Lɛvitikɔɔ

22 Mi Chɛhowa dimul vɛlɛ Muuse aa: 2 “Dimul Elɔŋ nda puaa nduaa maa, a nɔ ma wa yekeŋ a mɛɛ nda bii nyɛm diandaŋ Isɔluɛiya yɔŋgu woŋ yɛ.* Te a nɔɔliaa pɛ muŋ,+ mɛɛ diola nila diandaa laŋ nda cho laŋ nɔɔliaa ni.+ Ya cho Chɛhowa ni. 3 Dimul nda aa, ‘O chuauwaa ndaa tɛɛŋ kinɛi, wana o wana sɔɔŋguu pɛ o nyɛm diandaŋ Isɔluɛiya yɔŋgu o ya Chɛhowa lo woŋ ikɛi boondii o wa o nɔɔlɛi ye, wana koŋ nɔ mbo sɔla piɔmndo.+ Ya cho Chɛhowa ni. 4 O puaa Elɔŋ nda tɛɛŋ kinɛi, wana o wana nɔ pɛ naa ŋlɛlɔɔ,+ ɔɔ naa wana chii o lɛmbɔɔ niŋndo,+ wana koŋ nɔ mbo de nyɛm cho ŋ diandaa woŋ te haaa mbo simnuŋ o diandaa.+ Nduyɛ wana o wana pilaŋ pɛ wana pilaŋ wana vilɛiyo mbo simnuŋ o nɔɔlɛiyo,+ wana pɔnɔ chii o lɛmbɔɔ niŋndo,+ 5 wana pɔnɔ pilaŋ nyaa yoomaa nɔɔlɛiyaa balu kunda wa,+ ɔɔ wana pilaŋ wana simnuŋ o nɔɔlɛi le sabu o sabu cheleŋ tosa mi wana simnuŋ o nɔɔlɛiyo,+ 6 nyɛm nɔɔlɛiyoŋ muŋ kinɛi, wana o wana pilaŋ pɛ o kɛ kɛ, wana koŋ cho wa o nɔɔlɛi haaa mi paaleŋ le del. Nduyɛ, o nɔ mbo de nyɛdiaa kɛ kɛ le, mɛɛ mbo puluŋ a mɛŋndaŋ.+ 7 Te paaleŋ le del pɛ, o simnuŋ o diandaa. Okoŋ, o nɔ mbo de nyɛm cho ŋ diandaa woŋ, kanifuule nyɛdiaa ndɔɔ cho koŋ ni.+ 8 Te o saaluŋ vɛlɛ pɛ visi vilɛiyo, o wa a ba ndɔ o vi ni ɔɔ visi cheleŋ dii ndu ni, o nɔ mbo de ndu mbo simnuŋ o nɔɔlɛi le.+ Ya cho Chɛhowa ni.

9 “‘A nɔ ma diikuŋ sawala nilaŋ, le halikpeŋ a tosa hakioo ma sɔla piɔmndo, le mɛɛ nda nɔɔliaa nyɛm cho ŋ diandaa woŋ yɛ le. Ya cho Chɛhowa, wana cho nda dindioo wo ni.

10 “‘Wana cheleŋ* nɔ di mbo de nyɛm cho ŋ diandaa woŋ te.+ O wa mial hiŋ wana soliaa lasalaa o bɛŋgu choo wo, ɔɔ wana nda chua le wallo wo, o nɔ mbo de nyɛ o nyɛ cho o diandaa le. 11 Kɛ te wana soliaa lasalaa pendu pɛ waŋndo a kanii* nduɛi, wana koŋ nɔla mbo de nyɛm cho ŋ diandaa woŋ. Nduyɛ, te chiɔɔ veluŋ pɛ o wana soliaa lasalaa lo chiɛiniŋ, ndu bɛɛ nɔla mbo de nyɛm cho ŋ diandaa woŋ.+ 12 Te chua wana soliaa lasalaa chal pɛ wana cho wana soliaa lasala le wo* o ba o nɔɔ niŋ, o nɔ mbo de nyɛm diandaŋ nda chuuŋgiaa woŋ te. 13 Kɛ te chua wana soliaa lasalaa vii pɛ pɔnɔɔ ɔɔ ma kɛyaŋ nda pɔnɔ ndɔ kɛ o vilu ŋchuau le, okoŋ mbo miiŋgu o finya ndɔ lo chiɛiniŋ mɛɛ o wa loŋ tuupa mbo chal o nɔɔ yɛ, mɛɛ o dia nyɛm diandaŋ cho le finya ndɔ woŋ.+ Kɛ wana cheleŋ* nɔ di mbo de muŋ te.

14 “‘Te waŋndo ve o sina choo le mbo de nyɛm cho ŋ diandaa woŋ, o nɔ mbo paawa le nyɛm o de muŋ ndoŋ. Nduyɛ te o nɔ pɛ le paawaa 100, o handu 20 lechoo. Okoŋ, mbo ke wana soliaa lasalaa sala+ diandaa koŋ. 15 Lelaŋ, wanaa soliaa lasalaa nɔ ma nɔɔliaa nyɛm diandaŋ Isɔluɛiya chuuŋgiaa le ya Chɛhowa woŋ te,+ 16 yɔŋii Isɔluɛiya sɔla nyɛpalaa le haki nda tosa ma dia nyɛm diandaŋ ndo. Kanifuule, ya cho Chɛhowa, wana cho nda dindioo wo ni.’”

17 Mi Chɛhowa suaa vɛlɛ o Muuse lo aa: 18 “Dimul Elɔŋ, puaa nduaa, a Isɔluɛiya kpou aa, ‘Te Isɔluɛinɔɔ ɔɔ mial cho nya tɛɛŋ ndo wa pɛ sala luamaa solioo+ o ya Chɛhowa lo le buŋgɛi o chua ve peeloo, ɔɔ sala o kɛɛsiaŋ o kɔl le solioo wo,+ 19 o nɔ mbo hɛli nau towa kɛndɛ kɛndɔɔ,+ saa konduaa fɔŋnduaa, ɔɔ chuiŋnda o chɔluaa nduaa tɛɛŋ, le mi ya Mɛlɛka hini kɔl a ndu. 20 Chɔlu kɛ kɛ nɔ namtaleŋ,+ o nɔ mbo soli ndu salaa le. Kanifuule, keŋ cho tosa I hini kɔl a ndu le.

21 “‘Te waŋndo wa pɛ sala kɔl nyuloo solioo+ o ya Chɛhowa lo le buŋgɛi o chua ve peeloo, ɔɔ sala o kɛɛsiaŋ o kɔl le solioo wo, o nɔ mbo yɔŋgu nau kɛndɛ kɛndɔɔ, chuiŋndo, ɔɔ saa o chɔluaa nduaa tɛɛŋ, le mi hini kɔl a ndu. Chɔlu koŋ nɔ mbo nɔ lenamta kposoŋ te. 22 Chɔlu kɛ kɛ wa pɛ le salaa solioo, o nɔ mbo wa o sumɛi, mbo nɔ pelii yomɛiye, pauwo, yuŋgaa, kawalaŋ, ɔɔ naala cheleŋ fula chɔluaa laŋ te. Chɔlu kɛ kɛ wa pɛ lende, a nɔ ma soli ndu salaa o ya Chɛhowa lo ɔɔ ma lom ndu o bandu luamaa lasalaa choo le ya Chɛhowa le. 23 A nɔla ma yɔŋgu nauwo ɔɔ saa cho tindaa wo, le sala numpila kɛɛsiaŋ o kɔl le solioo wo. Kɛ te o yɔŋ pɛ ma yɔŋgu chɔluaa haa le sala ŋ chua buŋgɛiyo solioo, ya Mɛlɛka hini kɔl a nda le. 24 Chɔlu buŋ kpoloo piɔllo ɔɔ o nda pɛl boosioo wo, la nɔ mi la hiŋ a ndu o ya Chɛhowa lo le salaa solioo le. Nduyɛ, la nɔ mi la soli chɔlu waa nuaa salaa o lɛŋnde nyaleŋ niŋ te. 25 La bii chɔluaa waa nuaa o kɛ kɛ mialaa cho nya tɛɛŋ nda o ba le salaa solioo o ya Mɛlɛka nyaa lo le. Chɔluaa nɔ namtaleŋ ma wa a nɔɔlɛiya nda cho ni. I hini kɔl a sala waa lende le.’”

26 Mi Chɛhowa suaa vɛlɛ o Muuse lo aa: 27 “Te chɔloo kom pɛ nau piaandoo ɔɔ saa piaandoo, ɔɔ chuiŋndo, o nɔ mbo wa a kala ndɔ latulu le palɛi i ŋɔmmɛu.+ Kɛ chɔŋ niŋ o paale ŋɔmaa leŋ choo mbo kuɛ kɛ, a nɔla ma yɔŋgu ndu le sala nda luam o ya Chɛhowa lo wo, nduyɛ mi chɛl ndu. 28 Kɛ te o yɔŋ pɛ nauwo ɔɔ saa, la nɔ mi la dii ndu o paale pilɛ leŋ choo a chuale ndɔleŋ te.+

29 “Te sala balika melaa nya cho solioo o ya Chɛhowa lo ni,+ la nɔ mi la soli ndu o nɛi ya chɛllo choo. 30 La nɔ mi la de ndu o paale leŋ choo. O kɛ kɛ nɔ mbo lɔl haaa diimandɔɔ le.+ Ya cho Chɛhowa ni.

31 “La nɔ mi la bii sawala nilaŋ nduyɛ mi la tosa nyɛ la dimi wo.+ Ya cho Chɛhowa ni. 32 La nɔ mi la nɔɔliaa diola nila diandaa laŋ te,+ le halikpeŋ mi la lo la diandaa Isɔluɛiya tɛɛŋ.+ Ya cho Chɛhowa, wana cho nya dindioo wo ni.+ 33 Ya soli nya o lɛŋnde Ichipi leŋ niŋ ni, le mi chɔm nya maa Mɛlɛka nyaa ya cho ni.+ Ya cho Chɛhowa ni.”