Emɔɔsi
3 “Nya waŋnda Isɔluɛi, nya yuŋgu Chɛhowa soli o lɛŋnde Ichipi leŋ niŋndo kpou, la yaŋ nilaŋ mi la tuei nyɛ o dimi a nya okɔɔ wo:
2 ‘O yuŋgula cho o lɛŋndeŋ choo laŋ tɛɛŋ kpou, nya koni ya sina ni.+
Le sabu koŋ kpeekpei ya cho nya nyuna ni le mi la dɔɔnuŋ kona, le sɔɔŋ wɔɔŋ nya cho tosaa woŋ.+
3 Baa wanaa ŋiɔɔŋ kua pa kelaa diompilɛ, te a chɛlaŋ fɛŋ le ma bɔŋaŋ inɛ le?
4 Baa kpɔkuŋndo* pɛɛliaa pa yondoo niŋ, te o yeema le nyɛ o nyɛ biyɔɔ le?
Kpɔkuŋ fɔŋndɔɔ pɛɛliaa pa o bɛmɛlta ndɔlaŋ, te o bii nyɛ o nyɛ le?
5 Youwo nɔla pa mbo hau lɛŋ o yaŋɔɔleŋ, te o cho ma kɛsul ndu nyɛ loŋ te?
Yaŋɔɔleŋ le biondu pa mi le bii nyɛ, te o cho mi nyɛ o nyɛ del leniŋ te?
6 Te a hɔŋ pɛ buloo o chioo niŋ, waŋnda nyiiya a siooŋnde le?
Te kpundɔɔ del pɛ o chioo niŋ, o cho Chɛhowa le chɛl mbo yɔŋnuŋ te?
7 Tuupa mi Chɛhowa, Mɛlɛka Kpuluŋguma Bɛndoo tosa nyɛ o nyɛ,
Mɛɛ mbo dimul fɛŋ buɛiyaa nduaa suaa le ndu wa nyɛ o tuu le tosaa wo.*+
8 Te kpɔkuŋndo pɛɛliaa+ pɛ, nɛɛnɛ cho yɛ mi siooŋnde kɛɛ ndu biyɔɔ?
Te Chɛhowa, Mɛlɛka Kpuluŋguma Bɛndoo soo pɛ, o wanaa suaa le ndu wa tɛɛŋ, nɛɛnɛ kɛɛ yɛ le yooŋgu koŋ dimioo?’+
9 ‘La sim o chiɛila kala kalalaŋ choo Asidɔɔ,
A o chiɛila kala kalalaŋ choo o lɛŋnde Ichipi leŋ niŋ mi la yonda.
La dimi aa: “La chuuŋgiaŋ o pembuŋ bɛndoŋ choo Sameeliaa.+
La kɔ mi la che sɔŋgɔla cho loŋ ndaŋ,
Vɛlɛ a kafala nda cho waŋnda tosallo laŋ.+
10 Waŋnda haa sina lɛ mɛɛ wana tosa nyɛ cho sakpo wo yɛ le.”
“A cho chiɛila ndala choo choo la kala kalalaŋ peiyo, a nyɛm nda cho waŋnda poondiaa o laba woŋ.” Chɛhowa dimi lende ni.’
11 Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni,
‘Yaamɔɔwa cho hunɔɔ lɛŋndeŋ balɔɔ,+
Okoŋ ma puu nya kpaayaa o ba.
Nduyɛ chiɛila choo choo la kala kalala nyalaŋ, a cho nyɛm cho leniŋ ndoŋ puŋga ma kuɛŋnuŋ a muŋ.’+
12 Nyɛ Chɛhowa dimi wo cho hoo ni,
‘Waŋnda Isɔluɛi choŋnuŋ ihini o kpelela kɛndɛ kɛndɛlaŋ choo Sameeliaa, nduyɛ ma waŋnuŋ ichali o kpɛŋɛla kɛndɛ kɛndɛlaŋ* choo.
Kɛ a chinda niŋ yaamɔɔwaa ndaa o ba wa, a ve niŋ a bɔɔ le.
Mɛɛ kpɔkuŋndo bii nuaa saa mbo chii ndu dio, mi wana mandaa lasaa kɔ puu ndu niŋ peloŋ ŋ muuŋ ɔɔ nileŋ o sondo yɛ, lende i yɔŋnuŋ niŋ ni.’+
13 Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa* dimi aa, ‘La yaŋ nilaŋ nduyɛ mi la sila* chiɛi Chekɔpu wo.’
14 ‘Paale ya cho Isɔluɛi nyuna le mbo dɔɔnuŋ kona le sɔɔŋ wɔɔŋ o cho tosaa woŋ,*+
I cho vɛlɛ bandula luamaa lasalalaŋ o Bɛtɛl+ nyuna, le mi laŋ bɛɛ la dɔɔnuŋ kona.
Leela bandu luamaa lasalaa, la cho keendɔŋ mi la deli lɛŋ.+
15 I cho tɛɛmbuu chiɛila nda taŋgul le sialteŋ ndaŋ, a chiɛila nda taŋgul le wɔɔleŋ ndaŋ.’
‘Chiɛila nda bɛɛndiaa nyɛkɛndɛ kɛndɛi a chiŋuŋ kamaa laŋ bɛɛ, I cho laŋ tɛɛmbuu.+
Nduyɛ chiɛila bɛndulaŋ* la cho piɔl.’+ Chɛhowa dimi lende ni.”