Kɔliŋtiaŋ Tasoo

2 Puaapiliaa niaa, teleŋ ya hiŋ naa nya chua le nya sɔɔŋ viaŋnaŋ Mɛlɛkaŋ dimullo wo, I soliŋ diomnda bɛndulaŋ+ ɔɔ kɔl kalu nuu kpeku le.+ 2 Mi kɛɛsiaa maa a Chiisu Kiliti okɔɔ kinɛi ya cho isɔɔ ni, nduyɛ a diyɔɔ nda dii ndu o yɔmndo choo wo.+ 3 A teleŋ koŋ, I wa a dialuŋ vilɛiyoŋ, nduyɛ mi wa nyiiyaa kpa kpa a siooŋnde. 4 Nyɛ ya wa dimioo wo, a sɔɔŋ ya pɛɛku nya woŋ ve kɔl kalu ni le. Kɛ nyɛ ya wa dimioo wo chɔm mɛɛ nyina Mɛlɛkaa nɔ kpaayaa yɛ,+ 5 le mi laalaŋ nyaa tɔlnuŋ o kpaaya Mɛlɛkaa choo, kɛ o cho o taasi waŋnda chieeya choo le.

6 A taasioo okɔɔ naŋ cho suɛi o wanaa kendu o Mɛlɛka piɛiyo niŋnda lo ni,+ kɛ o cho taasi chieeŋndo hoo* le. Nduyɛ o cho vɛlɛ taasi masaa chieeŋnda haa, a cho hunɔɔ suŋ tambei sɔla wa le.+ 7 Taasi Mɛlɛka cho o viaŋnaŋ ndo, a ndu okɔɔ naŋ cho suɛi ni.+ Sindɛ niŋ pa Mɛlɛka kɛɛsiaa hei ni tuupa mi chieeŋndo kanduŋ, le miŋ sɔla biiloo. 8 Masaa chieeŋnda haa sina taasioo hoo le.+ Te ndaa sina ndu pɛ, a ve Masanɔ naa bɛndoo Chiisu diyɔɔ o yɔmndo choo le. 9 Kɛ a mɛɛ i cho i poonyiaa yɛ aa: “Sɔɔŋ hɔlte chi le woŋ, sɔɔŋ nile tui le woŋ, a sɔɔŋ wana yiyaŋ a muŋ okɔɔ le woŋ, muŋ Mɛlɛka bɛɛndiaa ni le wanaa kaala ndu wa.”+ 10 Kɛ mi Mɛlɛka chɔm naa muŋ+ o sabu nyina diandaa niŋ,+ kanifuule nyina diandaa nɔla mbo yaasiaa nyɛ o nyɛ, o yɔŋ bɛɛ aa sɔɔŋ cho ŋ viaŋnaŋ a Mɛlɛka okɔɔ woŋ.+

11 Nɛɛnɛ nɔla yɛ mbo sina yiyaŋnda wanachioo? Wana o wana nɔla le, mɛɛ ndupila. Lende koni, wana o wana nɔla mbo sina yiyaŋ Mɛlɛkaa le, mɛɛ nyina Mɛlɛkaa. 12 Kɛ naa naa, nyina fula Mɛlɛka o ba wo naŋ sɔla ni,+ le miŋ sina sɔɔŋ Mɛlɛka ke naa woŋ pɛŋgu, o cho nyina chieeŋndo le. 13 Sɔɔŋ naŋ cho muŋ dimioo woŋ, ŋ cho muŋ dimi a kɔl kalu iwana chieeya le,+ kɛ a kɔl kalu nyina Mɛlɛkaa pɛɛku naa wo.+ Lelaŋ naŋ cho sɔɔŋ cho a Mɛlɛka okɔɔ woŋ tɛɛsiaa a diomnda nyina Mɛlɛkaa pɛɛku naa laŋ ni.

14 Kɛ wana cho yeemɛi ŋdialle tolɔɔ kɔɔli wo, o chɛl sɔɔŋ cho a nyina Mɛlɛkaa okɔɔ woŋ te. Kanifuule, o cha muŋ ko maa sɔɔŋ ŋdiɔm, o nɔla mbo sina muŋ pɛŋgu le. Le muŋ sinaa, mɛɛ mbo nɔ nyina Mɛlɛkaa. 15 Kɛ wana nɔ nyina Mɛlɛkaa wo nɔ sina pɛŋgoo le nyɛ o nyɛ fee,+ nduyɛ wana kilu ndu iyama le. 16 “Nɛɛnɛ nɔla yɛ mbo sina yiyaŋ Chɛhowa* wo, okoŋ mbo pɛɛku ndu?”+ Kɛ naa naa, ŋ nɔ yiyaŋ Kiliti wo.+