Aisaya

20 O wɔsi Saakɔŋ masaa le Asiiliaa yɔŋ Tataŋ* o Asidɔɔ+ niŋndo, mi Tataŋ kɔ chiŋalaŋ Asidɔɔ a sɔŋgɔɔ nduyɛ mbo bii ndu.+ 2 A teleŋ koŋ, mi Chɛhowa dimul Aisaya+ po Amɔɔsi wo aa: “Kɔ ma kɔ soliŋ nyɛla labɛkilaŋ o chaŋ, nduyɛ ma soliŋ kɔwɛilaŋ* o ŋpelu.” Okoŋ mbo tosa lende, mbo wa balɔɔ kɔɔle fondo* a peloŋ fondo.

3 Okoŋ mi Chɛhowa dimi aa: “Mɛɛ buɛi nuu Aisaya wa balɔŋndo lende fondo vɛlɛ a peloŋ fondo le wɔsilaŋ la yaa yɛ, keŋ sim maa tamasi+ le nyɛ yɔŋnuŋ niŋ Ichipi+ a Itoopiaa+ wo. 4 Lende koni masaa le Asiiliaa cho wanaa o bii Ichipi+ a Itoopiaa wa chua ni, mbo kuɛ a nda o biyɔɔ niŋ. Chuaambɔ ni, kaasoŋnɔ ni, o cho nda yuŋga mbo mɛi nda fondo,* okoŋ mbo sooluu nda kɔwɛilaŋ o ŋpelu. A tonya, a cho Ichipi siɔmbulaŋ tusi. 5 Siooŋnde cho nda biyɔɔ, nduyɛ mi siɔmbulaŋ la bii nda le Itoopiaa ndaa tiindaŋ ndo a Ichipi ndaa kialu yoŋgaa le ndu wo. 6 Wanaa cho o pee mɛŋma ihɛllo kɔŋgɔ wa cho dimi o paale leŋ choo aa, ‘Tofawɔ nyɛ yɔŋnuŋ a tiindaŋ naa wo, fonda naŋ nyaanuŋ le malaa nduyɛ miŋ sɔla pioŋɔɔ masaa le Asiiliaa o ba wo! Vɛɛ naŋ cho yɛ niko hiɔlɔŋ?’”