Sam
O wana sim lachi le chondei yo lo. Chondii Deeve ve.
40 I dɔu tiindaŋ nuu kpou o Chɛhowa niŋ.*
Mbo yaŋ ya nilaŋ, nduyɛ mbo tuɛi chaŋ ya wa naa ndu chua le malaa wo.+
2 Mbo soli ya o sooŋ yiŋgilɛi bɛndoo niŋ,
A o pɔlɔŋndo niŋ.
Mbo simi ya o pouwo choo,
Nduyɛ mbo tosa mi sim yi, I hiiluŋ te.
3 Mbo pɛɛku ya chondii sɛnɛiye,+
Chondei le Mɛlɛka naa saŋgalaa.
Wanaa bɔɔbɔɔ cho tofa mi kɔndɔfillo bii nda,
Okoŋ ma dɔu tiindaŋ ndaa o Chɛhowa niŋ.
4 Kɔl kɛndɔɔ cho le wana dɔu tiindaŋndo o Chɛhowa niŋndo.
O sɔɔŋguu wanaa simulaa ɔɔ wanaa lachoowaa choo le.
5 Oo Chɛhowa Mɛlɛka nuu,
A cho yiyaŋndo teleŋ o teleŋ a naa okɔɔ,
Nduyɛ a tosa niŋ walta kɔndɔfiltaŋ tau le naa.+
Wana o wana tuuŋgaŋ a num te.+
O yɔŋ bɛɛ mi kindiŋ le suɛi a laŋ okɔɔ, I tiuba le,+
Kanifuule la cho bɔɔ.
6 A heu ba le sala ɔɔ ke le.+
Kɛ ma kumbi ya nilaŋ le mi tuei.+
A nyuna le salala luamaa laŋ a salala waŋnda soli le hakila ndalaŋ ndo le.+
7 Okoŋ mi dimi aa: “I hiŋ,
A mɛɛ i cho i poonyiaa o yau simbulaa niŋ a ya okɔɔ yɛ.+
9 I dimi yooŋgu kɛndɔɔ a sakpoyɛi okɔɔ, o kunda bɛndu bɛndoo niŋ.+
I meinuŋ mi kɛɛ isɔɔ le.+
Oo Chɛhowa, numpila sina kɛsɛ.
10 I viŋ sakpoyɛi numnde o kɔl nuu niŋ te.
Mi suaa a lo lechoo numndo vɛlɛ a mɛɛ ŋ piŋi yɛ okɔɔ.
I viŋ kaala lo lechoo numndo a tonya numndo o kunda bɛndoo niŋ te.”+
11 Oo Chɛhowa, kɛɛ le ya nyiɛɛyii numnde tuiinɔŋndo le.
Maa kaala lo lechoo numndo a tonya numndo manda ya le teleŋ o teleŋ.+
12 Sɔɔŋ palaŋ cho ya choo woŋ ŋ cho bɔɔ, I chii muŋ chɔm te.+
Hakila nilaŋ la hiou ya mayoomu, I nɔla mi fula leniŋ te.+
La cho tau tau, la hiou yiiŋii cho ya o lebol le.
Nduyɛ, yoomuaŋ ma fula ya po.
13 Oo Chɛhowa, a yandii, chɛl ma piŋi ya.+
Oo Chɛhowa, mala ya chɔ chɔ.+
14 Maa wanaa cho ya nuuviaa le ya diyɔɔ wa kpou,
Siɔmbulaŋ la tol nda ma tambu labɛɛ.
Maa wanaa duaunuŋ nyaale le kpundɛ komal la wo wa,
Miiŋgu amakɔɔ a siɔmbulaŋ.
15 Waŋnda cho ya dimullo aa: “A chaa! A chaa!”
Maa wanaa kaŋ nyiiya a siooŋnde le siɔmbula cho nda tolɔɔ laŋ.
16 Maa wanaa cho num nuuviaa wa +
Dɔɔnuŋ nyaale, ma wuu kpeŋjoo le num.+
Maa wanaa kaala walta numnda piŋiaa laŋ nda dimi teleŋ o teleŋ aa:
“Maa Chɛhowa sɔla saŋgalaa fɔ!”+
17 Maa Chɛhowa yaŋ ya nilaŋ.
Kanifuule wana bala fondoo ya cho ni, nduyɛ I nɔ wana malaa le.
Num cho wana ni malaa, a wana ni piŋiaa ni.+
Oo Mɛlɛka nuu, yandii duaunuŋ tamala le.+