Ɛsodɔɔ
10 Okoŋ mi Chɛhowa dimul Muuse aa: “Kɔ naa Feloo chua, kanifuule ya chɛl ni mi ndu a buɛiyaa nduaa wa bolle kalaleŋ tosaa,+ le halikpeŋ mi tosa kaamaala nilaŋ ndaŋ ndu o hɔl.+ 2 I tosa hei le halikpeŋ mi la huŋ dimul chuauwaa nyaa a chuauwaa nyaa mamaa, mɛɛ ya saaŋgiaa waŋnda Ichipi a kaamaala ya tosa nda tɛɛŋ ndaŋ yɛ.+ Nduyɛ, la cho sina kɛsɛ maa ya cho Chɛhowa ni.”
3 Mi Muuse nda Elɔŋ kua naa Feloo chua, ma dimul ndu aa: “Nyɛ Chɛhowa, Mɛlɛka Hibuluiya dimi wo cho hoo ni, ‘Le vɛɛ kpɛ ŋ cho yɛ hiouwɔɔ lachi a ya simullo?+ Mal wanaa niaa le ma kɔ piɛi ya. 4 Kɛ te a kɛɛ pɛ le wanaa niaa malɔɔ, I cho soonuaa yɔŋ siɔdii o lɛŋnde numndeŋ niŋ kpou. 5 Nduyɛ a cho lɛŋndeŋ kumbɔɔ kpu, wana nɔla niŋ ma che lɛŋnde fondoleŋ te. Nyɛ o nyɛ looŋ kpuŋgbaŋ mɛi le nya, a cho dio paku, nduyɛ ma de vɛlɛ yɔmii nyɛi kandu puiyo o yondolaŋ niŋnde kpou.+ 6 Soonuaa haa cho piɔ o chiɛila numndaŋ niŋ, chiɛila buɛiyaa numnda, a chiɛila waŋnda o Ichipi niŋ kpou. Chɔŋ a teleŋ finyaa nyaa vɛlɛ a finyaa nyaa mamaa wa ichali o lɛŋndeŋ ndeŋ niŋndo haaa huŋ bii a paale hauleŋ ndeŋ,+ i waa lende yɔŋnuŋ ndɔ le.’” Okoŋ, mi Muuse faŋaŋ Feloo o hɔl mbo kuaŋnuŋ.
7 Okoŋ kɔɔli, mi buɛiyaa Feloo wa dimul ndu aa: “Le vɛɛ kpɛ poo hoo cho yɛ hiouwɔɔ lachi a naa nyɛpalaa tusioo choo? Mal waŋnda haa ma kɔ piɛi Chɛhowa Mɛlɛka ndaa. Mɛɛ a biiyɔ bila nuaa maa Ichipi tambu le?” 8 Okoŋ mi Feloo veelu Muuse nda Elɔŋ, mbo dimul nda aa: “La kɔ piɛi Chɛhowa Mɛlɛka nyaa. Kɛ nɛɛ yaa cho yɛ lakɔ?” 9 Mi Muuse muli aa: “Ŋ cho lakɔ a feleŋguaa naa, bɛnduaa naa yuuwa, puaa naa, chuaa naa laanduaa, saa naa, vɛlɛ a nauwaa naa,+ kanifuule ŋ cho lakɔ bɔŋaŋndo biyɔɔ le Chɛhowa.”+ 10 Mi Feloo dimul nda aa: “Te o yɔŋ pɛ mi mal nya a chuauwaa nyaa mi la kuɛ, mɛɛ lekɛndɛi Chɛhowa cho latulu a nya.+ I cho kpendekele maa la tuu le iwɔɔŋnde tosaa. 11 Sako! O cho nya kpou le cho lakɔ le. Waŋ piaanduaa kinɛi cho lakɔ ni ma kɔ piɛi Chɛhowa, kanifuule lende nya dimi ni.” Le hei, ma tuau nda Feloo o hɔl.
12 Mi Chɛhowa dimul Muuse aa: “Siɛndi ba numndo o lɛŋnde Ichipi leŋ choo, le mi soonuaa tiu o lɛŋndeŋ niŋ silɔ, okoŋ ma de tɔlɔɔlaŋ kpou vɛlɛ a nyɛ o nyɛ looŋ kpuŋgbaŋ mɛi o lɛŋnde Ichipi leŋ niŋ.” 13 O lepilɛ niŋ kpe, mi Muuse siɛndi tinda ndɔɔ o lɛŋnde Ichipi leŋ choo, nduyɛ mi Chɛhowa tosa mi hueiyii fula ba paaleŋ le chaŋ ndo ve kandu hɔŋndo. Mi i niilu hɔŋndo kpɛŋ, nduyɛ mi i lɔl hɔŋndo pii. Mɛɛ paaleŋ le sɛ, mi hueiyii fula ba paaleŋ le chaŋ ndo ve huŋ a soonuaa. 14 Mi soonuaa huŋ o lɛŋnde Ichipi leŋ niŋ, ma tiu o tanda Ichipi wo niŋ kpou.+ I wa bɔɔ suɛi kpundɛ bɛndu.+ Kani bɛɛ soonuaa kunda bɛndu waa lende fula wɔ le, nduyɛ fɛɛŋ bɛɛ a fula lɛ niŋ lende le. 15 Ma kumbu lɛŋndeŋ kpu, nduyɛ mi le piimiaa kpilo a nda. Ma dia tɔlɔɔlaŋ a komɔɔla looŋ kpuŋgbaŋ mɛi laŋ kpou o lɛŋndeŋ niŋ. O lɛŋnde Ichipi leŋ niŋ kpou, peele kiyɛileŋ le pilɛ bɛɛ a mɛi o yɔmnde choo ɔɔ o yondolaŋ niŋ te.
16 Okoŋ mi Feloo veelu Muuse nda Elɔŋ chɔ chɔ, mbo dimul nda aa: “I tosa hakioo a Chɛhowa Mɛlɛka nyaa vɛlɛ a nya. 17 Lelaŋ a yandii, la mal la haki. Mɛɛlulaŋ la cho laŋ ni. La nyɔɔlul la Chɛhowa Mɛlɛka nyaa le mbo faŋa ya kpundɛ wɔɔŋndo hoo choo.” 18 Okoŋ mbo* faŋaŋ Feloo o hɔl, mbo kɔ nyɔɔlu Chɛhowa.+ 19 Okoŋ kɔɔli, mi Chɛhowa siŋga hueiyii wa hɔŋndo ve, a hueiyii kpaaya bɛnduii fula ba paaleŋ le del lo ve, mi i kuandu soonuaa, mi i kua a nda o Pee Siaŋa Mɛŋma Ihɛllo niŋ. O lɛŋnde Ichipi leŋ niŋ kpou, soonɔɔ o pilɛ bɛɛ lo loŋ te. 20 Kɛ mi Chɛhowa chɛl mi Feloo tosa vɛlɛ bolle kalaleŋ,+ nduyɛ mbo kɛɛ le Isɔluɛiya malɔɔ.
21 Okoŋ mi Chɛhowa dimul Muuse aa: “Heelu ba numndo choo choo, le halikpeŋ mi nyumma kpiŋgbima bɛnduaŋ ma tol o lɛŋnde Ichipi leŋ niŋ, nduyɛ mi wana o wana sinaŋ maŋ.” 22 O lepilɛ niŋ kpe, mi Muuse heelu ba ndɔɔ choo choo, okoŋ mi nyumma kpiŋgbima bɛnduaŋ ma tual o lɛŋnde Ichipi leŋ niŋ kpou le palɛi i yaa.+ 23 Le palɛi i yaa, wana o wana ndoo chi chaŋ ndɔ le, nduyɛ wana o wana ndoo tiuba mbo faŋaŋ o fondaŋ o wa wo le. Kɛ nduyɛ, nyɛ teŋgaa wa o fondaŋnda Isɔluɛiya wa laŋ.+ 24 Okoŋ mi Feloo veelu Muuse, mbo dimul ndu aa: “La kɔ piɛi Chɛhowa.+ La kɔ a chuauwaa nyaa latulu. Kɛ saa a nauwaa nyaa nda, la cho lakɔ a nda le.” 25 Kɛ mi Muuse dimi aa: “Numpila cho naa chɔluaa ke ni* le miŋ kɔ soli nda salalaŋ a salala luamaa laŋ o Chɛhowa Mɛlɛka naa lo.+ 26 Ŋ cho lakɔ a chɔluaa naa kpou. Chɔloo* o pilɛ bɛɛ ŋ cho chɛlɔɔ mbo lo naŋ te, kanifuule ŋ cho wa apum soliŋndo kpeku le Chɛhowa Mɛlɛka naa piɛiyo. Nduyɛ mɛɛ miŋ fuuluu loŋ malaŋ naŋ sina chɔluaa naŋ cho salaa soli o Chɛhowa lo wa.” 27 Mi Chɛhowa chɛl mi Feloo tosa vɛlɛ bolle kalaleŋ, mbo kɛɛ le nda malɔɔ.+ 28 Mi Feloo dimul ndu aa: “Faŋaŋ ya o hɔl! I cha lɛ num naŋ te dɛ! Paale ŋ cho hunɔɔ ya isisi o hɔl teŋ, I cho num diyɔɔ.” 29 Okoŋ mi Muuse dimul Feloo aa: “A mɛɛ ŋ dimi yɛ, a chi lɛ ya mi huŋ sim num o hɔl te.”