Luku

20 Paale pilɛ, Chiisu wa waŋnda pɛɛkoo a nda yooŋgu kɛndɔɔ dimullo o chiɛi Mɛlɛkaa niŋ, mi masaa wanaa soliaa lasalaa, wanaa pɛɛku waŋnda sawala Mɛlɛkalaŋ nda, a laŋgbaa kalla huŋ naa ndu chua. 2 Ma nyuna ndu aa: “Dimullɔ naa, a kpaaya nɛɛnɛ ŋ cho yɛ sɔɔŋ muŋ tosaa? Nɛɛnɛ ke yɛ num kpaayaa hoo?”+ 3 Mbo mulul nda aa: “Ya bɛɛ I cho nya nyuna, mi la mulul la: 4 Nɛɛnɛ ndoo vem yɛ Chɔŋ le waŋnda yiŋɔɔ? Mɛlɛka ɔɔ waŋnda chieeya?” 5 Okoŋ ma kandu suukaŋndo ndapila tɛɛŋ aa: “Te ŋ dimi pɛ aa, ‘Mɛlɛka,’ o cho dimi aa, ‘Mɛɛ le yɛɛnɛ la laalaŋ a nyɛ o wa nya dimullo wo le?’ 6 Kɛ te ŋ dimi pɛ aa, ‘Waŋnda chieeya,’ waŋnda kpou cho naa vii vii a poutaŋ, kanifuule a laalaŋ kɛsɛ maa wana ndoo suaa le Mɛlɛka wo Chɔŋ wa ni.”+ 7 Okoŋ ma muli maa a sina wana vem ndu wo le. 8 Mi Chiisu bɛɛ dimul nda aa: “Mɛɛ ya bɛɛ I cho nya chɔm wana ke ya kpaayaa le sɔɔŋ muŋ tosaa wo le.”

9 Okoŋ, mbo kandu waŋnda taloo hoo dimullo aa: “Po pilɛ wa ni, mbo tual kilepiiyaŋ o kpeloo niŋ,+ nduyɛ mbo ke waŋnda le ma koma mandal ndu kpele ndɔɔ, okoŋ mbo kuaŋnuŋ o lɛŋnde cheleŋ niŋ le teleŋ vilɛi.+ 10 Mɛɛ boondei fuuluu le tɔlɔɔ kendioo, mbo viam buɛi ndɔɔ naa waŋnda haa chua le ma ke ndu kilepiiyaŋ ma nduaŋ. Kɛ, mi waŋnda haa bii buɛiyo hoo ma luaa ndu, okoŋ ma miŋgi ndu bala fondo.+ 11 Mbo viam vɛlɛ buɛi cheleŋ. Ndu bɛɛ ma bii ndu ma luaa ndu, nduyɛ ma tɛɛmbuu ndu labɛɛ. Ma miŋgi ndu bala fondo. 12 Mbo viam vɛlɛ o yaa ndɔɔ. Ndu bɛɛ ma bii ndu ma booluu ndu, okoŋ ma soli ndu o kpeloo niŋ. 13 Mi wana kpeloo dimi aa, ‘Vɛɛ ya cho yɛ hei biyɔɔ? I cho Po ni kaalaa viomɔɔ naa nda chua.+ Naapum a cho ndu bɛɛleŋ ke.’ 14 Mɛɛ waŋnda haa che po ndɔɔ, ma dimulaŋ aa, ‘Hoo cho hunɔɔ nyɛm kiɔɔŋ loo ni. La ŋ diinuŋ ndu mi nyɛm kiɔɔŋ lo le naa.’ 15 Ma soli ndu o kpeloo niŋ, ma kɔ dii ndu.+ Yɛɛnɛ wana kpeloo cho yɛ tosa a wanaa kaŋ? 16 O cho nda hunɔɔ diu diu kpou, okoŋ mbo chua kpele ndɔɔ, mbo ke wanaa cheleŋ.”

Mɛɛ nda tuei hei, ma dimi aa: “Maa keŋ yɔŋnuŋ bɛɛ le fɔ!” 17 Kɛ mi Chiisu tofa nda chiŋ mbo dimi aa: “Yɛɛnɛ diomnda cho laŋ la poonyiaalaŋ la sim yɛ: ‘Pou wanaa taŋgulaa kɛɛ wo, ndu simnuŋ pou kpeekpei saa taŋgullo wo ni’?+ 18 Wana o wana del o pouwo hoo choo pɛ, wana koŋ yomi yomi.+ Nduyɛ wana o wana pouwo hoo del choo pɛ, o pesi ndu wɔ wɔ.”

19 Le hei, mi wanaa pɛɛku waŋnda sawala Mɛlɛkalaŋ nda, a masaa wanaa soliaa lasalaa kindiŋ le ndu biyɔɔ o foofo loŋ. Kanifuule, ma sina maa le nda o dimi taloo hoo ni, kɛ ma wo faŋgaa.+ 20 Ma saa ndu niko mɛŋgɛlaa. Le hei, ma hiau ŋwaŋ kɔɔli le ma tosa maa a cho wanaa sakpo, le halikpeŋ ma bii ndu a nyɛ o wa dimi wo,+ okoŋ mi ndaa kɔ loli ndu o masaleŋ a o wanaa bɛnduaa lo. 21 Ma nyuna ndu aa: “Wana Pɛɛkaa, ŋ sina maa nyɛ ŋ suaa wo a nyɛ ŋ pɛɛku wo tonyaa o cho ni. A cho wana hɛliaa le, nduyɛ tonya cho a Mɛlɛka okɔɔ wo ŋ pɛɛku waŋnda ni: 22 Baa o bɛnda pa miŋ mal paawaa* le Siisa* ɔɔ o bɛnda le?” 23 Kɛ mɛɛ o sina yiyaŋnda ndala wɔɔŋndaŋ, mbo dimul nda aa: 24 “La chɔm ndɔ ya dinaluɛiye.* Hɔlaa nɛɛnɛ a diola nɛɛnɛ la cho yɛ laŋ lechoo?” Ma muli aa: “Siisa.” 25 Mbo dimul nda aa: “Mɛɛ la ke Siisa nyɛ cho le Siisa wo,+ mi la ke Mɛlɛka nyɛ cho le Mɛlɛka wo.”+ 26 A nɔla ma bii ndu a nyɛ o wa dimioo wo waŋnda o hɔl te. Kɛ mi kɔndɔfillo bii nda a mɛɛ o muli yɛ, ma mei doŋ.

27 Mi Sadusiiya apum, a dimi maa wanaa vi wa miiŋgu lɛ niŋ yoomu le wa+ huŋ nyuna ndu aa:+ 28 “Wana Pɛɛkaa, mi Muuse poonyiaa aa, ‘Te waŋndo vi pɛ mbo mɛi lanɔɔ, kɛ o vilu chua a ndu le, pɔmbɔ ndɔ ɔɔ bɛ ndɔ nɔ mbo chua lanɔ koŋ o nɔɔ niŋ le mbo vilul wana vi wo chuauwa.’+ 29 Puaa pum wa nda ŋɔmmɛu, pɔmbɔɔ a bɛndoo waa nda wa ni. Mi o tasoo yil lanɔɔ, kɛ o vilu chua le mbo wu. 30 Mi o diiŋ ndɔɔ chua ndu, kɛ mi ndu bɛɛ wu. 31 O yaa ndɔɔ bɛɛ lende koni. Nda ŋɔmmɛu kpou, a vilu ŋchuau a ndu le ma wu. 32 O mɛɛlulaŋ kpɔŋ, mi chuaa bɛɛ wu. 33 Te nda kpou huŋ miiŋgu pɛ yoomu, lanɔɔ nɛɛnɛ chuaa hoo wa yɛ niŋ? Kanifuule, nda ŋɔmmɛu kpou mi chuaa hoo keeku nda o ba o nɔɔ niŋ.”

34 Mi Chiisu mulul nda aa: “Chuauwaa cho le chieeŋndo hoo* wa cho laanduaa chuaa, a challe o nɔlaŋ. 35 Kɛ wanaa sɔla dikeŋnaŋndo le ma huŋ miiŋgu yoomu nduyɛ ma wa o chieeŋ koŋ niŋnda, a chue lɛ niŋ ŋlaandu kɛlɛŋgaa ŋpiaandu le.+ 36 Fɛɛŋ bɛɛ a vi lɛ niŋ te, kanifuule mɛɛ maalikɛiya cho yɛ nda wa niŋ ni. Nduyɛ, te a huŋ miiŋgu pɛ yoomu, chuauwaa Mɛlɛkaa nda wa niŋ ni. 37 O nyɛ cho o poonyiaa a bɔɔ leyiŋndo okɔɔ wo niŋ, mi Muuse chɔm maa wanaa vi wa nɔ le miiŋgoo yoomu. Mbo veelu Chɛhowa* maa ndu cho ‘Mɛlɛka Ebilaham ndo, Mɛlɛka Aase wo, a Mɛlɛka Chekɔpu wo ni.’+ 38 O cho Mɛlɛka ŋwaŋ vilɛi le, kɛ Mɛlɛka wanaa cho yoomu wa, kanifuule nda kpou cho yoomu ndu o hɔl.”+ 39 Okoŋ mi wanaa pɛɛku waŋnda sawala Mɛlɛkalaŋ nda apum dimi aa: “Wana Pɛɛkaa, a chaa bɔɔ nyunaa hoo muli.” 40 Nduyɛ wana o wana bii lɛ kɔllo le ndu nyunaa le.

41 Okoŋ kɔɔli, mbo nyuna nda aa: “Le yɛɛnɛ nda dimi yɛ maa po Deeve wo Kiliti cho ni?+ 42 Mi Deeve pila dimi o yau Sam ndo niŋ aa, ‘Chɛhowa* dimul Masanɔ nuu aa: “Chal o ba ni kɛndɔɔ choo 43 haaa mi siiŋguu yaamɔɔwaa numnda maa nyɛ num handaa ŋpelu.”’+ 44 Te Deeve pila veelu ndu pɛ aa Masanɔɔ, vɛɛ o looku yɛ vɛlɛ mbo wa po ndɔɔ?”

45 Mɛɛ waŋnda kpou wa nilaŋ yaŋɔɔ, mbo dimul buɛiyaa nduaa aa: 46 “La mandaŋ a wanaa pɛɛku waŋnda sawala Mɛlɛkalaŋ nda, kanifuule a hɛnaŋ kelaa a domala bɛndulaŋ lekɔɔ. Nduyɛ te a wa o luŋ* pɛ, a yeema mi waŋnda yil nda yilɔɔ teŋgeŋndo. Te a kuɛ pɛ o chiɛila Chuuwa piɛi Mɛlɛka laŋ niŋ a o dunyaŋ, o kpeŋgbeila cho lachi laŋ* choo, a o fondaŋnda kɛndɛ kɛndɛlaŋ nda yeema challe ni.+ 47 A bii pɛ a poondiaa waŋ laanduaa vii piaanduaa wa nyɛm ndaŋ o laba. Nduyɛ ma bɛndi piɛile ndaleŋ le mi waŋnda muli nda hɔlla kɔɔli. Waŋnda haa cho nyɛpalaa sɔla mbo hiou wana o wana.”