Nahum
2 Nya waŋnda Ninivɛɛ, wana puusiaa waŋnda wo hiŋ le nya chiŋalaŋndo.+
La manda fondaŋnda kala kalala nya taŋgul taŋ.
La wa mɛŋgɛlaa o nɛi.
La chɔŋ mi la sim,* nduyɛ mi la bɛɛndiaŋ nyɛkɛndɛi le chɔuwo.
2 Chɛhowa cho tosa mi Chekɔpu fula vɛlɛ tɔɔ,
Okoŋ, mi Isɔluɛi bɛɛ fula tɔɔ.
Kanifuule, yaamɔɔwaa ndaa tusi nda dɛnɛ palaa choo,+
Nduyɛ ma tɛɛmbuu lɛuwuŋ tɔlɔɔla ndalaŋ.
3 Boola bɛndula manda puaa nduaa kpaaya bɛnduaa laŋ, la siaŋa la cho ni.
Kuubaa nduaa chɔuwa bɛɛ, nyɛla siaŋa laŋ la cho nda lekɔɔ ni.
Chiliŋuŋ cho o nyɛm ndɔŋ nyaanaŋ suaa naŋndoŋ cho wa iyeleŋgi yeleŋgiei maa leyiŋ,
O paale o cho bɛɛndiaŋ le chɔuwo leŋ choo.
Nduyɛ, mi puaa nduaa wa kɔlaŋ a baltaŋ* hiŋndo o kɔŋgaŋ bɛndoo niŋ.
4 Nyɛm nyaanaŋ suaa naŋndoŋ cho kiltaŋ kpeekpei o nɛilaŋ choo.
Ŋ cho heeloo a tuusoo o luŋnda bɛndaŋ.
Ŋ cho paŋgeloo yɔŋgoo maa leyiŋ, miŋ wa wolioo naŋ chaa nyɛ ŋualalɛi ŋualalɛiyo ni.
5 O* cho hunɔɔ kuubaa nduaa dialuŋ kalaa chuuŋgiaa.
Kɛ te a wa pɛ kɔlaŋ, a cho wa deli delioo o nɛi.
A cho nyaanɔŋ ma kuɛ o kpaki chioo.
Okoŋ, ma kɔ hau nɛiyo.
6 Diola kpakila cho o peelaŋ ndaŋ la cho kumbiŋ,
Nduyɛ mi chiɛi lemasaa piɔl.
7 A chii ndu yamɛi kilul: A yuŋga chuaa hoo* mbo lo fondo.
A bii ndu ma kua a ndu, mi buɛiyaa nduaa laanduaa wa mɔnɛi biyɔɔ.
A bii kɔmɔŋ* ma wa chaŋndo mɛɛ kaŋgbuaa chaŋ yɛ.
8 Kani masindɛ, Ninivɛɛ+ wa ko maa mɛŋma nda kanda o sooŋndo niŋndaŋ.
Kɛ suŋ suŋ niŋ, wanaa cho loŋ nda piɔl ma wa nyaanɔŋndo.
A cho nda yondaa amakɔɔ aa: “La sim! La sim!”
Kɛ wana pilɛ bɛɛ cho muliŋ te.+
9 La puŋga kaniŋ humboŋ, la puŋga kooliiyoŋ!
Nyɛm baa kalaŋ cho o chioo hoo niŋndoŋ ŋ chuu le.
Nyɛm kɛndɛŋ suu o suu ko cho ŋ piaa leniŋ cha.
10 Chioo hoo lo fondo. A tɛɛmbuu ndu mbo lo pɔm!+
Kɔltaŋ la laasiaŋ waŋnda a siooŋnde. Wulaŋ la cho nda nyiiyaa pia pia. Nduyɛ chaŋnda vi nda pɛ pɛ.
Nda kpou hɔlla siŋgaŋ nda.
11 Kuɛɛnɛ bɛmɛlta kpɔkuŋnda* la cho yɛ niŋ?+ Loŋ kpɔkuŋaa fɔŋnduaa ndaa dia nyɛdiaa ni.
Loŋ kpɔkuŋ piaandoo ndoo kua a chuauwaa nduaa ni,
Wana o wana ndoo luei nda isiooŋ te.
12 Mi kpɔkuŋ piaandoo hoo ndoo bii visiaa tau mbo sɛɛsiaa nda le chuauwaa nduaa,
A le kpɔkuŋaa laanduaa.
Teleŋ o teleŋ visiaa o bii le dioo wa, a wa a piaa cha o buulu ndɔɔ niŋ.
Nduyɛ, visiaa o sɛɛsiaa wa ndaa chuu o bɛmɛlta ndɔlaŋ niŋ te.
13 Chɛhowa, Mɛlɛka puaa chɔuwa* dimi aa, “I tul num leyɛ, Ninivɛɛ!+
I cho nyɛm num nyaanaŋ suaa naŋndoŋ malɔɔ o yiŋ miŋ ŋuɛ.+
Okoŋ, mi diu diu kpɔkuŋaa num aa fɔŋnduaa a muɛi faŋnde.
Visiaa num aa bii kaŋ nda, fɛɛŋ bɛɛ a sɔla lɛ niŋ nda o lɛŋndeŋ choo le.
Nduyɛ, fɛɛŋ bɛɛ wana tuii lɛ niŋ kiilaa chuu num yooŋgulaŋ nda diom te.”+