Isikiɛɛ

48 “Mɛɛ nda piɔu kaalaŋ o Isɔluɛi niŋ lɛŋndeŋ yɛ cho hoo ni, kandɔŋndo ba luaŋ ndo: Kaale Daŋ ndeŋ, buŋgɛi ndɛi+ cho chɔnɔŋ Hɛtilɔŋ, mi i kuɛ Lɛbo-Hamaati,*+ mi i kɔ bɔŋa a Hasaa-ɛnaŋ, haaa o pɛŋgulaŋ Damasikɔɔ ba luaŋ ndo, Hamaati ikɛi.+ Nduyɛ buŋgɛi ndɛi cho timbulaŋ chɔŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. 2 Kaale Asia leŋ+ le cho pɛŋgulaŋ salɔɔ a kaale Daŋ ndeŋ, chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. 3 Kaale Nafitalii leŋ+ le cho pɛŋgulaŋ salɔɔ a kaale Asia leŋ, chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. 4 Kaale Manaasɛ leŋ+ le cho pɛŋgulaŋ salɔɔ a kaale Nafitalii leŋ, chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. 5 Kaale Ifiluem ndeŋ le cho pɛŋgulaŋ salɔɔ a kaale Manaasɛ leŋ,+ chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. 6 Kaale Lubɛŋ ndeŋ le cho pɛŋgulaŋ salɔɔ a kaale Ifiluem ndeŋ,+ chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. 7 Kaale Chuda leŋ le cho pɛŋgulaŋ salɔɔ a kaale Lubɛŋ ndeŋ,+ chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. 8 O pɛŋgula kaale Chuda leŋ, chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo, lɛŋnde nya nɔ mi la yɔŋgu o Mɛlɛka lo leŋ, toŋgii nduɛi nɔ mi i wa nɛiyo 37,500.*+ Nduyɛ lɛŋndeŋ ndeŋ, bandii pilɛi kpe le nɔ ni mi le nɔ a kaala cheleŋ lɛŋii ndɛi, chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. Chiɛi diandaa Mɛlɛkaa nɔ mbo wa tɛɛŋ deŋ.

9 “Lɛŋnde nya nɔ mi la yɔŋgu o Chɛhowa lo leŋ, le nɔ mi le wa bandei nɛiyo 37,500, toŋgei nɛiyo 15,000. 10 Chuuŋgiaa diandaa nya nɔ mi le ke wanaa soliaa lasalaa wo cho hoo ni.+ Lɛŋndeŋ ndeŋ le nɔ mi le wa nɛiyo 37,500 ba luaŋ ndo, ba paaleŋ le del lo nɛiyo 15,000, ba paaleŋ le chaŋ ndo nɛiyo 15,000, nduyɛ ba tou wo nɛiyo 37,500. Chiɛi diandaa Chɛhowa wo nɔ mbo wa tɛɛŋ deŋ. 11 Lɛŋndeŋ ndeŋ le cho wa le wanaa soliaa lasalaa sɔla dindioo, ma fula o yuŋgu Sadɔki wo+ choo wa. Nda tosa walta ndalaŋ nyɛkɛndɛi ni le ya. Nduyɛ mɛɛ Isɔluɛiya a Livaiya kɛɛ ya, a tul nda kɔɔli le.+ 12 A cho buŋgɛi pɔmbɔ sɔla o lɛŋnde nda cho yɔŋgu o Mɛlɛka lo maa nyɛ hiou diondɔɔ kpou wo, le salu pɛŋgulaŋ a Livaiya leŋ.

13 “Buŋgɛi Livaiya cho sɔla ve nɔ mi i wa buŋgɛi wanaa soliaa lasalaa ikɛi. Nduyɛ buŋgɛi hei, bandii nduɛi nɔ mi i wa nɛiyo 37,500, toŋgei nɛiyo 15,000. (Bandii nduɛi kpou nɔ mi i wa nɛiyo 37,500, a toŋgei nɛiyo 15,000.) 14 Buŋgɛi nda cho sɔla ve, a nɔ ma pisi, ma siŋga, ɔɔ ma ke wana cheleŋ te. Kanifuule, nyɛ cho o diandaa Chɛhowa o hɔl lo i cho ni.

15 “Fondaŋ cho lo wo nɔ mbo wa le mi chioo soliŋ ndu kpeku+ le chiɛilaŋ taŋgullo, a le chɔluaa diolaŋ. Toŋgii nduɛi nɔ mi wa nɛiyo 7,500, bandei nɛiyo 37,500. Nduyɛ, o fondaa hoo tɛɛŋ deŋ chioo nɔ ni mbo wa.+ 16 Mɛɛ nda nɔ ma tuu chioo hoo yɛ cho hoo ni: O pɛŋgulaŋ ba luaŋ ndo nɛiyo 6,750, o pɛŋgulaŋ ba tou wo nɛiyo 6,750, o pɛŋgulaŋ ba paaleŋ le chaŋ ndo nɛiyo 6,750, nduyɛ o pɛŋgulaŋ ba paaleŋ le del lo nɛiyo 6,750. 17 Fondaŋ nda cho mɛi le mi chɔluaa wa diolaŋ ndo nɔ mbo wa nɛiyo 375 ba luaŋ ndo, ba tou wo nɛiyo 375, ba paaleŋ le chaŋ ndo nɛiyo 375, nduyɛ ba paaleŋ le del lo nɛiyo 375.

18 “Fondaŋ cho lo wo, bandii nduɛi nɔ mi i wa nyɛ pilɛ a lɛŋnde nya cho yɔŋgu o Mɛlɛka lo maa toolu cho o diandaa wo.+ Ba paaleŋ le chaŋ ndo nɛiyo 15,000, nduyɛ ba paaleŋ le del lo nɛiyo 15,000. Le nɔ mi le wa nyɛ pilɛ a lɛŋnde nya cho yɔŋgu maa toolu cho o diandaa wo. Nduyɛ, loŋ nyɛdiaa cho wa fulaa ni le wanaa walla o chioo hoo niŋ. 19 Wanaa cho wa wallo le chioo fulaa o kaalaŋ Isɔluɛi niŋ kpou wa, nda cho wa waltaŋ tosaa lechoo ni.+

20 “Lɛŋnde nya cho yɔŋgu o Mɛlɛka lo maa toolu diandaa leŋ, latulu a lɛŋnde nya hɛli le chioo leŋ, kpeŋguŋ hiɔɔloŋ kpou nɔ miŋ wa kpeŋkpeŋ. Ŋ nɔ miŋ wa nɛiyo 37,500.

21 “Te la faŋa pɛ lɛŋnde cho le Mɛlɛka maa toolu diandaa leŋ vɛlɛ a le cho le chioo leŋ, buŋgaŋ cho lo o kpeŋgoŋ vellaa velle woŋ, masaa nɔ muŋ ni.+ Lɛŋnde nda cho yɔŋgu tooloo o Mɛlɛka lo mi le wa nɛiyo 37,500 ba luaŋ ndo a ba tou wo leŋ, o lɛŋnde leŋ pɛŋgula ndɔlaŋ ikɛi kpeekpei buŋgaŋ muŋ cho wa ni. Ŋ nɔ miŋ wa nyɛ pilɛ a buŋgaŋ cho wa muŋ ikɛi yoŋ, nduyɛ le masaa ŋ cho wa ni. O buŋgaŋ muŋ tɛɛŋ toolu diandaa cho le Mɛlɛka wo vɛlɛ a chiɛi diandaa Mɛlɛkaa nɔ ni mbo wa.

22 “Buŋgɛi Livaiya a buŋgɛi nda cho faŋa le chioo ve, o buŋgaŋ masaa cho sɔla woŋ tɛɛŋ ŋ cho wa ni. Buŋgɛi masaa cho sɔla ve nɔ mi i wa buŋgɛi Chuda ve+ tɛɛŋ a Bɛŋjamiŋ.

23 “Le kaala tɔ la cho lo laŋ, buŋgɛi Bɛŋjamiŋ nde cho kandɔŋ chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo.+ 24 Kaale Simiɔŋ ndeŋ le cho pɛŋgulaŋ salɔɔ a kaale Bɛŋjamiŋ ndeŋ,+ chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. 25 Kaale Isaka leŋ+ le cho pɛŋgulaŋ salɔɔ a kaale Simiɔŋ ndeŋ, chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. 26 Kaale Sɛbulɔŋ ndeŋ le cho pɛŋgulaŋ salɔɔ a kaale Isaka leŋ,+ chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo.+ 27 Kaale Kaadi leŋ le cho pɛŋgulaŋ salɔɔ a kaale Sɛbulɔŋ ndeŋ,+ chɔŋ o pɛŋgulaŋ ba paaleŋ le chaŋ ndo, mbo kɔ bii o pɛŋgulaŋ ba paaleŋ le del lo. 28 Pɛŋgula buŋgɛi Kaadi ve ba tou wo la cho chɔnɔŋ Tamaa,+ mi la kuɛ o peelaŋ Mɛluibati-kadɛsi,+ mi la kei o Kpoloŋndo,*+ haaa o Pee Bɛndu Mɛŋma Ihɛllo.*

29 “Lɛŋndeŋ ndeŋ nya nɔ ni mi la piɔu kaalaŋ Isɔluɛi mi le wa nyɛm kɛŋ nda,+ nduyɛ o leŋ choo nda cho buŋgaŋ sɔla ni.”+ Ya Chɛhowa, Mɛlɛka Kpuluŋguma Bɛndoo dimi lende ni.

30 “Diola cho wa le luɛiyɔɔ chiee a le fulaa laŋ la cho wa laŋ ni: Kpeŋgii ba luaŋ nde nɔ mi i wa nɛiyo 6,750.+

31 “A mɛɛ kaalaŋ Isɔluɛi nɔ diolaŋ yɛ nda cho wa diola kpakilaŋ veeloo ni. Diola kpakila yaala cho ba luaŋ ndo laŋ, o pilɛ cho wa le Lubɛŋ, o pilɛ le Chuda, nduyɛ o pilɛ le Livai.

32 “Kpeŋgii ba paaleŋ le chaŋ ndo nɔ mbo wa bandei nɛiyo 6,750, nduyɛ diola kpakilaŋ la yaa la cho wa loŋ ni. O pilɛ le Choosɛ, o pilɛ le Bɛŋjamiŋ, nduyɛ o pilɛ le Daŋ.

33 “Kpeŋgii ba tou ve nɔ mbo wa nɛiyo 6,750, a diola kpakilaŋ la yaa. O pilɛ le Simiɔŋ, o pilɛ le Isaka, nduyɛ o pilɛ le Sɛbulɔŋ.

34 “Kpeŋgii ba paaleŋ le del lo nɔ mbo wa nɛiyo 6,750, a diola kpakilaŋ la yaa. O pilɛ le Kaadi, o pilɛ le Asia, o pilɛ le Nafitalii.

35 “Kpaki cho chioo balɔɔ silɔ wo, bandii nduɛi kpou kpou nɔ mi i wa nɛiyo 27,000. Nduyɛ chɔŋ o paale leŋ choo mbo kuɛ kɛ, chioo hoo nda cho wa veeloo ni aa Chɛhowa Cho Loŋ.”+