Isikiɛɛ

21 Mi Chɛhowa suaa vɛlɛ naa ya chua aa: 2 “Po wanachioo, muli hɔlla kpeŋgii Chulusalɛm nde, ma dimi yooŋgoo a fondaŋnda diandaa laŋ okɔɔ, vɛlɛ a nyɛ cho hunɔɔ lɛŋnde Isɔluɛi leŋ yɔŋnɔŋndo. 3 Dimul lɛŋnde Isɔluɛi leŋ aa, ‘Nyɛ Chɛhowa dimi wo cho hoo ni: “I cho num chiŋalaŋ, nduyɛ mi soli muɛi nii faŋnde o boo ndɔɔ niŋ,+ mi tɛɛmbuu wanaa cho sakpo wa a wanaa dɛnɛ wɔɔŋnda latulu. 4 Le mɛɛ ya cho wanaa cho sakpo wa a wanaa dɛnɛ wɔɔŋnda tɛɛmbuu latulu yɛ, I cho muɛi nii faŋnde soli o boo ndɔɔ niŋ, mi chiŋalaŋ wana o wana, chɔŋ ba luaŋ ndo mbo kuɛ ba tou wo. 5 Waŋnda kpou cho sina maa ya Chɛhowa, yapila soli muɛi nii faŋnde o boo ndɔɔ niŋ ni. Nduyɛ, i miiŋgu lɛ le.”’+

6 “Kɛ num po wanachioo, wa kuŋndaŋ ma* nyiiya. Wa kuŋndaŋ kpeekpei nda lachi.+ 7 Te a nyuna num pɛ aa, ‘Le yɛɛnɛ ŋ cho yɛ kuŋndaŋ ndaŋ?’ Dimul nda aa, ‘Le yooŋgu ya tueiyo.’ Kanifuule nyɛ ya tueiyo nɔ le yɔŋnɔŋndo. Kɔltaŋ la cho waŋnda laasiaŋ a siooŋnde. Balaŋ la cho nda nyiiya kpa kpa. Wana o wana cho tambu kɔl, nduyɛ mi wulaŋ la liwa nda a mɛŋndaŋ.*+ ‘A tonya, i cho yɔŋnɔŋ. Nyɛ ya tueiyo cho hunɔɔ yɔŋnɔŋ.’ Ya Chɛhowa, Mɛlɛka Kpuluŋguma Bɛndoo dimi lende ni.”

8 Mi Chɛhowa suaa vɛlɛ naa ya chua aa: 9 “Po wanachioo, dimul nda aa, ‘Nyɛ Chɛhowa dimi wo cho hoo ni: “Dimi aa, ‘Muɛi faŋnde! Muɛi faŋnde+ cho i chiɛɛŋɛi, nduyɛ a niŋgila ndi niŋgili. 10 I cho i chiɛɛŋɛi le waŋnda diuwo. A niŋgila ndi mi i wa woli wolioo maa nyɛ ŋualalɛi.’”’”

“Baa hei cho suɛi naŋ dɔɔnuŋ nyaale le?”

“‘Baa i* cho pa tinda lemasa po nuu kɛɛ,+ mɛɛ i kɛɛ yɔmii tuɛi yɛ?

11 “‘I ke ndu ndi le mbo niŋgila ndi, nduyɛ mbo soliŋ ndi kpeku a ba. A chiɛɛŋa ndi, ma niŋgila ndi, le ma sɔɔŋa ndi wana cho waŋnda diuwo wo o ba.+

12 “‘Po wanachioo, koŋul choo choo kpeleŋ,+ kanifuule muɛi faŋnde hinul wanaa niaa. I hinul bolii layuŋguei kpou o Isɔluɛi niŋ.+ Nda a wanaa niaa muɛi faŋnde hei cho chiŋalaŋ ni. Lelaŋ, chaŋ ma luaa lɔlulaŋ. 13 Wanaa niaa sɔla mɛɛndaŋndo.+ Nduyɛ yɛɛ cho yɛ yɔŋnɔŋ a muɛi faŋnde te i kɛɛ pɛ tinda lemasaa? O* cho lo pɛ.’+ Ya Chɛhowa, Mɛlɛka Kpuluŋguma Bɛndoo dimi lende ni.

14 “Nduyɛ num po wanachioo, wa nda yooŋgoo dimullo ma tiam balaŋ. Miŋgi sondoo bɛmbɔɔ le yaa aa, ‘Muɛi faŋnde!’ Muɛi faŋnde hei cho wanaa bɔɔbɔɔ diyɔɔ. I cho nda balɔɔ mi i diu nda tau tau.+ 15 Kɔltaŋ la cho nda laasiaŋ a siooŋnde,+ nduyɛ mi wanaa bɔɔbɔɔ deli o diola kpakila chieeŋ ndaŋ bɛndoŋ. I cho waŋnda diu a muɛi faŋnde. A tonya, muɛi hei cho wolioo maa nyɛ ŋualalɛi, nduyɛ a sui ndi chuɛiyaŋ le waŋnda diuwo. 16 Lɔwa o ba kɛndɔɔ choo! Ma lɔwa vɛlɛ o ba miallo choo! Kɔ ba o ba i muli pɛ sondoo! 17 I cho vɛlɛ balaŋ tiɔmɔɔ mi hini kɔl a tumbe ya dɔɔnuŋ ndo.+ Ya Chɛhowa pila dimi lende ni.”

18 Mi Chɛhowa suaa vɛlɛ naa ya chua aa: 19 “Kɛ num po wanachioo, tuuliaa nɛilaŋ la tiɔɔŋ le mi muɛi faŋnde le masaa Babilɔŋ kei lechoo. O lɛŋnde pilɛ leŋ niŋ kpe nɛilaŋ ndaŋ la nɔ ni mi la chɛŋ. La nɔ mi la handu tamasioo* o nɛi labandoo, naa nɛiyo hoo piɔuwaŋ le kɔlaŋ o chieeŋ muuŋ ndoŋ nda. 20 Tuuliaa nɛiyo le mi muɛi faŋnde kei lechoo le kɔlaŋ chiŋalaŋndo Luaba,+ chiee Amɔnaitiiya, vɛlɛ a nɛi cheleŋ le kɔlaŋ chiŋalaŋndo Chulusalɛm, chiee cho o kpakila kala kalalaŋ niŋ+ o Chuda niŋndo. 21 Kanifuule masaa le Babilɔŋ sim o nɛi labandoo, naa nɛila tiɔɔŋ ndaŋ la piɔuwaŋ nda le yawaa viomɔɔ. O hiiluu chiŋuaŋ, mbo nyuna piɔmaa nduaa* le nɛi chɔmaa, nduyɛ mbo mɛɛndaŋ yemnde. 22 Yawa cho ndu o ba kɛndɔɔ wo muli hɔlla ba Chulusalɛm ndo, le nyɛla pesi kpakilaŋ ndaŋ simioo, le diomndeŋ yɔŋgoo le waŋnda diuwo, le deŋi chɔuwo, le nyɛla pesi kpakilaŋ ndaŋ simioo o diola kpakilaŋ, le ma taŋgul kpakioo ma balu ndu silɔ, a le puuloo deŋgelaa o kpakioo balɔɔ chɛ chɛ.+ 23 Kɛ wanaa* chua buŋgɛi a ndu ma mɛnaŋ po wa cho yiyaŋ maa yawa lachoowaa o vem ni.+ O cho loonɔŋ a hakila ndalaŋ mbo bii nda.+

24 “Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Nyapila tosa ni mbo loonuŋ a biondɔŋnda nyalaŋ, nduyɛ mbo cha hakila nyalaŋ kpendekele o sɔɔŋ nya tosa woŋ niŋ kpou. Mɛɛ o loonuŋ niŋ nuaa a nya yɛ, o cho lakɔ a nya a kaka.’*

25 “Kɛ nya wanaa dɛnɛ wɔɔŋaa cho yuŋgulaŋ bolle o Isɔluɛi niŋnda,+ a yɔŋul nya mi la wa tendu piɔm. Nduyɛ, teleŋndo fuuluu le ma tusi nya nyɛpalaa mɛɛlaa choo. 26 Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Faŋa kooko bɛndu cho num o lebol lo a mɔsil num lemasaa.+ Sɔɔŋ ve lɛ niŋ maa paandu le.+ Heelu wana nɔ tɔɔ le wo,+ nduyɛ ma tusi wana nɔ tɔɔ wo.+ 27 Tambei, tambei. I cho tosa mi le* sɔla tambei. Wana o wana cho leŋ sɔla le haaa mi wana nɔ dioo le leŋ sɔlaa wo hiŋ,+ okoŋ mi ke ndu leŋ.’+

28 “Num po wanachioo, dimul nda aa: ‘Nyɛ Chɛhowa, Mɛlɛka Kpuluŋguma Bɛndoo dimi a Amɔnaitiiya vɛlɛ a diomnda wɔɔŋnda nda cho dimioo laŋ okɔɔ wo cho hoo ni.’ Dimi aa, ‘Muɛi faŋnde! Muɛi faŋnde fula faŋ le diyɔɔ. A sui ndi chuɛiyaŋ le tɛɛmbuuwo a le mi i wa woli wolioo maa nyɛ ŋualalɛi. 29 Mi che bɛɛ yilaŋuŋ lachoowaŋ nda che a nya okɔɔ ni, nduyɛ ma viam yawala lachoowalaŋ, kɛ a cho dialuŋ nyaŋ vilɛiyoŋ diyɔɔ kundaa siliŋ waŋvilɛiya choo. Teleŋndo fuuluu le ma tusi wanaa dɛnɛ wɔɔŋnda nyɛpalaa mɛɛlaa choo. 30 Miŋgi muɛi faŋnde o boo ndɔɔ niŋ. I cho num yamɛi kilul o lɛŋnde ŋ fula leŋ niŋ. 31 I cho num kɔl ni tuuwo hulɔɔ choo. I cho num tɛɛmbuu a tumbe ni kala kala cho maa leyiŋ ndo, nduyɛ mi mal num wanaa kɔl tuuwa o ba, a pɛɛku nyɛkɛndɛi le tɛɛmbuuwo wa.+ 32 A cho simnɔŋ nyɛ tosa mi yiŋndeŋ le bii yo.+ Kooma numndaŋ ma cho talaŋ o lɛŋndeŋ niŋ, nduyɛ fɛɛŋ bɛɛ a loonuŋ lɛ a num okɔɔ le. Ya Chɛhowa pila dimi lende ni.’”