Isikiɛɛ

7 Mi Chɛhowa suaa vɛlɛ naa ya chua, mbo dimi aa: 2 “Num po wanachioo, nyɛ Chɛhowa, Mɛlɛka Kpuluŋguma Bɛndoo dimi a lɛŋnde Isɔluɛi leŋ okɔɔ wo cho hoo ni: ‘Mɛɛlulaŋ! Mɛɛlulaŋ la fuuluu le lɛŋndeŋ kpou. 3 Mɛɛlula numndaŋ la fuuluu. Nduyɛ I cho num tumbe ni kala kalaa tusi choo, mi kilul num yamɛi a mɛɛ kuɛɛla numndaŋ la cho yɛ, okoŋ mi tusi num nyɛpalaa choo le sɔɔŋ wɔɔŋ ŋ tosa woŋ kpou. 4 I cho num tuiinɔŋ inyiɛɛ le,* kɛlɛŋgaa niŋ te mi bii mɔnɛi le num.+ I cho num nyɛpalaa tusi choo le kuɛɛla numndaŋ, nduyɛ ma saŋga le sɔɔŋ wɔɔŋ ŋ tosa woŋ.+ Okoŋ, a cho sina maa ya cho Chɛhowa ni.’+

5 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Kpundɔɔ cho hunɔɔ! Kpundɛ teŋgeŋndo cho hunɔɔ.+ 6 Mɛɛlulaŋ la cho hunɔɔ! Mɛɛlulaŋ la nɔ le hunɔɔ. La cho num woolu wa! A tonya, mɛɛlulaŋ la cho hunɔɔ. 7 Nya wanaa cho o lɛŋndeŋ niŋnda, teleŋ nyaa fuuluu. Teleŋndo cho hunɔɔ, paaleŋ le cho niŋ kpɛɛluŋ.+ Wooluŋ wooluŋndo cho o pembuŋ bɛndoŋ choo.

8 “‘I cho suŋ tumbe ya dɔɔnuŋ a num o kala kala wo hulɔɔ choo,+ mi kilul num yamɛi a mɛɛ kuɛɛla numndaŋ la cho yɛ. I cho num nyɛpalaa tusi choo+ le sɔɔŋ wɔɔŋ ŋ tosa woŋ kpou. 9 I cho num tuiinɔŋ inyiɛɛ le, kɛlɛŋgaa niŋ te mi bii mɔnɛi le num.+ I cho num nyɛpalaa tusi choo le kuɛɛla numndaŋ, nduyɛ ma saŋga le sɔɔŋ wɔɔŋ ŋ tosa woŋ. Okoŋ a cho sina maa ya Chɛhowa, ya cho num nyɛpalaa tusioo choo ni.+

10 “‘Paaleŋ le cho hunɔɔ! Le cho niŋ kpɛɛluŋ!+ Teleŋ numndo fuuluu, tindaa soli peeŋgelaŋ, mi heelɔŋndo wul. 11 Sɔŋgɔlaŋ la kui mi la simnuŋ tinda dɛnɛ wɔɔŋndo.+ Ndapila ni, sulta ndalaŋ ni, faŋga cho nda kɔɔli wo ni, a tɔɔ nda fula wo kpou cho hunɔɔ mɛɛlu. 12 Paaleŋ le cho hunɔɔ, teleŋ koŋ cho fuuluu. Wana cho piondɔɔ wo duaunuŋ nyaale le, nduyɛ wana cho pisioo wo bii imɔnɔ le. Kanifuule, kɔl tuu bɛndoo cho faŋga cho nda kɔɔli wo kpou tolɔɔ choo.*+ 13 Wana cho pisioo wo sɔla lɛ niŋ nyɛ o pisi wo le, o yɔŋ bɛɛ mbo lo yoomu. Kanifuule, yilaŋnde hei cho wana o wana fee piiliaŋ. Wana o wana cho miiŋgu le. Nduyɛ le mɛɛ nda tosa hakioo yɛ, wana o wana nɔla niŋ mbo piŋi yoomu ndɔɔ le.

14 “‘A hɔŋ buloo,+ nduyɛ wana o wana cho o bɛɛndiaŋ, kɛ wana pilɛ bɛɛ kue le chɔuwo le. Kanifuule, I dɔɔnuŋ tumbe o kala kala a waŋnda kpou.+ 15 Muɛi faŋnde cho o kpaki chioo kɔɔli,+ mi naala taŋ waŋnda laŋ a yima bɛnduaŋ ma wa leniŋ. Wana o wana kuɛ pɛ yondoo niŋ, muɛi faŋnde cho ndu diyɔɔ ni. Nduyɛ wana o wana lo pɛ chiee, yima bɛnduaŋ a naala taŋ waŋnda laŋ la cho ndu diyɔɔ ni.+ 16 Wanaa ndaa cho hiɔlɔŋ nda cho nyaanɔŋ o pembuŋ bɛndoŋ choo, nduyɛ wana o wana cho wa mɔnɛi biyɔɔ le hakila ndɔlaŋ maa piiŋnda o kpoloŋndaŋ niŋ.+ 17 Bala ndalaŋ kpou la cho wu, nduyɛ mi wula ndalaŋ kpou la liwa yɔ yɔ.*+ 18 A cho nyɛla labɛkilaŋ wounɔŋ,+ okoŋ ma wa nyiiyaa kpa kpa. Siɔmbulaŋ la cho wana o wana fee biyɔɔ, nduyɛ mi tembeltaŋ la del nda.*+

19 “‘A cho kaniŋ ndaŋ humboŋ vii vii o nɛila bɛndulaŋ choo, mi kooliŋ ndaŋ simnuŋ nyɛ wɔɔŋ wɔɔŋ bɛndu le nda. Kaniŋ ndaŋ humboŋ ni, kooliŋ ndaŋ ni, ŋ nɔla niŋ nda piŋi o paale kɔl tuule bɛndule Chɛhowa leŋ choo le.+ A nɔ niŋ kɔl hiniaa le, kɛlɛŋgaa niŋ te mi nyɛdiaa wa letuu le nda. Kanifuule, nyɔɔŋ muŋ* tosa ni ma luei balaŋ o hakilaŋ niŋ. 20 A cho pɛɛlɔŋndo a nyɛm kɛndɛŋ nda nɔ woŋ, nduyɛ ma soliŋ muŋ* kpeku le piɔmaa ndaa nɔɔlɛiya toosiaa.+ Le sabu koŋ, I cho tosa miŋ simnuŋ nyɛm wɔɔŋ wɔɔŋ le nda. 21 I cho tosa mi mialla chɔuviaa muŋ* ma kuɛŋnuŋ a muŋ, nduyɛ mi wanaa dɛnɛ wɔɔŋnda o lɛŋndeŋ choo puŋga muŋ ma soli muŋ o baa niŋ.

22 “‘I cho nda hɔlteŋ faŋa choo,+ okoŋ mi fondaŋ ni viaŋnaŋndo* nɔɔla, nduyɛ mi viiya luɛi ma tɛɛmbuu ndu.+

23 “‘Bɛɛndiaa yɔlɔŋ,*+ kanifuule lɛŋndeŋ le cho le piaa cha a kooma wanaa nda kilul yamɛi lakafɛi ya,+ nduyɛ chioo cho o piaa cha a niilu lasɔŋgɔɔ.+ 24 I cho hunɔɔ a wanaa wɔɔŋ wɔɔŋnda o lɛŋnde niŋ,+ ma huŋ poondiaa nda chiɛila ndalaŋ o laba.+ I cho tosa mi yoŋga wanaa kpaayaa bɛnduaa kelu wo mɛɛlu, nduyɛ mi nɔɔliaa fondaŋnda ndala lasooluulaŋ.+ 25 Te dɛnɛ palaa tol nda choo pɛ, a cho kɔl nyuloo nuuviaa, kɛ a seeluŋ niŋ ndu le.+ 26 Nyɛpalaa wa niŋ nda deŋgelaŋndo choo, nduyɛ mi konala wɔɔŋndaŋ la wa nda komallo o lepula. Waŋnda nuuviaa niŋ wana suaa le Mɛlɛka wo le mbo chɔm nda yilaŋnde.+ Wana soliaa lasala ve niŋ le nda sawa pɛɛku le, nduyɛ waŋ banaa ve niŋ le nda sila le.+ 27 Masa bɛndoo cho hunɔɔ mɔnɛi biyɔɔ,+ nduyɛ mi yuŋgu lebollo wounuŋ nyɛla imɔnɔ laŋ. Balaŋ la cho wanaa cho o lɛŋndeŋ niŋnda nyiiya kpa kpa a siooŋii bɛnduei. I cho nda biyɔɔ mɛɛ kuɛɛla ndalaŋ la cho yɛ, nduyɛ mi kilul nda yamɛi mɛɛ nda kilul acheleŋnda yamɛi yɛ. Okoŋ, a cho sina maa ya cho Chɛhowa ni.’”+