Hoosiaa
2 “La veelu puaapiliaa nyaa aa, ‘Wanaa niaa!’*+
Nduyɛ mi la dimul yemaa nyaa aa, ‘Oo wana lanɔ nda tuiinuŋ hoo inyiɛɛyo!’*+
2 La kilul kala nya yamɛi. La kilul ndu yamɛi,
Kanifuule, o cho lɛ laa ni le,+ nduyɛ ya bɛɛ I cho lɛ pɔnɔ ndɔ le.
3 Te o cho koŋ te, I cho ndu yuŋga, mi mɛi ndu fondo mɛɛ o wa paale nda velu ndu leŋ yɛ,
Mi siiŋguu ndu mɛɛ pollo wa nuaa yɛ,
Mi miŋgi ndu maa lɛŋnde nɔ mamɛŋ te leŋ,
Nduyɛ, mi tosa mbo vi a bolola vesɛilaŋ.
4 I cho chuauwaa nduaa inyiɛɛ tuiinɔŋ te,
Kanifuule, chuauwaa samaa* nda cho ni.
5 Suundaa kala nda suunda* ni.+
Mi wana chua foli* ndaa wo tosa sɔɔŋ lasiɔmboŋ.+ Mbo dimi aa,
‘I cho lakɔŋnɔŋ samaa niaa kɔɔli,+
Kanifuule, nda ke ya nyɛdiaa a mɛŋndaŋ ni.
Nda koni ke ya vɛlɛ nyɛlaŋ,* kolala feŋgbɛlaŋ, chuɛiyaŋ a muɛiyaŋ ni.’
6 Lelaŋ, I cho nɛi numndo kinda a yɔɔŋ kundaŋ.
Nduyɛ, I cho ndu pouwo simi o nɛi maa kpaki,
O nɔla mbo hiou le.
7 O cho nyaanɔŋ samaa nduaa kɔɔli, kɛ o bendal niŋ nda le.+
O cho nda nuuviaa, kɛ o seeluŋ niŋ nda le.
Okoŋ mbo dimi aa, ‘Mbɔ, I miiŋguŋ ndɔ o pɔnɔ nuu lo,+
Kanifuule, teleŋ ya wa pɔnɔ nuu o ba wo sɔɔŋ muŋ hiou bɛnda a ya.’+
8 O ve sina maa ya le wa ndu kulloŋ,+ muɛima sɛnɛiyaŋ, a chuɛiyaŋ kioo le.
Ya wa ndu kaniŋ humboŋ kioo ŋ hɔbɛi ni,
A kooliŋ ndaa soliŋ kpeku le Baal sooluuwo woŋ.+
9 ‘Lelaŋ, I cho miiŋgu pila mi kɔ bii kuluŋ nuŋ a teleŋ kuauwaa,
Nduyɛ, mi bii muɛima ni ma sɛnɛiyaŋ a teleŋ nda toosiaa maŋ ndo.+
Nyɛla ya ke ndu le dialuŋ ndɔŋ lasiɔmboŋ kumbɔɔ laŋ, a kolala feŋgbɛlaŋ, I cho ndu laŋ poondiaa o ba kpou.
10 I cho ndu yuŋga samaa nduaa o hɔl, ma che dialuŋ ndɔŋ lasiɔmboŋ kpendekele.
Nduyɛ, wana o wana nɔla niŋ ndu ya piŋi o ba le.+
11 I cho tosa mi nyaale ndɔɔ mɛɛlu.
Mi tosa vɛlɛ mi bɔŋaŋnda ndɔlaŋ,+ dunyaŋ ndɔŋ paŋguŋ sɛnɛiyoŋ, palɛi nduɛi pɛŋgiɛi, a dunyaŋ ndɔŋ kpou mɛɛlu.
12 I cho tɔlɔɔla ndɔlaŋ, a yɔmii nduɛi makilepiiye tɛɛmbuu. Nyɔɔŋ muŋ o dimi ni aa:
“Paawa* nuu cho hoo ni, samaa niaa ke ya ni.”
I cho nyɔɔŋ muŋ siiŋguu bundɔɔ,
Nduyɛ, mi visiaa yonduaa tɛɛmbuu muŋ.
13 Le mɛɛ o wa salalaŋ solioo teleŋ koŋ o suŋgbuma Baal laŋ yɛ, I cho ndu nyɛpalaa tusi choo.+
Teleŋ ndoo wounuŋ kelaŋ a nyɛm kɛvɛlɔŋ, nduyɛ mbo wa samaa nduaa kiltaŋ kɔɔli wo,
Mbo puɛɛnuŋ a ya.’+ Chɛhowa dimi lende ni.
14 ‘I cho ndu kɔllo siŋga,
Mi kuɛ a ndu o pollo niŋ,
Nduyɛ mi soo o ndu lo, mi tiu ndu ba.
15 Okoŋ kɔɔli, I cho ndu tɔlɔɔla ndɔlaŋ miŋgi o ba pila,+
Nduyɛ, Kpoloŋndo Akɔɔ+ cho simnɔŋ dio o luɛi mbo sɔla tiindaŋndo wo.
O cho ya diom tueiyɔɔ mɛɛ ndoo tuɛi ya diom teleŋ o wa feleŋgɔnɔ wo yɛ,
Nduyɛ, mbo tuei ya diom mɛɛ ndoo tuɛi ya diom teleŋ o fula sɛnɛi o lɛŋnde Ichipi leŋ niŋndo yɛ.’+
16 Mi Chɛhowa dimi aa, ‘A teleŋ koŋ,
A cho ya veelu aa pɔnɔ Nuu. Nduyɛ fɛɛŋ bɛɛ a veelu lɛ ya niŋ aa masanɔ Nuu* le.’
18 A teleŋ koŋ, I cho kpemaa yii a visiaa yonduaa le nda,+
Nduyɛ, mi yii kpemaa a youwa o choo choo niŋ, vɛlɛ a nyaa yoomaa sasuŋ lɛŋ nda.+
I cho chiɔulaŋ a muɛi faŋnde faŋa o chieeŋndo choo, nduyɛ mi chii chɔulaŋ.+
I cho tosa ma wa hɛnɛkɛ, nyɛ o nyɛ yɔŋnuŋ nda le.+
19 I cho yɔŋgɔŋ o numndo lefafɛɛŋ.
I cho yɔŋgɔŋ o numndo, nduyɛ mi wa num sɔɔŋ tosallo o nɛi sakpoo choo a o sandei choo.
I cho num kaala lo lechoo wo chɔm, nduyɛ mi tuiinuŋ num inyiɛɛ.+
20 I cho yɔŋgɔŋ o numndo, mi lo o lediom,
Nduyɛ, a cho sina kɛsɛ maa ya cho Chɛhowa ni.’+
21 ‘A teleŋ koŋ, I cho num diom muli,’ Chɛhowa dimi lende ni.
‘I cho choo choo diom muli,
Nduyɛ mi choo choo muli lɛŋndeŋ diom.+
22 Lɛŋndeŋ le cho kulloŋ, muɛima sɛnɛiyaŋ, a chuɛiyaŋ diom muli,
23 I cho ndu saŋɔɔ le yapila maa ŋkul o lɛŋndeŋ choo,+
Wana nda tuiinuŋ hoo inyiɛɛ* le wo, I cho ndu tuiinɔŋ inyiɛɛ.
I cho wanaa cho wanaa ni le wa* dimul aa: “Wanaa niaa nya cho ni.”+
Nduyɛ mi nda dimi aa: “Num cho Mɛlɛka naa ni.”’”+