Isikiɛɛ

44 Mbo miŋgi ya pila o dio kpaki wa o bɛɛ o chiɛi Mɛlɛkaa ba paaleŋ le chaŋ ndo wo,+ nduyɛ o wa o kindaa.+ 2 Okoŋ mi Chɛhowa dimul la aa: “Dio kpakioo hoo cho wa o kindaa. O nɔ mbo kumbiŋ te, nduyɛ wana o wana nɔ mbo luɛi loŋ te, kanifuule loŋ Chɛhowa, Mɛlɛka Isɔluɛiya keeku ni mbo luɛi.+ Lelaŋ, o nɔ mbo wa o kindaa. 3 Kɛ masaa ndu tiuba mbo huŋ chal o dioo hoo le nyɛdiaa* dioo Chɛhowa lachi,+ kanifuule masaa o cho ni. O cho wa keilaŋ a toŋgo pɔmbɔ dio kpakioo le luɛiyɔɔ, nduyɛ mbo keeku vɛlɛ a loŋ le fulaa.”+

4 Okoŋ, mbo kua a ya o dio kpaki wa ba luaŋ ndo o chiɛi Mɛlɛkaa lachi wo. Mɛɛ ya tofa, mi cha maa naŋɔɔ bɛndu Chɛhowa wo ndoo pɛ niŋ cha o chiɛi Chɛhowa wo niŋ.+ Le hei, mi baŋ wulaŋ mi fuuluu hɔlla lɛŋ mɛɛ.+ 5 Okoŋ mi Chɛhowa dimul la aa: “Po wanachioo, wa yekeŋ* nduyɛ ma yaŋ nilaŋ nyɛkɛndɛi o nyɛ o nyɛ ya cho num dimul a nɛila chɔmaalaŋ vɛlɛ a sawala cho a chiɛi Chɛhowa wo okɔɔ laŋ. Handu kɔllo nyɛkɛndɛi o nɛi cho le luɛiyɔɔ o chiɛi Mɛlɛkaa wo choo,+ vɛlɛ a nɛila cho le fulaa laŋ kpou. 6 A nɔ ma dimul wanaa bolii kalaa Isɔluɛi aa: ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Nya waŋnda Isɔluɛi, la hiou niŋ ba a sɔɔŋ nɔɔlɛiyoŋ tosaa. 7 Mɛɛ nya luei mialaa sɔla hivi chiɛi kɔɔli o kɔlta ndalaŋ niŋ a o dialuŋ ndaŋ niŋ te wa o chiɛi nuu niŋ, ma nɔɔliaa ndu. Mi che bɛɛ mi la ke ya beediiyo, vɛlɛ a chuɛima visioo a kooma nduaŋ, kɛ la cho hiouwɔɔ lachi a kpema nuu tɛɛmbuuwo a sɔɔŋ nɔɔlɛi nya cho tosaa woŋ kpou. 8 La hɛli waŋnda le ma manda nyɛm niŋ diandaŋ te,+ kɛ mi la hɛli waŋnda le ma wa waltaŋ tosaa o chiɛi ni diandaa niŋ.”’

9 “‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Mial kɛ kɛ cho o Isɔluɛi niŋ, te o sɔla hivi chiɛi kɔɔli o kɔllo niŋ a o dialloŋ niŋ te, o nɔ mbo luɛi o chiɛi ni diandaa niŋ te.”’

10 “‘Teleŋ Isɔluɛiya kɛɛ ya ma tual piɔmaa ndaa nɔɔlɛiya* kɔɔli wo, mi Livaiya bɛɛ kɛɛ ya,+ ma tual nda kɔɔli. Livaiyaa kaŋ, a cho nyɛpalaa sɔla le hakila ndalaŋ. 11 A cho wa wallo o fondaŋ ni diandaa. Nda cho wa diola kpakila chiɛi nuu hɔlteŋ ni,+ nduyɛ ma wa wallo tosaa loŋ. Nda cho wa chɔluaa diyɔɔ ni le salala luamaala kpulukuu laŋ solioo, vɛlɛ a salalaŋ solioo le waŋnda. A cho wa isisi waŋnda lachi, ma tosal nda waltaŋ. 12 Le mɛɛ nda tosal nda wallo piɔmaa ndaa nɔɔlɛiya lachi nduyɛ ma simnuŋ pou boŋaa le mi waŋnda Isɔluɛi tosa hakioo yɛ,+ le saboo hoo ya heelul nda baa ni mi mɛnaŋ po. A cho nyɛpalaa sɔla le hakila ndalaŋ.’ Ya Chɛhowa, Mɛlɛka Kpuluŋguma Bɛndoo dimi lende ni. 13 ‘I cho nda chɛlɔɔ ma tosal la wallo maa wanaa soliaa lasalaa le. I cho nda chɛlɔɔ ma sɔɔŋguu nyɛm niŋ diandaŋ ɔɔ nyɛm hiou diondɔɔ woŋ ikɛi le. Siɔmbulaŋ la cho nda biyɔɔ le sɔɔŋ nɔɔlɛi nda tosa woŋ. 14 Walta kɛ kɛ cho wa tosaŋndo o chiɛi nuu niŋ, nda cho wa laŋ hɔlteŋ ni.’+

15 “‘Kɛ puaa Sadɔki wa+ a fula o yuŋgu Livai yo choo wa, ma tosa walta ndalaŋ o chiɛi ni diandaa niŋ nyɛkɛndɛi mɛɛ Isɔluɛiya kɛɛ ya.+ Lelaŋ a cho ya isisi lachi ma tosal la wallo, nduyɛ ma soli chuɛima chɔluaa+ a kooma ndaŋ salaa o ya lo.’+ Ya Chɛhowa, Mɛlɛka Kpuluŋguma Bɛndoo dimi lende ni. 16 ‘Nda cho luɛiyɔɔ o fondaŋ ni diandaa ni, nduyɛ ma sɔɔŋguu tibii* nuu ikɛi ma tosal la wallo.+ Nduyɛ, a cho wa walta ndalaŋ tosaa nyɛkɛndɛi le ya.+

17 “‘A nɔ ma wounuŋ nyɛla kɛndɛ kɛndɛlaŋ, te a wa pɛ luɛiyɔɔ o diola kpakila cho o luŋndo leniŋ ndaŋ.+ Te a wa pɛ wallo o diola kpakila luŋ cho leniŋ ndo, a nɔ ma wounuŋ nyɛla nda toosiaa a yiiŋii saa laŋ te. 18 A nɔ ma yiinuŋ kookola humbula kɛndɛ kɛndɛ laŋ o lebol, nduyɛ ma wounuŋ lɛmbɛla humbula kɛndɛ kɛndɛ laŋ, mi la kumbu nda chaŋnda.+ A nɔ ma wounuŋ nyɛ o nyɛ tosa ma lali le. 19 Te a wa pɛ fulaa o luŋ cho o bɛɛ wo naa waŋnda cho wa, a nɔ ma soli nyɛla nda wa wallo laŋ+ ma kɛsi laŋ o lumuila diandaa laŋ niŋ.+ Okoŋ a wounuŋ nyɛla cheleŋ, yɔŋii nda tɛɛŋguu waŋnda diondɔɔ cho o nyɛla laŋ ndo.* 20 A nɔ ma sendi yiiŋii cho nda o lebol le,+ ɔɔ ma manda ndi mi i bandu tau le. A nɔ ma wa ndi kilioo. 21 Te wanaa soliaa lasalaa wa pɛ luɛiyɔɔ o luŋ cho leniŋ ndo,+ a nɔ ma kol muɛiyaŋ te. 22 A nɔ ma chua wana vii pɔnɔɔ wo ɔɔ wana lanɔ nda kɛɛ wo o nɔɔ niŋ te.+ Kɛ a chua yufuaanɔɔ o Isɔluɛi niŋ o nɔɔ niŋ, ɔɔ wana lanɔ pɔnɔ ndɔ wa wana soliaa lasalaa mbo wu wo.’+

23 “‘A nɔ ma pɛɛku wanaa niaa le ma sina teŋgeŋndo nyɛm diandaŋ tɛɛŋ a nyɛm yɔŋaŋ, nduyɛ ma pɛɛku nda le ma sina teŋgeŋndo nyɛ nɔɔlɛiyo tɛɛŋ a nyɛ diandaa.+ 24 Te isɔɔ del pɛ, nda cho wa wanaa kialaa ŋyamaa ni.+ Yamaŋ nda cho wa kiolɔɔ woŋ nɔ miŋ chɛlaŋ a sawala nilaŋ.+ A nɔ ma bii sawala nilaŋ a nɛila chɔmaala cho a bɔŋaŋnda nilaŋ okɔɔ laŋ kpou,+ nduyɛ ma ke palɛi nii pɛŋgiɛi bɛɛleŋ. 25 A nɔ ma sɔɔŋguu wana vilɛiyo ikɛi le, yɔŋii nda simnuŋ a nɔɔlɛi. Kɛ a tiuba ma simnuŋ a nɔɔlɛi le finyaa ndaa, kalaa ndaa, puaa ndaa, chuauwaa ndaa laanduaa, bɛndaa ndaa ɔɔ pɔmbuaa ndaa, te koŋ te yemaa ndaa chellɔ o lanɔ le wa.+ 26 Te wana soliaa lasalaa sɔla pɛ dindioo, o nɔ mbo chum le palɛi i ŋɔmmɛu. 27 Paale o cho luɛiyɔɔ o fondaŋ diandaa o luŋ cho leniŋ di le wallo tosaa leŋ, o nɔ mbo soli sala hakioo.’+ Ya Chɛhowa, Mɛlɛka Kpuluŋguma Bɛndoo dimi lende ni.

28 “‘La nɔ mi la ke nda nyɛ o nyɛ o Isɔluɛi niŋ te, kanifuule ya cho nyɛm kɛŋ ndaŋ ni.+ 29 Nda cho wa sala ŋkullo, sala hakioo,+ a sala yɔŋ wɔɔŋndo+ dioo ni. Nduyɛ nyɛ o nyɛ cho wa o yɔŋgaŋ o ya lo o Isɔluɛi niŋ, le nda o cho wa ni.+ 30 Tɔlɔɔla nyala tasela kɛndɛ kɛndɛlaŋ vɛlɛ a chuuŋgiaala nyala suu o suu, le wanaa soliaa lasalaa la cho wa ni.+ Nduyɛ, la nɔ mi la yɔŋgu wanaa soliaa lasalaa kpeyaŋ nya toosiaa a kɔmnde nyale taseleŋ ndo.+ Hei cho tosa mi salaa wa yuŋgula nyalaŋ choo.+ 31 Wanaa soliaa lasalaa nɔ ma de you kɛ kɛ, ɔɔ visi nda saaluŋ o vilɛiyo, ɔɔ o visiaa yonduaa sɛɛsiaa wo le.’+