Isikiɛɛ

8 O wɔsi ŋɔmpum ndo niŋ, paŋgii ŋɔmpum nde malɔ le ŋuɛɛnu, I wa ichali o ya lo chiɛiniŋ, mi waŋ banaa Chuda wa ya ichali lachi. Okoŋ mi nyina Chɛhowa wo, Mɛlɛka Kpuluŋguma Bɛndoo tual la choo loŋ. 2 Mɛɛ ya tofa, mi cha nyɔɔ maa wanachiee, wanaa che ndu pɛ aa yiŋndeŋ ni. Yiŋndeŋ le wa o nyɛ wa maa chaŋaa nduaa wo amatou.+ Nduyɛ chɔŋ o chaŋaa nduaa hel luaŋ, o wa iŋɛlɛŋgi ŋɛlɛŋgiei naŋ chaa kooliiye a kanii humbuei nda muuliaŋ ni.+ 3 Okoŋ mbo siɛndi nyɛ velaŋ a baa wo, mbo saa ya yiinde o lebol, nduyɛ mi nyina Mɛlɛkaa heelu ya o hueiye niŋ, mi wa choo choo a lɛŋndeŋ tɛɛŋ. Mbo kua a ya Chulusalɛm o yilaŋnde niŋ, mbo kɔ tusi ya o dio kpaki luŋ cho leniŋ ndo sondoo+ kpeŋgii ba luaŋ nde, naa piɔm nɔɔlɛi tosa mi Mɛlɛka paŋala wo wa isisi wa.+ 4 Nduyɛ mi cha naŋɔɔ bɛndu Mɛlɛka Isɔluɛiya loŋ,+ maa o yaa che o lɛŋnde dɛŋgbɛleŋ niŋndo.+

5 Okoŋ mbo dimul la aa: “Po wanachioo, yandii chuawɔ hɔlla ma tofa kpeŋgii ba luaŋ nde.” Mi chua hɔlla, mi tofa kpeŋgii ba luaŋ nde. Nduyɛ, piɔm nɔɔlɛi tosa mi Mɛlɛka paŋala wo wa kpeŋgii ba luaŋ nde, o dioo le luɛiyɔɔ o bandu luamaa lasalaa. 6 Mbo dimul la aa: “Po wanachioo, a cho pa chɔɔ sɔɔŋ nɔɔlɛi waŋnda Isɔluɛi cho tosaa naŋnuŋ ndoŋ,+ sɔɔŋ tosa mi kua landaŋ a chiɛi ni diandaa woŋ?+ Kɛ a cho sɔɔŋ nɔɔlɛi cheleŋ chɔ ŋ hiou bɛɛ muŋ lewɔu woŋ.”

7 Okoŋ mbo kua a ya o dioo le luɛiyɔɔ o luŋ chiɛi Mɛlɛkaa. Mɛɛ ya tofa, mi cha tɛɛŋgei o kpakioo. 8 Mbo dimul la aa: “Po wanachioo, yandii chɔɔlu tɛɛŋgii keŋ kumbi.” Mi chɔɔlu tɛɛŋgei kumbi, okoŋ mi sɔla fondaa le luɛiyɔɔ. 9 Mbo dimul la aa: “Luɛi ma kɔ chɔ sɔɔŋ nɔɔlɛi nda cho tosaa nanuŋ ndoŋ.” 10 Mi luɛi mi cha nyaa yoomaa suu o suu. A kua o demboo choo wa, visiaa nɔɔlɛiya,+ a piɔmaa nɔɔlɛiyaa* waŋnda Isɔluɛi wa piɛiyo wa kpou.+ A wa a tuuliaa chiɛiyo balɔɔ silɔ. 11 Nduyɛ waŋ banaa 70 o Isɔluɛi niŋ wa nda isisi lachi. Chaasanaya po Siafaŋ ndo+ wa nda isisi tɛɛŋ. Wana o wana ndoo nɔ hɛŋgɛi nda luam nyɛm chuŋ kɛndɔŋ ndo o ba, nduyɛ kumii nyɛm chuŋ kɛndɛŋ nda wa lomɔɔ woŋ wa helɔɔ choo choo.+ 12 Mbo dimul la aa: “Po wanachioo, a cho pa chɔɔ nyɛ waŋ banaa Isɔluɛi cho tosaa o nyumndaŋ niŋndo? Wana o wana cho piɔmnda sooluuwo o lumui ndɔɔ niŋ, ma dimi aa, ‘Chɛhowa cho naa chɔ le. Chɛhowa faŋaŋ o lɛŋndeŋ niŋ.’”+

13 Mbo hiau lachi a ya dimullo aa: “A cho chɔ sɔɔŋ nɔɔlɛi cheleŋ nda cho tosaa miŋ hiau muŋ lewɔu poloŋ ndoŋ.” 14 Okoŋ mbo kua a ya o dio kpakioo le luɛiyɔɔ o chiɛi Chɛhowa wo kpeŋgii ba luaŋ nde, mi cha waŋ laanduaa ichali loŋ. A wa chaŋndo le mɛlɛka Tamuusi.

15 Mbo dimul la vɛlɛ aa: “Po wanachioo, a cho pa hei chɔɔ? A cho chɔ sɔɔŋ nɔɔlɛi cheleŋ nda cho tosaa miŋ hiau muŋ lewɔu poloŋ ndoŋ.”+ 16 Okoŋ mbo luei ya o luŋ chiɛi Chɛhowa wo niŋ.+ Mi cha puaa 25 o dio pɔmbɔɔ a bandu luamaa lasalaa tɛɛŋ le luɛiyɔɔ o chiɛi Chɛhowa wo. A wa a naŋgaŋ ma mulul chiɛi Chɛhowa wo kɔɔlaŋ, nduyɛ ma muli hɔlla ba paaleŋ le chaŋ ndo, le paaleŋ sooluuwo.+

17 Mbo dimul la aa: “Po wanachioo, a cho pa hei chɔɔ? Sɔɔŋ wɔɔŋ waŋnda Chuda cho tosaa ma pei lɛŋndeŋ cha a sɔŋgɔlaŋ+ ma pilaŋ ya tana woŋ, a yiyaŋ pa maa sɔɔŋ taaniŋndoŋ ŋ cho ni? A cho ya miŋndo chukɔɔ a yɔmndo.* 18 Lelaŋ, I cho dɔɔnuŋ tumbe o kala kala. I cho nda tuiinɔŋ inyiɛɛ le,+ kɛlɛŋgaa niŋ te mi bii mɔnɛi le nda. O yɔŋ bɛɛ ma chaŋ ya o lani kpeleŋ le nda malaa, I yeŋ niŋ nda lani le.”+