Sɔɔŋ Chɔɔmaŋndoŋ
3 “Poonyial maalikɛinɔ cho o kundaa niŋ Sadisi wo aa: Wana nɔ nyinaa ŋɔmmɛuwaa Mɛlɛkaa+ a looŋ ŋɔmmɛu woŋ ndo,+ nyɛ o dimi wo cho hoo ni: ‘I sina kelala numndaŋ. Wana che num pɛ aa a cho yoomu, kɛ o vilɛiyo ŋ cho ni.+ 2 Lelaŋ tiondu,+ okoŋ ma luei nyɛm tɔɔŋ lo miŋ wa tendu piɔm ndoŋ yoomuaŋ. Kanifuule, I saaluŋ maa wali Mɛlɛka nuu ke num le tosaa wo, o chuu wɔ tosaŋ ndu o hɔl te. 3 Lelaŋ, loonuŋ a nyɛ ŋ sɔla, nduyɛ ma tuɛiyo. Hiou lachi a ndu mandaa, okoŋ ma wookuŋ.+ I cho hunɔɔ maa viinɔ.+ Lelaŋ te a tindu le, a cho sina boondii ya cho num hinul le le.+
4 “‘Kɛ a nɔ waŋnda apum Sadisi loŋ, nda nɔɔliaa domala ndalaŋ te.+ A cho balɔɔ a ya latulu o domala humbulaŋ niŋ,+ kanifuule a suliŋ le bɛɛle waa nuaa sɔlaa. 5 Wana yem pɛ,+ ndu cho wa o doviaŋ o nyɛla humbulaŋ niŋ ni.+ Nduyɛ, fɛɛŋ bɛɛ I wɔɔsuu diola ndɔlaŋ o yau yoomoo niŋ te.+ Kɛ I cho Finya nuu, a maalikɛiyaa nduaa dimi o hɔl maa I sina diola ndɔlaŋ.+ 6 Num o num nɔ pɛ nila tuɛiyaa isɔɔ, mɛɛ yaŋ nilaŋ o nyɛ nyina Mɛlɛkaa cho kundalaŋ dimullo wo.’
7 “Poonyial maalikɛinɔ cho o kundaa niŋ Filadɛɛfiaa wo aa: Wana cho o diandaa,+ mbo wa wana tonya wo,+ o nɔ kiyii Deeve ve o ba wo,+ o kumbi dioo wana kinda le wo, a o kinda wana kumbi le wo, nyɛ o dimi wo cho hoo ni: 8 ‘I sina kelala numndaŋ. I kumbul num dio+ wana o wana nɔla kinda le wo. I sina maa a nɔ kpaaya bɔɔ le. Kɛ ma tosa nyɛ ya dimul num ndo, nduyɛ ma chɔm maa a sina diola nilaŋ. 9 Kunda cho le Setana wo cho dimioo maa Chuuwa nda cho ni, kɛ a cho ŋChuu le.+ Choolaŋ koni nda cho dimioo ni. Lelaŋ, I cho tosa ma huŋ baŋ num wulaŋ o labɛŋguniŋ, ma sina maa I kaala num. 10 Le mɛɛ ŋ cho nyɛ ŋ tuei a biuwɔŋ nuu okɔɔ wo tolɔɔ kɔɔli yɛ,+ boondii nyɛpalaa bɛndoo tual niŋ o lɛŋndeŋ choo le waŋnda chieeya kpou tɔɔndaŋndo ve,+ ya bɛɛ I cho num manda. 11 I cho hunɔɔ chɔ chɔ.+ Lelaŋ, bii nyɛ ŋ nɔ wo kpiŋ, yɔŋii waŋndo chua mɔsil num lemasaa.+
12 “‘Wana yem pɛ, I cho tosa mbo wa suŋgbuleŋ o chiɛi Mɛlɛka nuu niŋ. Fɛɛŋ bɛɛ o fula niŋ o chiɛi koŋ niŋ te. I cho ndu diola Mɛlɛka nuu+ a diola nila sɛnɛilaŋ+ poonyiaa o itendu. I cho ndu vɛlɛ diola chiee bɛndu Mɛlɛka nuu poonyiaa o itendu, Chulusalɛm Sɛnɛiyo,+ o fula choo choo wo. 13 Num o num nɔ pɛ nila tuɛiyaa isɔɔ, mɛɛ yaŋ nilaŋ o nyɛ nyina Mɛlɛkaa cho kundalaŋ dimullo wo.’
14 “Poonyial maalikɛinɔ cho o kundaa niŋ Lawodiisiaa+ wo aa: Wana nda veelu aa Amiina,*+ mbo wa sei+ tonya+ chɔm lo lechoo wo wo, a wana tase Mɛlɛka toosiaa wo, nyɛ o dimi wo cho hoo ni:+ 15 ‘I sina kelala numndaŋ. A cho o nyulu le, a cho yɛ vɛlɛ o tuu le. Ndoo bɛnda ma wa o nyulu ɔɔ ma wa o tuu. 16 Le mɛɛ ŋ cho cham cham, a cho o nyulu le,+ nduyɛ a cho o tuu le yɛ,+ I cho num tufɔɔ.* 17 A dimi aa: “I sul,+ I nɔ nyɔɔŋ tau, I heu lɛ ba le nyɛ o nyɛ le.” Kɛ a sina maa a cho a kɔl tambɛiyo, ma wa a mɔnɛi, ma wa o kuɛi niŋ, ma wa o sumɛiyo, nduyɛ ma wa tum fondo le. 18 Lelaŋ, I cho num silaa le ma huŋ piondu ya kooliŋ kɛndɛ kɛndɔŋ o ba le ma sul, a domala humbulaŋ le ma wounuŋ, okoŋ ma kumbu dialuŋ num lasiɔmboŋ,+ vɛlɛ a kooma lahɔl laŋ le ma suiinuŋ o lahɔl+ le ma che.+
19 “‘Wanaa ya kaala wa kpou, nda ya miŋgi o nɛi ni,+ mi sila nda. Lelaŋ, wou sɛmbɔɔ ma wookuŋ.+ 20 I cho isisi o dio mi wa dioo lɔɔ. Wana tuei pɛ diom nuu, mbo kumbi dioo, I cho luɛiyɔɔ o ndu lo chiɛiniŋ miŋ de nyɛdiaa ichɔllo latulu. 21 Wana o wana yem pɛ,+ I cho tosa mbo chal a ya latulu o kpeŋgbei* ni lemasaa choo,+ mɛɛ ya bɛɛ yem mi chal+ a Finya nuu latulu o kpeŋgbei ndɔ lemasaa choo yɛ. 22 Num o num nɔ pɛ nila tuɛiyaa isɔɔ, mɛɛ yaŋ nilaŋ o nyɛ nyina Mɛlɛkaa cho kundalaŋ dimullo wo.’”