Lɛvitikɔɔ

12 Mi Chɛhowa dimul Muuse aa: 2 “Dimul Isɔluɛiya aa, ‘Te wana lanɔɔ chua pɛ folioo* mbo velu wana pɔnɔɔ, o cho wa o nɔɔlɛi le palɛi i ŋɔmmɛu, mɛɛ o wa o nɔɔlɛi a boondii o cha teleŋ ndɔɔ ve yɛ.+ 3 Nduyɛ o paale ŋɔmaa leŋ choo, a nɔ ma hivi po o velu koŋ ndo o chiɛi kɔɔli.+ 4 O cho hiouwɔɔ lachi a waa o nɔɔlɛi le palɛi 33, le mɛɛ koowaŋ ma fula ndu o ŋdial a teleŋ o velu wo yɛ. O nɔ mbo pilaŋ nyɛ o nyɛ diandaa le. Nduyɛ, haaa mbo chii palɛi o nɔ le waa o nɔɔlɛi ye, o nɔ mbo luɛi o fondaŋ diandaa le.

5 “‘Te o yɔŋ pɛ maa wana lanɔɔ o velu ni, o cho wa o nɔɔlɛi le palɛi 14, mɛɛ o wa o nɔɔlɛi a boondii o cha teleŋ ndɔɔ ve yɛ. O cho hiouwɔɔ lachi a waa o nɔɔlɛi le palɛi 66, le mɛɛ koowaŋ ma fula ndu o ŋdial a teleŋ o velu wo yɛ. 6 Te palɛi o cho wa o nɔɔlɛi le mɛɛ o velu wana pɔnɔɔ ɔɔ wana lanɔɔ ve chuu pɛ, o nɔ mbo hiŋ a saa fɔŋndɔ piaandoo, o chii wɔsioo o pilɛ wo le sala luamaa,+ nduyɛ mbo hiŋ a piiŋ fɔŋndɔɔ ɔɔ kaŋgboo le sala hakioo o tɛndii bɔŋaŋndo hɔlndɔ, o wana soliaa lasalaa lo. 7 Wana soliaa lasalaa nɔ mbo hiŋ a salalaŋ ndaŋ ya Chɛhowa lachi, mbo nyuna le malɔɔ hakioo le ndu, nduyɛ mbo simnuŋ vɛlɛ o diandaa le kooma fula ndu waŋ. Sawa cho a wana lanɔɔ okɔɔ wo cho hoo ni, te o yɔŋ pɛ mbo velu wana pɔnɔɔ ɔɔ wana lanɔɔ. 8 Kɛ te o yɔŋ pɛ maa o nɔla saa sɔla le, o nɔ mbo hiŋ a piiŋnda a ŋiɔɔŋ+ ɔɔ kaŋgbuaa fɔŋnduaa a ŋiɔɔŋ. O pilɛ le sala luamaa, o pilɔɔ le sala hakioo. Wana soliaa lasalaa cho nyuna le malɔɔ hakioo le ndu, nduyɛ mbo simnuŋ o diandaa.’”