Chɔŋ

7 Okoŋ kɔɔli, mi Chiisu hiau lachi a balɔɔ o Kalili niŋ, kɛ ndoo yeema mbo balu o Chudiaa niŋ te, kanifuule Chuuwa* wa nɛilaŋ nuuviaa le ndu diyɔɔ.+ 2 Nduyɛ Bɔŋaŋ laBafɛi*+ Chuuwa wa niŋ sɔɔŋguuwo kpɛɛluŋ. 3 Okoŋ, mi pɔmbuaa nduaa+ dimul ndu aa: “Faŋaŋ nanuŋ ma kuɛ Chudiaa, le mi buɛiyaa numnda bɛɛ kɔ chɔ walta ŋ cho tosaa laŋ. 4 Wana o wana yeema pɛ mi waŋnda sina ndu, o tosa sɔɔŋ o vioŋnɔŋ niŋ te. Te a wa pɛ sɔɔŋ muŋ tosaa, tosa muŋ waŋnda* o hɔl kpendekele.” 5 Pesiŋ bɛɛ pɔmbuaa nduaa haa ve laalaŋ dɔwɔɔ o ndu niŋ te.+ 6 Okoŋ mi Chiisu dimul nda aa: “Teleŋ nuu fuuluuwɔ le.+ Kɛ nya, teleŋ o teleŋ bɛnda a nya. 7 Chieeŋndo nɔ sabu o sabu o tul nya leyɛ le. Kɛ ya o tul leyɛ ni, kanifuule I cho seileŋ timbioo a walta ndɔla dɛnɛ wɔɔŋndaŋ okɔɔ.+ 8 Nya kɔ o bɔŋaŋndo. Kɛ ya I cho wɔ lakɔ o bɔŋaŋ koŋ te, kanifuule teleŋ ni kpeekpeiyo fuuluuwɔ le.”+ 9 Mɛɛ o chii nda sɔɔŋ muŋ dimul, mbo loŋnuŋ Kalili.

10 Kɛ mɛɛ pɔmbuaa nduaa kuɛ o bɔŋaŋndo, mbo koma kɔ nda kɔɔli sɔɔsɔɔ. 11 Okoŋ mi Chuuwa kandu ndu nuuviaa o bɔŋaŋ koŋ ma wa nyunaa aa: “Kuɛɛnɛ po koŋ cho yɛ?” 12 Nduyɛ, waŋnda wa sɔɔŋ tooloŋ dimioo a ndu okɔɔ o faŋgaa tɛɛŋ. Apum wa dimioo aa: “Wana kɛndɔɔ o cho ni.” Apum yɛ aa: “O cho wana kɛndɛ le. Waŋnda o cho huiyo ni.”+ 13 Kɛ wana pilɛ bɛɛ bii kɔllo le suɛi a ndu okɔɔ kpendekele le, kanifuule siooŋnde wa nda le Chuuwa.+

14 Mɛɛ nda fuuluu tɛɛŋ a bɔŋaŋndo, mi Chiisu kua o chiɛi Mɛlɛkaa niŋ mbo kandu waŋnda pɛɛkoo. 15 Mi kɔndɔfillo bii Chuuwa. Okoŋ ma dimi aa: “Poo hoo sɔla pɛɛku o sukuulaŋ* niŋ te,+ kɛ vɛɛ o looku yɛ kɔl kaloo hoo sɔla a Yau Mɛlɛkaa okɔɔ?”+ 16 Mi Chiisu mulul nda aa: “Sɔɔŋ ya pɛɛku waŋnda woŋ, ŋ cho sɔɔŋ ni le, kɛ sɔɔŋ wana vem ya wo.+ 17 Wana o wana yeema pɛ mbo tosa hɛnaŋ Mɛlɛkaa, o cho sina te Mɛlɛka o ba sɔɔŋ ya pɛɛku waŋnda woŋ fula ni+ ɔɔ te yiyaŋnda nilaŋ ni. 18 Wana o wana pɛɛku pɛ yiyaŋnda ndɔlaŋ, mɛɛ saŋgalaa o cho nuuviaa le ndupila ni. Kɛ wana o wana nuuviaa pɛ saŋgalaa le wana vem ndu wo,+ mɛɛ wana dimi tonyaa wo o cho ni, nduyɛ o tosa lakafa le. 19 Mi Muuse ke nya Sawalaŋ,+ lende le? Kɛ wana pilɛ bɛɛ bii laŋ te. Le yɛɛnɛ nya cho yɛ nɛilaŋ nuuviaa le ya diyɔɔ?”+ 20 Mi waŋnda mulul ndu aa: “Nyina wɔɔŋndo cho num kɔɔli ni. Nɛɛnɛ cho yɛ nɛilaŋ nuuviaa le num diyɔɔ?” 21 Mi Chiisu mulul nda aa: “Kaamaa o pilɛ kpe ya tosa ni, mi kɔndɔfillo bii nya kpou. 22 Le saboo hoo Muuse ke nya sawaa a hivi chiɛi kɔɔlioo okɔɔ ni.+ O cho a teleŋ Muuse wo le i kanduŋ te, kɛ a teleŋ finyaa nyaa mamaa i kanduŋ ni.+ Nduyɛ mi la hivi waŋndo o chiɛi kɔɔli o paale pɛŋgiaaleŋ choo. 23 Te la hivi pɛ waŋndo o chiɛi kɔɔli o paale pɛŋgiaaleŋ choo yɔŋii nya tɛɛmbuu Sawa Mɛlɛka ke Muuse wo, mɛɛ le yɛɛnɛ nya cho yɛ tumboo dɔɔnɔŋndo a ya le mɛɛ ya siŋgi waŋndo o paale pɛŋgiaaleŋ choo yɛ?+ 24 La kialu yamaŋ a nyɛ nya cha wo le. Kɛ la kiolu yamaŋ o nɛi sakpoo choo.”+

25 Okoŋ mi wanaa wa ichali Chulusalɛm nda apum kandu dimioo aa: “O cho poo hoo le nda cho nuuviaa le diyɔɔ le?+ 26 Tofawɔ ndu suɛi o luŋ kpendekele, kɛ a cho ndu nyɛ o nyɛ yɔŋ te. Mbo wa maa sinaa wanaa bɛnduaa sina ni maa ndu kpeekpei cho Kiliti ni? 27 Kɛ nduyɛ, ŋ sina naa poo hoo fula wa.+ Kiliti ndu te o hiŋ pɛ, wana o wana sina niŋ naa o fula wa le.” 28 Okoŋ, mɛɛ Chiisu wa waŋnda pɛɛkoo o chiɛi Mɛlɛkaa niŋ, mbo dimi choo choo aa: “La sina ya, nduyɛ la sina naa ya fula wa. O cho a ba ni le ya hiŋ te.+ Kɛ wana vem ya wo, o cho kpeekpei, nduyɛ la sina ndu le.+ 29 I sina ndu,+ kanifuule hɔlte ndɔ ya hiŋ ni, nduyɛ ndu vem ya ni.” 30 Okoŋ ma kandu nɛilaŋ nuuviaa le ndu biyɔɔ.+ Kɛ wana o wana hendu ndu baa choo le, kanifuule teleŋ ndɔɔ ndoo fuuluuwɔ le.+ 31 A koŋ kpou, mi wanaa bɔɔbɔɔ duau laalaŋndo o ndu niŋ,+ ma wa dimioo aa: “Te Kiliti hiŋ pɛ, o tosa niŋ pa kaamaalaŋ mbo hiou la poo hoo cho tosaa laŋ?”

32 Mi Falisiiya tuɛi faŋgaa sɔɔŋ muŋ dimioo toolo toolo a ndu okɔɔ. Okoŋ mi masaa wanaa soliaa lasalaa, a Falisiiya viam polisiiya le ndu biyɔɔ. 33 Mi Chiisu dimi aa: “Le teleŋ biŋgi koni ya cho wa a nya latulu ni. Okoŋ kɔɔli, mi miiŋgu naa wana vem ya wo chua.+ 34 La cho ya nuuviaa, kɛ la seeluŋ niŋ ya le. Nduyɛ, naa ya cho kɔlaŋ nda, la nɔla mi la kuɛ loŋ te.”+ 35 Mi Chuuwa dimulaŋ aa: “Kuɛɛnɛ poo hoo cho yɛ lakɔ miŋ bumba ndu saalɔŋ? Baa mbo wa maa o Chuuwaa cho Kilikiiya tɛɛŋnda lo o cho lakɔ ni, okoŋ mbo kɔ pɛɛku Kilikiiya? 36 Yɛɛnɛ o yiyaŋ yɛ a nyɛ o dimi hoo wo aa, ‘La cho ya nuuviaa, kɛ la seeluŋ niŋ ya le. Nduyɛ naa ya cho kɔlaŋ nda, la nɔla mi la kuɛ loŋ te’?”

37 O paale mɛɛlaaleŋ choo, paale bɛndule bɔŋaŋndo,+ mi Chiisu sim mbo dimi choo choo aa: “Wana o wana kolɔɔ bii, o huŋ naa ya chua mbo kol.+ 38 A mɛɛ yau Mɛlɛkaa dimi yɛ, wana o wana dɔu laalaŋndo o ya niŋ pɛ, ‘Peela ke wana yoomoo laŋ la cho ndu piɔl niŋ mi la wa hiouwɔɔ wolu wolu.’”+ 39 A nyina diandaa okɔɔ Chiisu wa hei dimioo ni. Nyina koŋ wanaa dɔu laalaŋndo o ndu niŋnda ndaa nɔ le hunɔɔ sɔlaa ni. Ndaa sɔla wɔ ndu le,+ kanifuule Chiisu ndoo lueiyɔ o biilu ndɔɔ niŋ te.+ 40 Mɛɛ waŋnda apum o faŋgaa hoo tɛɛŋ tuei diomnda o dimi laŋ ndaŋ, ma kandu dimioo aa: “Wana suaa le Mɛlɛka wo kɛsɛ cho hoo ni.”+ 41 Apum wa dimioo aa: “Kiliti cho hoo ni.”+ Kɛ acheleŋnda aa: “O cho Kalili le Kiliti nɔ le fulaa le, lende le?+ 42 Yau Mɛlɛkaa dimi maa o pulale Deeve leŋ choo Kiliti nɔ le fulaa ni.+ Nduyɛ maa o Bɛtilɛhɛm niŋ,+ sɔndɔkɔlɔ Deeve wa ichali wo.”+ 43 Okoŋ mi piɔuwaŋndo luɛi faŋgaa tɛɛŋ o ndu choo. 44 Apum nda tɛɛŋ ndaa yeema ma bii ndu, kɛ wana o wana hendu ndu baa choo le.

45 Okoŋ, mi polisiiya miiŋgu naa masaa wanaa soliaa lasalaa a Falisiiya chua. Kɛ mi Falisiiya nyuna nda aa: “Le yɛɛnɛ la bii ndu mi la hiŋ a ndu le?” 46 Mi polisiiya muli aa: “Kani bɛɛ ŋ tuiyɔ waŋndo suɛi maa laŋunɔ koŋ te.”+ 47 Mi Falisiiya dimi aa: “Baa nya bɛɛ poo hoo tiu nya ba? 48 La che niŋ mi wanaa bɛnduaa a Falisiiya o pilɛ bɛɛ duau laalaŋndo o ndu niŋ?+ 49 Kɛ wanaa sina haa Sawala Mɛlɛkalaŋ te wa, sendioo cho nda choo.” 50 Mi Nikodimɔɔ, o wa Falisiinɔɔ o pilɛ nda tɛɛŋ, nduyɛ mbo kua niŋ paandu o Chiisu lo wo dimul nda aa: 51 “Sawa naa dimi maa te o cho miŋ kɔɔsa fɛlɛŋ a waŋndo, nduyɛ miŋ sina nyɛ o tosa wo le, ŋ nɔ miŋ kilul ndu yamɛi le, lende le?”+ 52 Ma mulul ndu aa: “Mbo wa maa num bɛɛ Kalili ŋ fula ni? Yaasiaa bɛɛ o Yau Mɛlɛkaa niŋ kpou, a seeluŋ naa o dimi maa wana suaa le Mɛlɛka wo o pilɛ bɛɛ cho fula Kalili le.”*