Isikiɛɛ

47 Okoŋ, mbo huŋ a ya o dio wa le luɛiyɔɔ o chiɛi Mɛlɛkaa niŋndo,+ nduyɛ mi cha mɛŋndaŋ hiouwɔɔ loŋ ba paaleŋ le chaŋ ndo o dio chiɛi Mɛlɛkaa bɛŋgu.+ Kanifuule, ba paaleŋ le chaŋ ndo chiɛi Mɛlɛkaa ndoo muli hɔlla ni. Mɛŋndaŋ ma wa fulaa o chiɛi Mɛlɛkaa bɛŋgu o ba kɛndɔɔ choo, o bandu luamaa lasalaa ba tou wo.

2 Mbo keeku a ya o dio kpaki wa ba luaŋ ndo+ wo mbo soli ya o bɛɛ, o dio kpaki wa o bɛɛ wo kɔɔli, o muli hɔlla ba paaleŋ le chaŋ ndo wo.+ Nduyɛ, mi cha mɛŋndaŋ hiouwɔɔ o ba kɛndɔɔ choo.

3 Mɛɛ poo hoo fula o bɛɛ le kɔlaŋ ba paaleŋ le chaŋ ndo a yɔm tuwaa ndu o ba,+ mbo tuu tiŋndo nɛiyo 1,500,* okoŋ mbo tosa mi keeku o mɛŋndaŋ niŋ. Nduyɛ, peluŋ labɛŋgoŋ kinɛi mɛŋndaŋ maŋ maa kumbu ya ni.

4 Okoŋ mbo tuu vɛlɛ tiŋ cheleŋ nɛiyo 1,500, mbo tosa mi chɔɔlu lakɔ o mɛŋndaŋ niŋ, mi ma bii ya o wulaŋ.

Okoŋ kɔɔli, mbo tuu vɛlɛ tiŋ cheleŋ nɛiyo 1,500, mbo tosa mi chɔɔlu lakɔ o mɛŋndaŋ niŋ, mi ma bii ya o chaŋnda.

5 Mɛɛ o tuu vɛlɛ tiŋ cheleŋ nɛiyo 1,500, mi fuuluu o tindileŋ, nduyɛ yaa tiuba mi taŋ te. Kanifuule mɛŋndaŋ maa yiŋgila tau, nduyɛ tindileŋ le wa loŋ, wanaa nɔla ma taŋ a ŋpelu le, mɛɛ ma saana.

6 Mbo nyuna ya aa: “Po wanachioo, a cho pa hei chɔɔ?”

Okoŋ, mbo miŋgi ya o kɔŋgɔ. 7 Mɛɛ ya miiŋgu, mi cha yɔmnde tau o pioo hoo kɔŋgɔlaŋ vellaa velle.+ 8 Mbo dimul la aa: “Mɛŋndaŋ maŋ, ba paaleŋ le chaŋ ndo ma cho kɔlaŋ ni haaa Aluaba,+ mi ma kɔ del o pee mɛŋma ihɛllo choo. Te ma del loŋ pɛ, mɛŋma ihɛllaŋ+ ma cho sioŋgɔɔ. 9 Ba o ba mɛŋndaŋ maŋ* ma wa pɛ, nyaa yoomaa faŋga bɛnduaa cho o peelo wa nɔla ma chal leniŋ. Mɛŋndaŋ maŋ ma cho tosa mi suuwa pɛ o pee mɛŋma ihɛllo niŋ cha. Mɛŋma ihɛllaŋ ma cho sioŋgɔɔ, nduyɛ ba o ba ma wa pɛ, nyaa yoomaa cho wa o maŋ niŋ.

10 “Wanaa yɔɔyaa cho isisi o pee mɛŋma ihɛllo kɔŋgɔ chɔŋ Ɛŋ-kɛdi+ haaa Ɛŋ-ikilim, naa nda wa niŋ yalala yɔɔyaa laŋ tɛiyo wa. Suuwa suu o suu cho wa o pioo hoo niŋ a hɔbɛi, mɛɛ nda cho o Pee Bɛndu Mɛŋma Ihɛllo* niŋ yɛ.+

11 “Pioo hoo huŋnda ndɔlaŋ a pɔlɔŋnda ndɔlaŋ la siŋgu le. Hɛlle cho wa o laŋ niŋ.+

12 “Yɔmii suu o suu wana dia komɔɔla ndɔlaŋ nde cho wulɔɔ o pioo hoo kɔŋgɔla ndɔlaŋ vellaa velle. Yɔmnde hei, pei ndɛi nyamala niŋ te, kɛlɛŋgaa niŋ te mi komɔɔla ndalaŋ la foofi. Ipaŋgu o ipaŋgu i cho wa komɔɔ, kanifuule o chiɛi Mɛlɛkaa mɛŋma i cho wa sɔlaa waŋ ma cho wa fulaa ni.+ Komɔɔla yɔmnde hei cho wa maa nyɛdiaa, nduyɛ mi pei ndɛi wa le siŋgioo.”+

13 Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Lɛŋndeŋ ndeŋ nya cho piɔu kayii 12 o Isɔluɛi niŋ ni mi le wa nyɛm kɛŋ nda. Nduyɛ, Choosɛ nɔ mbo sɔla buŋgaŋ ŋ muuŋ.+ 14 La cho lɛŋndeŋ ndeŋ sɔla, nduyɛ mi la piɔuwaŋ ndeŋ kpeŋkpeŋ. Mi mɛnaŋ po le finyaa nyaa mamaa lɛŋndeŋ ndeŋ kioo,+ nduyɛ suŋ suŋ niŋ la sɔla leŋ maa nyɛm kɛŋ nya.*

15 “Pɛŋgulaŋ le lɛŋndeŋ ndeŋ ba luaŋ ndo la cho laŋ ni: La cho chɔnɔŋ o Pee Bɛndu Mɛŋma ihɛllo, mi la kei Hɛtilɔŋ+ haaa Sɛdadi,+ 16 Hamaati,+ Bɛlɔtai,+ a Sibiluim, o cho tanda Damasikɔɔ wo tɛɛŋ a tanda Hamaati wo wo, haaa Hasɛɛ-hatikɔŋ, o cho o pɛŋgulaŋ Hauluaŋ ndo.+ 17 Pɛŋgulaŋ la cho chɔnɔŋ o pee mɛŋma ihɛllo mbo kuɛ Hasaa-ɛnaŋ,+ mi la keeku o pɛŋgulaŋ Damasikɔɔ ba luaŋ ndo haaa o pɛŋgulaŋ Hamaati.+ Pɛŋgulaŋ ba luaŋ ndo la cho laŋ ni.

18 “Pɛŋgulaŋ ba paaleŋ le chaŋ ndo la cho wa Hauluaŋ tɛɛŋ a Damasikɔɔ, mi la keeku Chɔɔdaŋ, Kiliaadi tɛɛŋ+ a lɛŋnde Isɔluɛi leŋ. La nɔ mi la tuu pɛŋgulaŋ ndaŋ ba luaŋ ndo haaa mbo kɔ bii o pee mɛŋma ihɛllo ba paaleŋ le chaŋ ndo. Pɛŋgulaŋ ba paaleŋ le chaŋ ndo la cho laŋ ni.*

19 “Pɛŋgulaŋ ba tou wo la cho chɔnɔŋ Tamaa, mi la kuɛ o mɛŋndaŋ Mɛluibati-kadɛsi,+ mi la kei o Kpoloŋndo* haaa o Pee Bɛndu Mɛŋma Ihɛllo.+ Pɛŋgulaŋ ba tou wo la cho laŋ ni.

20 “Pɛŋgulaŋ ba paaleŋ le del lo la cho wa Pee Bɛndu Mɛŋma Ihɛllo ni. La cho chɔnɔŋ o pɛŋgulaŋ ba tou wo, mi la kuɛ haaa Lɛbo-Hamaati.*+ Pɛŋgulaŋ ba paaleŋ le del lo la cho laŋ ni.”

21 “La piɔuwaŋ lɛŋndeŋ ndeŋ nyapila tɛɛŋ, kaala 12 o Isɔluɛi niŋ. 22 La nɔ mi la piɔuwaŋ ndeŋ nyapila tɛɛŋ vɛlɛ a wanaa lekaawaa lo nya tɛɛŋ ma vialu chuauwa wa, mi le simnuŋ maa nyɛm kɛŋ nya. Nduyɛ, nda bɛɛ cho wa nya tɛɛŋ maa Isɔluɛiya. Nda bɛɛ nɔ ma sɔla nyɛm kiɔɔŋ kaalaŋ Isɔluɛi tɛɛŋ a nya latulu. 23 Kaale kɛ kɛ nɔ mbo ke mialaa cho nda ichali tɛɛŋ nda lɛŋndeŋ le ndaleŋ o buŋgɛi nda sɔla ve niŋ maa nyɛm ŋkɛ.” Ya Chɛhowa, Mɛlɛka Kpuluŋguma Bɛndoo dimi lende ni.