Ɛsodɔɔ

9 Okoŋ, mi Chɛhowa dimul Muuse aa: “Kɔ naa Feloo chua ma dimul ndu aa, ‘Nyɛ ya Chɛhowa, Mɛlɛka Hibuluiya dimi wo cho hoo ni: “Mal wanaa niaa le ma kɔ piɛi ya.+ 2 Kɛ te a kɛɛ pɛ le nda malɔɔ nduyɛ ma kukaŋ nda choo, 3 ya Chɛhowa,+ I cho tosa mi naa wɔɔŋndo del chɔluaa numnda choo. Suaa numnda ni, sofɛliaa, nyɔɔmiaa, nauwa, a saa, I cho tosa mi naa wɔɔŋ wɔɔŋndo del nda choo.+ 4 Ya Chɛhowa, I cho teŋgeŋndo chɔm chɔluaa Isɔluɛiya tɛɛŋ, a chɔluaa waŋnda Ichipi. Nduyɛ chɔluaa Isɔluɛiya kinɛi, o pilɛ bɛɛ vi niŋ te.”’”+ 5 Mi Chɛhowa kɛsi teleŋ suɛi hei cho yɔŋnɔŋndo. Mbo dimi aa: “Siɔdii ya Chɛhowa cho hei tosa o lɛŋndeŋ ndeŋ niŋ ni.”

6 Diimandɔɔ, mi Chɛhowa tosa mɛɛ o dimi yɛ. Mi chɔluaa suu o suu o Ichipi niŋ kandu wuoo,+ kɛ chɔluaa Isɔluɛiya o pilɛ bɛɛ vi le. 7 Mɛɛ Feloo vem buɛiyaa nduaa le ma kɔ nyuna a chɔluaa Isɔluɛiya okɔɔ, mi buɛiyaa nduaa dimul ndu maa chɔluaa Isɔluɛiya o pilɛ bɛɛ vi le. Kɛ a koŋ kpou, mi Feloo hiau lachi a bolle kalaleŋ tosaa, mbo kɛɛ le Isɔluɛiya malɔɔ.+

8 Okoŋ mi Chɛhowa dimul Muuse nda Elɔŋ aa: “La kɔndu pultaŋ o laba o fondaŋ nda luam beediiyo* wo, nduyɛ mi Muuse kɔ sim Feloo lachi, mbo wuu laŋ choo choo. 9 Pulta laŋ la cho simnɔŋ chundoo o lɛŋnde Ichipi leŋ niŋ kpou, nduyɛ mi la tosa mi hindɔɔla wɔɔŋ wɔɔŋndaŋ la fula waŋnda chieeya a chɔluaa o lɛŋnde Ichipi leŋ niŋ kpou.”

10 Ma kɔ kɔndu pultaŋ o fondaŋ nda luam beediiyo wo, ma kɔ sim Feloo lachi. Mi Muuse wuu pulta laŋ choo choo, okoŋ mi hindɔɔla wɔɔŋ wɔɔŋndaŋ la fula waŋnda chieeya a chɔluaa. 11 Wanaa maŋgalaa ndaa tiuba ma sim Muuse lachi le, kanifuule hindɔɔlaŋ la wa nda a waŋnda Ichipi kpou la tiuwaa lekɔɔ silɔ.+ 12 Mi Chɛhowa tosa mi Feloo hiau lachi a bolle kalaleŋ tosaa, nduyɛ mbo kɛɛ le nilaŋ yaŋɔɔ a mɛɛ Chɛhowa dimul Muuse yɛ.+

13 Okoŋ mi Chɛhowa dimul Muuse aa: “Pena chɔnɔŋ siɔdii idii puŋ ma kɔ sim Feloo lachi, ma dimul ndu aa, ‘Nyɛ Chɛhowa, Mɛlɛka Hibuluiya dimi wo cho hoo ni: “Mal wanaa niaa le ma kɔ piɛi ya. 14 Te a kɛɛ pɛ le wanaa niaa malɔɔ, I cho kpaaya nuu soliŋ kpeku mi tusi num, buɛiyaa numnda, a wanaa numnda nyɛpalaa bɛndoo choo, le halikpeŋ ma sina maa o lɛŋndeŋ choo kpou, wana o wana cheleŋ cho maa ya le.+ 15 A teleŋndo hoo, maa yaa siɛndi niŋ ba nuu mi tusi num, a wanaa numnda kpundɛ bɛndoo choo, mi yaa basu nya tɛɛ o lɛŋndeŋ choo. 16 Kɛ sabu kpeekpei ya mal num ma wa wɔ yoomu wo cho hoo ni: Le mi chɔm num kpaaya nuu, nduyɛ mi waŋnda o lɛŋndeŋ choo kpou sina diola nilaŋ.+ 17 Kɛ a cho wɔ hiouwɔɔ lachi a yoŋgaa kiolɔɔ, nduyɛ ma kɛɛ le wanaa niaa malɔɔ. 18 Siɔdii a teleŋ waa nuaa, I cho tosa mi looŋ kpuŋgbaŋ bɛndoŋ deli o lɛŋnde Ichipi leŋ niŋ. Nduyɛ chɔŋ a teleŋ lɛŋnde Ichipi leŋ le kilaŋndo haaa huŋ bii a hau, i waa nuaa yɔŋnuŋ ndɔ le. 19 Lelaŋ, dimul waŋnda le ma luei chɔluaa numnda kpou chiɛilaŋ niŋ, vɛlɛ a nyɛ o nyɛ ŋ nɔ mbo wa o bɛɛ. Kanifuule, wanachiee ni, chɔlu ni, te o kɛ kɛ wa pɛ o bɛɛ mbo luei chiɛiniŋ te, looŋ kpuŋgbaŋ cho nda deli choo ma vi.”’”

20 Buɛiyaa Feloo wa apum ndaa nɔ siooŋnde le nyɛ Chɛhowa dimi wo. Le hei, ma luei buɛiyaa ndaa a chɔluaa ndaa chɔ chɔ chiɛilaŋ niŋ. 21 Kɛ apum ndaa nɔ isiooŋ le Chɛhowa le. Le hei, ma mɛi buɛiyaa ndaa a chɔluaa ndaa o bɛɛ.

22 Mi Chɛhowa dimul Muuse aa: “Heelu ba numndo choo choo, le mi looŋ kpuŋgbaŋ bɛndoŋ+ deli waŋnda chieeya, chɔluaa, a yɔmii cho o lɛŋnde Ichipi leŋ niŋnde kpou choo.”+ 23 Okoŋ mi Muuse heelu tinda ndɔɔ choo choo, nduyɛ mi Chɛhowa tusi taŋndaŋ, looŋ kpuŋgbaŋ, a yiŋndeŋ* o lɛŋnde Ichipi leŋ niŋ. Mi Chɛhowa hiau lachi a looŋ kpuŋgbaŋ tusioo o lɛŋnde Ichipi leŋ niŋ. 24 Looŋ kpuŋgbaŋ wa delioo, nduyɛ yiŋndeŋ le wa kioloo o looŋ muŋ tɛɛŋ. Lusullo pila muŋ lusul ni. Nduyɛ chɔŋ a teleŋ lɛŋnde Ichipi leŋ le kilaŋ ndo, i waa nuaa yɔŋnuŋ ndɔ le.+ 25 Nyɛ o nyɛ wa o bɛɛ o lɛŋnde Ichipi leŋ niŋ, mi looŋ kpuŋgbaŋ tɛɛmbuu muŋ kpou, chɔŋ a waŋnda chieeya kɔ bii a chɔluaa. Mi looŋ kpuŋgbaŋ muŋ tɛɛmbuu tɔlɔɔlaŋ vɛlɛ yɔmii wa o yondolaŋ niŋnde kpou.+ 26 Kɛ naa Isɔluɛiya wa o tanda Koosiɛŋ ndo niŋnda kinɛi, looŋ kpuŋgbaŋ muŋ deli loŋ te.+

27 Okoŋ, mi Feloo yooŋgu le Muuse nda Elɔŋ, mbo dimul nda aa: “O laŋ niŋ, I tosa hakioo. Wana sakpoo Chɛhowa cho ni. Kɛ ya a wanaa niaa, ŋ nɔ di kposoŋ te. 28 La nyɔɔlu Chɛhowa le mbo faŋa taŋndaŋ a looŋ kpuŋgbaŋ muŋ, okoŋ mi mal nya mi la kuɛŋnuŋ. I kɛsi lɛ nya naŋ te.” 29 Mi Muuse dimul ndu aa: “Te I faŋaŋ dɔɔ chiee naŋ pɛ, I cho lakɔ piɛi o Chɛhowa lo.* Nduyɛ taŋma cho deŋioo waŋ a looŋ kpuŋgbaŋ cho delioo woŋ cho pɛŋgi, le halikpeŋ ma sina maa Chɛhowa nɔ lɛŋndeŋ ni.+ 30 Kɛ a koŋ kpou, num a buɛiyaa numnda, I sina kpendekele maa la cho isiooŋ nɔ le Chɛhowa Mɛlɛka le.”

31 Filakisiiyoŋ a baliŋ wa o chiɔɔŋ niŋndoŋ looŋ kpuŋgbaŋ muŋ tɛɛmbuu ni. Kanifuule baliiyoŋ muŋ diu niŋ, nduyɛ filakisiiyoŋ muŋ chuulu wɔ ko sɛnɛi. 32 Kɛ nyɛ o nyɛ yɔŋnuŋ a witiiyoŋ te, kanifuule muŋ wa tɔlɔɔ mɛɛlaa ni. 33 Mi Muuse faŋaŋ chiee naa Feloo wa wa, okoŋ mbo kɔ piɛi o Chɛhowa lo.* Nduyɛ mi taŋndaŋ, looŋ kpuŋgbaŋ, a piɔɔ wa siaa wo pɛŋgi.+ 34 Mɛɛ Feloo che maa piɔɔ, looŋ kpuŋgbaŋ, a taŋma wa deŋioo waŋ ma pɛŋgi, mbo tosa vɛlɛ hakioo, nduyɛ mi ndu a buɛiyaa nduaa tosa vɛlɛ bolle kalaleŋ.+ 35 Mi Feloo hiau lachi a bolle kalaleŋ tosaa, nduyɛ mbo kɛɛ le Isɔluɛiya malɔɔ a mɛɛ Chɛhowa dimul Muuse yɛ.+