Chɔŋ
20 O paale taseleŋ choo o lɔɔ bɛŋgu, mi Meele Madaliŋ huŋ o sɛiyo* idiiyo puŋ.+ Nyɔɔ wa wɔ yifidii. Mbo cha pou wa o sɛiyo* sondoo wo o faŋaa.+ 2 Mbo miiŋgu a kiltaŋ naa Saimɔŋ Pitɛ chua a buɛiyo opilɔɔ, o Chiisu ndoo kaala tau wo.+ Mbo dimul nda aa: “A soli Masanɔɔ o sɛiyo niŋ,+ nduyɛ ŋ sina naa nda hivi ndu wa le.”
3 Okoŋ mi Pitɛ nda buɛiyo o pilɔɔ bii kɔlaŋ o sɛiyo. 4 Ma kandu kiltaŋ nda ŋiɔɔŋ. Kɛ mi buɛiyo o pilɔɔ mɛi Pitɛ kɔɔli, mbo fuuluu ndu tase o sɛiyo. 5 Mɛɛ o tunduŋ, mbo cha kolala feŋgbɛlaŋ o sɛiyo niŋ,+ kɛ o luei leniŋ te. 6 Mi Saimɔŋ Pitɛ bɛɛ fuuluu, mbo luɛi o sɛiyo niŋ, mbo cha kolala feŋgbɛlaŋ. 7 Kɛ kola wa Chiisu o lebol lo ve o kɛsiaa naapilɛ a kolala ŋpɛŋgɛla nda simbu simbuu ndu laŋ te. Ndu waŋnuŋ naa cheleŋ o tuituiyaa. 8 Okoŋ, mi buɛi keleŋa fuuluu o sɛiyo wo bɛɛ luɛi, mbo cha nduyɛ mbo laalaŋ. 9 Kanifuule, ndaa biiyɔ bila nyɛ yau Mɛlɛkaa dimi maa o nɔ le miiŋgoo yoomu wo le.+ 10 Okoŋ mi buɛiya haa miiŋgu o la nda lo bɛɛ.
11 Kɛ mi Meele ndu lo isisi chaŋndo o sɛiyo ikɛi. Mɛɛ o wa chaŋndo, mbo tunduŋ le tofaa o sɛiyo niŋ. 12 Okoŋ, mbo cha maalikɛiya a ŋiɔɔŋ+ a nyɛla humbulaŋ lekɔɔ. A wa ichali o fondaŋ Chiisu wa o yambaa wo. Hoo wa ichali o bolleŋ, mi o pilɔɔ wa ichali o peloŋ. 13 Ma nyuna ndu aa: “Le yɛɛnɛ ŋ cho yɛ chaŋndo chuaa?” Mbo mulul nda aa: “Masanɔ nuu nda chua ni, nduyɛ I sina naa nda hivi ndu wa le.” 14 Mɛɛ o dimi lende, mbo muliŋ, mbo cha Chiisu isisi loŋ, kɛ o sina maa ndu le.+ 15 Mi Chiisu nyuna ndu aa: “Le yɛɛnɛ ŋ cho yɛ chaŋndo chuaa? Nɛɛnɛ ŋ cho yɛ nuuviaa?” Meele wa ko yiyaŋndo maa wana tosa wallo o kpeloo niŋndo ni. Mbo dimi aa: “Fallo, te num soli ndu ni, mɛɛ chɔm ya naa ŋ hivi ndu wa mi kɔ chua ndu.” 16 Mi Chiisu veelu ndu aa: “Meele!” Mɛɛ Meele muliŋ, mbo veelu ndu o Hibuluiye niŋ aa: “Luaboni!” (koŋ cho ni, “Wana Pɛɛkaa!”) 17 Mi Chiisu dimul ndu aa: “Baambaŋ ya le, kanifuule I kue wɔ o Finya nuu lo le. Kɔ o puaapiliaa niaa lo+ ma dimul nda maa, ‘I cho lakɔ o Finya nuu lo,+ o cho Finya nya wo, a o Mɛlɛka nuu lo,+ o cho Mɛlɛka nyaa wo.’” 18 Mi Meele Madaliŋ kɔ dimul buɛiyaa Chiisu wa aa: “I che Masanɔɔ!” Okoŋ mbo dimul nda nyɛ o dimul ndu wo.+
19 A paale yɔŋgaŋndeŋ, o paale pilɛle leŋ choo, mi buɛiyaa Chiisu wa chuuŋgiaŋ naapilɛ. Kɛ le mɛɛ nda wa siooŋii Chuuwa yɛ, ma kiindiaa diolaŋ kpaŋ kpaŋ. Okoŋ mi Chiisu huŋ sim nda tɛɛŋ. Mbo dimi aa: “Maa la wa a kɔl nyulu fɔ!”+ 20 Mɛɛ o dimi lende, mbo chɔm nda balaŋ a luŋgbuei.+ Mi buɛiyaa nduaa duaunuŋ nyaale tau le mɛɛ nda che Masanɔɔ yɛ.+ 21 Mi Chiisu dimul nda vɛlɛ aa: “Maa la wa a kɔl nyulu fɔ!+ Mɛɛ Finya nuu vem ya yɛ,+ lende ya bɛɛ cho nya viomɔɔ ni.”+ 22 Mɛɛ o dimi lende, mbo hul nda fuu, mbo dimul nda aa: “La sɔla nyina diandaa.+ 23 Wana o wana nya mal pɛ haki le hakila ndɔlaŋ, Mɛlɛka bɛɛ mal ndu haki. Kɛ wana o wana nya mel haki le, Mɛlɛka bɛɛ mel ndu haki le.”
24 Kɛ Tɔmɔsi,+ wana pilɛ o kiilaa 12 nda tɛɛŋ, o ndaa veelu aa Pɛnduaa wo ve loŋ teleŋ Chiisu hiŋndo le. 25 Okoŋ mi buɛiya a tuaa dimul ndu aa: “Ŋ che Masanɔɔ!” Kɛ mbo dimul nda aa: “Te I chi tindila ŋlɔndimɛilaŋ* ndu o laba, mi pilaŋ ndaŋ, nduyɛ mi pilaŋ ndu vɛlɛ luŋgbuei le,+ I laalaŋ ndi le.”
26 Palɛi i ŋɔmaa okoŋ kɔɔli, buɛiyaa Chiisu wa a wa vɛlɛ o dio kindaa kɔɔli, nduyɛ Tɔmɔsi wa a nda latulu. Mi che bɛɛ dioo wa o kindaa, kɛ mi Chiisu luɛi mbo huŋ sim nda tɛɛŋ. Mbo dimi aa: “Maa la wa a kɔl nyulu fɔ!”+ 27 Mbo dimul Tɔmɔsi aa: “Pilaŋ nanuŋ, nduyɛ ma tofa bala nilaŋ. Pilaŋ ya luŋgbuei a suei numnde, ma mal kiisaŋndo okoŋ ma laalaŋ.” 28 Mi Tɔmɔsi dimul ndu aa: “Masanɔ nuu, Mɛlɛka nuu!” 29 Mi Chiisu dimul ndu aa: “Le mɛɛ ŋ che ya yɛ ŋ laalaŋ ni? Kɔl kɛndɔɔ cho le wanaa laalaŋ, kɛ a chi le wa.”
30 A tonya, mi Chiisu tosa vɛlɛ kaamaala cheleŋ tau buɛiyaa nduaa o hɔl, kɛ la cho la poonyiaa o yauwo hoo niŋ te.+ 31 Sɔɔŋ muŋ poonyiaŋ le mi la laalaŋ maa Chiisu cho Kiliti ni, Po Mɛlɛkaa. Nduyɛ le mɛɛ nya laalaŋ yɛ, la cho yoomoo sɔla o diola ndɔlaŋ niŋ.+