Sam
O wana sim lachi le chondei yo lo. Chondii puaa Kolua ve.+ Nyɛchaa.
49 La yaŋ nilaŋ nya waŋnda kpou.
La yaŋ nilaŋ nya wanaa cho o chieeŋndo choo wa kpou,
2 Wana pɔmbɔ ni, wana bɛndu ni,
Wana sulaa ni, wana bala fondo ni.
3 Sɔɔŋ taasioŋ cho ya fula o sondo,
Nduyɛ mi nyɛ ya yiyaŋ o kɔl nuu niŋndo+ chɔm sinapɛŋgoo.
4 I cho nilaŋ yaŋɔɔ o taloo,
Nduyɛ mi tɛɛsiaa ndu o towaa lɔɔ niŋ.
5 Le yɛɛnɛ mi yɔŋ siooŋnde a teleŋ kpundɔɔ,+
Te wanaa dɛnɛ wɔɔŋnda balu ya pɛ ma wa kindiŋndo le ya suɛi wɔɔŋnde tosallo?
6 Wanaa tiindaŋ o sulta ndalaŋ niŋnda,+
A wanaa kialu yoŋgaa a sulta ndala bɛndulaŋ nda,+
7 Wana pilɛ bɛɛ nɔla mbo baŋa waŋndo,
Ɔɔ mbo ke Mɛlɛka nyɛ le ndu baŋaa,+
8 (Yoomula ndalaŋ la cho bɔɔ la sɔvɛ,
Lelaŋ fɛɛŋ bɛɛ a tiuba ma sɔla nyɛ le laŋ baŋa le).
9 Le halikpeŋ mbo wa yoomu lefafɛɛŋ, o chi sooŋndo* le le.+
10 Mbo che maa hali wanaa taasiaa bɛɛ ma vi.
11 Ma yiyaŋ o kɔlta ndalaŋ niŋ maa chiɛila ndalaŋ la cho wa lefafɛɛŋ,
Nduyɛ mi tɛndiila ndalaŋ la wa le teleŋ o teleŋ.
Diola ndalaŋ nda handu lɛŋii ndɛi choo ni.
12 Kɛ wanachioo ndu, mi che bɛɛ o cho o sɔvɛ, o viu achal te.+
O cho o sɔvɛ mbo hiau visiaa yonduaa sɔla tambei ya le.+
13 Mɛɛ nuaa yoomula diɔmnda la mɛɛlu ni,+
Vɛlɛ a wanaa tual nda kɔɔli wa, a naŋ kɔl a sɔɔŋ fondoŋ nda dimul nda woŋ nda. (Sila)
14 A cho tolɔɔ o Sɛiyo* niŋ, mɛɛ nda kua nuaa a saa le diyɔɔ yɛ.
Piɔmndo cho nda liila o sɛiyo ni.
Wanaa cho sakpo wa cho nda wa masaa choo+ idiiyo.
Kaŋnda ndalaŋ kpou la cho lo pɛ.+
Sɛiyo*+ wa niŋ chiɛi nda lemasaa ni.+
16 Buulaŋ le mɛɛ waŋndo simnuŋ wana sulaa,
Nduyɛ mi chiɛi ndɔɔ wa hiouwɔɔ lachi a naŋɔɔ yɛ le.
17 Te o vi pɛ, o kue a nyɛ o nyɛ o ba le.+
Nduyɛ naŋɔɔ ndɔɔ tul a ndu latulu o sɛiyo niŋ te.+
18 Teleŋ o wa yoomu wo, mbo saŋgalaŋ.+
(Te a sul pɛ mi waŋnda saŋgala num.)+
19 O mɛɛlulaŋ kpɔŋ, mbo sɔɔŋguu finyaa nduaa mamaa choo.
Nduyɛ fɛɛŋ bɛɛ a chi lɛ niŋ nyɛ teŋgaa le.
20 Mi che bɛɛ wanachioo cho o sɔvɛ, kɛ te o bii hei bila le,+
Mɛɛ o cho o sɔvɛ mbo hiau visiaa yonduaa sɔla tambei ya le.