Daaniɛɛ

3 Mi Masaa Nɛbukanɛɛsa toosiaa piɔm ŋkooliiyo bandei nɛiyo 90,* nduyɛ toŋgei nɛiyo 9.* Mbo simi ndu o lɛŋnde dɛŋgbɛleŋ niŋ Dulua, o tanda Babilɔŋ ndo niŋ. 2 Mi Masaa Nɛbukanɛɛsa yɔŋ diomndeŋ le mi wanaa wa hɔlte masaa wa, wanaa bɛnduaa, masaa ŋbuŋgaa, wanaa silaa, wanaa kɛsi nyɛsɔlaa wa, wanaa kialaa ŋyamaa, waŋ bɛnduaa polisiiya, a wanaa wa sɔɔŋ lemasaŋ chilaŋ o tandalaŋ niŋnda kpou chuuŋgiaŋ naapilɛ, le ma yɔŋgu piɔm Masaa Nɛbukanɛɛsa simi hoo wo o lɛŋndeŋ ndo.

3 Okoŋ mi wanaa wa hɔlte masaa wa, wanaa bɛnduaa, masaa ŋbuŋgaa, wanaa silaa, wanaa kɛsi nyɛsɔlaa wa, wanaa kialaa ŋyamaa, waŋ bɛnduaa polisiiya, a wanaa wa sɔɔŋ lemasaŋ chilaŋ o tandalaŋ niŋnda kpou chuuŋgiaŋ naapilɛ, le ma yɔŋgu piɔm Masaa Nɛbukanɛɛsa simi hoo wo o lɛŋndeŋ ndo. Nduyɛ, ma sim piɔm Nɛbukanɛɛsa simi hoo wo lachi. 4 Mi wana yondaa dimi choo choo kpeleŋ aa: “Nya waŋnda kpou, kaayii yɛ yɛi, vɛlɛ a kundala sɔɔŋ maŋgalaŋ yɛ yiɔɔŋ, masaa dimi maa, 5 te la tuei dɔɔ pɛ mi buloo soo, sɛŋndeŋ, towala bɛndulaŋ, towala pɔmbɔlaŋ, nyɛm chaaŋ iyooŋ, sɛŋnde bɔlɔ leŋ, a nyɛm chaaŋ suu o suu cheleŋ, la nɔ mi la baŋ wulaŋ, okoŋ mi la sooluu piɔm ŋkoolii Masaa Nɛbukanɛɛsa simi hoo wo. 6 Wana o wana beŋ wulaŋ mbo sooluu ndu le, a cho ndu wou o yiŋnde tondole bɛnduleŋ niŋ o lepilɛ niŋ kpe.”+ 7 Okoŋ, mɛɛ waŋnda kpou tuei mi buloo suaa, sɛŋndeŋ, towala bɛndulaŋ, towala pɔmbɔlaŋ, nyɛm chaaŋ iyooŋ, a nyɛm chaaŋ suu o suu cheleŋ, mi waŋnda kpou, kaayii yɛ yɛi, vɛlɛ a kundala sɔɔŋ maŋgalaŋ yɛ yiɔɔŋ baŋ wulaŋ, ma sooluu piɔm ŋkoolii Masaa Nɛbukanɛɛsa simi wo.

8 A teleŋ koŋ, mi Kaadiaŋnda apum kua naa masaa chua, ma kɔ chɔɔmuu Chuuwa. 9 Ma dimul Masaa Nɛbukanɛɛsa aa: “Oo fallo masaa, maa viou naa choo fɔ! 10 Oo fallo masaa, num dimi ni maa wana o wana tuei pɛ mi buloo soo, sɛŋndeŋ, towala bɛndulaŋ, towala pɔmbɔlaŋ, nyɛm chaaŋ iyooŋ, sɛŋnde bɔlɔ leŋ, a nyɛm chaaŋ suu o suu cheleŋ, o nɔ mbo baŋ wulaŋ, mbo sooluu piɔm ŋkooliiyo hoo. 11 Nduyɛ maa wana o wana beŋ wulaŋ mbo sooluu ndu le, a cho ndu wou o yiŋnde tondole bɛnduleŋ niŋ.+ 12 Kɛ Siɛduaa, Misiaki, a Abɛniko,+ Chuuwaa ŋ yulu iso le ma wa masaa o tanda Babilɔŋ ndo niŋnda, a kɛɛ le num diikɔŋndo kpooŋ fallo masaa. A cho mɛlɛkaa numnda sooluu le, nduyɛ piɔm ŋkoolii ŋ simi hoo wo bɛɛ, a kɛɛ le ndu sooluuwo.”

13 Mi Nɛbukanɛɛsa tuulu kɔl ŋama ŋama. Mbo dimi maa a huŋ a Siɛduaa, Misiaki, a Abɛniko naa ndu chua. Okoŋ, ma huŋ a nda o masaa lo. 14 Mi Nɛbukanɛɛsa nyuna nda aa: “Siɛduaa, Misiaki, a Abɛniko, tonya kpeekpei i cho ni maa la kɛɛ le mɛlɛkaa niaa sooluuwo,+ nduyɛ maa piɔm ŋkoolii ya simi wo bɛɛ laa kɛɛ le ndu sooluuwo? 15 Te la tuei niŋ dɔɔ pɛ mi buloo soo, sɛŋndeŋ, towala bɛndulaŋ, towala pɔmbɔlaŋ, nyɛm chaaŋ iyooŋ, sɛŋnde bɔlɔ leŋ, a nyɛm chaaŋ suu o suu cheleŋ, okoŋ mi la chɛl le wulaŋ baŋɔɔ mi la sooluu piɔm ya toosiaa hoo wo, mɛɛ nyɔɔ bɛnda. Kɛ te la kɛɛ pɛ le ndu sooluuwo, a cho nya viouwɔɔ o yiŋnde tondole bɛnduleŋ ndeŋ niŋ o lepilɛ niŋ kpe. Mɛlɛka kuɛɛnɛ cho yɛ o nɔla mbo piŋi nya ya o ba wo?”+

16 Mi Siɛduaa, Misiaki, a Abɛniko mulul masaa aa: “Oo Nɛbukanɛɛsa, ŋ nɔ sabu o sabu le num mulullo o suɛi hei niŋ te. 17 Te lende i nɔ le waa ni fallo masaa, Mɛlɛka naa naŋ cho piɛiyo wo nɔla mbo piŋi naa o yiŋnde tondole bɛndule leŋ niŋ, nduyɛ mbo piŋi naa num o ba.+ 18 Kɛ mbo piŋi naa bɛɛ le fallo masaa, ŋ yeema num ma sina maa ŋ cho mɛlɛkaa numnda biilu, ɔɔ miŋ sooluu piɔm ŋkoolii ŋ simi hoo wo le.”+

19 Okoŋ, mi Nɛbukanɛɛsa tuulu kɔl ŋama ŋama a Siɛduaa, Misiaki, a Abɛniko, nduyɛ mi hɔlaa nduaa kpou siŋgaŋ.* Mbo dimi le ma kɔ tuulu tondo leyiŋndo, mbo tuulu mbo hiou maa paandu bɛmbɔɔ le ŋɔmmɛu. 20 Mbo dimul puaa kpaayaa bɛnduaa o puaa nduaa chɔuwa tɛɛŋ le ma yii Siɛduaa, Misiaki, a Abɛniko, okoŋ ma wou nda o yiŋnde tondole bɛndule leŋ niŋ.

21 Nduyɛ a wa a domala ndala bɛndulaŋ lekɔɔ, domala lebɛŋgu laŋ, mɔsilta ndalaŋ, a nyɛla chuɛɛnaŋnda cheleŋ, ma yii nda poŋ, ma wuu nda o yiŋnde tondole bɛndule leŋ niŋ. 22 Le mɛɛ masaa ndoo tuulu kɔl nduyɛ mbo dimi le ma chɔɔlu tondo leyiŋndo tuulu yɛ, wanaa chua Siɛduaa, Misiaki, a Abɛniko wa kinɛi haŋgul leyiŋ koŋ dii ni. 23 Kɛ laŋgbaa yaa wa haa, Siɛduaa, Misiaki, a Abɛniko, a lo a yiyaa lende ma del o tondo leyiŋ bɛndoo hoo niŋ.

24 Mi siooŋii bɛnduei bii Masaa Nɛbukanɛɛsa, mbo chaŋ o lepilɛ niŋ kpe, mbo nyuna laŋgbaa nduaa kalla aa: “Puaa a yaa le naŋ yii miŋ wuu o yiŋndeŋ niŋ te?” Ma mulul masaa aa: “Ei, fallo masaa.” 25 Mi masaa dimi aa: “Kɛ la tofawɔ! I cho chɔɔ wanaa hiɔɔlu balɔɔ o yiŋndeŋ niŋ a cho a yiyaa le, nduyɛ nyɛ o nyɛ yɔŋnuŋ nda le. Wana hiɔɔlu ndɔɔ cho ko maa po mɛlɛkaa.”

26 Mi Nɛbukanɛɛsa sɔɔŋguu o dio tondo leyiŋndo ikɛi, mbo dimi aa: “Siɛduaa, Misiaki, a Abɛniko, nya buɛiyaa Mɛlɛka Hiou Kpou Wo,+ la fula mi la hiŋ nanuŋ!” Okoŋ mi Siɛduaa, Misiaki, a Abɛniko fula o yiŋndeŋ niŋ. 27 Mi wanaa wa hɔlte masaa wa, wanaa bɛnduaa, masaa ŋbuŋgaa, a laŋgbaa kalaa masaa, a wa a chuuŋgiaŋ loŋ nda+ cha maa yiŋndeŋ le tosal puaa haa nyɛ o nyɛ le.+ Yiiŋndeŋ le pilɛ bɛɛ le ŋue nda o lebol te, nyɛla ndalaŋ bɛɛ la ŋue le, nduyɛ chuŋ ikumndo bɛɛ ve nda lekɔɔ le.

28 Mi Nɛbukanɛɛsa dimi aa: “Saŋgalaa cho le Mɛlɛka Siɛduaa, Misiaki, a Abɛniko+ wo, o yɔŋ maalikɛinɔ ndɔɔ mbo piŋi buɛiyaa nduaa wo. Kanifuule ma duau tiindaŋndo o ndu niŋ, ma kɛɛ le nyɛ masaa dimi wo diikɔŋndo. A wa a yɔŋgaŋ wulee le piɔmndo sɔlaa,* yɔŋii nda piɛi mɛlɛka o mɛlɛka cheleŋ o Mɛlɛka ndaa kɔɔli.+ 29 Lelaŋ I cho hau sawaa dɔwɔɔ maa wana o wana, lekaa o lekaa, ɔɔ kunda isɔɔ o isɔɔ maŋgalaa dimi pɛ suɛi o suɛi wɔɔŋ a Mɛlɛka Siɛduaa, Misiaki, a Abɛniko wo okɔɔ, a cho ndu kili kili vee vee, nduyɛ ma siiŋguu chiɛi ndɔɔ naa kuaa yondo niŋnda* le wana o wana. Kanifuule, mɛlɛka o mɛlɛka cheleŋ cho mbo nɔla wana piŋi maa Mɛlɛka ndaa le.”+

30 Mi masaa chɔɔlu Siɛduaa, Misiaki, a Abɛniko foofolaŋ ke o tanda Babilɔŋ ndo niŋ.+