Isikiɛɛ

45 “‘Te la wa pɛ lɛŋndeŋ piɔuwo le mi le wa nyɛm kɛŋ nya,+ la nɔ mi la hɛli fondaa o lɛŋnde leŋ niŋ le mbo wa o diandaa le Chɛhowa.+ O nɔ mbo wa bandei nɛiyo 37,500,* a toŋgei nɛiyo 15,000.+ Fondaŋ koŋ kpou* cho wa o diandaa. 2 O fondaŋ nya cho koŋ hɛli wo tɛɛŋ, la nɔ mi la soli fondaŋ diandaa mbo wa bandei nɛiyo 750, a toŋgei nɛiyo 750.+ O kpeŋgii kɛ kɛ, la nɔ mi la soli fondaa le chɔluaa diolaŋ mbo wa nɛiyo 75.+ 3 O fondaŋ diandaa nya cho koŋ soli wo niŋ, la nɔ vɛlɛ mi la soli fondaa le chiɛi ni diandaa. Ndu cho wa fondaŋ hiou diondɔɔ kpou wo ni. O nɔ mbo wa bandei nɛiyo 37,500, a toŋgei nɛiyo 15,000. 4 Fondaa hoo cho wa fondaŋ diandaa ni o lɛŋndeŋ niŋ le wanaa soliaa lasalaa,+ a cho ya Chɛhowa isisi lachi, ma wa wallo tosaa o chiɛi ni diandaa niŋnda.+ O fondaa hoo naa ndaa lɔlaa cho wa ni, a fondaŋ diandaa le chiɛi nuu.

5 “‘La nɔ mi la soli lɛŋndeŋ le Livaiyaa cho wallo o chiɛi Mɛlɛkaa niŋnda. Le nɔ mi le wa bandei nɛiyo 37,500, a toŋgei nɛiyo 15,000.+ A nɔ ma sɔla lumuila diaa nyɛdiaa laŋ 20+ mi la wa nyɛm kɛŋ nda.

6 “‘La nɔ mi la soli lɛŋndeŋ mi le wa le chioo, mɛɛ nya soli lɛŋndeŋ le fondaŋ diandaa yɛ. Le nɔ mi le wa bandei nɛiyo 37,500, a toŋgei nɛiyo 7,500.+ Le waŋnda Isɔluɛi kpou lɛŋndeŋ ndeŋ le cho wa ni.

7 “‘La nɔ mi la hɛli lɛŋndeŋ o kpeŋguŋ muuŋ ndoŋ o fondaŋ diandaa, a lɛŋnde nya hɛli le chioo leŋ le mi le wa le masaa. Le cho wa o fondaŋ diandaa a lɛŋnde cho le chioo leŋ ikɛi. Le tiŋ le cho wa ba paaleŋ le del lo, mi le tiŋ le wa ba paaleŋ le chaŋ ndo. Lɛŋndeŋ ndeŋ bandii nduɛi, chɔŋ ba paaleŋ le del lo mbo kuɛ ba paaleŋ le chaŋ ndo, le cho wa kpeŋkpeŋ a lɛŋii nda piɔu kaalaŋ nde.+ 8 Lɛŋndeŋ ndeŋ le cho wa nyɛm kɛŋ ndɔŋ o Isɔluɛi niŋ ni. Masaa niaa cho lɛ wa wanaa niaa biyɔɔ wɔɔŋ te,+ nduyɛ a cho waŋnda lɛŋndeŋ ke a mɛɛ kaala ndalaŋ la cho yɛ.’+

9 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Nya masaa Isɔluɛi, la cho niŋ baa hiuwo!’

“‘La pɛŋgi waŋnda biyɔɔ ŋuasu ŋuasu a nda nyɛpalaa tusioo choo, okoŋ mi la tosa nyɛ cho sakpo wo.+ La pɛŋgi nyɛm wanaa niaa poondiaa.’+ Ya Chɛhowa, Mɛlɛka Kpuluŋguma Bɛndoo dimi lende ni. 10 ‘La nɔ mi la soliŋ sekeleila kpeekpei laŋ, ɛfaa,* a bafuiyo* kpeku le nyɔɔŋ tuuwo.+ 11 Teleŋ o teleŋ, ɛfaa a bafuii pilɔɔ kpe nya nɔ ni mi la wa nyɔɔŋ tuuwo. Bafuiyo tɔ kua o hɔmɛiyo* niŋ ni, nduyɛ ɛfaa 10 kua o hɔmɛiyo o pilɛ niŋ ni. Hɔmɛiyo cho wa nyɛ kpeekpeiyo ni le nyɔɔŋ tuuwo. 12 Siɛkɛlle i pilɛ,*+ lusul ndɔɔ wa le kɛlua woŋ 20.* Nduyɛ Siɛkɛlloŋ 60 nɔ mbo wa manɛiye i pilɛ.’*

13 “‘Chuuŋgiaa nya nɔ mi la yɔŋgu wo cho hoo ni: Hɔmɛi kɛ kɛ, la nɔ mi la faŋa witiiyoŋ ɛfaa le yaa a baliiyoŋ ɛfaa le yaa. 14 Chuɛima nda nɔ ma sɔla waŋ, o bafuiyo niŋ nda cho wa maŋ tuuwo ni. Kɔɔ wo o pilɛ,* te a piɔu ndu pɛ sala tɔ, o ke num bafuiyo o pilɛ. Hei sim ni maa bafuiyo tɔ kua o hɔmɛiyo o pilɛ niŋ ni. 15 Nduyɛ o chɔluaa Isɔluɛi tɛɛŋ, la nɔ mi la faŋa saa o pilɛ o saa 200 choo mi la yɔŋgu. Nyɔɔŋ muŋ cho wa le sala ŋkullo,+ sala luamaa kpulukuu wo,+ vɛlɛ a sala kɔl nyuloo,+ le halikpeŋ ma soli salalaŋ le waŋnda malɔɔ haki.’+ Ya Chɛhowa, Mɛlɛka Kpuluŋguma Bɛndoo dimi lende ni.

16 “‘Waŋnda o Isɔluɛi niŋ kpou nɔ ma yɔŋgu masaa chuuŋgiaa hoo.+ 17 Te waŋnda Isɔluɛi wa pɛ bɔŋaŋnda paŋguŋ sɛnɛilaŋ,+ bɔŋaŋ Paale Pɛŋgiaaleŋ,+ vɛlɛ a bɔŋaŋnda yɛ yɛla cheleŋ biyɔɔ,+ masaa nɔ ni mbo yɔŋgu nyɔɔŋ le salalaŋ ndaŋ solioo: salala luamaala kpulukuu laŋ,+ sala ŋkullo,+ vɛlɛ a sala mamuɛiyo. Ndu nɔ mi mbo yɔŋgu nyɔɔŋ le sala hakioo, sala ŋkullo, sala luamaa, a le sala kɔl nyuloo solioo, le halikpeŋ ma soli salalaŋ le mi waŋnda Isɔluɛi sɔla malɔɔ hakioo.’

18 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘O paŋgii tasei niŋ malɔ le pilɛ, la nɔ mi la bii nau piaandu fɔŋndɔ kɛndɛ kɛndɔɔ o nauwaa nyaa tɛɛŋ, mi la soli salaa le chiɛi nuu dindioo.+ 19 Wana soliaa lasalaa nɔ mbo chua kooma chɔlu nya dii le sala hakioo solioo waŋ ma tiŋ,+ mbo sui o keedei choo le luɛiyɔɔ o chiɛi Mɛlɛkaa niŋ. O nɔ vɛlɛ mbo sui maŋ o kpeŋguŋ hiɔɔloŋ, o kandu balu bandu luamaa lasalaa wo, a o keedei dio kpaki cho le luɛiyɔɔ o luŋ cho leniŋ ndo. 20 Hei nya nɔ ni mi la tosa o paale ŋɔmmɛu leŋ choo o paŋgei niŋ, te wana o wana tosa pɛ hakioo mbo ve o sina choo le.+ Nduyɛ, la nɔ mi la soli sala malɔɔ hakioo le chiɛi nuu dindioo.+

21 “‘O paŋgii tasei niŋ malɔ 14, la nɔ mi la bii Bɔŋaŋ Hiouwɔɔ Choo Wo.+ Le palɛi i ŋɔmmɛu, la nɔ mi la wa beedii nɔ yiisii* leniŋ te wo dioo.+ 22 O paale leŋ choo, masaa nɔ ni mbo yɔŋgu nau piaandu fɔŋndɔɔ le sala hakioo solioo le ndupila, vɛlɛ a waŋnda o lɛŋnde Isɔluɛi leŋ niŋ kpou.+ 23 Palɛi ŋɔmmɛu nya cho wa o bɔŋaŋndo choo ve, o paale kɛ kɛ choo, o nɔ mbo yɔŋgu nauwaa piaanduaa kɛndɛ kɛndiaa a ŋɔmmɛu, saa konduaa kɛndɛ kɛndiaa a ŋɔmmɛu,+ le sala luamaa kpulukuu wo solioo o Chɛhowa lo, latulu a chuiŋ piaandoo le sala hakioo solioo. 24 Le nau piaandu fɔŋndɔ kɛ kɛ a saa kondo kɛ kɛ, o nɔ mbo yɔŋgu kpeyaŋndo ɛfaa 11 le sala ŋkullo solioo, latulu a chuɛiyaŋ hiŋndo cha* le ɛfa 11 kɛ kɛ.

25 “‘O paŋgii ŋɔmmɛu ve niŋ malɔ 15, palɛi ŋɔmmɛu nda cho wa bɔŋaŋndo biyɔɔ ve,+ o nɔ mbo yɔŋgu nyɛm pilɔŋ muŋ kpe le sala hakioo, sala luamaa kpulukuu wo, sala ŋkullo, vɛlɛ a chuɛima piliaŋ kpe.’”