Kɔliŋtiaŋ Diiŋ Ndɔɔ

3 Baa ŋ nɔ pa miŋ chɔm nya vɛlɛ wanaa suu naŋ cho wa? Ŋ nɔ pa miŋ yɔŋ nya yaula chandu naa laŋ ɔɔ mi la yɔŋ naa laŋ, mɛɛ waŋnda apum tosa yɛ? 2 Nya cho yau cho o poonyiaa naa o lakɔl lo ni.+ Waŋnda kpou sina ndu, nduyɛ ma veelu diomndaŋ leniŋ. 3 I cho kpendekele maa nya cho yau Kiliti wo ni, o naa buɛiyaa Mɛlɛkaa poonyiaa wo.+ O cho a lekpɛki le o poonyiaŋ te, kɛ Mɛlɛka cho yoomu wo, a nyina ndɔɔ o poonyiaŋ ni. O poonyiaŋ vɛlɛ o pouta yɛndɛ choo le,+ kɛ o kɔltaŋ* niŋ.+

4 Kiliti tosa ni miŋ nɔ tiindaŋ waa nuaa o Mɛlɛka niŋ. 5 O cho nuaa maa naapila le suliŋ le wali o wali tosa le, kɛ Mɛlɛka tosa ni miŋ suliŋ nyɛkɛndɛi le wali o wali tosaa.+ 6 Ndu kpeekpei tosa ni miŋ suliŋ nyɛkɛndɛi le waa buɛiyaa kpema sɛnɛiya.+ O cho o sawala cho la poonyiaa laŋ bɛŋgu le naŋ cho wallo le,+ kɛ o nyina Mɛlɛkaa bɛŋgu. Sawala cho la poonyiaa laŋ la tosa mi wana sɔla piɔmndo.+ Kɛ nyina Mɛlɛkaa ndu tosa mi wana wa yoomu.+

7 Sawala tosa mi wana sɔla piɔmndo laŋ, o poutaŋ choo nda poonyiaa laŋ ni.+ Hunɔɔ Muuse wa a laŋ ndo, mi hɔlla yɔŋnuŋ ndu ŋɛlɛŋgi ŋɛlɛŋgi a paŋgeloo. Isɔluɛiya nɔla ma tofa ndu hɔlla le.+ Kɛ le teleŋ biŋgi koni paŋgele koŋ wa ni. 8 Te sawalaŋ la hiŋ ndɔ pɛ a paŋgele bɛndu waa nuaa,+ baa paŋgele nyina Mɛlɛkaa+ hiu niŋ koŋ poloŋ te? 9 Te sawala tosa mi wana sɔla piɔmndo laŋ+ la nɔ wɔ pɛ paŋgeloo nuaa,+ mɛɛ wali tosa mi wana wa sakpo wo hiou paŋgele koŋ poloŋ.+ 10 Paŋgele sawalaŋ ndaŋ la nɔ wo, o cho lɛ nyɛ o nyɛ le. Paŋgele kpema sɛnɛiyo hiou poloŋ.+ 11 Te nyɛ ndoo nɔ le faŋaŋndo wo hiŋ pɛ a paŋgele waa nuaa,+ mɛɛ paŋgele nyɛ nɔ le loo wo hiou poloŋ.+

12 Tiindaŋ naŋ nɔ hoo wo+ tosa ŋ nɔ isiooŋ le suɛi le. 13 Nduyɛ ŋ cho tosa mɛɛ Muuse tosa yɛ le. Kanifuule, mbo kumbu hɔlaa nduaa a kola waaŋgaa wo,+ yɔŋii Isɔluɛiya ndaa chɔ nyɛ ndoo nɔ koŋ le faŋaŋndo wo. 14 Kɔlta ndalaŋ la wa la kindaa.+ Haaa a paale hauleŋ ndeŋ, kɔlta ndalaŋ la cho la kumbaa a kola waaŋgaa koŋ, nduyɛ a bii nyɛ dimiŋ o kpema paandoo niŋndo bila le.+ Kanifuule, Kiliti kinɛi nɔla kola waaŋgaa wo hoo faŋa ni.+ 15 Nduyɛ huŋ bii a suŋ suŋ, kɔlta ndalaŋ la cho la kumbaa.+ Lelaŋ, a nɔla ma bii nyɛ Muuse poonyiaa wo bila le.+ 16 Kɛ te waŋndo siŋgaŋ pɛ mbo muliŋ o Chɛhowa* lo, kola koŋ faŋaŋ ndu o hɔl.+ 17 Nyinaa Chɛhowa* cho ni.+ Nduyɛ naa nyina Chɛhowa* wo cho pɛ, a baŋaŋnda waŋnda loŋ a wa ni.+ 18 Naa kpou kola waaŋgaa cho naa o lahɔl te. Ŋ cho ko maa tofaŋ chɔm naŋɔɔ Chɛhowa* Mɛlɛka naa wo. Nduyɛ ŋ cho siŋgaŋndo le miŋ wa maa ndu. Teleŋ o teleŋ, ŋ cho hiouwɔɔ lachi a biiloo hoo chɔmndo mɛɛ Chɛhowa,* o cho Nyinaa wo cho tosaa yɛ.+