Ditɔnɔmii
25 “Te wanaa ŋiɔɔŋ sɛɛŋgiaŋ pɛ, a nɔ ma kuɛ o wanaa kialaa ŋyamaa lo,+ okoŋ ma kɔ kiolu nda yamɛi tɛɛŋ. Wanaa kialaa ŋyamaa cho suɛi keŋ yaasiaa, ma ke wana nɔ dioo wo di ndɔɔ, nduyɛ ma yaala wana wɔu wo.+ 2 Te wana nɔ di le wo nɔ pɛ le lɔɔ sɔlaa,+ wana kialaa ŋyamaa cho ndu dimul le mbo hini lɛŋ, ma lɔɔ ndu wana kialaa ŋyamaa o hɔl. O nɔ mbo sɔla lɔɔ mɛɛ kpɛ suɛi o tɛɛmbuu ve cho yɛ. 3 Kɛ mɛɛ o mɛɛ nda lɔɔ ndu, o nɔ mbo hiou 40 le.+ Te a lɔɔ ndu pɛ mbo hiou o koŋ choo, mɛɛ puaapilɛnɔ nyaa cho bɛɛlaŋ tambu.
4 “Te nau towaa wa pɛ num witiiyoŋ nɛilullo, yii ndu sondoo le.+
5 “Te pɔmbɔɔ a bɛndoo wa pɛ naapilɛ mi o pilɛ vi kɛ o vilu po a lanɔ o chua wo le, mɛɛ lanɔ po koŋ mɛiyo nɔ mbo chal wana cheleŋ o ba o nɔɔ niŋ te. Pɔmbɔ ndɔ ɔɔ bɛ ndɔ lo yoomu wo nɔ ni mbo chua chua koŋ o nɔɔ niŋ, mbo simnuŋ laa ndɔ.+ 6 A nɔ ma ke po tase nda cho violɔɔ wo diola pɔmbɔ ndɔ ɔɔ bɛ ndɔ vi wo,+ le halikpeŋ diola ndɔlaŋ la feŋaŋ o Isɔluɛi niŋ te.+
7 “Kɛ te poo yeema ndu chua o nɔɔ niŋ te, chua koŋ nɔ mbo kuɛ o waŋ bɛnduaa chieeya lo mbo dimul nda aa, ‘Puaapilɛnɔ pɔnɔ nuu kɛɛ le mi diola puaapilɛnɔ ndɔɔ la wa o Isɔluɛi niŋ. O kɛɛ le ya chuaa o nɔɔ niŋ.’ 8 Waŋ bɛnduaa chieeya o chiee koŋ niŋ nɔ ma veelu poo ma soo o ndu lo. Kɛ te o baŋ pɛ mbo dimi aa, ‘I yeema mi chua chuaa hoo o nɔɔ niŋ te,’ 9 chua vii koŋ pɔnɔɔ wo nɔ mbo sɔɔŋguu po koŋ ikɛi waŋ bɛnduaa chieeya o hɔl, mbo soli ndu kɔwɛiyo* o ipelu,+ mbo tufu ndu lɔluaŋ o hɔl, okoŋ mbo dimi aa, ‘Po kɛɛ le chiɛi puaapilɛnɔ ndɔɔ simioo wo, nuaa nda nɔ ni ma tosal ndu.’ 10 Okoŋ kɔɔli, diola* nda cho niŋ wa yuŋgu ndɔɔ veeloo o Isɔluɛi niŋndaŋ la cho ni aa, ‘Chiɛi wana nda soli kɔwɛiyo o ipelu wo.’
11 “Te puaa a ŋiɔɔŋ wa pɛ sɔŋgaa mi lanɔɔ o pilɔɔ sɔɔŋguu le pɔnɔ ndɔ malaa, okoŋ mbo saa wana cho pɔnɔ ndɔ lɔɔ wo labɛŋguniŋndo, 12 la nɔ mi la kelu ndu baa. La* tuiinuŋ ndu inyiɛɛ le.
13 “La nɔ mi la nɔ pou pɔmbɔɔ a pou bɛndoo le nyɔɔŋ tuuwo+ o bɔlɔla nyalaŋ niŋ te. 14 La nɔ mi la nɔ nyɛ tuwaa bɛndoo a o pɔmbɔɔ o la nya lo chiɛiniŋ te.*+ 15 La nɔ mi la nɔ pou kpeekpeiyo a nyɛ tuwaa kpeekpei nda tuu nyɔɔŋ ndo, le halikpeŋ mi la viou achal o lɛŋnde Chɛhowa Mɛlɛka nyaa cho nya kioo leŋ niŋ.+ 16 Wana o wana tosa pɛ sɔɔŋ waa nuaa, Chɛhowa Mɛlɛka nyaa tul ndu leyɛ.+
17 “La loonuŋ a nyɛ waŋnda Amalɛki tosal nya teleŋ nya wa chɔnɔŋndo Ichipi wo.+ 18 La wa a saŋgɛi yɔkɔɔ, ma chiŋalaŋ wanaa wa nya hunɔɔ kɔɔli a yɔkpɛiya. A yɔŋ isiooŋ le Mɛlɛka le. 19 Te Chɛhowa Mɛlɛka nyaa ke nya pɛ pɛŋgioo yaamɔɔwaa nyaa tɛɛŋ kpou, o lɛŋnde Chɛhowa Mɛlɛka nyaa cho nya kioo, le mi le wa nyɛm kɛŋ nya leŋ niŋ+ nduyɛ mi la chal loŋ, la nɔ mi la wɔɔsuu waŋnda Amalɛki kpou o lɛŋndeŋ choo.+ La nɔ mi la puɛɛnuŋ te.