Sɔɔŋ Chɔɔmaŋndoŋ
8 Mɛɛ o+ faŋa tamasi ŋɔmmɛu wo,+ mi nyɔɔ mei doŋ o choo choo niŋ le havɛiyo* tɛndaa tɛɛŋ. 2 Mi cha maalikɛiya a ŋɔmmɛu+ isisi Mɛlɛka lachi. Ma ke nda bululaŋ la ŋɔmmɛu.
3 Mi maalikɛinɔ cheleŋ huŋ, mbo sim bandu luamaa lasalaa ikɛi.+ Hɛŋgɛi ŋkoolii nda luam nyɛm chuŋ kɛndɔŋ ndo wa ndu o ba. Ma ke ndu nyɛm chuŋ kɛndɔŋ tau,+ le mbo lom muŋ o bandu luamaa lasala ŋkoolii+ wa o kpeŋgbei* lemasaa lachi wo choo, a boondii Mɛlɛka tuei piɛile wanaa diandaa ve. 4 Mi kumii nyɛm chuŋ kɛndɛŋ wa maalikɛinɔɔ hoo o ba woŋ hel latulu a piɛile+ wanaa diandaa Mɛlɛka o hɔl. 5 Kɛ o lepilɛ niŋ kpe, mi maalikɛinɔɔ chua hɛŋgɛi nyɛm chuŋ kɛndɔŋ, mbo kuandu yiŋndeŋ o bandu luamaa lasalaa choo, mbo pei leŋ leniŋ cha. Okoŋ, mbo hulu leŋ o lɛŋndeŋ choo. Mɛɛ o hulu, mi diomndaŋ la suaa, mi nyɔɔ kiolu ŋualalɛi, mi taŋndaŋ ma deŋi,+ nduyɛ mi lɛŋndeŋ le nyiiya. 6 Mi maalikɛiyaa ŋɔmmɛuwaa ndaa nɔ bulula ŋɔmmɛulaŋ nda+ bɛɛndiaŋ le laŋ hɔŋndo.
7 Mɛɛ o tasoo hɔŋ bulu ndɔɔ, mi yiŋndeŋ a looŋ kpuŋgbaŋ bɛndoŋ muuliaŋ a koowaŋ, miŋ huluŋ o lɛŋndeŋ choo.+ Lɛŋndeŋ piɔuwo sala yaa, mi kumbuei i pilɛ ŋua chilikɔ. Yɔmnde piɔuwo sala yaa, mi kumbuei i pilɛ ŋua chilikɔ. Nduyɛ, tɔlɔɔlaŋ kpou mi la ŋua chilikɔ.+
8 Mɛɛ maalikɛinɔ diiŋ ndɔɔ hɔŋ bulu ndɔɔ, mi cha nyɔɔ mɛɛ pembii bɛndu bɛnduei wa nuaa ŋɔɔ yɛ, mi i huluŋ o pee mɛŋma ihɛllo niŋ.+ Mɛŋndaŋ o pee mɛŋma ihɛllo piɔuwo sala yaa, mi kumbuei i pilɛ simnuŋ koowaŋ.+ 9 Nyaa yoomaa piɔuwo sala yaa o pee mɛŋma ihɛllo niŋ, mi kumbuei i pilɛ wu kpou.+ Nduyɛ dɛndɛla mamɛŋndaŋ piɔuwo sala yaa, mi kumbuei i pilɛ kɔɔlu.
10 Mɛɛ maalikɛinɔ yaa ndɔɔ hɔŋ bulu ndɔɔ, mi luei bɛndu bɛnduei fula choo choo faŋ a diondɔɔ maa lambui, mi i huŋ del o peelaŋ a o sooŋnda mamɛŋndaŋ niŋ. Peelaŋ a sooŋnda mamɛŋndaŋ piɔuwo sala yaa, kumbuei i pilɛ luei hei del niŋ ni.+ 11 Luei hei diola ndɔlaŋ aa Yɔm Lolɛiyo. Mɛŋndaŋ piɔuwo sala yaa, mi kumbuei i pilɛ simnuŋ i lolɛi. Mi mɛŋndaŋ maŋ ma dii wanaa bɔɔbɔɔ, kanifuule maa lol bɔɔ.+
12 Mɛɛ maalikɛinɔ hiɔɔloo hɔŋ bulu ndɔɔ, paaleŋ piɔuwo kumboŋ ŋgaa, paŋgei piɔuwo kumboŋ ŋgaa, a looŋ piɔuwo kundalaŋ la yaa, mi o kɛ kɛ kumbuei i pilɛ nyum pɔli.+ Teleŋ nyɛ teŋgaa wa ipala wo piɔuwo sala yaa, kumbuei i pilɛi kinɛi nyɛ teŋgaa ve le.+ Nduyɛ, teleŋ nyɛ teŋgaa wa ichɔllo piɔuwo sala yaa, kumbuei i pilɛi nyɛ teŋgaa ve le.
13 Mi cha kowɔɔ balɔɔ o choo choo niŋ, mbo wa yondaa kpeleŋ aa: “Kpundɔɔ, kpundɔɔ, kpundɔɔ+ wa niŋ bɔɔ le wanaa cho o lɛŋndeŋ choo wa, te maalikɛiyaa yaawaa lo le bulula ndalaŋ hɔŋndo wa hɔŋ pɛ laŋ!”+