Walta Kiilaa
23 Mi Pɔɔl tofa Laŋgbaa Kalaa Kialu Yamaŋ Nda chiŋ, mbo dimi aa: “Chaaŋaa niaa, Mɛlɛka sina maa haaa mbo huŋ bii a paale hauleŋ ndeŋ, kɔl ni iyamaa+ choŋnuŋ walaŋ.” 2 Mi wana bɛndu wanaa soliaa lasalaa diolaŋ aa Ananaaya, dimul wanaa wa isisi Pɔɔl ikɛiya le ma lɔɔ ndu sondoo. 3 Mi Pɔɔl dimul ndu aa: “Mɛlɛka cho num lɔɔ, num chiyii chiɛi nda sui pɔu humboo wo.* Num chal hoo le ya kɔɔsaa a mɛɛ Sawaa* dimi yɛ wo, num dimi vɛlɛ ni maa a lɔɔ ya? O cho num te cho Sawaa tɛɛmbuuwo le?” 4 Mi wanaa wa ndu isisi ikɛiya dimi aa: “Le yɛɛnɛ ŋ yei yɛ wana bɛndu wanaa soliaa lasala Mɛlɛkaa?” 5 Mi Pɔɔl dimi aa: “Chaaŋaa niaa, I sina maa wana bɛndu wanaa soliaa lasalaa le o cho le. Kanifuule, i cho i poonyiaa aa, ‘A nɔ ma dimi diomnda wɔɔŋndaŋ a wana cho wanaa numnda bolleŋ ndo le.’”+
6 Mɛɛ Pɔɔl sina maa Sadusiiya a Falisiiya cho o bɔŋaŋ koŋ ni, mbo dimi Laŋgbaa Kalaa Kialu Yamaŋ Nda tɛɛŋ choo choo aa: “Puaapiliaa niaa, Falisiinɔɔ ya cho ni.+ Nduyɛ Falisiiya velu ya ni. Kɛ le tiindaŋ ya nɔ maa wanaa vi wa cho miiŋgu yoomu wo nda cho ya kɔɔsaa ni.” 7 Le mɛɛ Pɔɔl dimi lende yɛ, mi sɛɛŋgiaŋndo del Falisiiya a Sadusiiya tɛɛŋ. Okoŋ ma piɔuwaŋ tɛɛŋ. 8 Kanifuule, Sadusiiya dimi maa wanaa vi wa miiŋgu lɛ yoomu le, maalikɛiyaa cho le, nduyɛ maa nyaa yoomaa cho o inyinaya wa cho le. Kɛ Falisiiya nda laalaŋ sɔɔŋ muŋ kpou.+ 9 Mi wooluŋ wooluŋ bɛndoo kanduŋ. Okoŋ mi wanaa pɛɛku waŋnda sawala Mɛlɛkalaŋ nda apum o kunda Falisiiya choo chaŋ ma kandu suɛi a kɔl tuuwo aa: “Ŋ chi suɛi wɔɔŋ kɛ kɛ poo hoo tosa le. Kɛ te nyɛ yoomaa cho o inyinaya wo ɔɔ maalikɛinɔɔ soo o ndu lo ni+—.” 10 Mɛɛ wooluŋ wooluŋndo chɔɔlu kindɔŋ, mi siooŋnde bii wana cho puaa chɔuwa bolleŋ ndo, kanifuule ndoo yiyaŋ ko maa a cho Pɔɔl diyɔɔ. Le hei, mbo dimul puaa chɔuwa le ma kɔ soli ndu nda tɛɛŋ ma hiŋ a ndu o fondaŋ puaa chɔuwa.
11 Kɛ ichɔl koŋ, mi Masanɔɔ huŋ sim Pɔɔl ikɛi. Mbo dimi aa: “Nɔ kɔl simulaa!+ Mɛɛ ŋ wa seileŋ timbioo nyɛkɛndɛi a ya okɔɔ Chulusalɛm yɛ, lende koni ŋ cho seileŋ timbi a ya okɔɔ Luom ni.”+
12 Mɛɛ paaleŋ le sɛ, mi Chuuwa yiinuŋ kunda ma mɛnaŋ po maa te o cho ma dii Pɔɔl le, a di nyɛ o nyɛ le kɛlɛŋgaa ma kol. 13 Puaa yiinuŋ kunda le suɛi hei tosaa wa ndaa hiou ŋwaŋ 40. 14 Mi puaa haa kua o masaa wanaa soliaa lasalaa lo a laŋgbaa kalla. Ma dimi aa: “Ŋ mɛnaŋ po maa te o cho miŋ dii Pɔɔl le, ŋ di nyɛ o nyɛ le. 15 Lelaŋ, nya ni, a Laŋgbaa Kalaa Kialu Yamaŋ Nda, la dimul wana cho puaa chɔuwa bolleŋ ndo maa o huŋ a Pɔɔl naa nya chua. La chɔm maa la yeema le chɔɔloo suɛi nduɛi yaasiaa fɛsɛ fɛsɛ. Kɛ tuupa mbo fuuluu o nya lo, ŋ cho wa a bɛɛndiaŋ le ndu diyɔɔ.”
16 Kɛ mi Pɔɔl tooŋgoo ndɔ tuɛi a suɛi waŋnda tuu le Pɔɔl tosallo ve okɔɔ. Mbo kua o fondaŋ puaa chɔuwa mbo kɔ dimul Pɔɔl. 17 Okoŋ mi Pɔɔl veelu wana bɛndu puaa chɔuwa, mbo dimul ndu aa: “Kɔ a laŋunɔɔ hoo o wana cho puaa chɔuwa bolleŋ ndo lo. O nɔ isɔɔ le ndu dimullo.” 18 Okoŋ mbo kua a ndu o wana cho puaa chɔuwa bolleŋ ndo lo. Mbo dimul ndu aa: “Pɔɔl cho o biyɔɔ niŋndo veelu ya ni mbo dimul la maa ya huŋ a laŋunɔɔ hoo naa num chua, kanifuule o nɔ isɔɔ le num dimullo.” 19 Mi wana cho puaa chɔuwa bolleŋ ndo saa ndu baa, ma kua o lesɔŋgi. Mbo nyuna ndu aa: “Yɛɛnɛ ŋ nɔ yɛ le ya dimullo?” 20 Mbo dimi aa: “Chuuwa kɛɛsiaa maa siɔdii, a cho num hunɔɔ dimul le ma kuɛ a Pɔɔl o Laŋgbaa Kalaa Kialu Yamaŋ Nda lo, le chɔmndo maa a yeema le suɛi nduɛi chɔɔloo yaasiaa fɛsɛ fɛsɛ.+ 21 Chɛl nyɛ nda cho num dimullo le, kanifuule puaa ndaa hiouwɔɔ ŋwaŋ 40 veŋnuŋ o nɛi le ndu. A mɛnaŋ po maa te a dii Pɔɔl le, a di nyɛ o nyɛ le kɛlɛŋgaa ma kol.+ A cho niŋ a bɛɛndiaŋ, nduyɛ num koni nda cho chumndo ni le ma chɛl nda diom.” 22 Mi wana cho puaa chɔuwa bolleŋ ndo sila ndu aa: “Dimul wana o wana maa a chɔm ya suɛi hei le.” Okoŋ mbo mal laŋunɔɔ, mbo kuaŋnuŋ.
23 Mbo veelu wanaa bɛnduaa puaa chɔuwa nda ŋiɔɔŋ. Mbo dimul nda aa: “La chuuŋgiaa puaa chɔuwa 200, wanaa nyaanuŋ suaa wa 70, a puaa sɔŋga a baltaŋ nda 200, le kɔlaŋ Sisaliaa a lɔɔ 9:00 ichɔllo.* 24 La chua vɛlɛ suaa le mi Pɔɔl kuɛ lechoo, mbo fuuluu o masaa Felisi lo nyɛ o nyɛ yɔŋnuŋ ndu le.” 25 Mbo poonyiaa vɛlɛ yauwo a hei okɔɔ aa:
26 “Ya Kulɔdiɔɔ Lisiaa cho yauwo hoo poonyiaa ni. I yil num Wana Bɛndoo Felisi, Masa Ibuŋgaa! 27 Chuuwa bii poo hoo ni ma yeema le ndu diyɔɔ. Kɛ mɛɛ ya sina maa Luomaŋnɔɔ o cho ni,+ mi kua a puaa niaa chɔuwa chɔ chɔ mi piŋi ndu.+ 28 Yaa yeema mi sina nyɛ o tosa ma hɛɛnduu ndu sɔɔŋ choo wo. Le hei, mi huŋ a ndu o Laŋgbaa Kalaa Kialu Yamaŋ Nda lo.+ 29 Mi saaluŋ maa a Sawa ndaa okɔɔ+ sɔɔŋ nda hɛɛnduu ndu choo woŋ cho ni. Kɛ o tɛɛmbuu isɔɔ o isɔɔ o sɔla piɔm le ndi ɔɔ le ndu dɔwɔɔ o chiɛi manyum niŋ te. 30 Nduyɛ le mɛɛ ya tuei maa a kɛɛsiaa le ndu diyɔɔ yɛ,+ lelaŋ ya yɔŋ ndu naa num chua chɔ chɔ ni, le mi wanaa hɛɛnduu ndu sɔɔŋ choo wa kɔ chɔm suɛi o tosa ve num o hɔl.”
31 Okoŋ mi puaa chɔuwa tosa mɛɛ nda dimul nda yɛ. Ma chua Pɔɔl+ ma huŋ a ndu Aŋtipatii a nyumndaŋ. 32 Diimandɔɔ, mi wanaa nyaanuŋ suaa wa hiau lachi a kɔlaŋ a Pɔɔl. Kɛ mi puaa chɔuwa a tuaa miiŋguŋ o fondaŋ puaa chɔuwa. 33 Mi wanaa nyaanuŋ suaa wa fuuluu Sisaliaa. Ma yɔŋgu masa ibuŋgaa yauwo, nduyɛ ma mal Pɔɔl ndu o ba. 34 Okoŋ mbo veelu diomndaŋ o yauwo niŋ. Mbo nyuna Pɔɔl le buŋgɛi o fula ve. Mbo dimul ndu maa Siliisiaa o fula ni.+ 35 Mbo dimi aa: “Te wanaa hɛɛnduu num sɔɔŋ choo wa hiŋ pɛ,+ I cho suɛi numnde yaasiaa nyɛkɛndɛi.” Okoŋ mbo dimi le ma kuɛ a ndu o chiɛi lemasa Hɛlɔɔ wo niŋ, ma wa ndu hɔlteŋ choo.