Lɛvitikɔɔ
14 Mi Chɛhowa dimul vɛlɛ Muuse aa: 2 “Sawa cho a wana naa ŋlɛlɔɔ okɔɔ wo cho hoo ni, o paale nda cho hunɔɔ a ndu o wana soliaa lasalaa lo+ le mbo sɔla dindioo leŋ. 3 Wana soliaa lasalaa cho fula o dɔɔŋgɔɔ niŋ mbo kɔ mɛɛndaŋ ndu nyɛkɛndɛi. Te o che pɛ maa o seŋgu a naa ŋlɛlɔɔ, 4 wana soliaa lasalaa cho ndu dimul le mbo hiŋ a youwaa diandaa a ŋiɔɔŋ, yɔm sida wo, kola ipɛŋgɛ siaŋaa, a yɔm hisɔpi wo, le wana koŋ dindioo.+ 5 Wana soliaa lasalaa cho dimi le ma dii youwo o pilɛ o nyɛi laandii nda toosiaa a puuloo, mi mɛŋma nda kɔndu sɛnɛi o peelo waŋ ma wa leniŋ nde choo. 6 Kɛ, wana soliaa lasalaa cho chua you lo yoomu wo, yɔm sida wo, kola ipɛŋgɛ siaŋaa, a yɔm hisɔpi wo, mbo yiŋ o kooma you nda dii koŋ o mɛŋma nda kɔndu sɛnɛi o peelo waŋ choo wo niŋ. 7 Okoŋ, wana soliaa lasalaa cho wana ndoo nɔ koŋ lɛlɔŋ ndo kooma maŋ fasaŋiaa bɛmbɔɔ le ŋɔmmɛu le ndu dindioo a lɛlɔŋ, mbo dimul waŋnda maa wana diandaa o cho ni. Nduyɛ, mbo mal youwo mbo kuɛŋnuŋ yondoo niŋ.+
8 “Le mi wana ndoo nɔ lɛlɔŋ ndo sɔla dindioo, o nɔ mbo tɔɔ nyɛla ndɔlaŋ, mbo sendi yiiŋii nduɛi kpou, nduyɛ mbo puluŋ. Okoŋ kɔɔli, o nɔla mbo hiŋ o dɔɔŋgɔɔ niŋ. Kɛ haaa palɛi i ŋɔmmɛu, o nɔ mbo luɛi o tɛndii ndɔɔ niŋ te. 9 O paale ŋɔmmɛu leŋ choo, o nɔ mbo sendi yiiŋii cho ndu o lebol le, siɛiye, a yiiŋii lahɔlle. Te o chii ndi pɛ sendi kpou, o nɔ mbo tɔɔ nyɛla ndɔlaŋ, mbo puluŋ, okoŋ mbo simnuŋ o diandaa.
10 “O paale ŋɔmaa leŋ choo, o nɔ mbo kuɛ a saa fɔŋnduaa piaanduaa a ŋiɔɔŋ, saa laandu+ chii wɔsioo o pilɛ wo, kpeyaŋ kɛndɛ kɛndɔɔ ɛfaa le yaa a tɛndaa tɛɛŋ o nda muuliaŋ a chuɛiyaŋ le sala ŋkullo+ wo, a chuɛiyaŋ+ lɔkiiyo cha.* 11 Wana soliaa lasala dimi maa poo cho niŋ o diandaa wo nɔ mbo hiŋ a po koŋ vɛlɛ a salala ndɔlaŋ ya Chɛhowa lachi, o tɛndii bɔŋaŋndo hɔlndɔ. 12 Wana soliaa lasalaa cho saa fɔŋndɔ piaandoo o pilɛ chua a chuɛiyaŋ lɔkiiyo cha, mbo soli sala yɔŋ wɔɔŋndo.+ Okoŋ mbo keeliaa sala koŋ maa sala keeliaa ya Chɛhowa lachi.+ 13 O cho saa fɔŋndɔ piaandu koŋ diyɔɔ o fondaŋ nda dii+ chɔlu sala hakioo, a chɔlu sala luamaa o fondaŋ diandaa wo. Kanifuule maa sala hakioo, sala yɔŋ wɔɔŋndo bɛɛ, le wana soliaa lasalaa+ o cho ni. Nyɛ hiou diondɔɔ wo+ o cho ni.
14 “Okoŋ, wana soliaa lasalaa cho kooma sala yɔŋ wɔɔŋ koŋ chua ma tiŋ, mbo sui wana koŋ o nile tumnde ba kɛndɛ leŋ, suei bɛnduii ba kɛndɛi, a o suei bɛnduii pelii ba kɛndɛi. 15 Nduyɛ, wana soliaa lasalaa cho chua chuɛima+ cho maŋ lɔkiiyo cha waŋ, mbo talaŋ maŋ o ba kɔllo, o ba ndɔ miallo. 16 Chuɛima cho ndu maŋ o ba kɔllo, o ba ndɔ miallo waŋ, wana soliaa lasalaa cho suei nduɛi ba kɛndɛi pila leniŋ, mbo fasaŋiaa ma tiŋ a suei nduɛi bɛmbɔɔ le ŋɔmmɛu ya Chɛhowa lachi. 17 Okoŋ, wana soliaa lasalaa cho chuɛima lo waŋ wounɔŋ o ba kɔllo, mbo sui wana nda cho koŋ dindioo wo o nile tumnde ba kɛndɛ leŋ, o suei bɛnduii ba kɛndɛi, a o suei bɛnduii pelii ba kɛndɛi, naa nda sui ndu kooma sala yɔŋ wɔɔŋndo waŋ. 18 Wana soliaa lasalaa cho chuɛima lo waŋ talaŋ o ba, nduyɛ mbo tala wana o cho dindioo wo maŋ o lebol, okoŋ mbo soli sala malɔɔ lahakioo le ndu ya Chɛhowa lachi.+
19 “Wana soliaa lasalaa cho sala hakioo+ soli, nduyɛ mbo nyuna Mɛlɛka le mbo mal wana o cho koŋ dindioo wo haki. Okoŋ kɔɔli, mbo dii chɔlu cho le sala luamaa wo. 20 Wana soliaa lasalaa cho sala luamaa a sala ŋkullo+ soli o bandu luamaa lasalaa choo, nduyɛ mi wana soliaa lasalaa soli sala malɔɔ lahakioo le ndu,+ okoŋ mbo simnuŋ o diandaa.+
21 “Kɛ te o yɔŋ pɛ maa wana bala fondoo o cho ni, nduyɛ sɔla ndɔɔ cho tau le, o nɔ mbo kuɛ a saa fɔŋndɔ piaandoo le sala yɔŋ wɔɔŋndo, mbo keeliaa ndu Mɛlɛka lachi, le mbo soli sala malɔɔ lahakioo. O nɔ mbo kuɛ vɛlɛ a kpeyaŋ kɛndɛ kɛndɛ nda muuliaŋ a chuɛiyaŋ ndo ɛfaa le yaa a tɛndaa tɛɛŋ le sala ŋkullo, chuɛiyaŋ lɔkiiyo cha, 22 a piiŋnda a ŋiɔɔŋ ɔɔ kaŋgbuaa fɔŋnduaa a ŋiɔɔŋ, a mɛɛ sɔla ndɔɔ cho yɛ. O pilɛ le sala hakioo, o pilɔɔ le sala luamaa.+ 23 O paale ŋɔmaa leŋ choo,+ o nɔ mbo hiŋ a nda o wana soliaa lasalaa lo, le mbo sɔla dindioo o tɛndii bɔŋaŋndo hɔlndɔ ya Chɛhowa lachi.+
24 “Wana soliaa lasalaa cho saa fɔŋndɔ piaandu cho le sala yɔŋ wɔɔŋndo+ wo chua a chuɛima cho maŋ lɔkiiyo cha waŋ, mbo keeliaa ya Chɛhowa lachi+ maa sala keeliaa. 25 Wana soliaa lasalaa cho saa fɔŋndɔ piaandu cho le sala yɔŋ wɔɔŋndo wo diyɔɔ, mbo chua kooma maŋ ma tiŋ, mbo sui wana nda cho koŋ dindioo wo o nile tumnde ba kɛndɛleŋ, suei bɛnduii ba kɛndɛi, a o suei bɛnduii pelii ba kɛndɛi.+ 26 Wana soliaa lasalaa cho chuɛima maŋ ma tiŋ talaŋ o ba kɔllo, o ba ndɔ miallo,+ 27 mbo fasaŋiaa chuɛima cho ndu maŋ o ba waŋ bɛmbɔɔ le ŋɔmmɛu ya Chɛhowa lachi, a suei ba kɛndɛi. 28 Nduyɛ wana soliaa lasalaa cho chuɛima cho ndu maŋ o ba kɔllo waŋ chua, mbo sui wana nda cho koŋ dindioo wo o nile tumnde ba kɛndɛ leŋ, o suei bɛnduii ba kɛndɛi, a o suei bɛnduii pelii ba kɛndɛi, o fondaŋnda o sui ndu kooma sala yɔŋ wɔɔŋndo waŋ. 29 Wana soliaa lasalaa cho chuɛima tɔ ma lo ndu o ba waŋ tala wana o cho dindioo wo o lebol, le halikpeŋ mbo soli sala malɔɔ lahakioo le ndu ya Chɛhowa o hɔl.
30 “O nɔ mbo yɔŋgu piiŋnda a ŋiɔɔŋ ɔɔ kaŋgbuaa fɔŋnduaa a ŋiɔɔŋ, a mɛɛ sɔla ndɔɔ+ cho yɛ. 31 Youwa haa suu o suu o sɔla pɛ, o pilɛ cho wa le sala hakioo, mi o pilɔɔ wa le sala luamaa,+ latulu a sala ŋkullo. Nduyɛ, wana soliaa lasalaa cho sala malɔɔ lahakioo soli le wana o cho koŋ dindioo wo ya Chɛhowa lachi.+
32 “Te waŋndo ndoo nɔ pɛ naa ŋlɛlɔɔ, kɛ mbo nɔla nyɛm cho le dindioo sɔlaa woŋ sɔla le, sawa cho a ndu okɔɔ wo cho hoo ni.”
33 Mi Chɛhowa dimul Muuse nda Elɔŋ aa: 34 “Te la luɛi pɛ o lɛŋnde Kenaŋ ndeŋ+ niŋ, lɛŋnde ya cho nya kioo le mi le wa nyɛm kɛŋ nya+ leŋ, nduyɛ mi tosa mi naa ŋlɛlɔɔ+ del o chiɛiyo, 35 wana nɔ chiɛi koŋ ndo nɔ mbo kuɛ o wana soliaa lasalaa lo mbo dimul ndu aa, ‘Naa pum fula o chiɛi nuu.’ 36 Wana soliaa lasalaa cho wana koŋ dimul le ma soli nyɛ o nyɛ cho o ndu lo chiɛiniŋ, tuupa mbo hiŋ le naa koŋ mɛɛndaŋndo nyɛkɛndɛi. Yɔŋii o huŋ mbo dimi maa nyɛ o nyɛ cho chiɛiniŋ ndoŋ, o nɔɔlɛiyo o cho ni. Te o tosa pɛ lende, wana soliaa lasalaa hiŋ niko o mɛɛndaŋ chiɛiyo. 37 Wana soliaa lasalaa cho fondaŋ naa del koŋ ndo mɛɛndaŋ nyɛkɛndɛi, okoŋ te o saaluŋ pɛ maa naa del koŋ o chiɛiyo wo nɔ tiŋ kɔɔle basi leŋ ɔɔ o cho tiŋ o siaŋa, nduyɛ mbo che maa o luɛi o chiɛiyo niŋ, 38 wana soliaa lasalaa cho fula o bɛɛ, mbo dimi maa le palɛi i ŋɔmmɛu,+ wana o wana nɔ mbo luɛi chiɛiniŋ loŋ te.
39 “O paale ŋɔmmɛu leŋ choo, wana soliaa lasalaa cho miiŋgu mbo kɔ mɛɛndaŋ chiɛiyo nyɛkɛndɛi. Nduyɛ te o saaluŋ pɛ maa naa koŋ cho kɔlaŋ a tiuwo o chiɛiyo, 40 wana soliaa lasalaa cho waŋnda dimul ma kɔ sooluu pouta naa bii laŋ o chiɛiyo, ma faŋa laŋ o chioo niŋ, ma kɔ viou laŋ o fondaŋ nɔɔlɛiyo. 41 O cho vɛlɛ nda dimul le ma sɛɛluu chiɛi koŋ leniŋ nyɛkɛndɛi, nduyɛ ma chua puulu cho koŋ chuchɔŋ ndo, ma soli ndu o chioo niŋ, ma kɔ viou o fondaŋ nɔɔlɛiyo. 42 Okoŋ, a cho pouta cheleŋ miŋgi o fondaŋ nda soli koŋ poutaŋ ndo, nduyɛ ma soliŋ puulu cheleŋ kpeku le chiɛi koŋ yikpaa.
43 “Kɛ te o yɔŋ pɛ mi naa koŋ miiŋgu vɛlɛ o chiɛi koŋ, mi che bɛɛ ma sooluu pouta naa ndoo bii laŋ, ma sɛɛluu ndu, nduyɛ ma miŋgi ndu yikpa, 44 wana soliaa lasalaa cho vɛlɛ lakɔ mbo kɔ mɛɛndaŋ chiɛiyo nyɛkɛndɛi. Te o saaluŋ pɛ maa naa cho kɔlaŋ a tiuwo o chiɛiyo, mɛɛ lɛlɛŋ wɔɔŋ wɔɔŋndoŋ+ cho muŋ o chiɛiyo ni. Chiɛi koŋ cho o nɔɔlɛi. 45 Wana soliaa lasalaa cho dimi le ma pɛl chiɛiyo, ma sooluu poutaŋ, yɔmnde, nduyɛ ma kɔndu puulu nda taŋgul chiɛi koŋ ndo, okoŋ ma faŋa nyɛm muŋ kpou chiee, ma kɔ viou muŋ o fondaŋ nɔɔlɛiyo.+ 46 Kɛ a boondii wana soliaa lasalaa dimi maa wana o wana nɔ mbo luɛi o chiɛi koŋ+ niŋ te wo, wana o wana luɛi loŋ pɛ, o cho wa o nɔɔlɛi haaa mi paaleŋ le del.+ 47 Wana o wana hini o chiɛi koŋ niŋ pɛ, o nɔ mbo tɔɔ nyɛla ndɔlaŋ. Nduyɛ wana o wana de vɛlɛ nyɛdiaa o chiɛi koŋ niŋ pɛ, o nɔ mbo tɔɔ nyɛla ndɔlaŋ.
48 “Kɛ te o yɔŋ pɛ mi wana soliaa lasalaa huŋ mɛɛndaŋ chiɛi koŋ, nduyɛ mbo che maa mɛɛ nda miŋgi ndu yikpa, naa hiu lɛ lachi a tiuwo o chiɛiyo le, o cho waŋnda dimul maa chiɛi koŋ cho o diandaa. Kanifuule, naa wa o chiɛiyo wo faŋaŋ. 49 Wana soliaa lasalaa cho chua youwa a ŋiɔɔŋ, yɔm sida wo, kola ipɛŋgɛ siaŋaa, a yɔm hisɔpi wo,+ le halikpeŋ mbo dindi chiɛi koŋ. 50 Wana soliaa lasalaa cho youwo o pilɛ diyɔɔ o nyɛi laandii nda toosiaa a puuloo, mi mɛŋma nda kɔndu sɛnɛi o peelo waŋ ma wa leniŋ nde choo. 51 Okoŋ mbo chua yɔm sida wo, yɔm hisɔpi wo, kola ipɛŋgɛ siaŋaa, a you lo yoomu wo, mbo yiŋ o kooma you nda dii koŋ o mɛŋma nda kɔndu sɛnɛi o peelo waŋ choo wo niŋ, mbo fasaŋiaa maŋ bɛmbɔɔ le ŋɔmmɛu+ o chiɛi koŋ. 52 O cho chiɛi koŋ dindi a kooma you koŋ, mɛŋma nda kɔndu sɛnɛi o peelo waŋ, you lo yoomu wo, yɔm sida wo, yɔm hisɔpi wo, a kola ipɛŋgɛ siaŋaa. 53 O cho you lo yoomu wo malɔɔ mbo kuɛŋnuŋ yondoo niŋ, mbo soli sala malɔɔ lahakioo le chiɛi koŋ, nduyɛ mbo simnuŋ o diandaa.
54 “Sawa cho a naa ŋlɛlɔɔ, naa fula waŋndo o lebol ɔɔ o daadaa mi yiiŋnde ɔɔ siɛiye yuŋgaŋ ndo,+ 55 naa ŋlɛlɛ del o nyɛla chuɛɛnaŋndaŋ+ ɔɔ chiɛiyo+ wo, 56 hindɔɔlaŋ, tɛɛndaŋ, a kawalaŋ+ ndo cho hoo ni, 57 le sinaa te nyɔɔ cho pɛ o nɔɔlɛi ɔɔ o diandaa.+ Sawa cho a naa ŋlɛlɔɔ+ okɔɔ wo cho hoo ni.”