a cho nyaaloo dɔɔnɔŋndo o diola numndaŋ niŋ,
Nduyɛ mi sakpoyɛi numnde tosa ma fula tɔɔ.
17 Kanifuule, num tosa ni ma sɔla bɛɛleŋ a yoomuaŋ.+
Num tosa ni mi yoomuma naŋ ma* fula tɔɔ.+
18 Kanifuule Chɛhowa nɔ boo naa chɔuwo ni,
Nduyɛ le Wana Diandaa o Isɔluɛi niŋ masa naa cho ni.+
19 A teleŋ koŋ, ma suaa o wanaa chɔm num lo lechoo wo wa lo o yilaŋnde niŋ. Ma dimi aa:
“I luei wana kpaaya bɛndoo yoomuaŋ.+
I tosa mi wana ya hɛli wo fula tɔɔ waŋnda tɛɛŋ.+
21 I cho ndu toolu a ba nuu,+
Nduyɛ mi luei ndu yoomuaŋ.
22 Yaamɔɔnɔ kɛ kɛ nyuna ndu niŋ le paawa* malɔɔ le,
Nduyɛ wana dɛnɛ wɔɔŋ kɛ kɛ tusi ndu niŋ nyɛpalaa choo le.+
24 Kaala lo lechoo nuu vɛlɛ a tonya nuu cho a ndu latulu.+
Nduyɛ, diola nilaŋ la cho tosa mi kpaaya* ndɔɔ fula tɔɔ.
26 O cho ya dimul aa: ‘Num cho Finya nuu,
Mɛlɛka nuu, nduyɛ a Pou Kpoowa piŋi ya wo ni.’+
28 I cho ndu kaala lo lechoo nuu chɔm le teleŋ o teleŋ,+
Nduyɛ fɛɛŋ bɛɛ kpema ya yii a ndu wo tembu le.+
29 I cho tosa mi chuauwaa nduaa* wa le fɛɛŋ a fɛɛŋ,
Mi tosa mi masale ndɔleŋ le wa le fɛɛŋ a fɛɛŋ mɛɛ choo choo cho yɛ.+
30 Kɛ te puaa nduaa mal pɛ sawala nilaŋ biyɔɔ,
Ma hiu lachi a nyɛ ya dimul nda wo tosaa le,
31 Te a tul kɛɛsiaala nilaŋ kɔɔli,
Nduyɛ ma tosa nyɛ ya dimul nda wo le,
32 I cho nda soŋɔɔ a sioŋndeŋ le nilakalula ndalaŋ,+
Nduyɛ mi lɔɔ nda le biondɔŋnda ndalaŋ.
33 Kɛ fɛɛŋ bɛɛ I kɛɛ ndu kaala lo lechoo nuu chɔmndo le,+
Kɛlɛŋgaa niŋ te mi kɛɛ le buŋgɛi ya chua ve peeloo.
35 Ya Mɛlɛka diandaa, I mɛnaŋ po maa,
Fɛɛŋ bɛɛ I dimul Deeve choolaŋ te.+
36 Chuauwaa nduaa* cho wa le fɛɛŋ a fɛɛŋ.+
Masale ndɔleŋ le cho wa le fɛɛŋ a fɛɛŋ, mɛɛ paaleŋ le cho ya o hɔl lɛ.+
37 Le cho wa le fɛɛŋ a fɛɛŋ,
Mɛɛ paŋgei cho maa sei tonya o halaa niŋ yɛ.” (Sila)
38 Kɛ numpila dɔɔnuŋ tumbe o kala kala a wana ŋ pɔya wo,+
Nduyɛ ma kɛɛ ndu.
39 A tɛɛmbuu kpema ŋ yii a buɛi numndo wo.
A mal mɔsil lemasa ndɔɔ lɛŋ, nduyɛ ma nɔɔliaa ndu.
40 A pesi pesi saasala ndɔla o toosiaa a poutaŋ ndaŋ kpou,
Nduyɛ ma koombiaa kpakila ndɔla kala kalalaŋ.
41 Wanaa hiauwaŋnda kpou cho nyɛm ndɔŋ puŋgaa.
O simnuŋ nyɛ mamaa wanaa nda chiɛɛliaŋ nda tɛɛŋ.+
42 A ke yaamɔɔwaa nduaa kpaayaa ma yam ndu.*+
A tosa mi yaamɔɔwaa nduaa kpou duaunuŋ nyaale.
43 A tosa vɛlɛ mbo miŋgi muɛi nduɛi faŋnde o boo niŋ,
Ma tosa mi yaamɔɔwaa nduaa tiu ndu ba o chɔuwo.
44 A tosa mi tɔɔ ndɔɔ mɛɛlu,
Nduyɛ ma tɛɛmbuu masale ndɔleŋ labɛɛ.
45 A tosa o viu yoomu le,
Nduyɛ ma simbu simbuu ndu a siɔmbulaŋ. (Sila)
46 Oo Chɛhowa, le vɛɛ kpɛ ŋ cho yɛ hiouwɔɔ lachi a vioŋnɔŋndo? Baa lefafɛɛŋ?+
Baa kɔl num tuuwo cho hiouwɔɔ lachi a waa maa leyiŋ?
47 Loonuŋ a mɛɛ yoomu nuu cho o biŋgi yɛ!+
Mɛɛ le sabu yɛɛ kpeekpei ŋ toosiaa yɛ waŋnda chieeya?
48 Wanachiee kuɛɛ cho yɛ ndu vi kposoŋ te?+
Baa o nɔla pa mbo piŋi yoomu ndɔɔ kpaaya Sɛiyo* o ba? (Sila)
49 Oo Chɛhowa, le yɛɛnɛ a chɔm lɛ naa kaala lo lechoo wo maa paandu le?
Kanifuule, ma mɛnaŋ o Deeve lo maa a cho lo o lediom.+
50 Oo Chɛhowa, loonuŋ a mɛɛ nda cho buɛiyaa numnda mamɔɔ yɛ.
Loonuŋ a mɛɛ ya cho mamɔɔ waŋnda kpou biuwɔŋndo yɛ.
51 Oo Chɛhowa, loonuŋ a yioula yaamɔɔwaa numnda cho laŋ okɔɔ.
Ba o ba wana ŋ pɔya wo hiou pɛ, a cho ndu yioulaŋ.
52 Maa Chɛhowa sɔla saŋgalaa lefafɛɛŋ. Amiina! Amiina!+