Nahum
1 Yooŋgoo a Ninivɛɛ okɔɔ:+ Yauwo hoo soo a yilaŋii Nahum,* wana waa Ɛlikɔɔsi che ve okɔɔ:
2 Mɛlɛka yeema miŋ piɛi ndu ndupilɛ kpe wo Chɛhowa cho ni.+ Nduyɛ, mbo miŋgi maa.
Mi Chɛhowa miŋgi maa, nduyɛ o cho o bɛɛndiaŋ le tumboo dɔɔnɔŋndo.+
Mi Chɛhowa miŋgul yaamɔɔwaa nduaa maa,
Nduyɛ tumbe o duaunuŋ a nda wo o pɔlul te.
3 Chɛhowa doonuŋ tumbe chɔ chɔ le,+ nduyɛ o nɔ kpaayaa tau.+
Kɛ a koŋ kpou, mi Chɛhowa tusi wanaa dɛnɛ wɔɔŋnda nyɛpalaa nda nɔ le sɔlaa wo choo.+
Te o wa kɔlaŋ pɛ, hueiyii mɛli kpundɛlaŋ nde hɔŋ ni.
Yumbu yumboo chaŋ o peluŋ ndɔŋ bɛŋgu ni maa chundu.+
4 Mbo kpaa pee mɛŋma ihɛllo,+ nduyɛ mbo tosa mi ma vela.
Mbo tosa vɛlɛ mi peela pɔmbɔlaŋ kpou la vela.+
Mi bil puiyaa Baasiaŋ a hoo o pembii Kamɛlle choo vesa.+
Nduyɛ, mi bil lapeeŋge cho Lebanɔŋ ndo bɛɛ vesa.
5 Mi pembuŋ bɛndoŋ kpou nyiiya le ndu,
Okoŋ, mi pembuŋ pɔmbɔŋ teŋga.+
Chieeŋndo cho hunɔɔ hiilɔŋ woku woku ndu lachi,
Mi lɛŋndeŋ a wanaa cho leniŋ nda bɛɛ kpou hiiluŋ.+
6 Te o dɔɔnuŋ pɛ tumbe, o nɛɛnɛ nɔla yɛ mbo sim?+
Te kɔllo ŋol ndu niŋ pɛ a tumboo, o nɛɛnɛ bii yɛ kɔllo mbo sim?+
Tumbe ndɔɔ cho wa mɛɛ yiŋndeŋ le sandu nuaa wule wule yɛ,
Nduyɛ poutaŋ bɛɛ la cho tɛɛndiaa ndu lachi.
7 Chɛhowa cho Mɛlɛka kɛndɛ.+ Ndu cho fondaŋ wana viaŋnuŋ a teleŋ kpundɔɔ wo ni.+
Wana o wana nyaanuŋ pɛ o ndu lo le vioŋnɔŋndo, mandaa o manda ndu ni.+
8 Mɛlɛka cho hunɔɔ Ninivɛɛ* tɛɛmbuu, mbo basu ndu tɛɛ a mɛŋma koŋgi bɛnduaŋ.
Nduyɛ mi nyumndaŋ ma tol kpiŋgbi le yaamɔɔwaa Mɛlɛkaa.
9 Baa la nɔla pa mi la yeŋ Chɛhowa yaŋɔɔleŋ?
O cho nya tɛɛmbuu, mbo basu nya tɛɛ.
Le pilɛ kpe o cho ndi tosa ni, o peelu le diiŋ te.+
10 Waŋnda Ninivɛɛ cho ko mɛɛ bɔɔ ŋyɔɔ cho nuaa yɛ.
A cho ko maa wanaa muɛiyaŋ* ma bii ya.
Kɛ nduyɛ, a cho hunɔɔ tambei sɔla mɛɛ yiŋndeŋ le luam nuaa bil vesɛiyo yɛ.
11 Waŋndo cho chɔnɔŋ o nya lo mbo tuunuŋ sɔɔŋ wɔɔŋndoŋ o kɔl le Chɛhowa,
Mbo yɔŋgu silala wɔɔŋndaŋ.
12 Nyɛ Chɛhowa dimi wo cho hoo ni:
“Mi che bɛɛ a cho wanaa kpaaya bɛndu nduyɛ ma wa faŋga,
Kɛ a cho hunɔɔ tambei sɔla, okoŋ ma hiou fokpi.*
Nya waŋnda Chuda, nyɛpalaa ya tusi nya choo wo, fɛɛŋ bɛɛ I tusi lɛ niŋ ndu nya choo le.
14 Nyɛ Chɛhowa dimi a Asiiliaa okɔɔ wo cho hoo ni,
‘I cho hunɔɔ tosa mi diola numndaŋ la nyum pɔli.
Piɔmaa iyɔm nda a piɔmaa ichiliŋ* cho o maaŋnda mɛlɛkaa numnda niŋnda, I cho nda tɛɛmbuu.
I cho sɛiyo touwɔɔ le num, kanifuule nyɛ fondoo fuu ŋ cho ni.’
15 Waŋnda Chuda, mi che waŋndo hunɔɔ o pembuŋ bɛndoŋ choo a yooŋgu kɛndɔɔ,
Wana cho yondaa a kɔl nyuloo okɔɔ wo.+
La chɔŋ mi la bii bɔŋaŋnda nyalaŋ a kɔl kɛndɛ,+ nduyɛ mi la peelu buŋgaŋ nya chua woŋ.
Kanifuule, fɛɛŋ bɛɛ nyɛ fondo koŋ keeku lɛ o lɛŋnde nyaleŋ niŋ te.
O cho tambii fafɛɛŋnde sɔla.”